ទោះបីជាការរាតត្បាតជាសាកលបានធ្វើឲ្យការធ្វើដំណើរជាអន្តរជាតិមានការលំបាកយ៉ាងខ្លាំងក្ដី ក៏វាមិនបានបញ្ឈប់សម្រាប់ថ្នាក់ដឹកនាំនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយពីការងារបម្រើទៅដល់សមាជិកទាំងឡាយរបស់ពួកគាត់នោះដែរ ។ បចេ្ចកទេសសម័យទំនើបបានអនុញ្ញាតឲ្យ ស៊ីស្ទើរ ជីន ប៊ី ប៊ីងហាំ ប្រធាន សមាគមសង្គ្រោះទូទៅ និង ស៊ីស្ទើរ ខាមៀល អិន ចនសុន ប្រធាន អង្គការបឋមសិក្សាទូទៅ ធ្វើទស្សនកិច្ចនៅ តំបន់ អាស៊ីពីចម្ងាយនៅថ្ងៃទី៤-១២ ខែ កញ្ញា ។
ពួកគាត់បានធ្វើទស្សនកិច្ចជសរុបចំនួន ១១ ប្រទេស ដែលរួមមានតំបន់មួយចំនួន ក្នុងនោះមាន ហុងកុង ម៉ាកាវ តៃវ៉ាន់ ថៃ កម្ពុជា សិង្ហបូរី ម៉ាឡេស៊ី ឥណ្ឌូនេស៊ី ឥណ្ឌា ស្រីលង្កា និង ប៉ាគីស្ថាន ។ នេះគឺជាដំណើរធ្វើទស្សនកិច្ចពីចម្ងាយយ៉ាងធំបំផុតមិនដែលធ្លាប់មាននៅតំបន់អាស៊ីដែលធ្វើឡើងដោយផ្ទាល់ពីទីស្នាក់ការកណ្តាលរបស់សាសនាចក្រនៅទីក្រុង សលត៍ លេក រដ្ឋ យូថាហ៍ ។ គណៈប្រធានតំបន់អាស៊ី – អែលឌើរ ដេវីឌ ភី ហូមើរ, អែលឌើរ ភីធើ អេហ្វ មើស៍ និង អែលឌើរ បេនយ៉ាមីន តៃ – បានអមដំណើរប្រធានទាំងពីរក្នុងដំណើរធ្វើទស្សនកិច្ចនោះ ។
ស៊ីស្ទើរ ប៊ីងហាំ និងស៊ីស្ទើរ ចនសុន បានមានប្រសាសន៍ទៅកាន់អ្នកស្ដាប់ទាំងឡាយរបស់ពួកគាត់តាមកញ្ចក់ទូរទស្សន៍ដែលមានអ្នកចូលរួមយ៉ាងច្រើនកុះករមកពីតំបន់អាស៊ីទាំងមូលថា « ពួកយើងស្រឡាញ់បងប្អូន ។ ពួកយើងមើលឃើញបងប្អូននៅក្នុងផ្ទះរបស់បងប្អូន ហើយពួកយើងដឹងពីអារម្មណ៍របស់បងប្អូន ស្នាមញញឹមដ៏ស្រស់ស្អាតរបស់បងប្អូន ។ បងប្អូនបង្ហាញដល់ពួកយើងថា បងប្អូនមានទីបន្ទាល់នៃដំណឹងល្អ ដែលនោះជាមូលហេតុដែលបងប្អូននៅទីនេះសម្រាប់ថ្ងៃនេះ » ។
ដំណើរទស្សនកិច្ចរបស់ពួកគាត់ក្នុងគោលបំណងដើម្បីបង្ហាញសេចក្តីស្រឡាញ់ និងការគាំទ្រដល់ថ្នាក់ដឹកនាំសាសនាចក្រតាមមូលដ្ឋាន សមាជិក និងមិត្តភក្តិក៏ដូចជាដើម្បីពង្រឹងសេចក្តីជំនឿរបស់ពួកគេលើព្រះគ្រីស្ទផងដែរ ។ ពួកគាត់បានថ្លែងទៅកាន់ថ្នាក់ដឹកនាំ អង្គការបឋមសិក្សា គណៈប្រធាន សមាគមសង្គ្រោះ និងអែលឌើរ កូរ៉ុម និងថ្នាក់ដឹកនាំបព្វជិតភាព រួមទាំងការផ្តល់នូវដំបូន្មានជាក់ស្ដែងពីរបៀបដើម្បីពង្រីកការហៅបម្រើរបស់ពួកគេផងដែរ ។ ការប្រឹក្សាដ៏ជាក់លាក់របស់ពួកគាត់ចំពោះមាតាបិតាសម្រាប់កុមារ និងយុវវ័យ ព្រមទាំងបងប្អូនស្រ្តីសមាគមសង្គ្រោះ បានផ្តោតលើការនាំយកពរជ័យនៃសេចក្តីជំនឿលើព្រះយេស៊ូវគ្រីស្ទមកក្នុងជីវិតប្រចាំថ្ងៃរបស់ពួកគេ ។
