សារលិខិតដ៏មានអានុភាពមួយមកពីប្រធាន ណិលសុន នៅក្នុងការបញ្ចប់សន្និសីទទូទៅថ្មីៗនេះ បានផ្ដល់ជាគន្លងដ៏សំខាន់មួយសម្រាប់ពួកបរិសុទ្ធថ្ងៃចុងក្រោយទាំងអស់ក្នុងការជួយប្រឈមនឹងអនាគតកាលដោយសេចក្ដីជំនឿ ហើយរង់ចាំការរស់នៅក្នុងជីវិតធម្មតាថ្មីមួយ ។ កាលយើងខិតជិតដល់ចុងឆ្នាំនេះ យើងអាចក្រឡេកមើលក្រោយ ហើយមើលឃើញព្រះហស្ដរបស់ព្រះអម្ចាស់ដែលបានដឹកនាំយើងឲ្យឆ្លងកាត់ការរាតត្បាតនៃជំងឺឆ្លងទូទាំងសកលនេះ ។ ព្រះហស្ដរបស់ទ្រង់ក៏កាយជាផ្លូវមួយឲ្យយើងរស់នៅដោយសេចក្ដីជំនឿ ហើយឱបក្រសោបអនាគតកាលដោយសុទិដ្ឋិនិយម ។
នៅក្នុងសន្និសីទទូទៅ ប្រធានណិលសុនបានមានប្រសាសន៍ថា លោកត្រូវបានដឹកនាំឲ្យមានការយល់ដឹងថ្មីមួយសម្រាប់ពាក្យ « អ៊ីស្រាអែល » ។ លោកបានពោលថា « ដោយមានជំនួយពីអ្នកប្រាជ្ញហេព្រើរពីររូប ខ្ញុំបានរៀនថា អត្ថន័យមួយជាភាសាហេព្រើរនៃពាក្យ អ៊ីស្រាអែល គឺ ‹ ទុកឲ្យព្រះឈ្នះ › ។ ដូច្នេះ ឈ្មោះរបស់ អ៊ីស្រាអែល សំដៅទៅលើបុគ្គលដែលស្ម័គ្រចិត្តឲ្យព្រះឈ្នះលើជីវិតរបស់គាត់ ។ គោលគំនិតនេះបានអង្រួនព្រលឹងខ្ញុំ ! »1
កាលយើងចូលរួមជាមួយនឹងព្យាការីរបស់យើងដើម្បីពិចារណាពីអត្ថន័យថ្មីនេះ និងស្វែងរកវិធីដើម្បីអនុវត្តនិយមន័យថ្មីនេះនៅក្នុងជីវិតប្រចាំថ្ងៃរបស់យើង នោះយើងនឹងរកឃើញកម្រិតថ្មីនៃសុភមង្គល និងសេចក្ដីសុខសាន្ដនៅក្នុងព្រះគ្រីស្ទ ។ សូមពិចារណាជាមួយខ្ញុំនូវវិធីបីយ៉ាងដើម្បី « ទុកឲ្យព្រះឈ្នះ » នៅក្នុងជីវិតរបស់យើង ។
- ការទុកឲ្យព្រះឈ្នះតាមរយៈការរួបរួមសាមគ្គីគ្នា
នៅពេលព្រះអង្គសង្គ្រោះបានបង្ហាញព្រះកាយដល់ប្រជាជននីហ្វៃ ហើយបានបង្រៀនពួកគេអំពីគោលលទ្ធិរបស់ទ្រង់ និងបានបង្ហាញពួកគេពីរបៀបដ៏ត្រឹមត្រូវដើម្បីធ្វើពិធីបរិសុទ្ធ នោះទ្រង់បានប្រើពាក្យ « …ពុំត្រូវមានការប្រកែកគ្នានៅក្នុងចំណោមអ្នករាល់គ្នាឡើយ » ។2 ទ្រង់បានមានបន្ទូលដូច្នេះ ដោយសារការមិនរួបរួមសាមគ្គីគ្នា និងការប្រកែកគ្នាបានមានទូទៅនៅក្នុងចំណោមពួកគេ ។ មានតែពេលប្រជាជនបានរួមសាមគ្គីគ្នា និងគ្មានការប្រកែកគ្នាប៉ុណ្ណោះ ទើបពួកគេអាចក្លាយទៅជាតែមួយជាមួយព្រះគ្រីស្ទ ហើយទទួលបានការដឹកនាំមកពីព្រះវិញ្ញាណបរិសុទ្ធ ។ ២០០ ឆ្នាំនៃសេចក្ដីសុខសាន្ដបានកើតជាផលផ្លែ ។ ការអញ្ជើញរបស់ខ្ញុំសម្រាប់មនុស្សទាំងអស់គឺ ឲ្យរួបរួមសាមគ្គីគ្នា ។ ព្រះអម្ចាស់បានដាស់តឿនយើងឲ្យក្លាយជា « តែមួយ » ។ ទ្រង់ក៏បានមានបន្ទូលដែរថា « …ហើយបើសិនជាអ្នករាល់គ្នាមិនរួមគ្នាតែមួយទេ ឈ្មោះថាអ្នករាល់គ្នាពុំមែនជារបស់ផងយើងឡើយ » ។3
ខ្ញុំសូមសន្យាថា ប្រសិនបើយើងរួមសាមគ្គីគ្នា ហើយកា្លយជាតែមួយនៅក្នុងព្រះគ្រីស្ទ នោះយើងនឹងទទួលបាននូវសេចក្ដីអំណរដូចគ្នានឹងអ្វីដែលពួកសាសន៍នីហ្វៃបានទទួលដែរ ។
« នៅក្នុងវប្បធម៌របស់ព្រះគ្រីស្ទមាននូវទស្សនវិស័យ—និងផ្តោតលើភាពអស់កល្ប និងការដឹកនាំ ។ វប្បធម៌នេះគឺខ្វាយខ្វល់ពីអ្វីដែលមានតម្លៃយូរអង្វែង ! វាកើតមកពីដំណឹងល្អនៃព្រះយេស៊ូវគ្រីស្ទដែលមានភាពអស់កល្ប ហើយពន្យល់ពីមូលហេតុអ្វី អ្វីខ្លះ និងកន្លែងណានៃការមានជីវិតរស់នៅរបស់យើង ។ ( វាជាការរាប់បញ្ចូល មិនមែនមិនរាប់បញ្ចូលនោះទេ ) ។ ពីព្រោះតែវប្បធម៌នេះគឺជាលទ្ធផលមកពីការអនុវត្តតាមការបង្រៀនរបស់ព្រះអង្គសង្គ្រោះរបស់យើង នោះវាផ្តល់ឲ្យនូវទង្វើដែលនឹងព្យាបាលពិភពលោករបស់យើង ដែលកំពុងត្រូវការយ៉ាងខ្លាំង »
អែលឌើរ វិល្លាម ខេ ចាកសុន នៃពួកចិតសិបនាក់
- ការទុកឲ្យព្រះឈ្នះតាមរយៈការទទួលយកវប្បធម៌របស់ព្រះគ្រីស្ទ
អែលឌើរ វិល្លាម ខេ ចាកសុន នៃពួកចិតសិបនាក់បានថ្លែងថា « នៅក្នុងវប្បធម៌របស់ព្រះគ្រីស្ទមាននូវទស្សនវិស័យ—និងផ្តោតលើភាពអស់កល្ប និងការដឹកនាំ ។ វប្បធម៌នេះគឺខ្វាយខ្វល់ពីអ្វីដែលមានតម្លៃយូរអង្វែង ! វាកើតមកពីដំណឹងល្អនៃព្រះយេស៊ូវគ្រីស្ទដែលមានភាពអស់កល្ប ហើយពន្យល់ពីមូលហេតុអ្វី អ្វីខ្លះ និងកន្លែងណានៃការមានជីវិតរស់នៅរបស់យើង ។ ( វាជាការរាប់បញ្ចូល មិនមែនមិនរាប់បញ្ចូលនោះទេ ) ។ ពីព្រោះតែវប្បធម៌នេះគឺជាលទ្ធផលមកពីការអនុវត្តតាមការបង្រៀនរបស់ព្រះអង្គសង្គ្រោះរបស់យើង នោះវាផ្តល់ឲ្យនូវទង្វើដែលនឹងព្យាបាលពិភពលោករបស់យើង ដែលកំពុងត្រូវការយ៉ាងខ្លាំង » ។4
