ពេលខ្ញុំកើតនៅឆ្នាំ ១៩៦៤ មានតែព្រះវិហារបរិសុទ្ធចំនួន ១២ ប៉ុណ្ណោះដែលដំណើរការនៅក្នុងពិភពលោកនេះទាំងមូល ។ មកដល់ត្រឹមពេលខ្ញុំចេញបេសកកម្មនៅឆ្នាំ ១៩៨៤ មានព្រះវិហារបរិសុទ្ធចំនួន ៣១ តែប៉ុណ្ណោះ ។ សូមស្រមៃថា តើវាអស្ចារ្យប៉ុណ្ណាទៅ ដែលនៅឆ្នាំនេះមានការប្រកាសសង់ព្រះវិហារបរិសុទ្ធថ្មីចំនួន ៣៣ នោះ ។ ព្រះវិហារបរិសុទ្ធចំនួន ១៣ ដែលទើបតែបានប្រកាសនៅឯសន្និសីទទូទៅខែតុលានេះ នឹងនាំឲ្យមានព្រះវិហារបរិសុទ្ធសរុបចំនួន ២៦៥ នៅជុំវិញពិភពលោក ដែលរួមមានព្រះវិហារបរិសុទ្ធនៅប្រទេសឥណ្ឌា ប្រទេសថៃ ប្រទេសកម្ពុជា ទីក្រុងហុងកុង ទីក្រុងសៀងហៃ ប្រទេសសាំងហ្គាពួរ ទីក្រុងតៃប៉ិប្រទេសតៃវ៉ាន់ ហើយឥឡូវនេះ ទីក្រុងខៅឈីងប្រទេសតៃវ៉ាន់ ។ ខ្ញុំដឹងថា សមាជិកនៅប្រទេសតៃវ៉ាន់បានសង្ឃឹម និងអធិស្ឋានអស់រយៈពេលជាច្រើនឆ្នាំ ដើម្បីទទួលបានពរជ័យឲ្យមានព្រះវិហារបរិសុទ្ធមួយ ហើយកាលខ្ញុំអង្គុយនៅទីនេះ ខ្ញុំអាចស្រមៃឃើញព្រះវិហារបរិសុទ្ធ ពោលគឺព្រះវិហារបរិសុទ្ធជាច្រើន ត្រូវបានសាងសង់ឡើងនៅគ្រប់ប្រទេសទាំងអស់នៅក្នុងទ្វីបអាស៊ី ។ ឱ នោះគឺជាការគិតដ៏បំផុសគំនិតមួយ !
អារម្មណ៍នៃសេចក្ដីសង្ឃឹម និងការរំភើបចិត្តនេះហាក់ដូចជាចម្លែកបន្ដិច ដោយសារតថភាពនៃជំងឺរាតត្បាតកូវីដ-១៩ ដែលកំពុងបន្ដមាននេះ នៅតែជាផ្នែកមួយនៃជីវិតរបស់យើងនៅឡើយ ។ ពេញទ្វីបអាស៊ីទាំងមូល យើងនៅតែប្រឈមមុខនឹងឧបសគ្គនៃវិបត្តិទូទាំងពិភពលោកនេះនៅឡើយទេ ។ វាអាចមើលទៅដូចជាគ្រាមួយដែលមិនប្រក្រតី ដើម្បីផ្ដោតលើការសាងសង់ព្រះវិហារបរិសុទ្ធថ្មីៗ ។
នៅរដូវស្លឹកឈើជ្រុះឆ្នាំ ២០១៩ នៅពេលប្រធាន រ័សុល អិម ណិលសុន និង អែលឌើរ ឌី ថត គ្រីស្តូហ្វឺសិន បានធ្វើទស្សនកិច្ចនៅអាស៊ីអាគ្នេយ៍ នោះខ្ញុំត្រូវបានអញ្ជើញឲ្យចូលរួមក្នុងការប្រជុំមួយ ដែលជួបប្រជុំនឹងមន្ដ្រីរាជការនៃរដ្ឋាភិបាលក្នុងមូលដ្ឋាននៅទីក្រុងហាណូយ ប្រទេសវៀតណាម ជាពេលដែលប្រធាន ណិលសុន បានបញ្ចេញមតិដ៏គួរឲ្យចាប់អារម្មណ៍មួយ ដែលលោកបានថ្លែងវាម្ដងទៀតនៅក្នុងការប្រជុំធម្មនិដ្ឋាននៅទីក្រុងហូជីមិញនៅថ្ងៃបន្ទាប់ និងក្រោយមកនៅក្នុងសន្និសីទទូទៅផងដែរ ។ « នៅក្នុងទិដ្ឋភាពខ្លះ ការសង់ព្រះវិហារបរិសុទ្ធគឺងាយស្រួលជាងការស្ថាបនាមនុស្សដែលត្រៀមខ្លួនជាស្រេចសម្រាប់ព្រះវិហារបរិសុទ្ធ » ។[1] លោកបានលើកទឹកចិត្តពួកបរិសុទ្ធនៅក្នុងប្រទេសវៀតណាមឲ្យរៀបចំខ្លួនពួកគេ ដើម្បីពួកគេអាចត្រៀមខ្លួនជាស្រេចសម្រាប់ថ្ងៃនោះ នៅពេលដែលពរជ័យនៃព្រះវិហារបរិសុទ្ធនឹងមកដល់ដែនដីរបស់ពួកគេ ។ ពួកគេត្រូវមានសមាជិក ដែលអាចធ្វើការនៅក្នុងព្រះវិហារបរិសុទ្ធបាន ហើយរៀបចំឈ្មោះសមាជិកគ្រួសាររបស់ពួកគេ ដើម្បីពួកគេអាចយកវាទៅធ្វើពិធីបរិសុទ្ធជំនួសនៅក្នុងព្រះវិហារបរិសុទ្ធ ។ ដំបូន្មានរបស់លោកគឺថា យើងមិនគួររង់ចាំទាល់តែមានព្រះវិហារបរិសុទ្ធនោះទេ ប៉ុន្ដែយើងគួរតែរៀបចំខ្លួនយើងជាស្រេចសម្រាប់ព្រះវិហារបរិសុទ្ធ !
ដោយនឹកចាំដល់ដំបូន្មានរបស់ព្យាការីក្នុងចិត្ត និងសុទិដ្ឋិនិយមដ៏បំផុសគំនិតមកពីការប្រកាសនាពេលថ្មីៗនេះ វាហាក់ដូចជាពេលវេលាដ៏ល្អឥតខ្ចោះមួយ ដើម្បីឲ្យយើងពិចារណាយ៉ាងប្រុងប្រយ័ត្នអំពីអ្វីដែលយើងអាចធ្វើបាន ដើម្បីរៀបចំខ្លួនសម្រាប់ពរជ័យទាំងឡាយ ដែលនឹងមាននៅក្នុងព្រះវិហារបរិសុទ្ធថ្មីដ៏អស្ចារ្យទាំងនេះក្នុងពេលឆាប់ៗនេះ ។
« នៅក្នុងទិដ្ឋភាពខ្លះ ការសង់ព្រះវិហារបរិសុទ្ធគឺងាយស្រួលជាងការស្ថាបនាមនុស្សដែលត្រៀមខ្លួនជាស្រេចសម្រាប់ព្រះវិហារបរិសុទ្ធ » ។
រ័សុល អិម ណិលសុន
ចងភ្ជាប់ទៅនឹងព្រះអង្គសង្គ្រោះដោយអំណរយ៉ាងពេញលេញ
ពិធីបរិសុទ្ធ និងសេចក្តីសញ្ញាទំាងឡាយក្នុងព្រះវិហារបរិសុទ្ធ អនុញ្ញាតឲ្យយើងយល់កាន់តែច្បាស់អំពីផែនការរបស់ព្រះវរបិតាសួគ៌របស់យើងសម្រាប់យើងនៅលើផែនដីនេះ ។ ពិធីបរិសុទ្ធ និងសេចក្តីសញ្ញាទំាងនេះជួយយើងឲ្យបន្ដមានទស្សនវិស័យ ហើយរកឃើញសេចក្ដីសង្ឃឹម នៅពេលយើងប្រឈមមុខនឹងឧបសគ្គជារៀងរាល់ថ្ងៃ ។ ហើយពិធីបរិសុទ្ធ និងសេចក្តីសញ្ញាទំាងនេះផ្ដល់ពរជ័យឲ្យយើងមានអំណាចកែលម្អជីវិតរបស់យើង កាលវាចង្អុលប្រាប់ផ្លូវយើងយ៉ាងច្បាស់ឲ្យទៅរកព្រះអង្គសង្គ្រោះ ។
អំឡុងពេលសន្និសីទទូទៅនៅខែតុលា អែលឌើរ ដេវីឌ អេ បែដណា បានបង្រៀនយើងអំពីអ្វីដែលព្រះអម្ចាស់ចង់មានបន្ទូល នៅពេលទ្រង់បានមានបន្ទូល ៖
