គោលបំណងនៃជីវិតនេះគឺ « ប្រុងប្រៀបខ្លួនទៅជួបនឹងព្រះ » ។១ នៅក្នុងថ្ងៃចុងក្រោយនេះ ព្រះអម្ចាស់បានស្ដារសាសនាចក្រពិតរបស់ទ្រង់គឺសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ តាមរយៈព្យាការី យ៉ូសែប ស្ម៊ីធ ។ នៅក្នុងសាសនាចក្រនេះ យើងរៀនពីភាពពេញលេញនៃគោលលទ្ធិនៃដំណឹងល្អ ។ យើងក៏ទទួលសេចក្ដីសញ្ញា និងពិធីការទាំងឡាយដែលចាំបាច់សម្រាប់សេចក្ដីសង្គ្រោះ ដើម្បីយើងអាចរៀបចំរួចរាល់ក្នុងគ្រប់ចំនុចទាំងអស់ដើម្បីទៅជួបព្រះ ។
ដើម្បីត្រឡប់ទៅជួបព្រះវិញ យើងត្រូវតែរៀនអនុវត្តការបង្រៀននៃដំណឹងល្អនៅក្នុងជីវិតរបស់យើង និងស្រឡាញ់ ហើយបម្រើគ្នាទៅវិញទៅមក ។ សម្រាប់គោលបំណងនេះ ព្រះបានហៅយើងដែលជាមនុស្សរមែងស្លាប់ធម្មតា ដើម្បីធ្វើកិច្ចការពិសិដ្ឋនៃសាសនាចក្ររបស់ទ្រង់ ដើម្បីយើងអាចរៀនមកឯព្រះគ្រីស្ទ តាមរយៈការបម្រើរបស់យើង ។២
ពួកយើងម្នាក់ៗមានឱកាសបម្រើដល់មនុស្សតាមរយៈការហៅបម្រើទាំងឡាយ ហើយមានអារម្មណ៍ថា យើង « មិនមែនជាអ្នកដទៃ ឬជាអ្នកគ្រាន់តែសំណាក់នៅទៀតទេ គឺជាជាតិតែ១នឹងពួកបរិសុទ្ធ ជាពួកដំណាក់ព្រះវិញ » ។៣ ខ្ញុំចងចាំយ៉ាងច្បាស់ និងជ្រាលជ្រៅថា មិនយូរប៉ុន្មានបន្ទាប់ពីខ្ញុំទទួលបុណ្យជ្រមុជទឹក ប្រធានសាខារបស់ខ្ញុំបានចាត់ខ្ញុំឲ្យទទួលតួនាទីក្នុងថ្នាក់សាលាថ្ងៃអាទិត្យ ។ ខ្ញុំរីករាយនឹងទទួលការចាត់តាំងនេះ ។ តាមថ្នាក់នីមួយៗ ខ្ញុំកាន់បញ្ជីឈ្មោះដោយក្ដីរំភើប ហើយគូសឈ្មោះម្នាក់ៗ ។ កាលដែលពេលវេលាចេះតែកន្លងទៅ ខ្ញុំបានស្គាល់សមាជិកម្នាក់ៗក្នុងសាលាថ្ងៃអាទិត្យបន្តិចម្ដងៗ ។ មិនយូរប៉ុន្មានខ្ញុំបានស្គាល់សមាជិកទាំងអស់ ហើយមានការខ្វល់ខ្វាយចំពោះអ្នកដែលអវត្តមាន ។ ខ្ញុំមានអារម្មណ៍ថាមានឯកសិទ្ធិ ហើយរីករាយ ដែលខ្ញុំអាចធ្វើផ្នែករបស់ខ្ញុំសម្រាប់សាសនាចក្ររបស់ព្រះអម្ចាស់ ។ ខ្ញុំក៏មានអារម្មណ៍ដែរថា ព្រះអម្ចាស់បានបង្រៀនខ្ញុំ និងបានប្រទានពរដល់ខ្ញុំក្នុងការចាត់តាំងនេះ ។
