ចាប់តាំងពីការគាំទ្ររបស់ប្រធាន រ័សុល អិម ណិលសុន នៅក្នុងខែមេសា ឆ្នាំ ២០១៨ លោកបានអញ្ជើញយើងយ៉ាងខ្ជាប់ខ្ជួនឲ្យរស់នៅកាន់តែបរិសុទ្ធ និងកាន់តែពិសិដ្ឋ ហើយពង្រីកទស្សនវិស័យរបស់យើងហួសពីឧបសគ្គនានាក្នុងជីវិតនេះទៅដល់ឱកាសដ៏អស់កល្បជានិច្ច ។ លោកមានប្រសាសន៍ថា « សារលិខិតរបស់យើងទៅកាន់ពិភពលោក គឺសាមញ្ញ ហើយដោយស្មោះ ៖ ពួកយើងសូមអញ្ជើញបុត្រាបុត្រីរបស់ព្រះទាំងអស់ទាំងនៅសង្ខាងនៃវាំងននឲ្យមករកព្រះអង្គសង្គ្រោះ ទទួលយកពរជ័យនៃព្រះវិហារបរិសុទ្ធដ៏បរិសុទ្ធ ទទួលបានអំណរយូរអង្វែង និងសក្ដិសមសម្រាប់ជីវិតអស់កល្បជានិច្ច » ។1
មួយឆ្នាំក្រោយមកនៅក្នុងសន្និសីទទូទៅ លោកបានបង្រៀនថា « ព្រះរាជបំណងរបស់ព្រះគួរតែជាគោលបំណងរបស់យើង ។ ទ្រង់សព្វព្រះទ័យឲ្យកូនចៅរបស់ទ្រង់ជ្រើសរើសត្រឡប់ទៅរកទ្រង់វិញ បានរៀបចំខ្លួន មានគុណសម្បត្តិ ទទួលអំណោយទានពិសិដ្ឋ បានផ្សារភ្ជាប់ ហើយស្មោះត្រង់ចំពោះសេចក្ដីសញ្ញាដែលបានធ្វើឡើងនៅក្នុងព្រះវិហារបរិសុទ្ធ ។
ពេលធំឡើងនៅក្នុងប្រទេសអូស្ត្រាលី ព្រះវិហារបរិសុទ្ធដែលនៅជិតបំផុតរបស់យើង គឺព្រះវិហារបរិសុទ្ធ ហាមីលតុន ប្រទេស នូវវែលសេឡង់ ។ ក្នុងនាមជាអ្នកផ្សព្វផ្សាយសាសនាថ្មីនៅខែមករា ឆ្នាំ ១៩៧៦ ខ្ញុំបានទទួលអំណោយទានពិសិដ្ឋរបស់ខ្ញុំនៅទីនោះ ។ ខ្ញុំនៅតែចងចាំអំពីភាពស្ងប់ស្ងាត់ និងភាពសុខសាន្ដនៅក្នុងដំណាក់នៃព្រះអម្ចាស់ ។ ខ្ញុំចងចាំអំពីអារម្មណ៍ដ៏ច្បាស់ថា ខ្ញុំត្រូវការដៃគូអស់កល្បជានិច្ចដើម្បីទទួលបានពរជ័យពេញលេញនៃដំណឹងល្អដែលបានផ្ដល់ឲ្យ ។
នៅក្នុងខែមករា ឆ្នាំ ១៩៧៩ នៅពេលខ្ញុំត្រឡប់ទៅវិញជាមួយ ម៉ាស៊ីន ថាចឈើ ជានារីដ៏ស្រស់ស្អាត និងសុចរិតបំផុតមកពីវួដនៅឯផ្ទះរបស់ខ្ញុំ ហើយពួកយើងបានផ្សារភ្ជាប់សម្រាប់ជីវិតនេះ និងអស់កល្បជានិច្ច ។ ពួកយើងអស្ចារ្យ និងរីករាយនៅក្នុងសេចក្ដីសញ្ញាដែលយើងបានធ្វើជាមួយគ្នា និងព្រះអម្ចាស់ ។