« ចូរទទួលនឹមខ្ញុំ ហើយរៀននឹងខ្ញុំចុះ … ពីព្រោះនឹមខ្ញុំងាយទេ ហើយបន្ទុកខ្ញុំក៏ស្រាល » ។[2]
អែលឌើរ បែដណា បានបន្ថែមថា « យើងទទួលយកនឹមរបស់ព្រះអង្គសង្គ្រោះដាក់មកលើខ្លួនយើង នៅពេលយើងរៀនពីសេចក្ដីសញ្ញា និងពិធីបរិសុទ្ធ ទទួលបានវាដោយភាពស័ក្ដិសម និងគោរពដល់វា ។ យើងត្រូវបានចងភ្ជាប់ទៅនឹង ហើយជាមួយនឹងព្រះអង្គសង្គ្រោះដោយសុវត្ថិភាព នៅពេលយើងចងចាំ ហើយរស់នៅដោយស្មោះត្រង់ស្របតាមកាតព្វកិច្ចនានា ដែលយើងបានទទួលឲ្យអស់ពីសមត្ថភាពរបស់យើង ។ ហើយចំណងជាមួយនឹងទ្រង់នោះ គឺជាប្រភពនៃកម្លាំងខាងវិញ្ញាណនៅក្នុងគ្រប់រដូវកាលនៃជីវិតរបស់យើង » ។[3]
តើយើងអាចធ្វើអ្វីខ្លះដើម្បីរៀបចំខ្លួន ?
ជាច្រើនឆ្នាំកន្លងទៅ កាលខ្ញុំបានបម្រើជាប៊ីស្សព នោះវួដរបស់យើងបានទៅព្រះវិហារបរិសុទ្ធរួមគ្នារៀងរាល់ ៦ ខែម្ដង ។ នៅពេលរៀបចំខ្លួន យើងបានផ្ដោតទៅលើគោលដៅចំនួន ៣ ៖
១. ជួយសមាជិកម្នាក់ៗឲ្យមានប័ណ្ណចូលព្រះវិហារបរិសុទ្ធដែលមានសុពលភាព ។ ក្នុងនាមជាក្រុមប្រឹក្សាវួដ យើងបានជួយសមាជិកឲ្យយកឈ្នះលើឧបសគ្គទាំងឡាយ ដែលបានរារាំងពួកគេមិនឲ្យបន្ដរីកចម្រើនដើម្បីទៅព្រះវិហារបរិសុទ្ធបាន ។ ការណ៍នេះរួមមានយុវវ័យ និងយុវមជ្ឈិមវ័យម្នាក់ៗផងដែរ ។
២. ធ្វើការជាមួយសមាជិកគ្រប់រូប ដើម្បីជួយពួកគេឲ្យរៀបចំខ្លួនចូលរួមក្នុងពិធីបរិសុទ្ធសម្រាប់អ្នកនៅរស់ ដែលពួកគេត្រូវការ ។ យើងបានជួយសមាជិកទាំងឡាយ ដែលមិនទាន់បានទទួលអំណោយទានពិសិដ្ឋ ឬបានផ្សារភ្ជាប់នៅឡើយ ឲ្យរៀន និងរៀបចំខ្លួនពួកគេដើម្បីត្រៀមខ្លួនជាស្រេចដើម្បីទៅព្រះវិហារបរិសុទ្ធនៅថ្ងៃកំណត់នោះ រួមមានការចូលរៀនថ្នាក់រៀបចំខ្លួនទៅព្រះវិហារបរិសុទ្ធជាដើម ប្រសិនបើចាំបាច់ ។
៣. ផ្ដោតលើសកម្មភាព និងឱកាសទាក់ទងនឹងកិច្ចការពង្សប្រវត្តិ ដើម្បីជួយសមាជិកម្នាក់ៗក្នុងវួដឲ្យមានយ៉ាងហោចណាស់ឈ្មោះបុព្វការីជនមួយត្រៀមទៅព្រះវិហារបរិសុទ្ធជាស្រេច ។