ក្នុងរយៈពេលនៃការលូតលាស់របស់ខ្ញុំនៅក្នុងសាសនាចក្រ ខ្ញុំបានមានឱកាសទទួលការហៅបម្រើ និងការចាត់តាំងទាំងឡាយខុសៗគ្នា ។ ការហៅបម្រើទាំងនេះបានទុកនូវស្លាកស្នាមដ៏ប្រពៃមួយ ។ ពេលខ្លះ ពេលកំពុងធ្វើដំណើរឆ្លងកាត់ទីក្រុងមួយដែលខ្ញុំធ្លាប់រស់នៅ និងបម្រើ ខ្ញុំនឹកឃើញពីគ្រួសារមួយដែលខ្ញុំបានសួរសុខទុក្ខ និងស្ថានភាពនៃផ្ទះរបស់ពួកគេ ។ ពេលខ្លះ ពេលកំពុងជួបនឹងមិត្តចាស់ ខ្ញុំរំជួលចិត្តដូចអាលម៉ាជាកូននៅក្នុងព្រះគម្ពីរ ដែលបាន « អររីករាយជាខ្លាំង នៅពេលបានជួបបងប្អូនរបស់លោកទៀត រីឯអំណររបស់លោកកាន់តែកើនឡើងថែមទៀត ព្រោះពួកគេនៅជាបងប្អូនរបស់លោកក្នុងព្រះអម្ចាស់នៅឡើយ មែនហើយ ពួកគេបានមាំមួននៅក្នុងការស្គាល់ពីសេចក្ដីពិត ព្រោះពួកគេជាមនុស្សដែលមានយោបល់ដ៏ជ្រាលជ្រៅ ហើយគេបានព្យាយាមពិចារណាមើលបទគម្ពីរ ដើម្បីឲ្យគេអាចស្គាល់ព្រះបន្ទូលនៃព្រះ » ។៤
កាលដែលខ្ញុំមើលត្រឡប់ទៅការហៅបម្រើពីមុនៗ ខ្ញុំអាចយល់យ៉ាងច្បាស់ពីមូលហេតុដែលព្រះអម្ចាស់បានប្រទានការហៅបម្រើនោះដល់ខ្ញុំនៅពេលនោះ ។ ទោះជាយ៉ាងណា មានពេលខ្លះដែលខ្ញុំបានទទួលការហៅបម្រើមួយដែលពិបាកនឹងយល់ច្បាស់ពីព្រះរាជបំណងរបស់ព្រះអម្ចាស់ ។ ខ្ញុំគ្រាន់តែអាចមានអារម្មណ៍ភ័យខ្លាចជាខ្លាំង ដោយដឹងពីភាពមិនគ្រប់គ្រាន់របស់ខ្ញុំ និងភាពមិនសក្ដិសមរបស់ខ្ញុំក្នុងការបម្រើនៅក្នុងការហៅដែលព្រះអម្ចាស់បានប្រទានដល់ខ្ញុំនោះ ។
ខ្ញុំចាំថា ពេលខ្ញុំមានអារម្មណ៍បែបនោះ អ្នកដឹកនាំម្នាក់បានបង្រៀនខ្ញុំថា ខ្ញុំគួរតែទុកចិត្តទៅលើព្រះអម្ចាស់ ។ ពេលទ្រង់ប្រទានការហៅបម្រើ ទ្រង់យល់ពីការលំបាក ឧបសគ្គ ភាពមិនគ្រប់គ្រាន់ និងភាពទន់ខ្សោយទាំងអស់របស់យើង ។ យើងមិនអាចមើលឃើញជានិច្ចនោះទេ ពីអ្វីដែលទ្រង់មានព្រះទ័យចង់ឲ្យរៀន និងពរជ័យដ៏អស្ចារ្យដែលទ្រង់បានរៀបចំសម្រាប់យើង ។ « សេចក្តីដែលភ្នែកមិនដែលឃើញ ត្រចៀកមិនដែលឮ ហើយចិត្តនឹកមិនដែលដល់ គឺសេចក្តីនោះឯងដែលព្រះបានរៀបចំទុក សំរាប់ពួកអ្នកដែលស្រឡាញ់ទ្រង់ » ។៥
