នៅក្នុងគ្រាពិសេសនេះ ពិធីបរិសុទ្ធនានាអាចត្រូវបានធ្វើឡើង ខណៈដែលអនុវត្តនូវការប្រុងប្រយ័ត្នចាំបាច់នានា ។ ឧទាហរណ៍ កាលដែលជំងឺទាក់ទងទៅនឹងការទំនាក់ទំនងកំពុងតែជាកង្វល់ នោះអ្នកទាំងឡាយដែលធ្វើពិធីបរិសុទ្ធគួរតែលាងដៃរបស់ពួកគេឲ្យហ្មត់ចត់ ហើយក៏ប្រើស្រោមដៃ និងម៉ាស់ផងដែរ ។
ពិធីបុណ្យជ្រមុជទឹក និងពិធីបញ្ជាក់
ពិធីបុណ្យជ្រមុជទឹក និងពិធីបញ្ជាក់ តម្រូវឲ្យមានការអនុមតិមកពីថ្នាក់ដឹកនាំបព្វជិតភាពដែលមានកូនសោត្រឹមត្រូវ ។ នៅពេលចាំបាច់ កម្មវិធីពិធីបុណ្យជ្រមុជទឹកអាចធ្វើឡើងដោយមានមនុស្សតិចត្រឹមបួននាក់ ៖ បេក្ខជនទទួលបុណ្យជ្រមុជទឹក សង្ឃ ឬអ្នកកាន់បព្វជិតភាពមិលគីស្សាដែកម្នាក់ធ្វើពិធីបុណ្យជ្រមុជទឹក និងសាក្សីពីរនាក់ ។ ពិធីបុណ្យជ្រមុជទឹក ត្រូវធ្វើឡើងដោយមានការអនុញ្ញាតពីប៊ីស្សព ឬប្រធានបេសកកម្មដែលកាន់កូនសោបព្វជិតភាពចាំបាច់ ។ ប៊ីស្សព ឬប្រធានបេសកកម្ម ឬនរណាម្នាក់ដែលពួកគេចាត់តាំង ( អាចជាសាក្សីម្នាក់ ) ត្រូវមើល និងកត់ត្រាពិធីបុណ្យជ្រមុជទឹក និងពិធីបញ្ជាក់ ។ បើចាំបាច់ បុគ្គលដែលផ្ដល់ការអនុមតិអាចធ្វើពីចម្ងាយដោយប្រើបច្ចេកវិទ្យាផងដែរ ។ ថ្នាក់ដឹកនាំ គ្រួសារ និងមិត្តភក្ដិទាំងឡាយអាចចូលរួមពីចម្ងាយដោយប្រើបច្ចេកវិទ្យា ។ នៅពេលការប្រជុំសាក្រាម៉ង់ ត្រូវបានផ្អាកជាបណ្ដោះអាសន្ន នោះអ្នកផ្លាស់ប្រែចិត្តជឿអាចត្រូវបានផ្ដល់ពិធីបញ្ជាក់ភ្លាមៗបន្ទាប់ពីពិធីបុណ្យជ្រមុជទឹក ។
ការតែងតាំងបព្វជិតភាព និងការញែកចេញ
ការតែងតាំងបព្វជិតភាព និងការញែកចេញ តម្រូវឲ្យមានការអនុមតិជាមុនពីអ្នកដែលកាន់កូនសោ បព្វជិតភាពត្រឹមត្រូវ ។ ពួកគេក៏តម្រូវឲ្យមានការដាក់ដៃលើក្បាលដោយផ្ទាល់ពីអ្នកកាន់បព្វជិតភាពដែលមានការអនុញ្ញាតផងដែរ ។ ពិធីបរិសុទ្ធត្រូវតែមើល និងកត់ត្រាដោយបុគ្គលដែលកាន់កូនសោបព្វជិតភាព ឬនរណាម្នាក់ដែលគាត់បានចាត់តាំង ។ បើចាំបាច់ បុគ្គលម្នាក់នេះអាចមើលពិធីបរិសុទ្ធពីចម្ងាយដោយការប្រើបច្ចេកវិទ្យា ។ ថ្នាក់ដឹកនាំ គ្រួសារ និងមិត្តភក្ដិទាំងឡាយអាចមើលពីចម្ងាយដោយប្រើបច្ចេកវិទ្យា ។
