ក្នុងទស្សនកិច្ចមកកាន់តំបន់អាស៊ីថ្មីៗនេះ ស៊ីស្ទើរ ជីន ប៊ី ប៊ីងហាំ ជាប្រធានសមាគមសង្រ្គោះទូទៅបានមានប្រសាសន៍ថា « ខ្ញុំនឹងមិនអាចបំភ្លេចដំណើរទស្សនកិច្ចនេះបានឡើយ » ដែលបានអមដំណើរជាមួយគាត់ដោយ ស៊ីស្ទើរ បូនី អេច ខ័រឌុន ជាប្រធានយុវនារីទូទៅ ។ « វា [ គឺជា ] ឯកសិទ្ធមួយដើម្បីមកជួបពួកបរិសុទ្ធក្នុងតំបន់អាស៊ី ដើម្បីរៀនបន្ថែមទៀតពី វប្បធម៌ បរិយាកាសដែលពួកគេរស់នៅ…ខ្ញុំភ្ញាក់ផ្អើលខ្លាំងណាស់ចំពោះសេចក្តីជំនឿ សេចក្តីស្រឡាញ់ និងភាពកក់ក្តៅដែលពួកគេបានបង្ហាញមកដល់ពួកយើង » ។
ប្រធាន ប៊ី ប៊ីងហាំ និងប្រធាន ខ័រឌុន បានមកកាន់ប្រទេស កម្ពុជា សិង្ហបុរី និង ថៃអំឡុងដំណើរទស្សនកិច្ចរយៈពេល ១២ ថ្ងៃរបស់ពួកគាត់ ដែលអមដំណើរជាមួយស្វាមីរបស់ពួកគាត់ និង អ៊ែលឌើរ ដេវីឌ ភី ហូមើរ ជាប្រធានប្រចាំតំបន់អាស៊ី និងភរិយារបស់លោក ណានស៊ី ។ អស់រយៈពេលពីរឆ្នាំមកហើយដែលការធ្វើទស្សនកិច្ចទាំងឡាយត្រូវបានធ្វើឡើងពីចម្ងាយ ។
ប្រធាន ខ័រឌុន ដែលបានមកធ្វើទស្សនកិច្ចនៅទ្វីបអាស៊ីកាលពីឆ្នាំ២០១៧ ហើយគាត់បានស្ងើចសរសើរយ៉ាងខ្លាំងចំពោះកំណើននៃភាពរឹងមាំរបស់សាសនាចក្រដែលបានកើនឡើងចាប់តាំងពីពេលនោះមក « ខ្ញុំពិតជាស្ញប់ស្ញែងជាមួយនឹងការផ្លាស់ប្តូរដ៏ច្រើនក្នុងរយៈពេលប្រាំឆ្នាំនេះ… និងបានឃើញនូវអ្វីដែលព្រះអម្ចាស់អាចធ្វើក្នុងជីវិតរបស់យើង » ។
ដំណើរទស្សនកិច្ចរបស់ពួកគាត់ ក៏មានទាំងការអញ្ជើញទៅជួប ស៊ូណាន់ថា សុមប៊ុនថាំ ដែលជានិយោជកជនជាតិថៃដ៏ជោគជ័យម្នាក់ដែលបានចូលរួមយ៉ាងសកម្មក្នុងការងារមនុស្សធម៌ដើម្បីកែលម្អវិស័យវេជ្ជសាស្ត្រ បង្កើនឱកាសអប់រំ និងការមានភាពខ្លួនទីពឹងខ្លួននៅក្នុងប្រទេសថៃ ។ គម្រោងរបស់គាត់មួយចំនួនបានសហការជាដៃគូជាមួយអង្គការសប្បុរសធម៌ពួកបរិសុទ្ធថ្ងៃចុងក្រោយយ៉ាងមានប្រសិទ្ធភាព ។ ប្រធាន ខ័រឌុន ក៏បានជួបជាមួយអតីត អភិបាលក្រុង បាងកក បណ្ឌិត ប៊ីឈីត រតនៈគុល ដែលជាអតីតនិស្សិតរបស់សាកលវិទ្យាល័យ ប៊ី.វាយ.យូ ផងដែរ ។ ដំណើរទស្សនកិច្ចដោយថ្នាក់ដឹកនាំរបស់សាសនាចក្រទាំងនេះបានរំឭកនូវចំណងមិត្តភាពឡើងវិញជាមួយប្រជាពលរដ្ឋដែលមានគិតពីសាធារណៈដ៏អស្ចារ្យទាំងនេះ ។