ការជួបជាក្រុមបន្ថែម ប្រធានទាំងពីរក៏បានជួបជាមួយសមាជិកក្នុងផ្ទះរបស់ពួកគាត់ផងដែរ ។ ទោះបីជាមានចម្ងាយរាប់ពាន់គីឡូមែត្រពីគ្នាក្ដី ក៏សមាជិកសាសនាចក្រទាំងនេះបានថ្លែងថា ពួកគេអាចដឹងពីសេចក្តីស្រឡាញ់ពិតរបស់ពួកគាត់ដែរ ហើយបានពិពណ៌នាអំពីដំណើរទស្សនកិច្ចនោះថា « ជាឱកាសមួយដែលមិនអាចបំភ្លេចបាន » ។
គ្រួសារ មើឌីយ៉ានតូ មកពីប្រទេស ឥណ្ឌូនេស៊ី បាននិយាយថា « ពួកយើងមានអារម្មណ៍ពីព្រះវិញ្ញាណបរិសុទ្ធខ្លាំងណាស់ក្នុងផ្ទះរបស់យើង [ អំឡុងការជួបនោះ ] ។ « បទពិសោធន៍ដ៏គួរឲ្យចងចាំបំផុតនោះគឺពេលដែលពួកយើងបានពិភាក្សាអំពីផែនការនៃសេចក្តីសង្គ្រោះ និងសុន្ទរកថាពីសន្និសីទទូទៅថ្មីៗនេះ » ។
ដំណើរទស្សនកិច្ចនោះក៏រួមបញ្ចូលការផ្សាយកម្មវិធី មិត្តទៅកាន់មិត្ត ដែលមាននូវសារលិខិតពិសេសមួយមកពី ស៊ីស្ទើរ ចនសុន ទៅកាន់កុមារនៅតំបន់អាស៊ីទាំងមូលផងដែរ ។ នេះគឺជាលើកដំបូងហើយ ដែលកុមារបានដឹកនាំ និងអធិស្ឋាននៅក្នុងការប្រជុំមួយទូទាំងតំបន់ ។
កាលកំពុងមានប្រសាសន៍ទៅកាន់ថ្នាក់ដឹកនាំអង្គការបឋមសិក្សា ស៊ីស្ទើរ ចនសុន បានលើកទឹកចិត្តពួកគេឲ្យធ្វើការងារបម្រើដល់កុមាររាល់ថ្ងៃដើម្បីឲ្យពួកគេអាចទទួលអារម្មណ៍ពីសេចក្តីស្រឡាញ់របស់ព្រះ ។ គាត់បានសង្កត់ធ្ងន់ថា ការជួបកុមារគួរតែធ្វើឲ្យបានញឹកញាប់ ខ្លី ហើយសាមញ្ញ។ ការណ៍នេះត្រូវបានលើកមកបន្ថែមដោយ អែលឌើរ តៃ ដែលបានចែកចាយបទពិសោធន៍ផ្ទាល់របស់លោក និងបានមានប្រសាសន៍ថាការទាក់ទងដោយផ្ទាល់ធ្វើឲ្យមានការផ្លាស់ប្តូរទាំងស្រុងនៅក្នុងជីវិតរបស់កុមារ ។
ស៊ីស្ទើរ ចនសុន ក៏បានបង្រៀនថ្នាក់ដឹកនាំអង្គការបឋមសិក្សាឲ្យបង្កើតបរិយាកាសមួយដែលមានព្រះវិញ្ញាណ « ពេលមានព្រះវិញ្ញាណគង់នៅទីនោះ សូមឈប់ហើយសួរកុមារថា តើពួកគេមានអារម្មណ៍យ៉ាងម៉េចដែរ ។ ខ្ញុំមានទំនុកចិត្តថា ប្រសិនបើយើងធ្វើដូច្នេះ នោះយើងនឹងរៀបចំជំនាន់មួយនៃមនុស្សវ័យក្មេងដែលស្គាល់ព្រះវិញ្ញាណ និងដឹងពីរបៀបដែលត្រូវបានដឹកនាំពីទ្រង់ » ។
