គណៈប្រធានទីមួយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានចេញផ្សាយពីកាលបរិច្ឆេទពិធីសម្ភោធ និងពិធីឧទ្ទិសឆ្លងសម្រាប់ ព្រះវិហារបរិសុទ្ធ នៅទីក្រុងបាងកក ប្រទេសថៃ
ពិធីសម្ពោធជាសាធារណៈនឹងចាប់ផ្ដើមនៅថ្ងៃ សុក្រ ទី ១ ខែ កញ្ញា ហើយបន្ដរហូតដល់ថ្ងៃ សៅរ៍ ទី ១៦ ខែ កញ្ញា លើកលែងតែថ្ងៃអាទិត្យ ។ ព្រះវិហារបរិសុទ្ធ នៅទីក្រុង បាងកក ប្រទេសថៃ នឹងត្រូវឧទ្ទិសឆ្លងនៅថ្ងៃ អាទិត្យ ទី ២២ ខែ តុលា ដែលមានសម័យប្រជុំពីរ នៅម៉ោង ១០ ព្រឹក និង ១:៣០ រសៀល ។ អែលឌើរ រ៉ូណល អេ រ៉ាសបាន នៃកូរ៉ុមនៃពួកសាវកដប់ពីរនាក់នឹងធ្វើជាអធិបតីនៅក្នុងការឧទ្ទិសឆ្លងនេះ ។
នៅមុនពិធីសម្ពោធជាសាធារណៈនេះ យើងនឹងមានថ្ងៃសម្រាប់អ្នកសារព័ត៌មាន នៅថ្ងៃ ចន្ទ ទី ២៨ ខែ សីហា ។ ភ្ញៀវដែលបានអញ្ជើញ នឹងដើរទស្សនាព្រះវិហារបរិសុទ្ធ ទីក្រុងបាងកក ប្រទេសថៃ ពីថ្ងៃ អង្គារ ទី ២៩ ខែ សីហា ដល់ថ្ងៃ ព្រហស្បតិ៍ ទី ៣១ ខែ សីហា ។
សម័យប្រជុំឧទ្ទិសឆ្លងទាំងពីរនឹងត្រូវចាក់ផ្សាយទៅកាន់អង្គភាពទាំងអស់នៅក្នុងមណ្ឌលព្រះវិហារបរិសុទ្ធ នៅទីក្រុងបាងកក ប្រទេសថៃ ។ ព័ត៌មានលម្អិតបន្ថែមទៀតទាក់ទងទៅនឹងការឧទ្ទិសឆ្លងព្រះវិហារបរិសុទ្ធនឹងត្រូវប្រកាសនៅក្នុងស្រុក អំឡុងពេលព្រឹត្តិការណ៍ឈានចូលមកដល់ ។
អតីតប្រធានសាសនាចក្រ ថូម៉ាស អេស ម៉នសុន បានប្រកាសជាលើកដំបូងអំពីព្រះវិហារបរិសុទ្ធ នៅទីក្រុង បាងកក ប្រទេស ថៃ នៅខែ មេសា ឆ្នាំ ២០១៥ ។ ការសាងសង់បានចាប់ផ្ដើមនៅខែ មករា ឆ្នាំ ២០១៩ ជាមួយនឹង ពិធីបើកការដ្ឋានសាងសង់ ។
អ្នកផ្សព្វផ្សាយសាសនាពួកបរិសុទ្ធថ្ងៃចុងក្រោយដំបូងគេបានមកដល់ប្រទេសថៃនៅឆ្នាំ ១៨៥៤ ប៉ុន្ដែកិច្ចការផ្សព្វផ្សាយសាសនាមិនបានចាប់ផ្ដើមពិតប្រាកដទេរហូតដល់ទសវត្សរ៍ឆ្នាំ ១៩៦០ ។ សាលាប្រជុំដំបូងគេត្រូវបានឧទ្ទិសឆ្លងនៅឆ្នាំ ១៩៧៤ ។ សព្វថ្ងៃនេះ ប្រទេសថៃ គឺជាជម្រកសម្រាប់ពួកបរិសុទ្ធថ្ងៃចុងក្រោយជាង ២៣,០០០ នាក់ នៅក្នុងក្រុមជំនុំប្រហែលជា ៤០ ។ ព្រះវិហារបរិសុទ្ធនេះនឹងជាព្រះវិហារបរិសុទ្ធដំបូងគេនៅក្នុងប្រទេស ។
ពួកបរិសុទ្ធថ្ងៃចុងក្រោយចាត់ទុកព្រះវិហារបរិសុទ្ធថាជាព្រះដំណាក់របស់ព្រះអម្ចាស់ និងជាទីកន្លែងដ៏ពិសិដ្ឋបំផុតសម្រាប់ថ្វាយបង្គំនៅលើផែនដីនេះ ។ ព្រះវិហារបរិសុទ្ធខុសពីសាលាប្រជុំរបស់សាសនាចក្រ ( រោងជំនុំ ) ។ មនុស្សទាំងអស់ត្រូវបានស្វាគមន៍ឲ្យចូលរួមក្នុងកម្មវិធីថ្វាយបង្គំនៅថ្ងៃអាទិត្យ និងសកម្មភាពក្នុងសប្ដាហ៍ផ្សេងទៀតនៅឯសាលាប្រជុំក្នុងមូលដ្ឋានទាំងឡាយ ។ នៅក្នុងព្រះវិហារបរិសុទ្ធ សមាជិកដ៏ស្មោះត្រង់ទាំងឡាយនៃសាសនាចក្រនៃព្រះយេស៊ូវគ្រីស្ទចូលរួមក្នុងពិធីការខាងសាសនាដ៏ពិសិដ្ឋ ដែលបង្រួបបង្រួមក្រុមគ្រួសារជារៀងរហូត លើកទឹកចិត្តពួកគេឲ្យរស់នៅក្នុងជីវិតមួយប្រកបដោយគុណធម៌ និងធ្វើតាមព្រះយេស៊ូវគ្រីស្ទ ។ សមាជិកធ្វើពិធីការទាំងនេះសម្រាប់ខ្លួនគេ និងជំនួសឲ្យបុព្វការីជនដែលបានចែកឋានទៅ ដែលមិនអាចចូលរួមបានកាលនៅរស់ ។