ដំណើររឿងក្នុងព្រះគម្ពីសញ្ញាចាស់ដំណាលប្រាប់អំពី គ្រាដែលព្រះអម្ចាស់បានបើកភ្នែកអ្នកបម្រើរបស់ អេលីស ដើម្បីគាត់អាចមើលឃើញការណ៍ទាំងឡាយដែលគាត់មើលមិនឃើញពីមុន ។ ក្នុងគ្រានៃវិបត្តិ នៅពេលខ្មាំងសត្រូវឡោមព័ទ្ធពួកគេ យុវជនទាំងនោះបានមើលឃើញថា ព្រះអម្ចាស់កំពុងការពារពួកគេដូចជា « ឃើញភ្នំនោះ មានពេញដោយពលសេះ និងរទេះចំបាំង ដែលសុទ្ធតែជាភ្លើងនៅព័ទ្ធជុំវិញអេលីសេ » ។ [1]
ក្នុងដំណើរ រឿងនេះបង្រៀនថា ពេលខ្លះយើងត្រូវការជំនួយដើម្បីមើលឃើញការណ៍ដែលជាធម្មតាយើងមើលមិនឃើញ ។ វាអាចដូចជាក្នុងករណីនៃជំងឺរាតត្បាតនេះ ។ មានការឈឺចាប់ និងទុក្ខវេទនាជាច្រើនណាស់ ដែលពិបាកនឹងមើលឃើញអ្វីផ្សេងទៀតណាស់ ។ ប៉ុន្តែបើយើងបើកភ្នែកខាងវិញ្ញាណរបស់យើងនោះយើងនឹងមើលឃើញបន្ថែមទៀត ។
យើងមើលឃើញថា ព្រះអម្ចាស់បានគង់នៅខាងមុខជំងឺរាតត្បាតនេះមួយជំហានជាមួយនឹងការបំផុសគំនិតកែតម្រូវកម្មវិធី ការរៀនសូត្រដំណឹងល្អដែលផ្ដោតទៅលើគេហដ្ឋាន និងការបង្កើតកម្មវិធីសិក្សារួមបញ្ចូលគ្នា និងការអនុវត្តកម្មវិធីកុមារ និង យុវជន ។ ដោយកែវភ្នែកខាងវិញ្ញាណ យើងមើលឃើញថាព្រះអម្ចាស់បានបង្រៀនយើងពីរបៀបថ្មីដើម្បីធ្វើកិច្ចការផ្សព្វផ្សាយសាសនា និងការបម្រើគ្នាទៅវិញទៅមក ។
បើយើងពិនិត្យមើលដោយប្រុងប្រយ័ត្ន យើងឃើញថា នេះជាឱកាសពិសេសមួយនៅក្នុងប្រវត្តិសាស្ត្រ និងជាឱកាសមួយដើម្បីឆ្លើយតបទៅនឹងការព្យាករណ៍របស់ប្រធាន ណិលសុន អំពាវនាវឲ្យប្រមូលពួកអ៊ីស្រាអែលដែលបានខ្ចាត់ព្រាត់ ។
ការប្រមូលពួកអ៊ីស្រាអែលគឺជាកន្លែងដែលមនុស្សទាំងអស់មានអារម្មណ៍នៃក្តីស្រឡាញ់ និងការស្ថាបនាសេចក្ដីជំនឿទៅលើព្រះយេស៊ូវគ្រីស្ទ
ប្រធានណិលសុន បានបង្រៀនថា « ការប្រមូលផ្ដុំនោះ គឺជាកិច្ចការដ៏សំខាន់បំផុតនៅលើផែនដីសព្វថ្ងៃនេះ ។ លោកបានមានប្រសាសន៍ថា « ពុំមានអ្វីផ្សេងទៀតអាចសម្បើមជាង សំខាន់ជាង និងមានឫទ្ធិជាងកិច្ចការនេះនោះទេ » ។[2]