គោលការណ៍នេះត្រូវបានបញ្ជាក់ម្តងទៀតកាលគាត់មានប្រសាសន៍ទៅកាន់មាតាបិតារបស់កុមារ និងយុវវ័យជាមួយស៊ីស្ទើរ ប៊ីង ហាំ អំពី « វិវរណៈ ចំណងទាក់ទង និងសិទ្ធិជ្រើសរើស » ។ ពួកគាត់បានបង្រៀនថា វាមិនត្រឹមតែសំខាន់សម្រាប់ជំនាន់ដែលកំពុងពេញវ័យត្រូវរៀនស្គាល់ពីរបៀបដែលព្រះមានបន្ទូលទៅកាន់ពួកគេនោះទេ ប៉ុន្តែក៏ដើម្បីស្ថាបនាទំនាក់ទំនងដែលផ្តោតលើព្រះគ្រីស្ទ និងដឹងរបៀបដាក់គោលដៅ ហើយដាក់ផែនការសម្រាប់ខ្លួនពួកគេផ្ទាល់ផងដែរ ។ ពួកគាត់បានលើកទឹកចិត្តមាតាបិតាឲ្យបង្រៀនដំណឹងល្អនៅក្នុងផ្ទះជាអាទិភាព និងសង្កត់ធ្ងន់ថាកម្មវិធីកុមារ និងយុវវ័យគឺជាប្រភពដ៏សំខាន់មួយ ។
ស៊ីស្ទើរទាំងពីរបានមានប្រសាសន៍ថា កិច្ចការនៃសេចក្តីសង្គ្រោះ និងភាពតម្កើងឡើងអាចស្តាប់ទៅពិបាកយល់បន្តិច ជាពិសេសសម្រាប់កុមារ ។ ពួកគាត់បានចែកចាយបួនចំណុច ងាយៗដែលគូសបញ្ជាក់ពីរបៀបដែលពួកបរិសុទ្ធបង្ហាញសេចក្តីជំនឿរបស់ពួកគេ ៖
- ការរស់នៅ តាមដំណឹងល្អរបស់ព្រះយេស៊ូវគ្រីស្ទ
- ការមើលថែ ដល់អ្នកខ្វះខាត
- ការអញ្ជើញ មនុស្សទាំងអស់ឲ្យមកទទួលយកដំណឹងល្អ
- ការបង្រួបបង្រួម ក្រុមគ្រួសារសម្រាប់ភាពអស់កល្ប
នៅពេលធ្វើការបំពាក់បំប៉នដល់គណៈប្រធានអែលឌើរកូរ៉ុម និងសមាគមសង្គ្រោះ ស៊ីស្ទើរ ប៊ីងហាំ បានមានប្រសាសន៍ថា « វាសំខាន់ណាស់ដែលត្រូវយល់ថា ទាំងបុរស និងស្រ្តីធ្វើការនៅក្រោមកូនសោបព្វជិតភាព » ។
គាត់បានលើកទឹកចិត្តដល់ បព្វជិតភាព និងបងប្អូនស្រីឲ្យធ្វើការរួមគ្នា និងដើម្បីបង្ហាញរបៀបដែលការសម្ភាសន៍ពីការងារបម្រើអាចលើកតម្កើង បំផុសគំនិត និងជម្រុញទឹកចិត្ត ។
អែលឌើរ មើស៍ បានបន្ថែមលើការបង្រៀនរបស់ស៊ីស្ទើរ ប៊ីងហាំ ដោយចែកចាយពាក្យដកស្រង់មកពីព្យាការី យ៉ូសែប ស៊្មីធ ថា « ភាពអាស្រ័យគ្នានៃបុរស និងស្ត្រី គឺដើម្បីសម្រេចនូវកិច្ចការរបស់ព្រះឲ្យបានតាមរយៈព្រះចេស្តារបស់ទ្រង់គឺជាចំណុចសំខាន់ចំពោះដំណឹងល្អនៃព្រះយេស៊ូវគ្រីស្ទ » ។
ដំណើរទស្សនកិច្ចនេះបានបញ្ចប់ជាមួយនឹងការប្រជុំធម្មានិដ្ឋានរបស់សមាគមន៍សង្គ្រោះ ដែលជាការប្រជុំដ៏ធំបំផុតដោយគ្របដណ្តប់លើប្រទេស និងតំបន់ចំនួនប្រាំពីរដែលមានអ្នកចូលរួមប្រហែលជា ២០០០ នាក់ ។ ពេលមានប្រសាសន៍ទៅកាន់ ស្ត្រីនៅក្នុងសាសនាចក្រ នៅទូទាំងតំបន់អាស៊ី អែលឌើរ ហូមើ បានរំឭកអ្នកចូលរួមថា ប្រធាន ហ្គរដុន ប៊ី ហ៊ិងគ្លី ធ្លាប់បង្រៀនថា « ស្ត្រីគឺជាការបង្កបង្កើតដ៏កំពូលរបស់ព្រះ » ។
