ឆ្នាំនេះ សមាជិកនៃគណៈប្រធានតំបន់អាស៊ី រួមជាមួយនឹងពួកចិតសិបនាក់ប្រចាំតំបន់ បានជួបប្រជុំដាច់ដោយឡែកពីគ្នាជាមួយនឹងគណៈប្រធានស្តេក និងគណៈប្រធានមណ្ឌលនីមួយៗ ដើម្បីស្វែងយល់ពីគោលដៅ និងផែនការសម្រាប់ឆ្នាំ២០១៩ ។ វាគឺជាឱកាសដ៏អស្ចារ្យមួយសម្រាប់យើងដើម្បីស្វែងយល់ពីទស្សនវិស័យរបស់គណៈប្រធាននីមួយៗ ហើយទទួលអារម្មណ៍ពីសេចក្ដីស្រឡាញ់ដែលថ្នាក់ដឹកនាំដ៏អស្ចារ្យទាំងនេះមានចំពោះសមាជិកនៅក្នុងមណ្ឌល និងស្ដេករបស់ពួកគាត់ ។
ប្រធានបទដ៏សំខាន់មួយសម្រាប់ការពិភាក្សានៅក្នុងការប្រជុំទាំងនេះគឺការងារបម្រើ ។ ខណៈដែលយើងបានរៀនពីគំរូល្អៗជាច្រើនអំពីការងារបម្រើផ្ទាល់ខ្លួនដែលកើតឡើងទូទាំងតំបន់ យើងបានរកឃើញថា នៅតែមានការយល់ច្រឡំ និងភាពពុំប្រាកដប្រជាមួយចំនួនអំពីរបៀបអនុវត្តការងារបម្រើពិតឲ្យមានជោគជ័យ ។
នៅក្នុងគេហទំព័រ ministering.lds.org យើងរៀនថា « ការងារបម្រើគឺជាការរៀន ហើយមើលថែដល់សេចក្ដីត្រូវការរបស់មនុស្សដទៃ ។ វាគឺជាការធ្វើកិច្ចការរបស់ព្រះអម្ចាស់ ។ នៅពេលយើងធ្វើការងារបម្រើ យើងកំពុងតំណាងឲ្យព្រះយេស៊ូវគ្រីស្ទ និងដើរតួជាភ្នាក់ងាររបស់ទ្រង់ដើម្បីមើលថែ លើកស្ទួយ ហើយពង្រឹងដល់មនុស្សជុំវិញខ្លួនយើង » ។
ការងារបម្រើគឺជាការរៀន ហើយមើលថែដល់សេចក្ដីត្រូវការរបស់មនុស្សដទៃ ។ វាគឺជាការធ្វើកិច្ចការរបស់ព្រះអម្ចាស់ ។ នៅពេលយើងធ្វើការងារបម្រើ យើងកំពុងតំណាងឲ្យព្រះយេស៊ូវគ្រីស្ទ និងដើរតួជាភ្នាក់ងាររបស់ទ្រង់ដើម្បីមើលថែ លើកស្ទួយ ហើយពង្រឹងដល់មនុស្សជុំវិញខ្លួនយើង។
ministering.lds.org
ដើម្បីជាជំនួយដល់ការយល់ដឹង នៅក្នុងការប្រជុំភាពជាអ្នកដឹកនាំមួយចំនួនដែលខ្ញុំបានចូលរួមជាមួយនឹងប្រធានស្តេក យើងមានការសន្ទនាដូចតទៅនេះ ៖ យើងបានសុំឲ្យគណៈប្រធានស្តេក ស្មៀន និងលេខាប្រតិបត្តិឲ្យគិតពីសមាជិកគ្រួសារ ឬបុគ្គលដែលពុំសូវសកម្មនៅក្នុងវួដរបស់ពួកគាត់ ដែលពួកគាត់ស្គាល់ជិតស្និទ្ធ ។ យើងបានសុំឲ្យពួកគេគិតពីមនុស្សដែលពួកគាត់បានធ្វើការជាមួយនៅក្នុងការហៅមួយកាលពីមុន ។ យើងបាននិយាយថា វាអាចជាអ្នកជិតខាង ឬមិត្តស្និទ្ធស្នាលម្នាក់របស់គ្រួសារ វាអាចជាមនុស្សម្នាក់ដែលធ្លាប់ជាថ្នាក់ដឹកនាំក្នុងព្រះវិហារ ឬវាអាចជាអ្នកប្រែចិត្តជឿថ្មីម្នាក់ដែលបានវង្វេងផ្លូវរបស់គាត់ ឬនាង ។
បន្ទាប់មក យើងបានសុំឲ្យពួកគាត់ពិចារណាថា ប្រសិនបើពួកគាត់អាចមានការចាត់តាំងតែមួយសម្រាប់ការងារបម្រើ ក្នុងចំណោមគ្រួសារ ឬបុគ្គលទាំងនេះ តើនរណាម្នាក់ដែលពួកគាត់អាចជួយ ហើយផ្ដល់ពរជ័យបានច្រើនបំផុត ? តើនរណាទៅដែលទំនងជាឆ្លើយតបយ៉ាងវិជ្ជមានបំផុត ? ហើយប្រសិនបើយើងបានធ្វើការងារបម្រើដ៏ពិតប្រាកដ តើនរណាទៅដែលពួកគាត់គិតថា អាចត្រឡប់មកវិញ ហើយរីករាយនឹងពរជ័យនៃការចូលរួមនៅក្នុងដំណឹងល្អរបស់ព្រះយេស៊ូវគ្រីស្ទជាថ្មីម្ដងទៀតនោះ ?
