« ខ្ញុំដឹងថា នៅពេលយើងឆ្លើយតបទៅនឹងការអញ្ជើញដ៏បំផុសគំនិតរបស់ប្រធានណិលសុនឲ្យ ៖ សិក្សា ជ្រើសរើសជឿលើព្រះយេស៊ូវគ្រីស្ទ ធ្វើសកម្មភាពដោយជំនឿ ទទួលយកពិធីបរិសុទ្ធពិសិដ្ឋដោយភាពស័ក្តិសម និងទូលសូមជំនួយពីព្រះវរបិតាសួគ៌របស់យើងដោយនៅក្នុងព្រះនាមនៃព្រះយេស៊ូវគ្រីស្ទ ។ នោះសេចក្តីជំនឿរបស់យើងនឹងរីកលូតលាស់ ហើយផ្តល់អំណាចដល់យើងតាមរយៈព្រះអម្ចាស់ព្រះយេស៊ូវគ្រីស្ទ ដើម្បីរើភ្នំនៅក្នុងជីវិតរបស់យើង » ។
ជាច្រើនឆ្នាំកន្លងទៅ កូរ៉ុមនៃពួកសាវកដប់ពីរនាក់បានប្រឹក្សាជាមួយគ្នាអស់រយៈពេលជាច្រើនខែអំពីសំណួរថា – តើយើងអាចជួយសមាជិកនៅក្នុងសាសនាចក្រឲ្យបង្កើនសេចក្ដីជំនឿរបស់ពួកគេទៅលើព្រះវរបិតាសួគ៌ និងព្រះយេស៊ូវគ្រីស្ទដោយរបៀបណា ?
នៅក្នុង អេធើរ ១២:៥ មរ៉ូណៃបានផ្អាកការចម្លងកំណត់ត្រារបស់ពួកសាសន៍យ៉ារេឌ ហើយផ្ដល់នូវការអត្ថាធិប្បាយដ៏មានឥទ្ធិពលមួយចំនួន « អេធើរបានព្យាករនូវការណ៍ដ៏ធំ ហើយអស្ចារ្យដល់ប្រជាជនដែលពួកគេពុំជឿសោះ ពីព្រោះពួកគេពុំបានឃើញ » ។
នៅក្នុងខបន្ទាប់ក្នុងគម្ពីរអេធើរ មរ៉ូណៃបានរៀបរាប់ឧទាហរណ៍ជាច្រើនអំពីអំណាចនៃសេចក្ដីជំនឿ ៖
- ១២:៧ ត្បិតគឺដោយសារសេចក្ដីជំនឿនេះហើយ ដែលព្រះគ្រីស្ទទ្រង់បានបង្ហាញរូបអង្គទ្រង់ដល់ពួកអយ្យកោរបស់យើង
- ១២:១១ ហេតុដូច្នោះហើយ ដោយសារសេចក្ដីជំនឿ នោះក្រឹត្យវិន័យលោកម៉ូសេត្រូវបានប្រទានមក
- ១២:១២ ព្រោះបើសិនជាគ្មានសេចក្ដីជំនឿនៅក្នុងចំណោមកូនចៅមនុស្សទេ នោះព្រះទ្រង់ពុំអាចសម្ដែងអព្ភូតហេតុ នៅក្នុងចំណោមពួកគេបានឡើយ
- ១២:១៣ គឺដោយសេចក្ដីជំនឿរបស់អាលម៉ា និងអាមូលេក ដែលបានធ្វើឲ្យគុករលំចុះទៅដី
- ១២:១៥ គឺដោយសេចក្ដីជំនឿរបស់អាំម៉ូន និងពួកបងប្អូនរបស់លោក ដែលបាននាំមកនូវអព្ភូតហេតុដ៏ធំនៅក្នុងចំណោមពួកសាសន៍លេមិន
កាលដែលយើងពិចារណាឧទាហរណ៍ទាំងនេះ នោះយើងចាប់ផ្តើមយល់ពីមូលហេតុដែលសំណួរនៃការបង្កើនសេចក្ដីជំនឿមានសារៈសំខាន់ចំពោះព្យាការី និងពួកសាវកដែលនៅរស់ ។ វិវរណៈដែលពួកលោកបានទទួល នៅពេលពួកលោកប្រឹក្សាជាមួយគ្នាគឺថា ការបង្កើនការគោរពប្រតិបត្តិដ៏ស្មោះត្រង់នៅថ្ងៃឈប់សម្រាក នឹងជួយបង្កើនសេចក្ដីជំនឿទៅលើព្រះវរបិតាសួគ៌ និងព្រះរាជបុត្រារបស់ទ្រង់ គឺព្រះយេស៊ូវគ្រីស្ទ ជាងអ្វីៗផ្សេងទៀតទាំងអស់ ។
