សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយមានជំនឿដូចៗគ្នាជាច្រើនជាមួយនឹងពួកគ្រីស្ទានដទៃទៀត ។ យើងសូមប្រកាសជាឧឡារិកថា ព្រះយេស៊ូវគ្រីស្ទគឺជាព្រះរាជបុត្រារបស់ព្រះ ដែលបានរស់នៅក្នុងចំណោមមនុស្សលោក បានធ្វើដង្វាយធួនសម្រាប់អំពើបាបនៃពិភពលោក ហើយបន្ទាប់ពីទ្រង់សុគត បានមានព្រះជន្មរស់ឡើងវិញជាអង្គរុងរឿង និងបានរស់ឡើងវិញ ។ យើងសូមប្រកាសបន្ថែមទៀតថា សព្វថ្ងៃនេះទ្រង់មានព្រះជន្មនៅរស់ ហើយថាទ្រង់នឹងយាងមកកាន់ផែនដីនេះម្តងទៀតនៅថ្ងៃណាមួយ ។
ខណៈដែលសេចក្តីជំនឿរបស់យើងមានខ្លះដូចគ្នា ក៏មានខ្លះមិនដូចគ្នាផងដែរ ។ ហើយការយល់ពីភាពខុសគ្នានេះអាចផ្តល់ជាទស្សនៈវិស័យដ៏សំខាន់ ដែលនឹងពង្រឹងសេចក្តីជំនឿរបស់យើង និងផ្តល់ជាទិសដៅដឹកនាំនៅក្នុងជីវិតរបស់យើង ។ ភាពខុសគ្នាមួយក្នុងចំណោមនោះគឺសេចក្តីជំនឿរបស់យើងថា សាសនាចក្រដែលបានស្ថាបនាឡើងដោយព្រះយេស៊ូវគ្រីស្ទ បានបាត់បង់សេចក្តីពិតពីផែនដីអស់មួយរយៈ ហើយក៏ត្រូវបានស្តារឡើងវិញមុនពេលទ្រង់យាងមកម្តងទៀត ។
ព្យាការីបុរាណបានព្យាករអំពីព្រឹត្តិការណ៍ទាំងនេះ ។ ព្យាការីអេម៉ុសនៃព្រះគម្ពីសញ្ញាចាស់បានមានប្រសាសន៍ថា ៖ « មើលមានគ្រាមក…ដែលយើងនឹងចាត់ប្រើអំណត់មកក្នុងស្រុកមិនមែនជាអំណត់ដែលអត់អាហារ ឬដែលស្រេកទឹកទេ គឺជាអំណត់ខាងឯការឮព្រះបន្ទូលនៃព្រះយេហូវ៉ាវិញ… [ ហើយ ] គេនឹងរត់ច្រវាត់ខំរកព្រះបន្ទូលនៃព្រះយេហូវ៉ា តែនឹងមិនប្រទះឡើយ » ។1 ក្រោយមកសាវកប៉ុលបានព្រមានពួកបរិសុទ្ធនៅក្នុងថែស្សាឡូនីចថា ព្រះអង្គសង្រ្គោះនឹងមិនយាងមកម្តងទៀតឡើយ « ទាល់តែមានសេចក្តីក្បត់សាសនាមកជាមុនសិន » ។2
បន្ទាប់ពីការសុគតរបស់ព្រះយេស៊ូវគ្រីស្ទ សមាជិកនៃសាសនាចក្រជាច្រើនត្រូវបានគេបៀតបៀន ខណៈដែលអ្នកដទៃទៀតបានរសាត់ចេញពីគោលការណ៍ដែលបានបង្រៀនដោយព្រះយេស៊ូវ គ្រីស្ទ និងសាវករបស់ទ្រង់ ។ សាវកទាំងឡាយត្រូវបានសម្លាប់ម្ដងម្នាក់ៗ ហើយសិទ្ធិអំណាចបព្វជិតភាព— រួមទាំងកូនសោដើម្បីដឹកនាំ និងទទួលវិវរណៈសម្រាប់សាសនាចក្រ — ត្រូវបានបាត់បង់ពីផែនដី ។ ដោយគ្មានការណែនាំពីវិវរណៈ នោះក៏មានការភាន់ច្រឡំច្របូកច្របល់នៅក្នុងការបង្រៀនរបស់សាសនាចក្រ ។ ដំណឹងល្អដែលបានស្ថាបនាដោយព្រះយេស៊ូវ គ្រីស្ទត្រូវបានបាត់បង់ ប៉ុន្តែនៅសេសសល់មនុស្សល្អ និងសេចក្តីពិត ។
