សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយផ្ដោតទៅលើការទទួលខុសត្រូវដែលបានចាត់តាំងដ៏ទេវភាពដើម្បីជួយសមាជិក នៅពេលពួកគេរីកចម្រើននៅលើផ្លូវនៃសេចក្ដីសញ្ញាឆ្ពោះទៅកាន់ជីវិតអស់កល្បជានិច្ច ។ ដើម្បីជួយសម្រេចបាននូវគោលដៅដ៏ទេវភាពនេះ នោះសាសនាចក្រ និងថ្នាក់ដឹកនាំផ្ដល់សិទ្ធិអំណាចបព្វជិតភាព កូនសោ សេចក្ដីសញ្ញា និងពិធីបរិសុទ្ធ និងការដឹកនាំពីព្យាការី ។ សាសនាចក្រអញ្ជើញមនុស្សទាំងអស់ឲ្យមករកព្រះយេស៊ូវគ្រីស្ទ និងគោរពតាមបទបញ្ញត្តិរបស់ទ្រង់ដោយស្មោះត្រង់ ។
គ្រាដែលមានឧបសគ្គ
បទគម្ពីរប្រាប់ច្បាស់ថា នៅក្នុងគ្រាកាន់កាប់ត្រួតត្រានេះ យើងនឹងជួបគ្រាដ៏មានឧសគ្គ ។ នៅកណ្ដាលស្ថានភាពដ៏លំបាក នោះសាសនាចក្រនឹងប្រកាសអំពីគោលការណ៍គ្រឹះ និងធ្វើពិធីបរិសុទ្ធចាំបាច់ដើម្បីប្រទានពរដល់កូនចៅរបស់ព្រះវរបិតាសួគ៌ ។ មិនថាពេលណា ឬស្ថានភាពណាទេ រឿងជាក់លាក់មានសារសំខាន់នៅក្នុងសាសនាចក្ររបស់ព្រះអម្ចាស់ ។ រឿងទាំងនេះរួមមានគោលលទ្ធិ និងពិធីបរិសុទ្ធពិសិដ្ឋនានា ។
ការទទួលខុសត្រូវរបស់ពលរដ្ឋនៅទូទាំងសាកលលោក
សមាជិកទាំងឡាយនៃសាសនាចក្រ មានអំណរគុណចំពោះច្បាប់របស់ជាតិសាសន៍ជាច្រើននៅជុំវិញពិភពលោក ដែលការពារដល់សេរីភាពខាងសាសនា និងគោរពដល់សេរីភាពខាងមនសិការដ៏ពិសិដ្ឋ ។
សាសនាចក្របង្រៀនថា សមាជិកគួរតែគាំទ្រ និងគោរពច្បាប់នៅកន្លែងដែលពួកគេរស់នៅ ។ រដ្ឋាភិបាលទាំងនេះអនុមតិច្បាប់តាមការវិនិច្ឆ័យផ្ទាល់ខ្លួនពួកគេ គឺត្រូវបានគណនាល្អបំផុតដើម្បីសុវត្ថិភាពរបស់សាធារណជន ។ យើងទទួលស្គាល់ថា នៅក្នុងស្ថានភាពពិសេសនេះ សិទ្ធិបុគ្គលម្នាក់ៗអាចមានកម្រិតសមហេតុផល ក្នុងគ្រាមួយដើម្បីការពារដល់សុវត្ថិភាពរបស់សាធារណជនទូទៅ ។
នៅក្នុងគ្រាដែលមានការរាតត្បាត ឬគ្រោះធម្មជាតិ នោះសាសនាចក្រនឹងឆ្លើយតបចំពោះបទបញ្ជាជាផ្លូវការដើម្បីធ្វើសកម្មភាពចាំបាច់ ដូចជាការលុបចោលការប្រជុំ ឬការផ្អាកការប្រជុំ ឬការជួបជុំដទៃទៀត ។ សាសនាចក្រ និងសមាជិក តាំងចិត្តដើម្បីធ្វើជាពលរដ្ឋល្អ និងសមាជិកល្អ ។ សាសនាចក្រមានប្រវត្តិយូរអង្វែងក្នុងការឈោងទៅជួយ និងផ្ដល់ជំនួយដល់អស់អ្នកដែលខ្វះខាត ។