« សារលិខិតរបស់យើងទៅកាន់ពិភពលោក គឺសាមញ្ញ ហើយដោយស្មោះ ៖ ពួកយើងសូមអញ្ជើញបុត្រាបុត្រីរបស់ព្រះទាំងអស់ទាំងនៅសង្ខាងនៃវាំងននឲ្យមករកព្រះអង្គសង្គ្រោះ ទទួលយកពរជ័យនៃព្រះវិហារបរិសុទ្ធដ៏បរិសុទ្ធ ទទួលបានអំណរយូរអង្វែង និងសក្ដិសមសម្រាប់ជីវិតអស់កល្បជានិច្ច »
ប្រធាន រ័សុល អិម ណិលសុន
អ្វីដែលយើងរីករាយរយៈពេលជិត ៦ ឆ្នាំក្រោយមក គឺនៅពេលព្រះវិហារបរិសុទ្ធស៊ីឌនី អូស្ត្រាលី ត្រូវបានឧទ្ទិសឆ្លងនៅក្នុងខែកញ្ញា ឆ្នាំ ១៩៨៤ ។ យើងបានបើកឡានចម្ងាយ ១១០០ គីឡូម៉ែត្រទៅចូលរួមការឧទ្ទិសឆ្លងព្រះវិហារបរិសុទ្ធ ។ ចាប់ពីពេលនោះមក ពួកបរិសុទ្ធស្មោះត្រង់មកពីមែលប៊ើន និងប្រ៊ីសបាន បានទៅចូលរួមជាទៀងទាត់នៅក្នុងការធ្វើដំណើរតាមឡានក្រុងនៅចុងសប្ដាហ៍ ( រយៈពេល ១២ ម៉ោងទៅមក ) ទៅកាន់ព្រះវិហារបរិសុទ្ធស៊ីឌនី អូស្ត្រាលី – ដោយចេញដំណើរបន្ទាប់ពីចប់ការងារថ្ងៃសុក្រ ចំណាយពេលថ្ងៃសៅរ៏ នៅក្នុងព្រះវិហារបរិសុទ្ធ និងធ្វើដំណើរមកវិញនៅយប់ថ្ងៃសៅរ៏ ដើម្បីមកឲ្យទាន់ពេលទៅព្រះវិហារនៅថ្ងៃអាទិត្យ ។
នៅក្នុងឆ្នាំ ១៩៨៨ យើងបានផ្លាស់ទៅកាន់ទីក្រុងភើស អូស្ដ្រាលីដើម្បីមានឱកាសការងារថ្មី ។ ព្រះវិហារបរិសុទ្ធ ស៊ីឌនី អូស្ត្រាលី កាលពេលនោះមានចម្ងាយ ៤០០០ គីឡូម៉ែត្រពីផ្ទះរបស់យើង ។ យើងបានធ្វើការតាំងចិត្តជាគ្រួសារដើម្បីបើកឡានទៅព្រះវិហារបរិសុទ្ធរៀងរាល់ពីរឆ្នាំម្ដង ។ ពេលទៅដល់ទីនោះ យើងនឹងចំណាយពេលពេញមួយសប្ដាហ៍ចូលរួមពិធីបរិសុទ្ធនានាក្នុងព្រះវិហារបរិសុទ្ធ ។ កូនៗរបស់ខ្ញុំនៅតែមានការចងចាំដ៏រីករាយអំពីគ្រាដ៏ពិសិដ្ឋបំផុត ដែលយើងមានជាមួយគ្នានៅក្នុងឡានក្នុងរយៈពេលបីថ្ងៃកន្លះធ្វើដំណើរទៅមកឆ្លងកាត់ប្រទេសអូស្ត្រាលី ។
នៅក្នុងតំបន់អាស៊ី យើងកំពុងរស់នៅក្នុងពេលមួយនៃការសាងសង់ព្រះវិហារបរិសុទ្ធជាប្រវត្តិសាស្ត្រ ។ នៅក្នុងខែមករា ឆ្នាំ ២០១៩ ដីត្រូវបានបំបែក ហើយទីតាំងត្រូវបានឧទ្ទិសសម្រាប់ព្រះវិហារបរិសុទ្ធបាំងកកប្រទេសថៃ ។ នៅក្នុងខែមេសា ឆ្នាំ ២០១៨ ប្រធាន ណិលសុនបានប្រកាសអំពីព្រះវិហារបរិសុទ្ធប៊ែងហ្គាឡូ ប្រទេសឥណ្ឌា ។ ប្រាំមួយខែក្រោយមក លោកបានប្រកាសអំពីព្រះវិហារបរិសុទ្ធកម្ពុជា ។ នៅខែកក្កដា ឆ្នាំ ២០១៩ ព្រះវិហារបរិសុទ្ធហុងកុងត្រូវបានបិទសម្រាប់ការជួសជុលខ្នាតធំ ។ ការវិនិយោគទៅលើព្រះវិហារបរិសុទ្ធជាបន្តបន្ទាប់នេះ គឺបន្ដធ្វើជាសាក្សីអំពីសារៈសំខាន់នៃពិធីបរិសុទ្ធព្រះវិហារបរិសុទ្ធដ៏ពិសិដ្ឋ និងការថ្វាយបង្គំក្នុងព្រះវិហារបរិសុទ្ធ ។
ប្រធាន ណិលសុនក៏បានបង្រៀនថា « ការសាងសង់ និងការថែទាំព្រះវិហារបរិសុទ្ធពុំអាចផ្លាស់ប្ដូរជីវិតរបស់បងប្អូនទេ ប៉ុន្តែការចំណាយពេលរបស់បងប្អូននៅក្នុងព្រះវិហារបរិសុទ្ធនឹងផ្លាស់ប្ដូរជីវិតបងប្អូនដ៏ពិត ។ ចំពោះបងប្អូនដែលបានអវត្តមានទៅព្រះវិហារបរិសុទ្ធជាយូរ ខ្ញុំសូមលើកទឹកចិត្តបងប្អូនឲ្យរៀបចំខ្លួន ហើយត្រឡប់មកវិញឲ្យបានឆាប់បំផុតតាមដែលអាចធ្វើទៅបាន ។ បន្ទាប់មកខ្ញុំអញ្ជើញបងប្អូនឲ្យថ្វាយបង្គំនៅក្នុងព្រះវិហារបរិសុទ្ធ ហើយអធិស្ឋានដើម្បីដឹងក្នុងចិត្តពីសេចក្ដីស្រឡាញ់ដ៏និរន្ដរ៍របស់ព្រះអង្គសង្គ្រោះមានចំពោះបងប្អូន ដើម្បីបងប្អូនម្នាក់ៗអាចទទួលបានទីបន្ទាល់ផ្ទាល់ខ្លួន ថាទ្រង់បន្ដដឹកនាំកិច្ចការដ៏ពិសិដ្ឋ និងនិរន្ដរ៍នេះដោយផ្ទាល់ » ។៣
នៅក្នុងតំបន់អាស៊ី យើងចាំបាច់ត្រូវរៀបចំជាបន្ទាន់សម្រាប់ពរជ័យព្រះវិហារបរិសុទ្ធនាពេលអនាគត ។ របៀបដ៏សំខាន់ពីរដែលយើងអាចរៀបចំខ្លួន រួមមាន ៖
- ការថែទាំបណ្ណព្រះវិហារបរិសុទ្ធសុពលភាពមួយ ។
ប្រធាន ណិលសុនបានផ្ដល់អំណោយមួយដល់ព្រះវិហារទាំងមូល នៅពេលលោកបានចែកចាយអំពីសំណួរទទួលបណ្ណចូលព្រះវិហារបរិសុទ្ធសុពលភាព ជាចំណែកនៃសុន្ទរកថាបញ្ចប់របស់លោកនៅក្នុងសន្និសីទខែតុលា ឆ្នាំ ២០១៩ ។ សំណួរទាំងនេះអាចជួយយើងប្រែចិត្ត ហើយរៀបចំខ្លួនដើម្បីមានការសម្ភាសទទួលបណ្ណពីអ្នកដឹកនាំសាសនា/វួដ ឬស្ដេក/បេសកកម្ម ។ យើងលើកទឹកចិត្តសមាជិកពេញវ័យទាំងអស់ រួមទាំងអ្នកដែលបានទៅព្រះវិហារបរិសុទ្ធរួចហើយ គួរទៅធ្វើបណ្ណចូលព្រះវិហារបរិសុទ្ធរបស់ពួកគេជាថ្មីពីមុនវាផុតកំណត់ ។ ទោះជាបងប្អូនមានអារម្មណ៍ថាពុំមានភាពសក្ដិសមក្ដី សូមជួបនឹងប្រធានសាខា ឬប៊ីស្សពរបស់បងប្អូន ដែលពួកគាត់រីករាយនឹងជួយបងប្អូនរៀបចំខ្លួន ។
