នៅក្នុងឆ្នាំ២០២០ ដ៏មិនប្រក្រតីនេះ មនុស្សគ្រប់គ្នាបានទទួលរងឥទ្ធិពលពីការរាតត្បាតទូទាំងពិភពលោកដោយសារជំងឺកូវីដ-១៩ ។ ដោយសារមានកូនចៅជាច្រើនរបស់ព្រះជួបបញ្ហានូវជំងឺផ្ទាល់ខ្លួន ការបាត់បង់ការងារ និងការព្រួយបារម្ភ ព្រមទាំងសេចក្ដីស្លាប់របស់មនុស្សជាទីស្រឡាញ់ នោះយើងអាចនឹងសួរសំណួរថាតើយើងអាចធ្វើអ្វីខ្លះដើម្បីធ្វើឲ្យពិភពលោកនេះក្លាយជាកន្លែងមួយដ៏ប្រសើរ ។
ខ្ញុំសង្ឃឹមថា ខ្ញុំបានស្គាល់បងប្អូនម្នាក់ៗដោយផ្ទាល់ ។ ខ្ញុំចង់ឲ្យបងប្អូនដឹងថា អែលឌើរ មៀអឺស និង អែលឌើរ ហូម័រ ហើយនិងខ្ញុំបានអធិស្ឋានសម្រាប់បងប្អូនដូចជាយើងបានស្គាល់បងប្អូនដោយផ្ទាល់ដូច្នោះ ។ យើងបានបន្ថែមឈ្មោះរបស់បងប្អូន និងបុព្វហេតុនានាទៅក្នុងបញ្ជីការអធិស្ឋាននៃព្រះវិហារបរិសុទ្ធ ថែមទាំងសូមឲ្យគណៈប្រធានទីមួយ និងពួកដប់ពីរនាក់ចងចាំបងប្អូននៅក្នុងការអធិស្ឋានរបស់ពួកលោកផងដែរ ។ យើងបានទួញយំជាមួយនឹងបងប្អូនមួយចំនួន នៅពេលយើងបានដឹងពីការបាត់បង់របស់បងប្អូននៅអំឡុងគ្រាដ៏លំបាកនេះ ។ នៅក្នុងឆ្នាំនេះ ខ្ញុំបានរីករាយ ពេលខ្ញុំបានឃើញមនុស្សជាច្រើនចងចាំពីសេចក្ដីសញ្ញាពិធីបុណ្យជ្រមុជទឹករបស់ពួកគេដើម្បី « . . .ទទួលបន្ទុកគ្នាទៅវិញទៅមក ដើម្បីឲ្យបន្ទុកនោះបានស្រាល . . .ហើយ . . .ទួញយំជាមួយអ្នកណាដែលទួញយំ . . .ហើយកម្សាន្តទុកដល់អស់អ្នកណាដែលកំពុងត្រូវការកម្សាន្តទុក្ខ ហើយឈរជាសាក្សីដល់ព្រះនៅគ្រប់ពេល និងគ្រប់សេចក្ដី និងគ្រប់ទីកន្លែង . . . »1 រួមទាំងពេលដែលសេចក្ដីជំនឿត្រូវបានសាកល្បង ហើយស្ថិតក្នុងស្ថានភាពលំបាកផងដែរ ។
ខ្ញុំគិតពីជីវិតរបស់ប្រធាន សាំសិន ប៉ាតារ៉ា ដែលបានរស់នៅក្នុងជីវិតដ៏ស្មោះត្រង់ ដោយខិតខំធ្វើឲ្យពិភពលោកនេះក្លាយជាកន្លែងមួយដ៏ប្រសើរ ។ នៅគ្រានៃការទទួលមរណភាពភ្លាមៗរបស់គាត់ដោយសារតែជំងឺកូវីដ-១៩ គាត់បានកំពុងបម្រើជាទីប្រឹក្សានៅក្នុងគណៈប្រធានស្តេកបេងហ្គាឡូឥណ្ឌា ។ គាត់មានអាយុតែ ៥៧ ឆ្នាំប៉ុណ្ណោះ ហើយបានបន្សល់ទុកភរិយាដ៏អស្ចារ្យរបស់គាត់ លោកស្រី ជូឌី និងកូនស្រី វ័យជំទង់ដ៏ស្រស់ស្អាតពីរនាក់ ។ បងប្រុស សាំសិន ត្រូវបានជ្រមុជទឹកជាសមាជិកមួយរូបនៅក្នុងសមាជិកដំបូងបង្អស់ក្នុងសាសនាចក្រនៅប្រទេសឥណ្ឌា នាឆ្នាំ១៩៨៤ ក្នុងវ័យ ២១ ឆ្នាំ ។ នៅឆ្នាំ ១៩៨៦ គាត់ត្រូវបានតែងតាំងជាអែលឌើរ ហើយមិនយូរប៉ុន្មានបានចាប់ផ្ដើមការបម្រើជាអ្នកផ្សព្វផ្សាយសាសនាពេញម៉ោងរបស់គាត់ ។ តាមរយៈការបង្រៀន និងឥទ្ធិពលរបស់គាត់ មានមនុស្សជាច្រើនបានប្រែចិត្តជឿ ។ នៅឆ្នាំ២០០២ គាត់ និងលោកស្រី ជូឌី ជាទីស្រឡាញ់របស់គាត់បានរៀបការ រួចហើយបានផ្សារភ្ជាប់នៅក្នុងព្រះវិហារបរិសុទ្ធហុងកុង ហើយបានមានកូនស្រីដ៏ស្រស់ស្អាតពីរនាក់ ។ ប្រធាន សាំសិន បានបម្រើយ៉់ាងស្មោះត្រង់ ហើយបានធ្វើជាគំរូដល់មនុស្សជាច្រើន ។
« តើអំណរគុណនាំឲ្យយើងរួចផុតពីទុក្ខសោក សោកសៅ ទុក្ខព្រួយ និងការឈឺចាប់ដែរឬទេ ? អត់ទេ ប៉ុន្តែវាពិតជាបានធ្វើឲ្យយើងមានអារម្មណ៍ធូរស្រាល ។ វានាំមកឲ្យយើងនូវទស្សនវិស័យកាន់តែធំជាងលើរាល់គោលបំណង និងសេចក្តីអំណរនៃជីវិត »
Church Newsroom ថ្ងៃទី ២០ ខែវិច្ឆិកា ឆ្នាំ២០២០ « ព្យាការីបានចេញផ្សាយសារលិខិតមួយស្ដីពីអំណាចព្យាបាលនៃការដឹងគុណ» ។
ពេលខ្ញុំបានស្គាល់ប្រធាន និងស៊ិស្ទើរ សាំសិន ខ្ញុំបានដឹងថា ពួកគាត់បានចែករំលែកក្តីអំណរ និងការខកបំណងនៃជីវិតមួយចំនួនរួមគ្នានៅក្នុងជីវិតរមែងស្លាប់នេះផងដែរ ។ ប៉ុន្តែទោះជាយ៉ាងនេះក្ដី ក៏ពួកគាត់បានស្រឡាញ់គ្នា ហើយបានស្វែងរកវិធីផ្គត់ផ្គង់ដល់គ្រួសារពួកគាត់ ស្រឡាញ់កូនចៅពួកគាត់ បម្រើមនុស្សដទៃ ហើយបំពេញការហៅដែលព្រះបានប្រទានដល់ពួកគាត់នៅក្នុងសាសនាចក្ររបស់ទ្រង់ផងដែរ ។ ទោះជាជីវិតរបស់គាត់ពេញដោយសេចក្ដីល្អយ៉ាងណាក្ដី ក៏នៅថ្ងៃទី ២០ ខែកក្កដា ឆ្នាំ២០២០ ប្រធាន សាំសិន ត្រូវបានហៅ « ត្រឡប់ទៅផ្ទះវិញ គឺទៅជួបនឹងព្រះដែលទ្រង់បានប្រទានជីវិតដល់ [គាត់] »2 ហើយបានត្រឡប់ទៅជួបនឹងព្រះវរបិតាសួគ៌របស់គាត់វិញ ។ ការសាកល្បងរបស់គាត់បានបញ្ចប់ហើយ ។ ឥឡូវនេះ វាគឺជាឱកាស និងសំណូមពររបស់យើងដើម្បីស្រឡាញ់ឲ្យគ្រប់គ្រាន់ មានអំណរគុណឲ្យគ្រប់គ្រាន់ ហើយស្មោះត្រង់ឲ្យគ្រប់គ្រាន់ ដើម្បីយើងអាចចូលរួមនឹងគាត់ ហើយរួមរស់នឹងគ្នាជារៀងរហូត ។
ប្រធាន ឌៀថើរ អេហ្វ អុជដូហ្វ បានបង្រៀនថា
« មិនយូរមិនឆាប់ ខ្ញុំជឿថា យើងទាំងអស់គ្នានឹងជួបនូវគ្រាដែលយើងមានអារម្មណ៍ថា ជីវិតយើងខ្ទេចខ្ទាំ ដោយទុកឲ្យយើងនៅឯកោ ខកចិត្ត ហើយរសាត់អណ្តែតតាមយថាកម្ម ។
វាអាចកើតឡើងចំពោះមនុស្សគ្រប់គ្នា ។ គ្មាននរណាម្នាក់ជៀសផុតឡើយ ។
ស្ថានភាពរបស់មនុស្សគឺខុសៗគ្នា ឯខ្សែជីវិតនៃមនុស្សម្នាក់ៗ ក៏ប្លែកពីគ្នាដែរ ។ តែខ្ញុំបានរៀនថា មានអ្វីមួយដែលអាចដកយកភាពជូរចត់ ដែលអាចកើតមាននៅក្នុងជីវិតយើងបាន…
ក្នុងនាមជាសិស្សនៃព្រះគ្រីស្ទ យើងត្រូវបានបញ្ជាឲ្យ ‹ ថ្វាយអំណរគុណដល់ព្រះអម្ចាស់ ជាព្រះនៃ [យើង] នៅគ្រប់ការណ៍ទាំងអស់ › ឲ្យ ‹ ច្រៀងថ្វាយព្រះអម្ចាស់ដោយពាក្យអរព្រះគុណ › ហើយឲ្យ ‹ ចិត្ត [យើង] ពោរពេញទៅដោយអំណរគុណដល់ព្រះ › » ។ 3
នៅក្នុងសុន្ទរកថាសន្និសីទទូទៅដដែលនេះ ប្រធាន អុជដូហ្វ សន្យាថា « ព្រះវរបិតាសួគ៌យើងត្រាស់ដឹងថា ការជ្រើសរើសដើម្បីអភិវឌ្ឍស្មារតីនៃការដឹងគុណ នឹងនាំអំណរពិត និងសុភមង្គលធំធេងដល់យើង » ។
ប្រធាន ណិលសុន បានសន្យាពរជ័យដូចគ្នា នៅពេលយើងបង្ហាញការដឹងគុណចំពោះពរជ័យជាច្រើននៅក្នុងជីវិតរបស់យើង ។
« ក្នុងរយៈពេលប្រាំបួនទសវត្សរ៍កន្លះនៃជីវិតរបស់ខ្ញុំ ខ្ញុំបានសន្និដ្ឋានថា ការរាប់ពរជ័យរបស់យើងគឺប្រសើរជាងការរាប់បញ្ហារបស់យើងឆ្ងាយណាស់ ។ មិនថាស្ថានភាពរបស់យើងយ៉ាងណាក៏ដោយ ការបង្ហាញអំណរគុណចំពោះឯកសិទ្ធិរបស់យើងគឺជាវេជ្ជបញ្ជាដែលមានសកម្មភាពរហ័ស និងយូរអង្វែង ។