ពិធីបរិសុទ្ធ ការហៅបម្រើ និងការញែកចេញអាចធ្វើឡើងដោយគ្មានការគាំទ្រជាមុននៅក្នុងវួដ និងស្ដេក បើបានអនុមតិជាមុនដោយបុគ្គលម្នាក់ដែលកាន់កូនសោបព្វជិតភាពត្រឹមត្រូវ ។ ការធ្វើដូចនេះអនុញ្ញាតឲ្យកិច្ចការរបស់ព្រះអម្ចាស់ឆ្ពោះទៅមុខ ហើយនឹងធ្វើកិច្ចការនោះនៅពេលក្រោយ នៅពេលយើងមានការជួបជុំឡើងវិញ ។
ការមើលថែអ្នកឈឺ
ពរជ័យបព្វជិតភាពតម្រូវឲ្យមានការដាក់ដៃលើក្បាលដោយផ្ទាល់ ។ ជាធម្មតា អ្នកកាន់បព្វជិតភាពមិលគីស្សាដែកពីរនាក់ ឬច្រើននាក់ត្រូវធ្វើ ប៉ុន្តែមនុស្សម្នាក់អាចធ្វើបាន ។ បន្ទាប់ពីការធ្វើការប្រុងប្រយ័ត្នចាំបាច់នានា កាលដែលការដាក់ដៃលើក្បាលជាការហាមប្រាម នោះការអធិស្ឋានអាចត្រូវធ្វើឡើង រួមទាំងការប្រើបច្ចេកវិទ្យា ។ នេះគឺជាការអធិស្ឋានដោយសេចក្ដីជំនឿ ហើយពុំមែនជាការប្រសិទ្ធពរបព្វជិតភាព ។ នរណាក៏អាចធ្វើការអធិស្ឋាន តមអាហារ ឬផ្តល់ការងារបម្រើតាមរបៀបផ្សេងៗទៅកាន់អ្នកដទៃ ។
ការធ្វើពិធីសាក្រាម៉ង់
សមាជិកគួរតែទទួលអត្ថប្រយោជន៍ពីពរជ័យនៃការចូលរួមការប្រជុំសាក្រាម៉ង់ និងការទទួលទានសាក្រាម៉ង់ប្រចាំសប្ដាហ៍ នៅពេលដែលអាចធ្វើទៅបាន ។ ក្នុងករណីពិសេស នៅពេលការប្រជុំសាក្រាម៉ង់ក្នុងវួដពុំត្រូវបានធ្វើឡើងក្នុងរយៈពេលវែង នោះប៊ីស្សពអាចអនុមតិថ្នាក់ដឹកនាំបព្វជិតភាព ដែលមានសក្ដិសមនៅក្នុងវួដរបស់គាត់ឲ្យរៀបចំ និងបម្រើសាក្រាម៉ង់នៅក្នុងផ្ទះរបស់ ពួកគេ ឬនៅក្នុងផ្ទះរបស់សមាជិកវួដដទៃទៀត ដែលពុំមានសង្ឃ ឬអ្នកកាន់បព្វជិតភាពមិកគីស្សាដែកសក្ដិសមនៅក្នុងផ្ទះ ។ ( សូមមើល ក្បួនខ្នាតទូទៅ, ១៨.៩.១) ។ នៅពេលចាំបាច់ ពិធីសាក្រាម៉ង់អាចធ្វើឡើងដោយសង្ឃ និងអ្នកកាន់បព្វជិតភាពមិលគីស្សាដែកតែម្នាក់ ។
សមាជិកអាចមាននំប៉័ង និងទឹកផ្ទាល់ខ្លួនរបស់ពួកគេ ។ ទោះជាយ៉ាងណាក៏ដោយ ការរៀបចំសាក្រាម៉ង់ គួរតែធ្វើឡើងដោយអ្នកកាន់បព្វជិតភាពដែលមានការអនុញ្ញាត ។ អ្នកកាន់បព្វជិតភាពបម្រើពិធីសាក្រាម៉ង់ត្រូវតែស្ថិតនៅក្នុងទីតាំងតែមួយនឹងអ្នកដែលទទួលសាក្រាម៉ង់ នៅពេលពួកគេកាច់នំប៉័ង ប្រសិទ្ធពរ និងចែកសាក្រាម៉ង់ ។ ក្នុងស្ថានភាពខុសប្រក្រតី កាលដែលពិធីសាក្រាម៉ង់ពុំមានទេ នោះសមាជិកអាចសិក្សាការអធិស្ឋានសាក្រាម៉ង់ និងតាំងចិត្តជាថ្មីដើម្បីរស់នៅតាមសេចក្ដីសញ្ញានានាដែលគាត់បានធ្វើ ហើយអធិស្ឋានសម្រាប់ថ្ងៃដែលពួកគេនឹងទទួលសាក្រាម៉ង់ដោយផ្ទាល់ ដែលធ្វើឡើងដោយអ្នកកាន់បព្វជិតភាពត្រឹមត្រូវ ។