នៅក្នុងសុន្ទរកថា ខែ មេសា ឆ្នាំ ២០១៥ របស់លោក « ថ្ងៃឈប់សម្រាកជាថ្ងៃមួយដ៏សប្បាយ » អែលឌើរ រ័សុល អិម ណិលសុន បានបង្រៀនថា « សេចក្ដីជំនឿលើព្រះនាំឲ្យមានសេចក្ដីស្រឡាញ់ចំពោះថ្ងៃឈប់សម្រាក សេចក្ដីជំនឿលើថ្ងៃឈប់សម្រាកនាំឲ្យមានសេចក្ដីស្រឡាញ់ចំពោះព្រះ ។ ថ្ងៃឈប់សម្រាកដ៏ពិសិដ្ឋ ពិតជាថ្ងៃមួយដ៏សប្បាយ » ។
នៅក្នុងសុន្ទរកថាសន្និសីទទូទៅរបស់លោកនៅ ខែ មេសា ឆ្នាំ ២០២១ អំពី « ព្រះគ្រីស្ទមានព្រះជន្មរស់ឡើងវិញ សេចក្ដីជំនឿលើទ្រង់នឹង រើភ្នំចេញបាន » ប្រធានណិលសុនបានធ្វើការអញ្ជើញដែលព្យាករណ៍បន្ថែមទៀត ដើម្បីឲ្យយើងទាំងអស់គ្នាបង្កើនសេចក្ដីជំនឿរបស់យើង ។
« សេចក្ដីជំនឿលើព្រះនាំឲ្យមានសេចក្ដីស្រឡាញ់ចំពោះថ្ងៃឈប់សម្រាក សេចក្ដីជំនឿលើថ្ងៃឈប់សម្រាកនាំឲ្យមានសេចក្ដីស្រឡាញ់ចំពោះព្រះ ។ ថ្ងៃឈប់សម្រាកដ៏ពិសិដ្ឋ ពិតជាថ្ងៃមួយដ៏សប្បាយ » ។
អែលឌើរ រ័សុល អិម ណិលសុន
« សេចក្តីជំនឿលើព្រះយេស៊ូវគ្រីស្ទគឺជាគ្រឹះនៃជំនឿទាំងអស់ និងជារបៀបដើម្បីទទួលបានព្រះចេស្ដារបស់ព្រះ ។
អ្វីៗគ្រប់យ៉ាងដែលល្អក្នុងជីវិត—គ្រប់ពរជ័យដែលសំខាន់ដ៏អស់កល្ប—ចាប់ផ្ដើមដោយសេចក្ដីជំនឿ ។ ការទុកឲ្យព្រះឈ្នះនៅក្នុងជីវិតយើង ចាប់ផ្ដើមដោយសេចក្ដីជំនឿថា ទ្រង់ស្ម័គ្រព្រះទ័យដឹកនាំយើង ។ ការប្រែចិត្តដ៏ពិតចាប់ផ្ដើមដោយសេចក្ដីជំនឿថា ព្រះយេស៊ូវគ្រីស្ទមានព្រះចេស្ដាដើម្បីសម្អាត ព្យាបាល និងពង្រឹងយើង » ។
លោកក៏បានផ្តល់ឲ្យយើងនូវការអញ្ជើញដ៏មានអានុភាពចំនួន ៥ ដើម្បីជួយយើងឲ្យអភិវឌ្ឍសេចក្ដីជំនឿ និងការទុកចិត្តផងដែរ ។
« ទីមួយ សូម សិក្សា ។ សូមក្លាយជាអ្នករៀនដ៏ឧស្សាហ៍ ។ សូមជ្រមុជខ្លួនបងប្អូននៅក្នុងបទគម្ពីរ ដើម្បីយល់ពីបេសកកម្ម និងការងារបម្រើរបស់ព្រះគ្រីស្ទកាន់តែច្បាស់ …
