អំឡុងពេលមានសេចក្តីត្រូវការជាសាកលខ្លាំង សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នារដូវបុណ្យគ្រីស្ទម៉ាស់នេះ លើកទឹកចិត្តមនុស្សនាំពន្លឺមកកាន់ពិភពលោកតាមរយៈការបម្រើដ៏សាមញ្ញ និងមានអត្ថន័យ ។
អែលឌើរ ម៉ាកឺស ប៊ី ណាស ជាពួកចិតសិបនាក់ដែលមានសិទ្ធិអំណាចទូទៅបានមានប្រសាសន៍ថា « អំឡុងពេលដ៏ពិសេស និងមានបញ្ហាទាំងនេះ យើងមានឱកាសធ្វើឱ្យមានការផ្លាស់ប្តូរតាមរបៀបតូចតាច និងសាមញ្ញ » ។ « យើងអាចជាពន្លឺដែលអាចបំភ្លឺពិភពលោក ។ យើងសូមអញ្ជើញអ្នកទាំងអស់គ្នា ឲ្យចូលរួមជាមួយយើងក្នុងរដូវបុណ្យគ្រីស្ទម៉ាស់នេះ បំភ្លឺពិភពលោកម្ដងមួយៗ ម្នាក់ម្តងៗដូចដែលព្រះអង្គសង្គ្រោះបានធ្វើដែរ ។ យើងអាចបញ្ចប់ឆ្នាំ២០២០ ដោយវិជ្ជមានទាំងអស់គ្នា ។
ព្រះយេស៊ូវគ្រីស្ទដែលគេប្រារព្ធពិធីប្រសូត្រនៅរដូវកាលពិសេសនេះ « បានយាងចុះឡើងធ្វើការល្អ » ( កិច្ចការ ១០:៣៨ ) ។ ដោយដើរតាមគន្លងរបស់ទ្រង់ នោះពួកបរិសុទ្ធថ្ងៃចុងក្រោយ ជឿថា ការណ៍ល្អជាច្រើននៅក្នុងពិភពលោកនេះអាចត្រូវបានធ្វើសម្រេចតាមរយៈដួងចិត្ត និងដៃរបស់បុរស និងស្ត្រីល្អៗ ។
ចាប់ផ្តើមពីថ្ងៃទី១ ខែធ្នូតទៅ សាសនាចក្រនៅតំបន់អាស៊ីនឹងផ្តល់គំនិតនៃការបម្រើ #បំភ្លឺពិភពលោកនៅលើអ៊ិនធឺណិត ។ ការផ្តល់យោបល់ទាំងនេះនឹងរួមបញ្ចូល ៖
- ឱកាសធ្វើជាអ្នកស្ម័គ្រចិត្តនៅក្នុងប្រទេសរបស់អ្នក
- លទ្ធភាពដើម្បីបរិច្ចាគដោយផ្ទាល់ទៅកាន់អង្គការសប្បុរសធម៌ពួកបរិសុទ្ធថ្ងៃចុងក្រោយ ឬអង្គការសប្បុរសធម៌ក្នុងមូលដ្ឋានតាមជម្រើសរបស់បងប្អូន ។
- ប្រតិទិនប្រចាំថ្ងៃមានវិធីងាយៗចំនួន ២៥ របៀបដើម្បីបម្រើអ្នកដទៃ
នៅក្នុងការផ្សព្វផ្សាយតាមបណ្តាញសង្គមអំពីការផ្តល់ការបម្រើបែបនេះ សាសនាចក្រលើកទឹកចិត្តឱ្យប្រើសញ្ញា #បំភ្លឺពិភពលោក ។
អែលឌើរ ណាស បានមានប្រសាសន៍ថា ៖ « គំនិតផ្តួចផ្តើម #បំភ្លឺពិភពលោក... ផ្តល់នូវឱកាសជាច្រើនទៀត ដើម្បីផ្តល់ និងចែកចាយក្តីសង្ឃឹមដ៏គ្មានព្រំដែន ភាពសុខសាន្ត និងសេចក្តីស្រឡាញ់របស់ព្រះអង្គសង្គ្រោះ ព្រះយេស៊ូវគ្រីស្ទរបស់យើង » ។ « យើងលើកទឹកចិត្តប្រជាជនឲ្យគិតឲ្យបានហ្មត់ចត់នៅពេលពួកគេសម្រេចចិត្តពីវិធីល្អបំផុត ដើម្បីផ្តល់ឲ្យនារដូវកាលឈប់សម្រាកនេះ » ។
អស់អ្នកដែលបានទទួលព្រះពរពីព្រះ មានឱកាសដើម្បីចែករំលែកការដឹងគុណចំពោះអំណោយទានរបស់ព្រះដោយការជួយដល់អ្នកដែលខ្វះខាត ។
បុណ្យគ្រីស្ទម៉ាស់នេះ ជាបុគ្គល និងក្រុមគ្រួសារ អាចរីករាយម្តងទៀតនឹងការនិទានរឿងអំពីការប្រសូតមករបស់ព្រះយេស៊ូវ ដូចបានបង្ហាញក្នុងវីដេអូរយៈពេល ១៨នាទី ដែលមានចំណងជើងថា « ព្រះទារកគ្រីស្ទ » ។