នៅពេលយើងបានចូលទៅក្នុងទឹកនៃពិធីបុណ្យជ្រមុជទឹក នោះយើងត្រូវបានសម្អាតយ៉ាងស្អាតពីអំពើបាបរបស់យើង ហើយបានកើតម្ដងទៀតនៅក្នុងព្រះគ្រីស្ទ ។ យើងបានប្រែចិត្ត ហើយបានលះបង់ទម្លាប់ និងការអនុវត្តចាស់ៗចោល ដែលផ្ទុយពីការបង្រៀនរបស់ព្រះអង្គសង្គ្រោះ ។ ប៉ុន្ដែ យើងអាចនឹងយកមកតាមនូវទម្លាប់តូចតាច ឬទទួលយកការបង្រៀនមិនសូវសំខាន់មកពីវប្បធម៌កំណើតរបស់យើង ដែលពុំសមនឹងវប្បធម៌ថ្មីរបស់យើងនៅក្នុងព្រះគ្រីស្ទ ។
ខ្ញុំសូមអញ្ជើញមនុស្សទាំងអស់ឲ្យពិនិត្យមើលជីវិតរបស់យើង ហើយរកមើលអ្វីទាំងឡាយដែលយើងអាចនឹងបានយកមកតាមពីវប្បធម៌កំណើតរបស់យើង ដែលមិនមែនជារបស់ព្រះ ហើយដែលមិនពង្រីកគុណតម្លៃ និងការរីកចម្រើនដ៏អស់កល្បរបស់យើង ។ តាមរយៈការរកឃើញ និងការលុបចោលសំណល់វប្បធម៌ទាំងនេះ នោះយើងអាចទុកឲ្យព្រះឈ្នះនៅក្នុងជីវិតរបស់យើងបាន ។
- ការទុកឲ្យព្រះឈ្នះតាមរយៈការរង់ចាំព្រះអម្ចាស់
នៅក្នុងពិភពលោកដែលផ្លាស់ប្ដូរយ៉ាងឆាប់រហ័សនេះ យើងចង់បានអ្វីៗគ្រប់យ៉ាងឲ្យកើតឡើងលឿនៗ ។ ដោយមានទស្សនៈនេះ យើងខកខានមិនបានរៀនពីការអត់ធ្មត់ និងមិនបានចំណាយពេលរីករាយនឹងជីវិតឡើយ ។ នៅពេលយើងរងការឈឺចាប់ ទុក្ខសោក និងការរងទុក្ខ នោះយើងចង់ឲ្យវាដល់ទីបញ្ចប់ឆាប់ៗ ឬចប់ភ្លាមៗ ។ យើងរៀនមកពីព្រះជន្មរបស់ព្រះអង្គសង្គ្រោះថា ទោះជាក្នុងការឈឺចាប់ និងការរងទុក្ខដ៏ខ្លាំងបំផុតរបស់ទ្រង់ ក៏ទ្រង់បានទ្រាំវាដោយការអត់ធ្មត់ ហើយបានមានបន្ទូលទៅកាន់ព្រះវរបិតារបស់ទ្រង់ថា « …សូមតាមព្រះហឫទ័យទ្រង់ចុះ » ។5 ការរៀនមានចិត្តអត់ធ្មត់តាមរយៈការសាកល្បងរបស់យើង គឺជាការទុកឲ្យព្រះឈ្នះនៅក្នុងជីវិតរបស់យើង ។
សេចក្ដីសន្និដ្ឋាន