…ទ្រង់បានលើកដាក់មកលើព្រះអង្គទ្រង់នូវការឈឺចាប់ របស់បងប្អូន កំហុស របស់បងប្អូន ភាពទន់ខ្សោយ របស់បងប្អូន និងអំពើបាប របស់បងប្អូន ។ ទ្រង់បានបង់ថ្លៃសង ហើយបានផ្ដល់អំណាចឲ្យបងប្អូនអាចរើភ្នំ ទាំងអស់ដែលបងប្អូននឹងជួបប្រទះ… ការរើភ្នំរបស់បងប្អូនអាចតម្រូវឲ្យមានអព្ភូតហេតុកើតឡើង ។ សូមរៀនពីអព្ភូតហេតុ ។ អព្ភូតហេតុកើតមានស្របតាមសេចក្ដីជំនឿរបស់បងប្អូនលើព្រះអម្ចាស់ ។ អ្វីដែលសំខាន់ចំពោះសេចក្ដីជំនឿនោះគឺ ការទុកចិត្តលើព្រះទ័យ និងកាលវិភាគរបស់ទ្រង់—របៀប និងពេលវេលាដែលទ្រង់នឹងប្រទានពរដល់បងប្អូន ឲ្យទទួលបានជំនួយដ៏អព្ភូតហេតុដែលបងប្អូនចង់បាននោះ ។ មានតែ ការឥតជំនឿ របស់បងប្អូន ទេ ដែលនឹងរារាំងមិនឲ្យព្រះប្រទានពរដល់បងប្អូន ឲ្យមានអព្ភូតហេតុរើភ្នំក្នុងជីវិត របស់បងប្អូន នោះ…ព្រះអង្គសង្គ្រោះនឹងគង់នៅកាន់តែជិតបងប្អូន ពេលបងប្អូនកំពុងជួបបញ្ហា ឬកំពុងឡើងភ្នំ ដោយសេចក្ដីជំនឿ » ។ [ សូមមើល មរ៉ូណៃ ៩:១៩-២១ ]
« ទីពីរ សូមជ្រើសរើសដើម្បី ជឿ លើព្រះយេស៊ូវគ្រីស្ទ ។ បើបងប្អូនសង្ស័យពីព្រះ ជាព្រះវរបិតា និងព្រះរាជបុត្រាសំណព្វរបស់ទ្រង់ ឬពីភាពពិតនៃការស្ដារឡើងវិញ ឬសេចក្ដីពិតពេញលេញនៃការហៅដ៏ទេវភាពរបស់យ៉ូសែប ស្ម៊ីធ ជាព្យាការី នោះសូម ជ្រើសរើស ជឿ [ សូមមើល នីហ្វៃ ទី ២ ៣៣:១០-១១ ] ហើយបន្ដនៅស្មោះត្រង់ ។ សូមយកសំណួររបស់បងប្អូនទូលទៅព្រះអម្ចាស់ និងទៅកាន់ប្រភពដ៏ស្មោះសរផ្សេងទៀត ។ សូមសិក្សាដោយមានបំណងចិត្តដើម្បី ជឿ ជាជាងសង្ឃឹមថា បងប្អូននឹងរកឃើញកំហុសក្នុងជីវិតរបស់ព្យាការី ឬភាពមិនស្របគ្នានៅក្នុងបទគម្ពីរ ។ សូមឈប់បង្កើនការសង្ស័យរបស់បងប្អូន ដោយទៅការពិភាក្សាជាមួយអ្នកសង្ស័យផ្សេងទៀត ។ សូមទុកឲ្យព្រះអម្ចាស់ដឹកនាំបងប្អូនក្នុងដំណើររុករកខាងវិញ្ញាណរបស់បងប្អូន » ។
« ទីបី សូម ធ្វើសកម្មភាព ដោយជំនឿ ។ តើបងប្អូននឹងធ្វើអ្វីខ្លះ បើសិនជាបងប្អូនមានជំនឿ បន្ថែមទៀត នោះ ? សូមគិតពីការណ៍នេះ ។ សូមកត់ត្រាវាទុក ។ រួចហើយ សូម ទទួលជំនឿបន្ថែមទៀត តាមរយៈការធ្វើអ្វីមួយដែលតម្រូវឲ្យមានជំនឿបន្ថែម » ។
« ទីបួន សូម ទទួលយកពិធីបរិសុទ្ធពិសិដ្ឋ ដោយភាពស័ក្ដិសម ។ ពិធីបរិសុទ្ធចាក់សោបើកព្រះចេស្ដានៃព្រះមកក្នុងជីវិតរបស់បងប្អូន ។ [ សូមមើល គ. និង ស. ៨៤:២០ ] »