« តើអំណរគុណនាំឲ្យយើងរួចផុតពីទុក្ខសោក សោកសៅ ទុក្ខព្រួយ និងការឈឺចាប់ដែរឬទេ ? អត់ទេ ប៉ុន្តែវាពិតជាបានធ្វើឲ្យយើងមានអារម្មណ៍ធូរស្រាល ។ វានាំមកឲ្យយើងនូវទស្សនវិស័យកាន់តែធំជាងលើរាល់គោលបំណង និងសេចក្តីអំណរនៃជីវិត » ។4
ខណៈដែលមានវិធីជាច្រើន ដែលយើងអាចខិតខំដើម្បីធ្វើឲ្យពិភពលោកនេះក្លាយជាកន្លែងមួយដ៏ប្រសើរ ចូរយើងចាប់ផ្ដើមដោយបង្ហាញការដឹងគុណចំពោះពរជ័យរបស់យើង ។ យើងអាចចូលរួមនឹងប្រធាន ណិលសុន នៅក្នុងការអធិស្ឋានរបស់យើងផ្ទាល់អំពីការដឹងគុណ ហើយមានអំណរគុណចំពោះអ្វីដែលយើងមាន ជាជាងផ្ដោតលើអ្វីដែលយើងពុំមាន ។ យើងអាចសូមជំនួយពីសួគ៌ាដើម្បីបំពេញសេចក្ដីសញ្ញាពិធីបុណ្យជ្រមុជទឹករបស់យើង ដើម្បីជួយមនុស្សដទៃពេញមួយជីវិតរបស់យើង និងដើម្បីឈរជាសាក្សីរបស់ព្រះគ្រប់ពេល និងគ្រប់កាលៈទេសៈ សូម្បីស្ថិតក្នុងតែពេលស្ថានភាពលំបាកក្ដី ។ ចូរយើងមានអំណរគុណចំពោះព្រះសម្រាប់ជីវិត និងមនុស្សជាទីស្រឡាញ់ ចំពោះទីបន្ទាល់របស់យើង និងចំពោះដំណឹងល្អ ។ សូមឲ្យយើងរីករាយនៅក្នុងពរជ័យនៃការដឹងថា ជីវិតនេះគឺជាគ្រាដ៏ខ្លីមួយ ហើយថាបើយើង« ស៊ូទ្រាំការណ៍នោះដោយហ្មត់ចត់ »5 នោះគ្រប់ពរជ័យ រួមទាំង ជីវិតដ៏នៅអស់កល្បជានិច្ចជាមួយនឹងគ្រួសាររបស់យើងផងដែរ នឹងត្រូវបានប្រទានឲ្យ ។
ខ្ញុំសូមថ្លែងសាក្សីរបស់ខ្ញុំអំពីពរជ័យនៃការដឹងគុណ « នៅគ្រប់ការណ៍ទាំងអស់ » ។6 ខ្ញុំសូមថ្លែងសាក្សី ហើយសន្យាថា ព្រះនឹងព្យាបាលដួងចិត្តនីមួយៗដែលខ្ទេចខ្ទាំ ហើយប្រទានមធ្យោបាយមួយនៅក្នុងជីវិតរបស់យើង ពេលយើងស្រឡាញ់ ហើយបម្រើគ្នា ពង្រឹងគ្នា ហើយសម្ដែងការដឹងគុណចំពោះព្រះសម្រាប់អ្វីដែលយើងមាន ។
សេចក្ដីយោង
2. អាលម៉ា ៤០:១១
3. សន្និសីទទូទៅខែមេសា ឆ្នាំ២០១៤ ប្រធាន ឌៀថើរ អេហ្វ អុជដូហ្វ « អំណរគុណនៅគ្រប់ស្ថានភាព »
4. Church Newsroom ថ្ងៃទី ២០ ខែវិច្ឆិកា ឆ្នាំ២០២០ « ព្យាការីបានចេញផ្សាយសារលិខិតមួយស្ដីពីអំណាចព្យាបាលនៃការដឹងគុណ » ។