រដូវកាលនេះគឺពិសេសណាស់ ។ យើងចងចាំដល់ព្រះរាជបុត្រារបស់ព្រះ និងការប្រសូតរបស់ទ្រង់ ។ យើងចងចាំដល់អំណោយទានដែលត្រូវបានប្រទានដល់មនុស្សជាតិទាំងអស់ ដោយព្រះវរបិតាដែលពេញដោយក្ដីស្រឡាញ់ដែលគង់នៅស្ថានសួគ៌ ។
ព្រះគ្រីស្ទគឺជាមូលហេតុនៃសេចក្ដីអំណររបស់យើងនៅអំឡុងរដូវកាលនេះ ។ ពួកយើងជាច្រើនបានប្រឈមមុខនឹងការបាត់បង់ និងការឈឺចិត្តផ្ទាល់ខ្លួន ពេលយើងបានបាត់បង់មនុស្សជាទីស្រឡាញ់ ឬរងទុក្ខតាមរបៀបណាមួយ ។ ការប្រសូតរបស់ព្រះអង្គសង្គ្រោះលើពិភពលោកនេះនាំមកនូវសេចក្ដីសុខសាន្ដ និងសេចក្ដីសង្ឃឹមដល់បុត្រា និងបុត្រីទាំងអស់របស់ព្រះ ។ ការប្រសូតរបស់ទ្រង់ផ្ដល់នូវអត្ថន័យ និងគោលបំណងដល់ជីវិតរបស់យើង ។ ទ្រង់បានទ្រាំទ្ររាល់ការសាកល្បង ទុក្ខសោក ការឈឺចាប់ និងការរងទុក្ខគ្រប់ជំពូកដែលបានកើតឡើង កំពុងកើតឡើង ឬនឹងកើតឡើងដល់មនុស្សជាតិទាំងអស់ ជាបុគ្គលម្នាក់ៗ និងជាសមូហភាព ។ ទ្រង់បានធ្វើការណ៍នេះ ដើម្បីទ្រង់អាច « …ដឹងស្របតាមសាច់ឈាមថាតើត្រូវជួយរាស្ដ្រទ្រង់ [ យើង ] បែបណា » ។
ខ្ញុំសូមថ្លែងជាសាក្សីអំពីព្រះគ្រីស្ទដ៏មានព្រះជន្មរស់ ។ ខ្ញុំដឹងថា ទ្រង់គឺជាព្រះអង្គសង្គ្រោះ និងព្រះប្រោសលោះរបស់យើង ។ ខ្ញុំក៏ដឹងផងដែរថា នៅពេលយើងរួបរួមសាមគ្គីគ្នា ទទួលយកវប្បធម៌របស់ព្រះគ្រីស្ទ ហើយទ្រាំទ្រការលំបាករបស់យើងដោយការអត់ធ្មត់ នោះយើងក្លាយជាបុត្រាបុត្រីរបស់ទ្រង់ ។ យើងទុកឲ្យព្រះឈ្នះនៅក្នុងជីវិតរបស់យើង ។ ខ្ញុំថ្លែងសាក្សីនេះនៅក្នុងព្រះនាមនៃព្រះយេស៊ូវគ្រីស្ទ ។
សេចក្ដីយោង
- « ទុកឲ្យព្រះឈ្នះ » ដោយប្រធាន រ័សុល អិម ណិលសុន សន្និសីទទូទៅ ខែ តុលា ឆ្នាំ ២០២០ ។
- « ព្រះគម្ពីរមរមន » នីហ្វៃទី៣ ១១: ២២ & ២៨ ។
- « គោលលទ្ធិ និង សេចក្ដីសញ្ញា » ៣៨:២៧ ។
- « វប្បធម៌របស់ព្រះគ្រីស្ទ » ដោយអែលឌើរ វីល្លាម ខេ ចាកសុន សន្និសីទទូទៅ ខែ តុលា ឆ្នាំ ២០២០ ។
- « ព្រះគម្ពីរប៊ីប » ម៉ាថាយ ២៦:៤២ ។
- « ព្រះគម្ពីរមរមន » អាលម៉ា ៧:១២ ។