ការីហេលេមិនបានថ្លែងទីបន្ទាល់ថា « … គឺនៅលើសិលានៃព្រះដ៏ប្រោសលោះនៃយើងគឺព្រះគ្រីស្ទ ជាព្រះរាជបុត្រានៃព្រះ ដែលកូនត្រូវសង់គ្រឹះរបស់កូន... ដែលជាគ្រឹះដ៏ខ្ជាប់ខ្ជួនមួយ ជាគ្រឹះមួយបើសិនណាមនុស្សសង់នៅលើនោះ នោះពួកគេមិនអាចរលំបានឡើយ » ។ [i]
ព្រះវរបិតាសួគ៌របស់យើង និងព្រះរាជបុត្រាបង្កើតតែមួយរបស់ទ្រង់ ព្រះយេស៊ូវគ្រីស្ទ គឺជាប្រភពដ៏ពិតនៃសុភមង្គល និងអំណររបស់យើង ។ ព្រះយេស៊ូវគ្រីស្ទគឺជាព្រះអង្គគាំទ្ររបស់យើងជាមួយនឹងព្រះវរបិតា ។ ការបង្រៀន និងពលិកម្មដ៏ធួនរបស់ទ្រង់ធ្វើឲ្យបុគ្គលម្នាក់ៗអាចសង្គ្រោះបាន ។ ជំហានទីមួយរបស់យើងទៅកាន់សេចក្ដីសង្គ្រោះគឺជាសេចក្ដីជំនឿលើទ្រង់ ។
ប៉ុន្ដែ ការស្គាល់ព្រះយេស៊ូវគ្រីស្ទគឺជាការធ្វើតាមអស់មួយជីវិត ។ ការទុកចិត្តលើព្រះ និងការឆ្ពោះទៅមុខក្នុងជីវិត ទោះជាយើងប្រឈមមុខនឹងឧបសគ្គទាំងអស់ក្ដី គឺជាចំណុចសម្គាល់របស់សិស្សដ៏ស្មោះត្រង់ម្នាក់ ។ កាលយើងព្យាយាមគោរពតាមការបង្រៀនរបស់ព្រះគ្រីស្ទ និងកាន់តាមព្រះបញ្ញត្តិទាំងឡាយរបស់ព្រះ នោះនៅទីបញ្ចប់ យើងនឹងដុសខាត់គំនិត សកម្មភាព និងព្រលឹងរបស់យើងឲ្យប្រែក្លាយដូចជាព្រះគ្រីស្ទ ។
នៅឯពិធីបុណ្យជ្រមុជទឹក យើងបានចុះសេចក្ដីសញ្ញាជាមួយនឹងព្រះអម្ចាស់ ។ រៀងរាល់សប្ដាហ៍ យើងចុះសេចក្ដីសញ្ញាតាមរយៈពិធីសាក្រាម៉ង់ថានឹងចងចាំដល់ទ្រង់ជានិច្ច ។ ការណ៍នេះគឺសំខាន់ ដើម្បីយើងអាចមានព្រះវិញ្ញាណរបស់ទ្រង់គង់នៅជាមួយនឹងយើង ក្នុងសកម្មភាពទាំងអស់របស់យើងជានិច្ច « …ដើម្បីណែនាំអ្នកទៅតាមផ្លូវទាំងឡាយខាងប្រាជ្ញា ដើម្បីអ្នករាល់គ្នាអាចបានពរចម្រើនឡើង ហើយស្ថិតស្ថេរជាប់នៅ » ។ [ii]
« សេចក្ដីជំនឿដ៏ពិតប្រាកដផ្ដោតលើព្រះអម្ចាស់ព្រះយេស៊ូវគ្រីស្ទ ហើយតែងដឹកនាំទៅរកសកម្មភាពជានិច្ច » [iii] ហើយសេចក្ដីជំនឿគឺជាគោលការណ៍នៃសកម្មភាព ដែលដឹកនាំយើងទៅរកសេចក្ដីសុចរិត ។ សេចក្ដីសុចរិតគឺជាមូលដ្ឋានគ្រឹះនៃអំណាចខាងវិញ្ញាណតាមរយៈព្រះគ្រីស្ទ ដោយសារ « …អំណាចនៃស្ថានសួគ៌ពុំអាចត្រួតត្រា ឬកាន់កាប់បានឡើយ លើកលែងតែដោយគោលការណ៍នៃសេចក្ដីសុចរិតប៉ុណ្ណោះ » ។ [iv]
