គណៈប្រធានទីមួយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានប្រកាសថាពិធីបើកសម្ពោធការដ្ឋានសាងសង់ព្រះវិហារបរិសុទ្ធភ្នំពេញកម្ពុជា នឹងប្រព្រឹត្តឡើងនៅថ្ងៃសៅរ៍ទី ១៨ ខែកញ្ញា ឆ្នាំ ២០២១ ។
ប្រធាន នាងកូណូ វាសនា នៃបេសកកម្មភ្នំពេញកម្ពុជានឹងធ្វើជាអធិបតីនៅក្នុងព្រឹត្តិការណ៍នេះ ។ មានតែភ្ញៀវដែលត្រូវបានអញ្ជើញឲ្យចូលរួមប៉ុណ្ណោះ ទើបអាចចូលរួមនៅឯទីតាំងនោះបាន អនុលោមទៅតាមសេចក្ដីណែនាំអំពីជំងឺកូវីត-១៩ ក្នុងមូលដ្ឋាននាពេលបច្ចុប្បន្ន។ ព្រះវិហារបរិសុទ្ធនេះនឹងជាព្រះវិហារបរិសុទ្ធដំបូងគេបង្អស់របស់សាសនាចក្រនៅក្នុងប្រទេស ។
ព្រះវិហារបរិសុទ្ធមានកម្ពស់មួយជាន់ ដែលមានក្រឡាផ្ទៃប្រហែលជា ១០០០០ ហ្វីតការ៉េ ( ៩២៩.០៣០៤ ម៉ែត្រការ៉េ ) នឹងសាងសង់នៅលើផ្ទៃដីចំនួន ៣.១៦ acre ( ១.២៧៨៨០៧ ហិចតា ) មានទីតាំងនៅលើផ្លូវសហព័ន្ធរុស្សី នៅចន្លោះវិទ្យាស្ថានបច្ចេកវិទ្យាកម្ពុជា និងវិទ្យាស្ថានភាសាបរទេស ដែលនៅជិតនឹងសាកលវិទ្យាល័យភូមិន្ទភ្នំពេញ ។ ទីតាំងព្រះវិហារបរិសុទ្ធនឹងមានអគារបន្ថែមមួយទៀតផងដែរ។
ព្រះវិហារបរិសុទ្ធស្ថិតនៅក្នុងរាជធានីភ្នំពេញ ត្រូវបាន ប្រកាសនៅខែតុលា ឆ្នាំ ២០១៨ ដោយប្រធាននៃសាសនាចក្រ គឺ ប្រធាន រ័សុល អិម ណិលសុន ។ អំឡុងពេលនៃទស្សនកិច្ចលើកដំបូងរបស់លោកនៅក្នុងប្រទេសកម្ពុជានៅខែវិច្ឆិកាឆ្នាំ ២០១៩ នោះប្រធាន រ័សុល អិម ណិលសុន បានបើកបង្ហាញនូវរូបគំនូររបស់វិចិត្រករម្នាក់ ជារូបភាពនៃព្រះវិហារបរិសុទ្ធភ្នំពេញកម្ពុជា ។ ប្រធាន ណិលសុន បានមានប្រសាសន៍អំឡុងពេលបើកបង្ហាញរូបភាពនៃព្រះវិហារបរិសុទ្ធថា តើនោះមិនអស្ចារ្យទេឬអី ? ទស្សនិកជនទាំងអស់បានឆ្លើយតបដោយសំឡេងស្ងើចអស្ចារ្យ ។ លោកមានប្រសាសន៍ថា « ការរៀបចំខ្លួនសម្រាប់ព្រះវិហារបរិសុទ្ធរួមមានទាំងសមាជិកនៃក្រុមគ្រួសាររបស់បងប្អូន ។ ការរៀបចំខ្លួនរបស់បងប្អូនផ្ទាល់ នឹងប្រទានពរដល់សមាជិកគ្រួសាររបស់បងប្អូន » ។ លោកលើកទឹកចិត្តដល់ពួកបរិសុទ្ធថ្ងៃចុងក្រោយនៅ ក្នុងប្រទេសកម្ពុជាឲ្យស្វែងយល់អំពី សំណួរសម្ភាសទទួលប័ណ្ណចូលព្រះវិហារបរិសុទ្ធ ហើយមានភាពស័ក្ដិសមដើម្បីកាន់ប័ណ្ណចូលព្រះវិហារបរិសុទ្ធ ។ ព្យាការីមានប្រសាសន៍ នៅពេលលោកបញ្ចប់សុន្ទរកថារបស់លោកថា « ខ្ញុំមានសុទិដ្ឋិនិយមណាស់អំពីអនាគតនៃប្រទេសកម្ពុជា » ។
ប្រទេសកម្ពុជាជាស្រុកកំណើតរបស់ពួកបរិសុទ្ធថ្ងៃចុងក្រោយច្រើនជាង ១៥០០០ នាក់ ព្រមទាំងមានក្រុមជំនុំប្រហែលជា ៣០ កន្លែង ។ ព័ត៌មាន Newsroom នឹងផ្សាយដំណឹងពេញលេញស្ដីអំពីពិធីសម្ពោធការដ្ឋានសាងសង់ ។
ព្រះវិហារបរិសុទ្ធនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ខុសប្លែកពីសាលាប្រជុំ ឬរោងជំនុំ ដែលសមាជិកមកជួបជុំគ្នាដើម្បីធ្វើពិធីថ្វាយបង្គំនៅថ្ងៃអាទិត្យ ។ ព្រះវិហារបរិសុទ្ធនីមួយៗ ត្រូវបានចាត់ទុកថាជា « ដំណាក់នៃព្រះអម្ចាស់ » ជាកន្លែងដែលការបង្រៀនរបស់ព្រះយេស៊ូវគ្រីស្ទត្រូវបានបញ្ជាក់អះអាងជាថ្មីតាមរយៈពិធីបុណ្យជ្រមុជទឹក និងពិធីបរិសុទ្ធដទៃទៀត ដែលបង្រួបបង្រួមក្រុមគ្រួសារសម្រាប់ភាពអស់កល្បជានិច្ច ។ នៅក្នុងព្រះវិហារបរិសុទ្ធ សមាជិកសាសនាចក្រនឹងរៀនសូត្របានកាន់តែច្រើនអំពីគោលបំណងនៃជីវិត ហើយចុះសេចក្ដីសញ្ញាដើម្បីធ្វើតាមព្រះយេស៊ូវគ្រីស្ទ ហើយបម្រើដល់បងប្អូនរបស់ពួកគេ ។