ព្រមជាមួយនឹងការតាំងចិត្តរបស់យើងដើម្បីធ្វើជាពលរដ្ឋល្អជាសាកល នោះយើងអះអាងដោយការគោរពថា ការស្នាក់នៅសមហេតុផលត្រូវផ្ដល់ទៅដល់មនុស្សគ្រប់ជំនឿ នៅពេលពួកគេព្យាយាមដើម្បីចូលរួមនៅក្នុងពិធីដែលជាមូលដ្ឋានគ្រឹះចំពោះសេចក្ដីជំនឿរបស់ពួកគេ ។
ព្រះអម្ចាស់បានរៀបចំសាសនាចក្ររបស់ទ្រង់
ការដឹកនាំដ៏បំផុសគំនិតជាច្រើនឆ្នាំកន្លងមក បានរៀបចំសាសនាចក្រ និងសមាជិករបស់ព្រះអម្ចាស់ ទាំងខាងសាច់ឈាម និងខាងវិញ្ញាណ សម្រាប់គ្រាដែលមានការផ្លាស់ប្ដូរ និងគ្រាមានឧបសគ្គ ។
បន្ថែមទៅលើការប្រឹក្សារយៈពេលវែងសម្រាប់សមាជិកដើម្បីមានការស្ដុកអាហារនៅក្នុងផ្ទះរបស់ពួកគេ នោះសមាជិកសាសនាចក្រត្រូវផ្ដោតទៅលើការគោរពតាមថ្ងៃឈប់សម្រាក ការងារបម្រើដល់អ្នកដទៃ និងការពង្រឹងដល់កូរ៉ុមបព្វជិតភាពមិលគីស្សាដែក និងសមាគមសង្រ្គោះ ។ តាមរយៈពួកព្យាការីរបស់ទ្រង់ ព្រះអម្ចាស់បានបង្កើនការផ្ដោតទៅលើការរៀនសូត្រ និងការរស់នៅតាមដំណឹងល្អនៅក្នុងផ្ទះដែលមានការគាំទ្រពីសាសនាចក្រ ។ សមាជិកបានលើកទឹកចិត្តឲ្យធ្វើឲ្យផ្ទះរបស់ពួកគេក្លាយជាទីបរិសុទ្ធនៃសេចក្ដីជំនឿ ដែលកុមារ និងយុវវ័យត្រូវបានបង្រៀនដំណឹងល្អ ។ កម្មវិធី ចូរមកតាមខ្ញុំ ផ្ដល់ជាគំរូមួយដែលសមាជិកគ្រប់ទីកន្លែងរៀនដំណឹងល្អនៅក្នុងផ្ទះរបស់ពួកគេ និងនៅសាសនាចក្រ ។ កម្មវិធីកុមារ និងយុវវ័យ គឺអនុញ្ញាតឲ្យឪពុកម្ដាយបីបាច់កូនចៅពួកគេខាងវិញ្ញាណ ខាងបញ្ញា ខាងសាច់ឈាម និងខាងសង្គមនៅក្នុងផ្ទះរបស់ពួកគេផងដែរ ។
សមាជិកត្រូវបានលើកទឹកចិត្តឲ្យប្រើបច្ចេកវិទ្យាដើម្បីចែកចាយសារលិខិតដំណឹងល្អតាមរបៀបធម្មតា និងសាមញ្ញ ។ អ្នកផ្សព្វផ្សាយសាសនាបានផ្ដល់ឧបករណ៍ដែលអនុញ្ញាតឲ្យពួកគេស្វែងរក និងបង្រៀន ខណៈដែលការជួបផ្ទាល់ពុំអាចធ្វើទៅបាន ។ សមាជិកអាចចូលរួមនៅក្នុងកិច្ចការពង្សប្រវត្តិពីផ្ទះរបស់ពួកគេ ។
នៅពេលយើងមើលទៅលំនាំចាក់ស្រេះគ្នានៃកិច្ចខិតខំទាំងនេះ និងជាច្រើនដទៃទៀត នោះយើងអាចមើលឃើញពីរបៀបដែលព្រះអម្ចាស់រៀបចំយើងតាមលំដាប់ដោយប្រុងប្រយ័ត្នដើម្បីរៀបចំសម្រាប់គ្រាដែលមានឧបសគ្គ ។
គោលការណ៍គ្រឹះ និងពិធីបរិសុទ្ធនានា