អ្នកបម្រើដ៏ស្មោះត្រង់របស់ព្រះអម្ចាស់អនុវត្តសេចក្ដីជំនឿដើម្បីបម្រើព្រះយេស៊ូវគ្រីស្ទ និងបុត្រាបុត្រីរបស់ព្រះនៅលើផែនដី ។ ដូចជាស្ដេចបេនយ៉ាមីនដែលបានថ្លែងទីបន្ទាល់ថា ទ្រង់បានចំណាយព្រះជន្មរបស់ទ្រង់ដើម្បីបម្រើដល់ព្រះ និងមនុស្សដទៃដែរ នោះយើងគួរតែចូលរួមយ៉ាងសកម្មនៅក្នុងការបម្រើដល់មនុស្សជាតិរបស់យើង ។ នៅពេលយើងធ្វើត្រាប់តាមព្រះយេស៊ូវគ្រីស្ទដោយមានសកម្មភាពនៃសេចក្ដីស្រឡាញ់ និងការបម្រើ នោះព្រះនឹងប្រទានពរជ័យដល់យើង ។ ការអនុវត្តសេចក្ដីជំនឿលើព្រះយេស៊ូវគ្រីស្ទគឺជាសេចក្ដីស្រឡាញ់ដែលមានសកម្មភាព ។ ការណ៏នេះគឺជាចំណុចសំខាន់នៃជីវិតដ៏មានអំណរមួយ ។
« សេចក្ដីជំនឿដ៏ពិតប្រាកដផ្ដោតលើព្រះអម្ចាស់ព្រះយេស៊ូវគ្រីស្ទ ហើយតែងដឹកនាំទៅរកសកម្មភាពជានិច្ច »
អែលឌើរ ដាវីឌ អេ បែដណា
របៀបមួយចំនួនដើម្បីជួយយើងឲ្យបីបាច់សេចក្ដីជំនឿរបស់យើង និងសង់គ្រឹះរបស់យើងនៅលើព្រះយេស៊ូវគ្រីស្ទមានដូចជា ៖
- សូមស្រឡាញ់ព្រះឲ្យអស់ពីចិត្ត ព្រលឹង ពលំ គំនិត និងកម្លាំងរបស់បងប្អូនជានិច្ច ហើយដូចគ្នាដែរ សូមស្រឡាញ់អ្នកជិតខាងរបស់បងប្អូនឲ្យដូចជាខ្លួនបងប្អូនដែរ ។ ( សូមមើល ម៉ាកុស ១២:៣០, ម៉ាថាយ ២២:៣៧–៣៩, មរ៉ូណៃ ១០:៣២–៣៣, គ. និង ស. ៤:២ )
- សូមកាន់តាមព្រះបញ្ញត្តិទាំងឡាយរបស់ព្រះជានិច្ច ។ ( សូមមើល យ៉ូហាន ១៤:១៥ )
- សូមមានភាពស័ក្ដិសមនឹងភាពជាដៃគូនៃព្រះវិញ្ញាណបរិសុទ្ធជានិច្ច ។ មានតែតាមរយៈព្រះវិញ្ញាណ បរិសុទ្ធប៉ុណ្ណោះ ទើបយើងអាចរៀនពីអត្ថន័យដ៏ពិតនៃដង្វាយធួនរបស់ព្រះយេស៊ូវគ្រីស្ទនៅក្នុងជីវិតរបស់យើងបាន ។ ( សូមមើល យ៉ូហាន ១៥:១៦, មរ៉ូណៃ ១០:៥–៧ )
- សូមរៀនសូត្រពីព្រះគម្ពីរជានិច្ច ដើម្បីឲ្យព្រះគម្ពីរថ្លែងទីបន្ទាល់អំពីព្រះយេស៊ូវគ្រីស្ទ ។ ( សូមមើល យ៉ូហាន ៥:៣៩ )
- សូមអធិស្ឋានជានិច្ច ហើយអរព្រះគុណព្រះវរបិតាសួគ៌ក្នុងព្រះនាមរបស់ព្រះគ្រីស្ទជារៀងរាល់ថ្ងៃ ។ ( សូមមើល នីហ្វៃទី៣ ១៨:១៩, គ. និង ស. ៤៦:៣១–៣២ )
- សូមធ្វើតាមព្យាការីដែលនៅរស់ជានិច្ច ដោយសារការធ្វើដូច្នោះនាំឲ្យមានសុវត្ថិភាព ។ ( សូមមើល គ. និង ស. ២១:៤–៦ )