បន្ទាប់មក យើងបានសុំឲ្យបុគ្គលម្នាក់ៗចែកចាយពីមនុស្សដែលពួកគាត់ទទួលបានការបំផុសគំនិតឲ្យផ្ដល់ការងារបម្រើ ។ ជាទូទៅ ថ្នាក់ដឹកនាំគ្រប់រូបបានទទួលបំផុតគំនិតមួយពីមនុស្សម្នាក់ ។ ភាគច្រើន ពួកគាត់បាននិយាយថា ពួកគាត់បានខ្វល់ខ្វាយពីក្រុមគ្រួសារ ឬបុគ្គលទាំងនេះយូរហើយ ហើយថាពួកគាត់មានបំណងចង់ធ្វើការងារបម្រើដល់ពួកគេ ។ ពេលខ្លះទៀត ពួកគាត់បាននិយាយថា ពួកគាត់បានចាត់មនុស្សដទៃឲ្យធ្វើការងារបម្រើនោះរួចហើយ ប៉ុន្តែឥឡូវនេះដោយសារតែពួកគាត់បានគិតពីគ្រួសារ ឬ បុគ្គលនោះជាថ្មី នោះពួកគាត់បានទទួលអារម្មណ៍ថាចាំបាច់ត្រូវធ្វើការងារបម្រើដោយផ្ទាល់ទៅកាន់ពួកគេ ។
នៅពេលយើងបានសួរថ្នាក់ដឹកនាំទាំងនោះពីអារម្មណ៍របស់ពួកគាត់ចំពោះបុគ្គល និងក្រុមគ្រួសារទាំងនេះ ជាទូទៅ ពួកគាត់បាននិយាយថា ពួកគាត់ស្រឡាញ់ពួកគេ ហើយបានបង្ហាញអារម្មណ៍ថា ពួកគាត់ចង់ជួយពួកគេយ៉ាងខ្លាំង ។ ពួកគាត់ទាំងអស់គ្នាបានទទួលអារម្មណ៍ថា ការងារបម្រើចំពោះក្រុមគ្រួសារទាំងនេះនឹងក្លាយជាពរជ័យមួយសម្រាប់ពួកគាត់ ដៃគូការងារបម្រើរបស់ពួកគាត់ និងចំពោះក្រុមគ្រួសារទាំងនោះ ។
បន្ទាប់មក យើងបានសួរថា « តើការណ៍នេះអាចត្រូវបានអនុវត្តនៅក្នុងស្ដេក ឬមណ្ឌលរបស់អ្នកតាមរបៀបណា ? តើអ្នកអាចមានការសន្ទនាដូចគ្នានេះជាមួយនឹងសមាជិកនៃក្រុមប្រឹក្សាស្តេកដែរឬទេ ? តើអ្នកអាចមានការសន្ទនាដូចគ្នានេះជាមួយគណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះដែរឬទេ ? តើប្រធានកូរ៉ុមអែលឌើរ ឬប្រធានសមាគមសង្គ្រោះអាចមានការសន្ទនានេះជាមួយនឹងសមាជិករបស់ពួកគាត់បានដែរឬទេ ?