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាសាសនាចក្រនៃរបៀបរៀបរយ ។ ពិធីបរិសុទ្ធ និងការប្រសិទ្ធពរទាំងឡាយ គឺជាកិច្ចការពិសិដ្ឋដែលបានផ្ដល់ឲ្យដោយអ្នកមានសិទ្ធិអំណាចនៃបព្វជិតភាព ។ ខណៈដែលទម្រង់ការមួយចំនួនអាចនឹងផ្លាស់ប្ដូរអាស្រ័យទៅលើស្ថានភាព នោះគោលលទ្ធិគ្រឹះ គោលការណ៍ និងពិធីបរិសុទ្ធនានា ត្រូវតែត្រូវបានការពារ ។
ពិធីបរិសុទ្ធជាច្រើនតម្រូវឲ្យមានការដាក់ដៃលើ ដូចជាពិធីបញ្ជាក់ ការតែងតាំង ការប្រសិទ្ធពរ ការញែកចេញ និងការប្រគល់កូនសោបព្វជិតភាព ។ ពិធីបរិសុទ្ធដូច្នេះ តម្រូវឲ្យអ្នកកាន់បព្វជិតភាពដែលធ្វើពិធីបរិសុទ្ធ ស្ថិតនៅក្នុងទីតាំងដូចគ្នានឹងអ្នកទទួល ។ ពិធីបរិសុទ្ធបព្វជិតភាពមិនអាចធ្វើពីចម្ងាយតាមបច្ចេកវិទ្យានោះទេ ។ នៅពេលស្ថានភាពតម្រូវ នោះអ្នកដទៃទៀតអាចមើលពិធីបរិសុទ្ធពីចម្ងាយតាមបច្ចេកវិទ្យា បើអនុញ្ញាតដោយអ្នកមានសិទ្ធិអំណាចជាអធិបតី ។
នៅក្នុងគ្រាដ៏មានឧបសគ្គទាំងនេះ អ្នកមានសិទ្ធិអំណាចជាអធិបតីត្រូវប្រើប្រាជ្ញាបើពិធីបរិសុទ្ធទាំងឡាយគួរតែពន្យាពេលជាបណ្ដោះអាសន្ន ។ កាលដែលជំងឺដែលទាក់ទងនឹងការទំនាក់ទំនងគឺជាកង្វល់ នោះអស់អ្នកដែលធ្វើពិធីបរិសុទ្ធ គួរតែធ្វើការប្រុងប្រយ័ត្នចាំបាច់ដើម្បីការពារខ្លួនពួកគេ និងអ្នកដទៃ ។
ឯកសារភ្ជាប់គឺជាការដឹកនាំសម្រាប់ពិធីបរិសុទ្ធ ការប្រសិទ្ធពរ និងដំណើរការសំខាន់ៗដទៃទៀតរបស់សាសនាចក្រ ។
ឯកសារទាំងនេះត្រូវបានចេញមកដើម្បីឆ្លើយតបចំពោះការរំខានដល់ដំណើរការសាសនាចក្រ និងសកម្មភាពរបស់សមាជិកដែលបណ្ដាលមកពីការរាតត្បាតកូវីត ១៩ នៅទូទាំងពិភពលោក ។ ពួកគេគួរតែប្រើប្រាស់តាមការណែនាំ តាមរយៈពេលដែលការរាតត្បាតនេះ និងការដាក់កំហិតជាផ្លូវការដែលទាក់ទងនឹងរឿងនេះទៅលើការប្រជុំសាសនាចក្រ និងការបង្ហាញជាសាធារណដែលមាននៅក្នុងប្រទេស ឬភូមិសាស្ត្រជាក់លាក់ក្នុងប្រទេសមួយ ។ ការដឹកនាំដទៃទៀតអាចនឹងចេញមកនៅពេលក្រោយ ។
សេចក្ដីបញ្ចប់
ដូចព្យាការីនីហ្វៃថ្លែងថា « ព្រះអម្ចាស់ទ្រង់មិនចេញបញ្ជាដល់កូនចៅមនុស្សណាឡើយ លើកលែងតែទ្រង់នឹងរៀបចំផ្លូវ ដើម្បីឲ្យគេអាចសម្រេចនូវអ្វីៗដែលទ្រង់បានបញ្ជាដល់ពួកគេទុកជាមុនសិន » (នីហ្វៃទី១ ៣:៧) ។ ព្រះអម្ចាស់នឹងជួយយើង ។ អំណាចនៃបព្វជិតភាព និងភាពសុចរិតនៃសមាជិកនឹងជួយយើងឆ្ពោះទៅមុខនៅក្នុងពេលខាងមុខ ។