សាវកប៉ុលបានថ្លែងទីបន្ទាល់ថា « ហេតុដែលហាមយ៉ាងដូច្នោះ នោះគឺប្រយោជន៍ចង់ឲ្យបានសេចក្តីស្រឡាញ់ ដែលកើតពីចិត្តស្អាត ពីបញ្ញាចិត្តជ្រះថ្លា ហើយពីសេចក្តីជំនឿដ៏ស្មោះត្រង់វិញ » ។ [v] ស្ដេចបេនយ៉ាមីនបានបង្រៀនថា ទ្រង់មិនដែលស្វែងរកមាសប្រាក់នោះទេ ហើយក៏មិនធ្វើតាមរបៀបនៃអ្នកមានទ្រព្យនៃពិភពលោកនេះដែរ ។ ទ្រង់បានថ្លែងទីបន្ទាល់ថា ទ្រង់ត្រូវបានថែរក្សា និងថែទាំដោយព្រះអម្ចាស់ដើម្បីបម្រើដល់ប្រជាជន ។ ទ្រង់ព្រមានថា អស់អ្នកដែលមិនមានមនសិការច្បាស់លាស់ ដែលបដិសេធមិនព្រមប្រែចិត្ត នឹងចាកឆ្ងាយពីព្រះដោយសារតែកំហុសរបស់ពួកគេ ។ ប៉ុន្ដែពួកសុចរិតដែលស្រឡាញ់ និងបម្រើដល់មនុស្សដទៃ ហើយកាន់តាមព្រះបញ្ញត្តិ នោះនឹងចូលទៅក្នុងស្ថានភាពដ៏មានពរជ័យ និងរីករាយ ។ នៅក្នុង ម៉ូសាយ ២:៤១ ស្ដេចបេនយ៉ាមីនបានបង្រៀនថា នេះគឺជា « ស្ថានភាព … នៃអស់អ្នកណាដែលកាន់តាមព្រះបញ្ញត្តិទាំងឡាយនៃព្រះ ដ្បិតមើលចុះ ពួកគេបានពរគ្រប់យ៉ាង ទាំងខាងសាច់ឈាម និងខាងវិញ្ញាណផង » ។ ទ្រង់បានបន្ដថ្លែងទីបន្ទាល់នៅក្នុងខគម្ពីរនេះថា មនុស្សទាំងអស់ដែលស៊ូទ្រាំដល់ចុងបំផុត « … នឹងត្រូវបានទទួលនៅស្ថានសួគ៌ ដើម្បីឲ្យពួកគេអាចរស់នៅជាមួយនឹងព្រះក្នុងស្ថានភាពសុភមង្គលដ៏មិនចេះចប់មិនចេះហើយ » ។
ពេលគិតដល់កុមារភាពរបស់ខ្ញុំ ខ្ញុំត្រូវបានបង្រៀនពីភាពពិត និងទេវភាពរបស់ព្រះ ហើយថា ការគោរពតាមទ្រង់ធានាឲ្យខ្ញុំមានពរជ័យទាំងឡាយរបស់ទ្រង់ ។ ខ្ញុំសូមបង្ហាញការកោតសរសើរ និងការដឹងគុណរបស់ខ្ញុំចំពោះក្រុមគ្រួសារ និងបុគ្គលទាំងអស់ដែលបម្រើដល់ព្រះ តាមរយៈការធ្វើការដោយឥតឈប់ឈរ ដើម្បីផ្ដល់ពរជ័យដល់ជីវិតរបស់មនុស្សដទៃ ។
សូមកុំឲ្យមានកន្លែងសម្រាប់ការស្អប់ និងការឆ្មើងឆ្មៃនៅក្នុងជីវិតរបស់យើងឡើយ ។ យើងត្រូវតែបន្ទាបខ្លួន និងដាក់ខ្លួនតាមព្រះទ័យរបស់ព្រះ ។ ការទាក់ទងដ៏ខ្ជាប់ខ្ជួន និងឥតឈប់ឈរជាមួយនឹងព្រះ ជួយយើងឲ្យសម្រេចបានការណ៍នេះ ។ ប្រធាន អ៊ែសរ៉ា ថាហ្វ ប៊ែនសឹន បានទូន្មានថា « ការសាកល្បងដ៏ធំក្នុងជីវិត គឺការគោរពប្រតិបត្តិតាមព្រះ ។ ព្រះអម្ចាស់បានមានព្រះបន្ទូលថា ‹ យើងនឹងសាកល្បងពួកគេមើលបើសិនជាពួកគេនឹងប្រព្រឹត្តនូវអ្វីៗគ្រប់យ៉ាង ដែលព្រះអម្ចាស់ដ៏ជាព្រះរបស់ពួកគេ នឹងបញ្ជាដល់ពួកគេ › ។ ( អ័ប្រាហាំ ៣:២៥ ) ។ កិច្ចការដ៏ធំក្នុងជីវិត គឺការរៀនសូត្រពីព្រះទ័យរបស់ព្រះអម្ចាស់ រួចហើយធ្វើតាមព្រះទ័យទ្រង់ ។ ព្រះបញ្ញត្តិដ៏ធំក្នុងជីវិត គឺការស្រឡាញ់ព្រះអម្ចាស់ » ។ [vi]