« ហើយទីប្រាំ ចូរ ទូលសូម ជំនួយពីព្រះវរបិតាសួគ៌របស់បងប្អូនដោយនៅក្នុងព្រះនាមនៃព្រះយេស៊ូវគ្រីស្ទ ។ សេចក្ដីជំនឿតម្រូវឲ្យមានសកម្មភាព ។ ការទទួលវិវរណៈតម្រូវឲ្យមានការអនុវត្ត ។ ប៉ុន្ដ « អស់អ្នកណាដែលសូម នោះរមែងបាន អ្នកណាដែលរក នោះរមែងឃើញ ហើយនឹងបើកឲ្យអ្នកណាដែលគោះដែរ ។ [ សូមមើល ម៉ាថាយ ៧:៨ ] » ព្រះជ្រាបពីអ្វីដែលនឹងជួយដល់សេចក្ដីជំនឿរបស់បងប្អូនឲ្យរីកចម្រើន ។ ចូរសូមហើយសូមទៀត » ។
ប្រធានណិលសុនក៏បានទូន្មានផងដែរថា « សូមកុំកាត់បន្ថយសេចក្ដីជំនឿ ដែលបងប្អូនមានរួចទៅហើយនោះឡើយ ។ វាត្រូវការសេចក្ដីជំនឿដើម្បីចូលរួមក្នុងសាសនាចក្រនេះ ហើយបន្ដនៅស្មោះត្រង់ ។ វាត្រូវការសេចក្ដីជំនឿដើម្បីធ្វើតាមព្យាការី ជាជាងធ្វើតាមអ្នកជំនាញការ និងទស្សនៈល្បីល្បាញ ។ វាត្រូវការសេចក្ដីជំនឿដើម្បីបម្រើបេសកកម្មអំឡុងពេលជំងឺរាតត្បាត ។ វាត្រូវការសេចក្ដីជំនឿដើម្បីមានជីវិតមួយដ៏បរិសុទ្ធ កាលលោកិយស្រែកថា ច្បាប់ព្រហ្មចារីភាពរបស់ព្រះគឺហួសសម័យ ។ វាត្រូវការសេចក្ដីជំនឿដើម្បីបង្រៀនដំណឹងល្អដល់កូនចៅក្នុងពិភពលោកមួយដែលមិនជឿលើព្រះ ។ វាត្រូវការសេចក្ដីជំនឿដើម្បីអង្វរសូមជីវិតរបស់មនុស្សជាទីស្រឡាញ់ម្នាក់ ហើយវាត្រូវការសេចក្ដីជំនឿកាន់តែខ្លាំងដើម្បីទទួលយកចម្លើយដែលមិនដូចចិត្តនោះ » ។
បន្ទាប់មក លោកបានចែកចាយការសន្យាដ៏មានឥទ្ធិពលចំនួនពីរ ។ « សេចក្ដីជំនឿរបស់បងប្អូនទៅលើទ្រង់ ដែលចម្រើនឡើង នឹងរើភ្នំចេញ—មិនមែនជាភ្នំថ្មដែលធ្វើឲ្យផែនដីនេះស្រស់ស្អាតនោះទេ—តែជាភ្នំនៃទុក្ខសោកនៅក្នុងជីវិតរបស់បងប្អូនវិញ ។ សេចក្ដីជំនឿដ៏លូតលាស់របស់បងប្អូននឹងជួយបងប្អូនឲ្យបង្វែរឧបសគ្គទៅជាការរីកចម្រើន និងឱកាសដ៏មិនអាចប្រៀបផ្ទឹមបានវិញ » ។
ខ្ញុំសូមបង្ហាញការដឹងគុណ និងសេចក្តីស្រឡាញ់ចំពោះព្យាការីដ៏ពិតរបស់ព្រះដែលបន្តបង្រៀន និងអញ្ជើញយើង ។ ខ្ញុំដឹងថា នៅពេលយើងឆ្លើយតបទៅនឹងការអញ្ជើញដ៏បំផុសគំនិតរបស់ប្រធានណិលសុនឲ្យ ៖ សិក្សា ជ្រើសរើសជឿលើព្រះយេស៊ូវគ្រីស្ទ ធ្វើសកម្មភាពដោយជំនឿ ទទួលយកពិធីបរិសុទ្ធពិសិដ្ឋដោយភាពស័ក្តិសម និងទូលសូមជំនួយពីព្រះវរបិតាសួគ៌របស់យើងដោយនៅក្នុងព្រះនាមនៃព្រះយេស៊ូវគ្រីស្ទ ។ នោះសេចក្តីជំនឿរបស់យើងនឹងរីកលូតលាស់ ហើយផ្តល់អំណាចដល់យើងតាមរយៈព្រះអម្ចាស់ព្រះយេស៊ូវគ្រីស្ទ ដើម្បីរើភ្នំនៅក្នុងជីវិតរបស់យើង ។