« ខ្ញុំសូមធានាថា វិវរណៈបន្ដមាននៅក្នុងសាសនាចក្រនេះ ហើយនឹងបន្ដមាននៅក្រោមការដឹកនាំរបស់ព្រះអម្ចាស់ រហូតដល់ ‹ គោលបំណងរបស់ព្រះនឹងបានសម្រេច ហើយព្រះយេហូវ៉ាដ៏មហិមា នឹងមានបន្ទូលថា កិច្ចការបានចប់សព្វគ្រប់ហើយ »
ប្រធាន រ័សុល អិម ណិលសុន
គ្រានេះ គឺត្រូវបានហៅថាជាការក្បត់សាសនាដ៏ធំ ។ អំឡុងពេលនេះ បុរសស្រ្តីជាច្រើនបានស្វែងរកនូវសេចក្តីពិត ប៉ុន្តែពួកគេមិនអាចរកឃើញ ។ មនុស្សល្អៗព្យាយាមយល់ និងបង្រៀនអំពីសេចក្តីពិត ប៉ុន្តែពួកគេមិនមានដំណឹងល្អ ឬសិទ្ធិអំណាចបព្វជិតភាពពេញលេញនោះទេ ។ ជាលទ្ធផលជំនាន់និមួយៗត្រូវបានទទួលរងឥទ្ធិពលដោយអ្វីដែលបានបន្តពីជំនាន់មុនៗ រួមទាំងការផ្លាស់ប្តូរដែលគ្មានសិទ្ធិអំណាចនៅក្នុងដំណឹងល្អរបស់ព្រះយេស៊ូវ គ្រីស្ទផងដែរ ។
អ្នកដែលទទួលការបំផុសគំនិតឲ្យស្តារព្រះវិហារឡើងវិញពីជំនាន់មុន ដូចជាម៉ាទីន លូធើរ និងចន ខាលវិន បានដឹងថាការអនុវត្ត និងគោលការណ៍មួយចំនួនត្រូវបានផ្លាស់ប្តូរ ឬបាត់បង់ ពួកគេព្យាយាមស្តារព្រះវិហារនានាដែលជារបស់ពួកគេឡើងវិញ ។ ទោះជាយ៉ាងណាក្តីដោយគ្មានសិទ្ធិអំណាចបព្វជិតភាពដំណឹងល្អនៃព្រះយេស៊ូវ គ្រីស្ទ មិនអាចវិលត្រឡប់មកវិញដូចដើមបានទេ ។ ការស្តារឡើងវិញត្រូវការជាចាំបាច់ ។
បន្ទាប់មក កាលពីពីររយឆ្នាំមុននៅដើមឆ្នាំ ១៨២០ ព្រះវរបិតាដែលគង់នៅស្ថានសួគ៍បានជ្រើសរើសព្យាការីម្នាក់ ដែលតាមរយៈលោក នោះដំណឹងល្អ សាសនាចក្រ និង សិទ្ធិអំណាចបព្វជិតភាពពីដើមត្រូវបានស្តារឡើងវិញ ។ ព្យាការីនោះមានឈ្មោះថា យ៉ូសែបស្មីធ ។ កាលពីក្មេង យ៉ូសែប បានមានការច្របូកច្របល់ដោយការបង្រៀនផ្សេងៗគ្នាក្នុងចំណោមព្រះវិហារជាច្រើននៅក្នុងតំបន់របស់លោក ហើយលោកចង់ដឹងថាមួយណាដែលត្រឹមត្រូវ ។ ដោយដឹងថាលោកខ្វះប្រាជ្ញា លោកក៏បានធ្វើតាមដំបូន្មានដែលបានរកឃើញនៅក្នុងព្រះគម្ពីរប៊ីបថា « តែបើអ្នករាល់គ្នាណាមួយខ្វះប្រាជ្ញា មានតែសូមដល់ព្រះ ដែលទ្រង់ប្រទានដល់មនុស្សទាំងអស់ដោយសទ្ធា ឥតបន្ទោសផង នោះទ្រង់នឹងប្រទានឲ្យ » ។3
