គណៈប្រធានទីមួយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានហៅប្រធានបេសកកម្មថ្មីចំនួន ១០៥ រូប និងភរិយារបស់ពួកគាត់ ដើម្បីចាប់ផ្តើមបម្រើនៅខែកក្កដានេះ ក្នុងនោះមានប្រាំបីរូបត្រូវបានហៅឲ្យបម្រើក្នុងតំបន់អាស៊ី ។
ក្នុងចំណោមគូស្វាមីភរិយាទាំងប្រាំបីគូនេះ មានបួនគូមកពីសហរដ្ឋអាមេរិក ខណៈដែលបួនគូទៀតគឺជាថ្នាក់ដឹកនាំសាសនាចក្រក្នុងប្រទេសរបស់ពួកគាត់ផ្ទាល់ ។ ប្រធានទាំងឡាយដែលបានហៅឲ្យបម្រើនៅក្នុងប្រទេសកំណើតរបស់ពួកគាត់ផ្ទាល់នោះគឺ ៖ ក្រុមចិតសិបនាក់មកពីប្រទេសឥណ្ឌា អែលឌើរ រ៉ូប៊ឺត ខេ. វិលលាម, ប្រធានស្តេកទឹកដីហុងកុង ចិន ប្រធាន ហ៊ុក អុន ចាន់, ប្រធានមណ្ឌលខាងកើតភ្នំពេញកម្ពុជា នាង វាសនា, និងអតីតប្រធានស្តេក កៅសៀង តៃវ៉ាន់ខាងលិច ស្ទីវ ឈី នីង យ៉ាង ។
អែលឌើរ ដេវីឌ ភី ហូមើរ នៃគណៈប្រធានតំបន់អាស៊ីបានមានប្រសាសន៍ថា « យើងមានសេចក្តីរំភើបណាស់ដែលមានក្រុមថ្នាក់ដឹកនាំបេសកកម្មថ្មីពោរពេញដោយទេពកោសល្យបានហៅឲ្យបម្រើនៅតំបន់អាស៊ី ហើយមានអំណរដែលពួកគាត់ជាច្រើននាក់អាចមប្រើនៅក្នុងប្រទេសកំណើតរបស់ខ្លួន ។ នេះគឺជាព្រឹត្តិការណ៍ដ៏គួរឲ្យចងចាំមួយអំពីការរីកចម្រើនរបស់សាសនាចក្រនៅក្នុងតំបន់អាស៊ី » ។
ប្រធានបេសកកម្ម និងភរិយារបស់ពួកគាត់បម្រើរយៈពេលបីឆ្នាំ ដោយគ្មានទទួលបានប្រាក់កម្រៃអ្វីទាំងអស់ ។ ពួកគាត់គ្រប់គ្រង និងបំពាក់បំប៉នអ្នកផ្សព្វផ្សាយសាសនាវ័យក្មេង ហើយនឹងធ្វើការជាមួយមនុស្សរាប់រយនាក់អំឡុងពេលបម្រើបីឆ្នាំនោះ ។ គូស្វាមីភរិយាដែលមានភារកិច្ចគ្រប់គ្រងនេះ មើលខុសត្រូវលើផ្នែកសុខុមាលភាពរាងកាយ ខាងសតិអារម្មណ៍ និងខាងព្រលឹងវិញ្ញាណរបស់អ្នកផ្សាយសាសនាទាំងឡាយ ហើយក៏បង្រៀនពួកគេនូវរបៀបដើម្បីបង្រៀនដំណឹងល្អរបស់ព្រះយេស៊ូវគ្រីស្ទប្រកបដោយប្រសិទ្ធភាពផងដែរ ។
ដើម្បីរៀនបន្ថែមទៀតអំពីកម្មវិធីផ្សព្វផ្សាយសាសនារបស់សាសនាចក្រ សូមចុចនៅត្រង់នេះ