បុគ្គលម្នាក់ៗ និងក្រុមគ្រួសារ ត្រូវបានប្រទានពរនៅពេលពួកគេអាចធ្វើពិធីថ្វាយបង្គំនៅថ្ងៃឈប់ សម្រាកនៅផ្ទះ ជាឯកជន ទាំងដោយផ្ទាល់ និងពីចម្ងាយ ។ ការថ្វាយបង្គំដូច្នេះអាចរួមមានការអធិស្ឋាន ទំនុកតម្កើង និងការសិក្សាដំណឹងល្អ ។ នៅពេលអនុញ្ញាត នោះអ្នកកាន់បព្វជិតភាព (ទាំងឡាយ) មានវត្តមាន នោះពិធីសាក្រាម៉ង់អាចត្រូវបានប្រសិទ្ធពរ និងចែក ។
ដំណើរការក្នុងសាសនាចក្រដទៃទៀត
ការប្រជុំទាំងឡាយ ។ ក្នុងស្ថានភាពធ្ងន់ធ្ងរ ថ្នាក់ដឹកនាំអាចនឹងផ្អាកការប្រជុំ និងសកម្មភាពនានាជាបណ្ដោះអាសន្ន ។ នៅពេលស្ថានភាពតម្រូវ ការប្រជុំគណៈប៊ីស្សព ការសម្ភាស និងការប្រជុំក្រុមប្រឹក្សាវួដ អាចធ្វើឡើងដោយការប្រើបច្ចេកវិទ្យាពីចម្ងាយ ដូចជាហៅជាទូរសព្ទដៃ ឬហៅទូរសព្ទជាវីដេអូ ។ ប៊ីស្សព និងថ្នាក់ដឹកនាំវួដ អាចប្រើបច្ចេកវិទ្យាដើម្បីផ្ញើរសារដើម្បីបំពេញបន្ថែមនូវការថ្វាយបង្គំក្នុងផ្ទះរបស់សមាជិក ។
ការងារបម្រើ ។ បងប្អូនប្រុសស្រីដែលផ្ដល់ការងារបម្រើ នឹងរកឃើញថា មានវិធីផ្សេងៗដើម្បីផ្ដល់ការគាំទ្រចាំបាច់ទៅដល់បុគ្គលម្នាក់ៗ និងក្រុមគ្រួសារដែលពួកគេបានចាត់ឲ្យទៅ ។ ទោះជាការផ្ដល់ ការងារបម្រើធ្វើឡើងដោយផ្ទាល់ ឬតាមបច្ចេកវិទ្យាពីចម្ងាយក្ដី វាអាស្រ័យទៅលើស្ថានភាពក្នុងមូលដ្ឋាន និងតម្រូវការ បំណងប្រាថ្នា និងសុខភាពរបស់អ្នកដែលចូលរួម ។ ការសម្ភាសអំពីការងារបម្រើអាចធ្វើឡើងដោយការប្រើបច្ចេកវិទ្យាពីចម្ងាយតាមចាំបាច់ ។ នៅក្នុងករណីធ្ងន់ធ្ងរ ការផ្ដល់ ការងារបម្រើដោយផ្ទាល់អាចនឹងត្រូវកំណត់ដើម្បីបង្ហាញពីតម្រូវការខ្លាំង និងបន្ទាន់ទាំងខាងសាច់ ឈាម ខាងគំនិតប្រាជ្ញា និងខាងសតិអារម្មណ៍ ។ បងប្អូនប្រុសស្រីដែលផ្ដល់ការងារបម្រើ គួរតែបង្ហាញពីសេចក្ដីស្រឡាញ់ និងការគាំទ្រតាមរបៀបត្រឹមត្រូវ ។