វាគឺជាកិច្ចខិតខំផ្ចិតផ្ចង់ដ៏អស្ចារ្យមួយ ដែលបាននាំឲ្យមានចិត្តរំភើប និងចក្ខុវិស័យសម្រាប់វួដរបស់យើង ។ នៅពេលដល់ថ្ងៃទៅព្រះវិហារបរិសុទ្ធរបស់យើង នោះវួដទាំងមូលបានមកតាំងពីព្រលឹម ហើយបានចំណាយពេលមួយថ្ងៃពេញដើម្បីបម្រើ និងជួយគ្នាទៅវិញទៅមកនៅក្នុងព្រះវិហារបរិសុទ្ធ ។ យើងបានទទួលអារម្មណ៍នៃសេចក្ដីស្រឡាញ់ និងសាមគ្គីភាពនោះ នៅពេលយើងបានបម្រើរួមគ្នានៅក្នុងព្រះដំណាក់របស់ព្រះអម្ចាស់ ។
ឥឡូវនេះគឺជាពេលដ៏ល្អឥតខ្ចោះ
« ព្រះវិហារបរិសុទ្ធគឺពិតជាដំណាក់នៃព្រះអម្ចាស់ ។ ព្រះវិហារបរិសុទ្ធគឺជាទីដ៏បរិសុទ្ធសម្រាប់ការថ្វាយបង្គំ ជាកន្លែងដែលបុគ្គលម្នាក់ៗចុះសេចក្ដីសញ្ញាដ៏ពិសិដ្ឋជាមួយនឹងព្រះ ។ ដោយសារការចុះសេចក្ដីសញ្ញាជាមួយនឹងព្រះគឺជាការទទួលខុសត្រូវដ៏មុតមាំមួយ នោះបុគ្គលម្នាក់ៗមិនអាចចូលទៅក្នុងព្រះវិហារបរិសុទ្ធដើម្បីទទួលអំណោយទានពិសិដ្ឋរបស់ពួកគេ ឬអាចបានផ្សារភ្ជាប់នៅក្នុងអាពាហ៍ពិពាហ៍សម្រាប់ភាពអស់កល្បបានទេ ទាល់តែពួកគេបានរៀបចំខ្លួនគេបានពេញលេញជាមុនសិន... » ។[4]
ខ្ញុំមានអារម្មណ៍ថា គ្រាដ៏លំបាកខ្លាំងបំផុតនេះគឺជាពេលវេលាដ៏អស្ចារ្យមួយ ដើម្បីចងចាំដល់ដំបូន្មានរបស់ព្យាការីជាទីស្រឡាញ់របស់យើង ឲ្យរៀបចំខ្លួនយើងសម្រាប់ព្រះវិហារបរិសុទ្ធ ដែលនឹងត្រូវសាងសង់នៅក្នុងចំណោមពួកយើងក្នុងពេលឆាប់ៗនេះ ។ វាគឺជាពេលវេលាដ៏ល្អឥតខ្ចោះ ដើម្បីធ្វើការជាគ្រួសារវួដទាំងមូល ដើម្បីរៀបចំខ្លួនទទួលពរជ័យនៃព្រះវិហារបរិសុទ្ធរួមគ្នា ។
អាលម៉ាបានបង្រៀនដល់កូនប្រុសៗរបស់លោក « ថា គ្មានផ្លូវ ឬមធ្យោបាយឯណាផ្សេងទៀតទេ ដែលនាំឲ្យមនុស្សបានសង្គ្រោះ មានតែដោយ និងតាមរយៈព្រះគ្រីស្ទមួយប៉ុណ្ណោះ ។ មើលចុះ ទ្រង់គឺជាជីវិត ហើយជាពន្លឺនៃពិភពលោក ។ មើលចុះ ទ្រង់គឺជាព្រះបន្ទូលនៃសេចក្ដីពិត និងសេចក្ដីសុចរិត » ។[5]
សូមយើងទាំងអស់គ្នាធ្វើការរួមគ្នា ដើម្បីជួយប្រមូលក្រុមគ្រួសាររបស់យើងនៅទាំងសងខាងវាំងននមកក្នុងដំណឹងល្អ ហើយពង្រឹងគ្រឹះរបស់យើងនៅលើព្រះគ្រីស្ទ ។
[1] រ័សុល អិម ណិលសុន « សុន្ទរកថាបញ្ចប់ » សន្និសីទទូទៅ ខែ តុលា ឆ្នាំ ២០១៩ ។
[2] ម៉ាថាយ ១១:២៩–៣០ ។
[3] ដេវីឌ អេ បែដណា « ដោយព្រះចេស្ដានៃព្រះដោយសិរីល្អដ៏អស្ចារ្យ » សន្និសីទទូទៅ ខែ តុលា ឆ្នាំ ២០២១ ។
[4] Gospel Topics « Temple »
[5] អាលម៉ា ៣៨:៩ ។