សូមគិតពីអ្វីដែលនឹងកើតឡើងនៅក្នុងវួដ និងសាខារបស់យើង ប្រសិនបើការចាត់តាំងផ្ដួចផ្ដើមការងារបម្រើរបស់យើងត្រូវបានធ្វើឡើងដោយផ្អែកទៅលើបំណងប្រាថ្នារបស់ថ្នាក់ដឹកនាំ និងសមាជិកដើម្បីផ្ដល់ពរជ័យដល់មនុស្សដទៃ ។ ការចាត់តាំងមកពីថ្នាក់ដឹកនាំកូរ៉ុមអែលឌើរ និងសមាគមសង្គ្រោះអាចត្រូវបានធ្វើឡើង ក្រោយពីការប្រឹក្សាជាមួយនឹងបងប្អូនប្រុសស្រីរបស់ពួកគាត់ រួចហើយប្រឹក្សាជាមួយនឹងប៊ីស្សព ។ ដៃគូអាចត្រូវបានចាត់តាំងដើម្បីទទួលបានពរជ័យតាមរយៈបទពិសោធន៍នោះ ។
ហើយបើសិនជាអ្នកត្រូវធ្វើការអស់មួយជីវិតអ្នក…ហើយគ្រាន់តែនាំព្រលឹងតែមួយគត់មករកយើង នោះអ្នកនឹងមានសេចក្ដីអំណរដ៏មហិមាជាមួយអ្នកនោះនៅក្នុងនគរនៃព្រះវរបិតារបស់យើង ។
គោលលទ្ធិ និង សេចក្ដី សញ្ញា ១៨:១៥
នៅពេលប្រធានណិលសុនបានបង្រៀនដល់សាសនាចក្រអំពីការងារបម្រើតាមរបៀបដែលខ្ពស់ជាង ហើយបរិសុទ្ធជាង នោះលោកបានដកស្រង់បទគម្ពីរដ៏មានអនុភាពទាំងនេះ ៖ « ត្រូវឲ្យស្រឡាញ់ព្រះអម្ចាស់ ជាព្រះនៃអ្នកឲ្យអស់អំពីចិត្ត អស់អំពីព្រលឹង ហើយអស់អំពីគំនិតឯង » ហើយ« ចូរឲ្យអ្នកស្រឡាញ់អ្នកជិតខាង ដូចខ្លួនឯង » ។១នៅក្នុងស្មារតីនោះ ព្រះយេស៊ូវក៏បានបង្រៀនដែរថា « អ្នករាល់គ្នាជាអ្នកដែលយើងបានរើសដើម្បីធ្វើការងារបម្រើដល់ប្រជាជននេះ » ។២
ខ្ញុំមានទីបន្ទាល់ដ៏រឹងមាំថា នៅពេលយើងធ្វើតាមការអញ្ជើញរបស់ព្យាការីនៃព្រះដើម្បីធ្វើការងារបម្រើតាមរបៀបដែលខ្ពស់ជាង ហើយបរិសុទ្ធជាង នៅពេលយើងអធិស្ឋាន ហើយស្វែងរកការដឹកនាំ រួចហើយធ្វើតាមការបំផុសគំនិតទាំងនោះ នៅពេលយើងបង្ហាញសេចក្ដីស្រឡាញ់ដូចជាព្រះគ្រីស្ទចំពោះមនុស្សដែលយើងធ្វើការងារបម្រើ ហើយខិតខំស្វែងរកវិធីដើម្បីផ្ដល់ពរជ័យដល់ពួកគេ ហើយពង្រឹងសេចក្ដីជំនឿរបស់ពួកគេជាថ្មី រហូតដល់ពួកគេនឹងចង់ត្រឡប់មកវិញដោយឯកឯង ហើយចូលរួមនឹងយើង ។ អំណរដែលយើងនឹងមាន នៅពេលមិត្ត មនុស្សជាទីស្រឡាញ់ និងអ្នកជិតខាងរបស់យើងត្រឡប់មកវិញគឺដូចគ្នានឹងអារម្មណ៍ដែលបានពិពណ៌នានៅក្នុងបទគម្ពីរ« ហើយបើសិនជាអ្នកត្រូវធ្វើការអស់មួយជីវិតអ្នក…ហើយគ្រាន់តែនាំព្រលឹងតែមួយគត់មករកយើង នោះអ្នកនឹងមានសេចក្ដីអំណរដ៏មហិមាជាមួយអ្នកនោះនៅក្នុងនគរនៃព្រះវរបិតារបស់យើង » ។៣
អែលឌើរ ជែហ្វ្រី អ័រ ហូឡិន បានបង្រៀនថា « បងប្អូនប្រុសស្រីទាំងឡាយ យើងទទួលបានឱកាសដែលបានបញ្ជូនមកពីស្ថានសួគ៌នៅទូទាំងសាសនាចក្រ…ដើម្បីបង្ហាញពី ‹ សាសនាបរិសុទ្ធនៅចំពោះព្រះ ›—‹ ដើម្បីរែកបន្ទុកគ្នាទៅវិញទៅមក ដើម្បីពួកគេអាចបានស្រាល និងលួងលោមចិត្តដល់អស់អ្នកដែលត្រូវការការលួងលោមចិត្ត › បម្រើដល់ស្ត្រីមេម៉ាយ និងកុមារកំព្រាអ្នកដែលរៀបការ និងអ្នកនៅលីវ ទាំងអ្នករឹងមាំ និងអ្នកមានបញ្ហា ទាំងអ្នករងទុក្ខ និងអ្នកមានសុខភាពល្អ ទាំងអ្នកសប្បាយ និងអ្នកកើតទុក្ខ—ជារួមគឺពួកយើងទាំងអស់គ្នា ពួកយើងម្នាក់ៗ ដោយសារយើងទាំងអស់គ្នាត្រូវការអារម្មណ៍មិត្តភាពកក់ក្ដៅ ហើយស្ដាប់ឮការប្រកាសពីសេចក្ដីជំនឿដោយមុតមាំ » ។៤
កំណត់ចំណាំ ៖
១ សូមមើល ម៉ាថាយ ២២:៣៧, ៣៩
២ សូមមើល នីហ្វៃទី ៣ ១៣:២៥
៣ សូមមើល គោលលទ្ធិ និង សេចក្ដី សញ្ញា ១៨:១៥
៤ ជែហ្វ្រី អ័រ ហូឡិន « នៅជាមួយ និង ចម្រើនកម្លាំងពួកគេ » សន្និសីទទូទៅ ខែមេសា ឆ្នាំ២០១៨ ។