ខ្ញុំមានទីបន្ទាល់អំពីការភ្ជាប់នឹងព្រះតាមរយៈការអធិស្ឋាន ។ កាលខ្ញុំអធិស្ឋាន នោះខ្ញុំទទួលអារម្មណ៍ពីសេចក្ដីស្រឡាញ់ និងភាពកក់ក្ដៅរបស់ព្រះ ។ ខ្ញុំបានរៀនកាលពីវ័យក្មេងថា « ចូរប្រឹក្សាជាមួយនឹងព្រះអម្ចាស់នូវគ្រប់កិច្ចការរបស់កូន ហើយទ្រង់នឹងដឹកនាំកូនទៅរកការល្អ » ។ [vii] ការអធិស្ឋាននេះគឺជាចម្លើយចំពោះសំណួរជាច្រើន ។ នៅពេលយើងអំពាវនាវសូមសេចក្ដីមេត្តា ការបន្ទាបខ្លួន និងសូមឲ្យអ្នកផ្ទះយើងមានអំណាចប្រឆាំងនឹងពួកសត្រូវរបស់យើង ប្រឆាំងនឹងអារក្ស និងមានការប្រែចិត្ត នោះសូមឲ្យព្រះអម្ចាស់ប្រទានពរដល់យើងឲ្យមានដួងចិត្តពេញដោយការអភ័យទោស និងបរិសុទ្ធភាព ។
តំបន់អាស៊ីមានពរជ័យដោយសារការប្រកាសសង់ព្រះវិហារបរិសុទ្ធជាច្រើន ។ យើងអធិស្ឋានសូមឲ្យមនុស្សគ្រប់គ្នាដឹង មានអារម្មណ៍ និងដកពិសោធន៍សេចក្ដីស្រឡាញ់របស់ព្រះតាមរយៈព្រះវិហារបរិសុទ្ធដ៏ពិសិដ្ឋទាំងនេះ និងពិធីបរិសុទ្ធទាំងឡាយដែលនឹងធ្វើឡើងនៅទីនោះ ។ ខ្ញុំថ្លែងទីបន្ទាល់ថា ព្រះគឺមានពិត ហើយព្រះយេស៊ូវគ្រីស្ទគឺជាព្រះអង្គសង្គ្រោះ និងព្រះប្រោសលោះរបស់យើង ។ មានតែតាមរយៈការសង់គ្រឹះរបស់យើងនៅលើព្រះគ្រីស្ទប៉ុណ្ណោះទេ ទើបយើងអាចរកឃើញសុភមង្គលដ៏ពិតនៅក្នុង « … សេចក្តីសុខសាន្តរបស់ព្រះ ដែលហួសលើសពីអស់ទាំងគំនិត » [viii] ហើយត្រឡប់ទៅកាន់ផ្ទះសួគ៌ារបស់ព្រះវិញបាន ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។
កំណត់ចំណាំ
[i] ហេលេមិន ៥:១២
[ii] ម៉ូសាយ ២:៣៦
[iii] ដេវីឌ អេ បែដណា « Seek Learning by Faith » Ensign ខែ កញ្ញា ឆ្នាំ ២០០៧ ។
[iv] គ. និង ស. ១២១:៣៦
[v] ធីម៉ូថេ ទី១ ១:៥
[vi] អ៊ែសរ៉ា ថាហ្វ ប៊ែនសឹន « The Great Commandment, Love the Lord » Ensign ខែ ឧសភា ឆ្នាំ ១៩៨៨ ។
[vii] អាលម៉ា ៣៧:៣៧
[viii] ភីលីព ៤:៧