បន្ថែមពីលើជំនួបជាមួយនឹងថ្នាក់ដឹកនាំមូលដ្ឋាន ដំណើរទស្សនកិច្ចរយៈពេលជិតពីរសប្តាហ៍នេះគឺផ្តោតលើការផ្តល់ការងារបម្រើទៅដល់សមាជិកសាសនាចក្រ ថ្នាក់ដឹកនាំ និងពួកអ្នកផ្សាយសាសនាតាមរយៈជំនួបដោយផ្ទាល់ ធម្មនិដ្ឋាន និងប្រជុំពិសេសផ្សេងៗទៀត ។ នៅប្រទេសថៃ ថ្នាក់ដឹកនាំរបស់សាសនាចក្របានពិនិត្យមើលនិងចូលរួមក្នុងការប្រជុំគណៈកម្មាធិការយុវមជ្ឈឹមវ័យនៅលីវ ( យ.ម.ល. ) និងក្រុមប្រឹក្សាយុវវ័យវួដ ។ ពួកគាត់ក៏បានឡើងថ្លែងសុន្ទរកថានៅឯសន្និសីទ យ.ម.ល. នៅប្រទេសកម្ពុជា និងសឹង្ហបូរី ហើយបានចូលរួមពិសារអាហារថ្ងៃត្រង់ជាមួយ យ.ម.ល. មួយក្រុម ។ ទំនាក់ទំនងដោយផ្ទាល់ដ៏កក់ក្តៅនេះគឺជាផ្នែកដ៏សំខាន់ចំពោះមនុស្សទាំងអស់ ។
តាន់ រ៉េនើ នៅវួដយ.ម.ល. ប្រទេសសិង្ហបុរី បាននិយាយថា « ខ្ញុំចូលចិត្តពីរបៀបដែលពួកគាត់បានចែកចាយពីបទពិសោធន៍របស់ពួកគាត់ និងការភ្ជាប់បទពិសោធន៍ទាំងនោះនៅពេលឆ្លើយតបចំពោះសំណួររបស់ពួកយើង » ។ « ខ្ញុំបានមានអារម្មណ៍កក់ក្តៅជាងការគ្រាន់តែផ្តល់ចម្លើយតាមសៀវភៅ » ។
លោក គ្រីស រ៉ូលីនស៍ ដែលជាប៊ីស្សពនៃវួដ យ.ម.ល. សឹង្ហបុរីបានមានប្រសាសន៍ថា « ខ្ញុំមានសេចក្តីរំភើបដែលបានឃើញប្រធាន ប៊ីងហាំ ប្រធាន ខ័រឌុន និងអ៊ែលឌើរ ហូមើរ ផ្តល់ការងារបម្រើ ម្តងហើយ ម្តងទៀត និងទន់ភ្លន់ ម្តងម្នាក់ៗដល់អ្នកដែលត្រូវការ ការងារបម្រើនេះបំផុត » ។ « ការជួបដោយផ្ទាល់នេះគឺជាបញ្ជាក់យ៉ាងច្បាស់ចំពោះខ្ញុំថាព្រះអម្ចាស់គឺកំពុងតែដឹកនាំកិច្ចការនេះ ។ ទ្រង់បានទតឃើញ សន្និសីទរបស់យើងនៅលើកោះដ៏តូចនេះ ហើយបានបញ្ជូលពួកអ្នកបម្រើរបស់ទ្រង់ដើម្បីមកនៅជាមួយយើង ។ ម្តងហើយម្តងទៀតខ្ញុំបានឮសមាជិករបស់យើងថ្លែងពីរបៀបដែលកង្វល់ផ្ទាល់ខ្លួនឯកជន និងការអធិស្ឋានរបស់ពួកគាត់ត្រូវបានឆ្លើយតប ។ យើងទាំងអស់គ្នាពិតជាមានសេចក្តីអំណរយ៉ាងខ្លាំង ! »