នៅក្នុងសុន្ទរកថាបញ្ចប់ដដែលនោះ ប្រធាន ណិលសុន បានមានប្រសាសន៍ថា « ខ្ញុំចង់ថ្លែងទៅកាន់យុវវ័យរបស់យើង ។ យើងលើកទឹកចិត្តអ្នកឲ្យមានភាពសក្ដិសមដើម្បីកាន់បណ្ណចូលព្រះវិហារបរិសុទ្ធប្រើប្រាស់មានកំណត់ ។ អ្នកនឹងត្រូវសួរតែសំណួរទាំងឡាយណាដែលទាក់ទងនឹងអ្នកនៅក្នុងការរៀបចំខ្លួនសម្រាប់ពិធីបរិសុទ្ធនៃពិធីបុណ្យជ្រមុជទឹក និងពិធីបញ្ជាក់ជំនួសប៉ុណ្ណោះ ។ យើងមានអំណរគុណណាស់ចំពោះភាពសក្ដិសម និងឆន្ទៈរបស់បងប្អូនដើម្បីចូលរួមនៅក្នុងកិច្ចការព្រះវិហារបរិសុទ្ធដ៏ពិសិដ្ឋនោះ » ។៤
- ពង្សប្រវត្តិ
ប្រធាន និង ស៊ីស្ទើរ ណិលសុន បន្ដដាក់គោលដៅដ៏ធំមួយនៅក្នុងកិច្ចការពង្សប្រវត្តិផ្ទាល់ខ្លួនរបស់ពួកលោក ។ ប្រធាន ណិលសុនបានរំឭកយើងជាទៀងទាត់អំពីសារៈសំខាន់នៃការងារបម្រើដល់ក្រុមគ្រួសាររបស់យើងនៅទាំងសង្ខាងនៃវាំងនន ។ ខ្ញុំដឹងចេញពីបទពិសោធន៍ផ្ទាល់ខ្លួននូវអំណរនៃការស្វែងរកជីដូនជីតារបស់ខ្ញុំ ដោយកត់ត្រាព័ត៌មានលម្អិត បញ្ជូនឈ្មោះតាមរយៈការស្វែងរកគ្រួសារ ហើយបន្ទាប់មកចូលរួមក្នុងពិធីបរិសុទ្ធដ៏ពិសិដ្ឋក្នុងព្រះវិហារបរិសុទ្ធ ។
វាគឺជាការអធិស្ឋានរបស់ខ្ញុំសុំឲ្យក្រុមគ្រួសារក្នុងគេហដ្ឋាន វួដ និងសាខារបស់យើងដាក់អាទិភាពបណ្ណចូលព្រះវិហារបរិសុទ្ធ ហើយដាក់បញ្ជូនឈ្មោះគ្រួសារបួនជំនាន់របស់យើង ដើម្បីយើងអាចមានភាពសក្ដិសមចំពោះពរជ័យទាំងអស់ ដែលនឹងកើតមាន នៅពេលព្រះវិហារបរិសុទ្ធថ្មី ត្រូវបានឧទ្ទិសឆ្លងនៅទូទាំងទឹកដីអាស៊ីដ៏ស្រស់ស្អាត ។ ■
កំណត់ចំណាំ ៖
១. ប្រធាន រ័សុល អិម ណិលសុន, « ចូរយើងខិតខំទៅ » សន្និសីទទូទៅ ខែ មេសា ឆ្នាំ ២០១៨ ។
២. ប្រធាន រ័សុល អិម ណិលសុន « សុន្ទរកថាបញ្ចប់ » សន្និសីទទូទៅ ខែមេសា ឆ្នាំ ២០១៩ ។
៣. ប្រធាន រ័សុល អិម ណិលសុន« ការក្លាយជាពួកបរិសុទ្ធថ្ងៃចុងក្រោយគំរូ »សន្និសីទទូទៅ ខែ តុលា ឆ្នាំ ២០១៨ ។
៤. ប្រធាន រ័សុល អិម ណិលសុន « សុន្ទរកថាបញ្ចប់ » សន្និសីទទូទៅ ខែមេសា ឆ្នាំ ២០១៩ ។