នៅពេលយ៉ូសែបស្ម៊ីធអធិស្ឋានដើម្បីដឹងការពិត ព្រះវរបិតាសួគ៍ និងព្រះយេស៊ូវ គ្រីស្ទ បានលេចឡើងនៅចំពោះលោក ។ ព្រះយេស៊ូវបានប្រាប់យ៉ូសែប មិនឲ្យចូលរួមជាមួយព្រះវិហារណាមួយឡើយ « គេគោរពប្រតិបត្តិដល់យើងតែបបូរមាត់ទេ តែចិត្តគេនោះនៅឆ្ងាយពីយើងណាស់ គេបង្រៀនសេចក្តីដែលជាបញ្ញត្តិរបស់មនុស្សវិញ ដោយមានឫកពាជាអ្នកគោរពប្រតិបត្តិដល់ព្រះ ប៉ុន្តែមិនព្រមទទួលស្គាល់ព្រះចេស្តា ដែលមកដោយការគោរព ប្រតិបត្តិនោះទេ » ។4 បទពិសោធន៍ប្រកបដោយអព្ភូតហេតុនេះបានចាប់ផ្តើមអំឡុងពេលដែលសេចក្តីពិត ពិធីបរិសុទ្ធ និងពរជ័យទាំងអស់របស់ព្រះ បានកើតមានជាថ្មីចំពោះសមាជិកនៃសាសនាចក្រនៃព្រះយេស៊ូវ គ្រីស្ទ នៅផ្នែកទាំងសងខាងនៃវាំងនន ។
ពួកទេវតាបាននាំមកនូវសិទ្ធិអំណាចទេវភាពតាមរយៈព្យាការីយ៉ូសែបដែលបានស្តារសាសនាចក្រនៃព្រះយេស៊ូវ គ្រីស្ទ បានបំពេញតាមលំនាំដើម មានកូនសោ និងតំណែងទាំងឡាយនៃបព្វជិតភាពជំនាន់ដើម ។ ដោយបានដឹកនាំដោយការបំផុសគំនិត លោកបានបកប្រែព្រះគម្ពីរមរមន ។ ក្រោយមកវិវរណៈបន្ថែមត្រូវបានបោះពុម្ពនៅក្នុងគោលលទ្ធិ និង សេចក្តីសញ្ញា និងគម្ពីរមុក្ដាដ៏មានតម្លៃមហិមា ដើម្បីនាំមកនូវការរីកចម្រើនដល់អស់អ្នកដែលទទួលវា ។ ព្យាការីដ៏ទៃទៀត និងការដឹកនាំដ៏បំផុសគំនិត ក៏បានបន្តរហូតមកដល់ប្រធាន រ័សុល អិម ណិលសុន ដែលបានក្លាយជាព្យាការីនៅជំនាន់របស់យើង ។
ជាញឹកញាប់ប្រធាន ណិលសុន បានអធិប្បាយថាការស្តារឡើងវិញមិនមែនជាព្រឹត្តិការណ៍មួយទេ ប៉ុនែ្តជាដំណើរការដែលបន្តមានជានិច្ច ។ ក្នុងពេលថ្មីៗនេះ លោកបានមានប្រសាសន៍ថា « ខ្ញុំសូមធានាថា វិវរណៈបន្ដមាននៅក្នុងសាសនាចក្រនេះ ហើយនឹងបន្ដមាននៅក្រោមការដឹកនាំរបស់ព្រះអម្ចាស់ រហូតដល់ ‹ គោលបំណងរបស់ព្រះនឹងបានសម្រេច ហើយព្រះយេហូវ៉ាដ៏មហិមា នឹងមានបន្ទូលថា កិច្ចការបានចប់សព្វគ្រប់ហើយ › » ។5
គ្មានសិស្សដ៏ហ្មត់ចត់ណាម្នាក់នៅក្នុងប្រវត្តិសាស្រ្តសាសនាចក្រ ដែលអាចមើលទៅលើអត្រានៃការផ្លាស់ប្តូរក្នុងឆ្នាំថ្មីៗនេះ ហើយធ្វើការសរុបសេចក្តីបែបផ្សេងនោះទេ ។ ខ្ញុំសូមថ្លែងទីបន្ទាល់អំពីការស្តារឡើងវិញនៃដំណឹងល្អជាបន្ដបន្ទាប់ និងសាសនាចក្រនៃព្រះយេស៊ូវ គ្រីស្ទ និង ព្យាការីដែលនៅរស់ក្នុងជំនាន់របស់យើង ។ ■
កំណត់ចំណាំ
1. អម៉ុស ៨:១១-១២
2. ថែស្សាឡូនីច ទី២ ២:៣
3. យ៉ាកុប ១:៥
4. យ៉ូសែប ស្ម៊ីធ—ប្រវត្តិ ១:១៩ ។
5. រ័សុល អិម ណិលសុន « សុន្ទរកថាបញ្ចប់ » សន្និសីទទូទៅ ខែ តុលា ឆ្នាំ ២០១៩