ប្រធាន ខ័រឌុន បានមានប្រសាសន៍ថា « ខ្ញុំមានទំនុកចិត្តយ៉ាងខ្លាំងលើ យ.ម.ល.នៅតំបន់អាស៊ីនេះ …ការយល់ដឹងរបស់ពួកគេ ឥទ្ធិពលរបស់ពួកគេ វាគួរឲ្យកត់សម្គាល់បំផុតដោយគ្រាន់តែបានជជែកជាមួយពួកគេប៉ុណ្ណោះ » ។ គាត់បានលើកឡើងពីការអង្គុយ និងការជជែកជាមួយក្រុម យ.ម.ល.ចំនួន ៥០០នាក់ ក្នុងប្រទេសកម្ពុជា នៅក្នុងបន្ទប់ដ៏ក្តៅមួយ ជាទីដែលមនុស្សគ្រប់គ្នាបែកញើស ប៉ុន្តែស្តាប់យ៉ាងយកចិត្តទុកដាក់ ជាបទពិសោធមួយដ៏លើកស្ទួយបំផុត ។
ប្រធាន ខ័រឌុន បានមានប្រសាសន៍ថា « អ្វីដែលខ្ញុំចូលចិត្តកាលដែលខ្ញុំនៅជាមួយ[ ពួកគេ ]នោះគឺបំណងប្រាថ្នារបស់ពួកគេដើម្បីមានអំណរ ហើយពួកគេដឹងថាពួកគេអាចរកបានអំណរនៅក្នុងព្រះគ្រីស្ទ ហើយពួកគេពុំមានភាពភ័យខ្លាចក្នុងការចែកចាយ និងអញ្ជើញឡើយ » ។
ប្រធាន ប៊ីងហាំ បានមានចំណាប់អារម្មណ៍ដូចគ្នាជាមួយនិងយ.ម.ល.ដែលគាត់បានជួប ។ « នៅទីណាដែលយើងទៅដល់ ពួកគេគឺជាមនុស្សរឹងមាំ ជាតារា …ហើយដោយសារតែការរឹតត្បិតនៃកូវីដបានធ្វើឲ្យមានបញ្ហាប្រឈមអស់មួយរយៈ…ប៉ុន្តែយុវមជ្ឈឹមវ័យទាំងនេះបានប្តេជ្ញាចិត្តដើម្បីឈោងទៅរក ហើយនាំមិត្តភក្តិរបស់ពួកគេឲ្យត្រឡប់មកកាន់ព្រះវិហារវិញ…ក៏ព្រោះពួកគេដឹងថាការណ៍នោះមានន័យខ្លាំងប៉ុណ្ណាចំពោះសាសនាចក្រ…ដើម្បីមាននូវកម្លាំងទាំងនោះសម្រាប់យុវមជ្ឈឹមវ័យនៅទីនេះ » ។
បទពិសោធន៍ដែលមិនអាចបំភ្លេចបានផ្សេងទៀតនោះគឺការងារបម្រើដោយចុះសួរសុខទុក្ខរបស់ថ្នាក់ដឹកនាំនៅតាមគេហដ្ឋាន ។
ប្រធានខ័រឌុន បានមានប្រសាសន៍ថា « យើងបានជួបក្រុមគ្រួសារដ៏គួរឲ្យស្រឡាញ់មួយចំនួនដែលបានឆ្លងកាត់រឿងរាវដ៏លំបាក ដូចជាជំងឺ ប៉ុន្តែពួកគេមានសេចក្តីជំនឿដើម្បីបន្តទៅមុខ » ។