ប្រធាន ថូម៉ាស អេស ម៉នសុន បានបង្រៀនថា « ទ្រង់ធ្វើឲ្យមានគុណសម្បត្តិគ្រប់គ្រាន់ដល់អស់អ្នកដែលទ្រង់ហៅ » ។៦ ប្រធានស្តីទីនៃកូរ៉ុមនៃពួកសាវកដប់ពីរនាក់ ប្រធាន អិម រ័សុល បាឡឺដ បានមានប្រសាសន៍ថា « គ្មាននរណាម្នាក់ព្យាយាមស្វែងរកតួនាទីនៅក្នុងសាសនាចក្រនោះទេ ប៉ុន្តែពេលដែលការហៅមកដល់ យើងទទួលវា ព្រោះយើងស្រឡាញ់ព្រះអម្ចាស់ព្រះយេស៊ូវគ្រីស្ទ » ។៧ ពេលយើងស្រឡាញ់ព្រះអម្ចាស់ យើងនឹងទុកចិត្តលើទ្រង់ដោយរាបសារ ហើយនឹងមានការប្ដេជ្ញាចិត្តចំពោះការហៅបម្រើនោះ ។ ពេលព្រះអម្ចាស់ស្នើ ហើយយើងមានឆន្ទៈ នោះព្រះនឹងជួយយើងនៅក្នុងភាពមិនគ្រប់គ្រាន់ និងភាពទន់ខ្សោយរបស់យើង ដើម្បីយើងអាចទទួលយកកិច្ចការដ៏បរិសុទ្ធរបស់ទ្រង់បាន ។
ព្រះអម្ចាស់បានបំពេញនូវកិច្ចការដ៏អស្ចារ្យគឺដង្វាយធួន ។ ទ្រង់អញ្ជើញយើងឲ្យទទួលយកនូវកិច្ចការដ៏បរិសុទ្ធដើម្បីស្ថាបនាសាសនាចក្រ ដើម្បីជួយដល់មនុស្សទាំងអស់បង្កើនជំនឿរបស់យើងទៅលើព្រះវរបិតាសួគ៌ និងព្រះយេស៊ូវគ្រីស្ទ ដើម្បីទទួលសេចក្ដីសញ្ញា និងពិធីការទាំងឡាយនៃសេចក្ដីសង្គ្រោះ និងទទួលនូវពរជ័យនៃភាពអស់កល្បជានិច្ច ។ ខ្ញុំមានអំណរគុណដោយអស់ពីចិត្តរបស់ខ្ញុំ ដែលបានចូលរួមក្នុងកិច្ចការដ៏បរិសុទ្ធនេះ ហើយសូមទុកនូវទីបន្ទាល់ដ៏ប្រាកដរបស់ខ្ញុំអំពីភាពពិសិដ្ឋ និងភាពពិតនៃកិច្ចការដ៏អស្ចារ្យនេះ ។ នៅក្នុងព្រះនាមនៃព្រះយស៊ូវគ្រីស្ទ អាមែន ។ ■
ចំណងជើង ៖ អែលឌើរ មីង-ហ្សុន ( វិនសិនថ៍ ) គួន
______________________________________
កំណត់ចំណាំ ៖
[1] អាលម៉ា ៣៤:៣២
២ អេភេសូរ ៤:១១-១៣
៣ អេភេសូរ ២:១៩
៤ អាលម៉ា ១៧:២
៥ កូរិនថូសទី១ ២:៩
៦ Thomas S. Monson “Whom the Lord Calls, He Qualifies”, Ensign, July 2013
៧ Building up the Church and Regulating All the Affairs of the Same