លោកបានមានប្រសាសន៍ថា « ពេលខ្លះមនុស្ស ពេលខ្លះសង្គម ចាត់ទុកស្ត្រីហាក់ដូចជាមិនសូវសំខាន់ដូចបុរសទេនៅក្នុងពិភពលោក ។ ចំពោះខ្ញុំ វាហាក់ដូចជាខុសគ្នាទាំងស្រុងទៅនឹងគោលលទ្ធិរបស់សាសនាចក្រ » ។
ស៊ីស្ទើរ ប៊ីងហាំ បានរំឭកបងប្អូនស្រីទាំងអស់ថា ស្ត្រីមានឥទ្ធិពលដែលមិនអាចកាត់ថ្លៃបានលើក្រុមគ្រួសារ និងសាសនាចក្ររបស់ព្រះអម្ចាស់ ។
ទោះជាយ៉ាងណាក៏ដោយ គាត់បានមានប្រសាសន៍ថា ពេលខ្លះស្ត្រីប្រៀបធៀបខ្លួនឯងជាមួយអ្នកដទៃ ដែលនាំឲ្យពួកគាត់មិនពេញចិត្តនឹងខ្លួនឯង ហើយពុំមានភាពសុខដុម ។ គាត់បានប្រឹក្សាដល់បងប្អូនស្ត្រីឲ្យជៀសវាងពីការរំខាននៃពិភពលោកបែបនេះ ឲ្យបញ្ឈប់ការគិតដែលថាពួកគេមិនសូវសំខាន់ ហើយកម្ចាត់ភាពទាស់ទែងគ្នាចេញពីជីវិតរបស់ពួកគេ ។
ស៊ីស្ទើរ ប៊ីងហាំ បានមានប្រសាសន៍ថា « ការផ្តោតគំនិត និងសកម្មភាពលើព្រះយេស៊ូវគ្រីស្ទ នឹងជួយយើងស្វែងរកមធ្យោបាយដើម្បីលើកស្ទួយអ្នកដទៃក៏ដូចជាខ្លួនរបស់យើងផងដែរ ហើយធ្វើសកម្មភាពក្នុងរបៀបមួយដែលលើកកម្ពស់ និងកាន់តែបរិសុទ្ធ » ។
គាត់បានបន្សល់ទុកសំណួរពីរដល់អ្នកចូលរួមទាំងឡាយដូចខាងក្រោម ៖
- តើបងប្អូនអាចធ្វើអ្វីខ្លះដែលនឹងជួយបងប្អូនឲ្យចងចាំនូវចំណុចអាទិភាពដ៏អស់កល្បជានិច្ចទាំងឡាយ ?
- តើបងប្អូនអាចធ្វើអ្វីខ្លះដើម្បីកាត់បន្ថយភាពទាស់ទែងគ្នាក្នុងចំណោមអ្នកដែលរស់នៅ និងធ្វើការជាមួយបងប្អូន ?
គាត់បានបញ្ចប់ដោយធ្វើការធានាដល់បងប្អូនស្ត្រីអំពីតម្លៃផ្ទាល់ខ្លួនរបស់ពួកគេ និងការរំឭកថា ពួកគេមានអំណោយទានពិសេសដើម្បីប្រទានពរដល់អ្នកដទៃ និងជួយស្ថាបនានគរព្រះលើផែនដី ។
គាត់បានមានប្រសាសន៍ថា « សក្តានុពលរបស់បងប្អូនគឺគ្មានដែនកំណត់នោះទេ ។ សូមចងចាំថាបងប្អូនគឺជានរណា ហេតុអ្វីបានជាបងប្អូននៅលើផែនដីនេះ និងកន្លែងដែលបងប្អូនចង់ទៅ បងប្អូននឹងអាចសម្រេចការណ៍នេះបានតាមរយៈព្រះអង្គសង្គ្រោះរបស់យើង ព្រះយេស៊ូវគ្រីស្ទ នូវអស់ទាំងអ្វីដែលបងប្អូនបានធ្វើសេចក្តីសញ្ញាដើម្បីធ្វើ » ។