ប្រធាន ប៊ីងហាំ មានមានប្រសាសន៍ថា« វាគឺពេញដោយភាពទន់ភ្លន់ » ។ « ភាគច្រើនបំផុតនៃពួកបរិសុទ្ធទាំងអស់នេះដែលយើងជួប បានក្លាយជាសមាជិកនៃសាសនាចក្រមិនយូរប៉ុន្មានទេ ហើយពួកគេ[ ភាគច្រើន ]គឺជាសមាជិកនៃសាសនាចក្រតែម្នាក់ឯងនៅក្នុងគ្រួសាររបស់ពួកគេ ។ ពេលយើងបានជួបពួកគេ ទីបន្ទាល់ដ៏រឹងមាំរបស់ពួកគេ អារម្មណ៍ដ៏ជ្រាលជ្រៅរបស់ពួកគេគឺអស្ចារ្យណាស់ ពួកគេដឹងថាខ្លួនឯងគឺជានរណា ។ ពួកគេបានជ្រើសយកផ្លូវនៃសេចក្តីសញ្ញាដែលដឹកនាំពួកគេទៅរកព្រះអង្គសង្គ្រោះ ព្រះយេស៊ូវគ្រីស្ទរបស់ពួកគេ » ។
បងប្អូនស្រីនៅក្នុងប្រទេសនីមួយៗបានឱបក្រសោបយកឱកាសដើម្បីបានបង្រៀនដោយថ្នាក់ដឹកនាំសមាគមសង្គ្រោះ និងយុវនារីទូទៅ ។ បងប្អូនស្រីមួយចំនួននៅប្រទេសថៃបានបើកឡានចំនួនប្រាំបីម៉ោងដើម្បីមកចូលរួមការប្រជុំធម្មនិដ្ឋានដែលពួកគាត់បានឡើងនិយាយ ។
ប្រធាន ប៊ីងហាំ បានថ្លែងថា « សេចក្តីស្រឡាញ់ជួយយើងឲ្យមានអារម្មណ៍សាមគ្គីភាពក្នុងនាមជាបងប្អូនស្រី ។ យើងជួយគ្នាឲ្យក្លាយជារាស្ត្រនៃក្រុងស៊ីយ៉ូនដោយការធ្វើការរួមគ្នា » ។ គាត់បានអញ្ជើញបងប្អូនស្រីដើម្បីប្រមូលផ្តុំអ៊ីស្រាអែលដោយរៀបចំខ្លួនសម្រាប់ព្រះវិហារបរិសុទ្ធតាមរយៈការស្វែងរកបព្វការីជនរបស់ពួកគេ និងដោយការធ្វើការងារបម្រើម្តងមួយៗតាមរយៈការអញ្ជើញដោយផ្ទាល់ឲ្យមកចូលរួមការប្រជុំក្នុងព្រះវិហារវិញ ។ « វានឹងធ្វើឲ្យមានការផ្លាស់ប្តូរ ។ មានកម្លាំងរឹងមាំក្នុងសាមគ្គីភាព ។ មាននូវអំណាចពេលយើងកំពុងផ្តោតលើរឿងដូចគ្នា » ។
សារដ៏សំខាន់ដែលប្រធាន ខ័រឌុន បានបង្រៀនដដែលៗនោះគឺឲ្យរស់នៅតាមបាវចនាយុវវ័យឆ្នាំ ២០២២ « ចូរទីពឹងដល់ព្រះយេហូវ៉ាឲ្យអស់អំពីចិត្ត កុំឲ្យពឹងផ្អែកលើយោបល់របស់ខ្លួនឡើយ » ។ គាត់បានលើកទឹកចិត្តដល់យុវវ័យ និង យ.ម.ល ឲ្យរៀនស្វែងរក និងធ្វើតាមវិវរណៈផ្ទាល់ខ្លួន ។ គាត់បានជំរុញថ្នាក់ដឹកនាំក្នុងមូលដ្ឋានឲ្យផ្តោតលើការជួយមនុស្សវ័យក្មេងស្គាល់ព្រះអង្គសង្គ្រោះកាន់តែប្រសើរជាងមុន ហើយស្ថាបនាទំនាកទំនងដ៏ជិតស្និទជាមួយទ្រង់ ។ គាត់បានមានប្រសាសន៍ថា « នៅក្នុងពិភពលោកដ៏ឆ្កួតលីលានេះ វាងាយខ្លាំងណាស់ដើម្បីធ្វើការសន្មតចំពោះរឿងរ៉ាវផ្សេងៗ ។ សូមទុកចិត្តទ្រង់ ហើយទុកចិត្តលើសេចក្តីសន្យារបស់ទ្រង់ថាទ្រង់នឹងដឹកនាំផ្លូវរបស់យើង » ៕