យើងស្វែងរកដើម្បីប្រមូលកូនចៅរបស់ព្រះ ដើម្បីទ្រង់អាចប្រទានពរដល់ពួកគេ ។ យើងចង់ធ្វើដូច្នេះនៅក្នុងរបៀបមួយដែលគ្រប់គ្នាមានអារម្មណ៍ស្វាគមន៍ ផ្តល់តម្លៃ និងពេញដោយក្តីស្រឡាញ់ ។ មិត្តភ័ក្តិរបស់យើងជាច្រើន ទាំងនៅក្នុង និងក្រៅសាសនាចក្រ ត្រូវការជំនួយ ។ បងប្អូនខ្លះបានបាត់បង់មនុស្សជាទីស្រឡាញ់ ហើយបងប្អូនផ្សេងទៀតបានបាត់បង់ការងារ ។ បងប្អូនខ្លះត្រូវបានផ្លាស់ទីលំនៅ ខណៈពេលបងប្អូនខ្លះទៀតត្រូវបានផ្ដាច់ទំនាក់ទំនងពីមិត្តភ័ក្ដិ និងជំនឿរបស់ពួកគេ ។ គ្រប់គ្នាត្រូវការពរជ័យដែលបានមកពីការពង្រឹងសេចក្ដីជំនឿរបស់ពួកគេលើព្រះយេស៊ូវគ្រីស្ទ ។
ប្រធាន ណិលសុន បានបង្រៀន ៖ « កូនចៅរបស់ព្រះម្នាក់ៗសមនឹងមានឱកាសស្ដាប់ ហើយទទួលយកសារលិខិតនៃការព្យាបាល និងការប្រោសលោះរបស់ព្រះយេស៊ូវគ្រីស្ទ ។ គ្មានសារលិខិតណាផ្សេងទៀតដែលសំខាន់ជាងចំពោះសុភមង្គលរបស់យើងឡើយ—ទាំងពេលនេះ និងពេលអនាគត ។ គ្មានសារលិខិតណាដែលពោរពេញដោយសេចក្ដីសង្ឃឹមខ្លាំងជាងនេះទេ ។ » [3]
« កូនចៅរបស់ព្រះម្នាក់ៗសមនឹងមានឱកាសស្ដាប់ ហើយទទួលយកសារលិខិតនៃការព្យាបាល និងការប្រោសលោះរបស់ព្រះយេស៊ូវគ្រីស្ទ ។ គ្មានសារលិខិតណាផ្សេងទៀតដែលសំខាន់ជាងចំពោះសុភមង្គលរបស់យើងឡើយ—ទាំងពេលនេះ និងពេលអនាគត ។ គ្មានសារលិខិតណាដែលពោរពេញដោយសេចក្ដីសង្ឃឹមខ្លាំងជាងនេះទេ ។ »
ប្រធានរ័សុល អិម ណិលសុន
តើយើងធ្វើកិច្ចការនេះបានដោយរបៀបណា ?
បងប្អូនអាចសួរថា « តើយើងអាចធ្វើបានល្អបំផុតរបៀបណា ? » ចម្លើយចំពោះសំណួរនោះនឹងបានមកពី គ្រប់ការប្រឹក្សាយោបល់ទាំងអស់ពីគណៈប្រធាន កូរ៉ុម ថ្នាក់ សមាជិកនិងពីពួកអ្នកផ្សព្វផ្សាយសាសនាទាំងអស់ដែលពិចារណាប្រកបដោយការអធិស្ឋានចំពោះអ្វីដែលពួកគេអាចធ្វើដើម្បីប្រមូលពួកអ៊ីស្រាអែល ។
ជាច្រើនឆ្នាំ កន្លងទៅហើយ ខ្ញុំបានធ្វើដំណើរជាមួយក្រុមតូចមួយទៅកាន់មជ្ឈមណ្ឌលអវកាស កេណ្ណាឌី នៅក្នុងសហរដ្ឋអាមេរិក ។ នៅទីនោះ មានអ្នកវិទ្យាសាស្ត្រ និង វិស្វករមកពីប្រទេសនានាកំពុងរៀបចំ បាញ់បង្ហោះសមាសភាគផ្សំនៃស្ថានីយអវកាសអន្តរជាតិ ។ ខ្ញុំចាំថា បានដើរនៅក្រោមពោះនៃយានអវកាសដែល បញ្ឈរចោល ហើយសម្លឹងមើលដោយយកចិត្តទុកដាក់លើការរចនាដំបូលក្បឿងយ៉ាងពិសេស ដើម្បីគ្រប់គ្រងកំដៅដ៏ខ្លាំងនៃការត្រឡប់ចូលទៅក្នុងបរិយាកាសផែនដីឡើងវិញ ។
ហើយខ្ញុំចាំពីការទៅទស្សនាចំណតយន្តហោះធំៗ ដែលក្រុមការងារមកពីប្រទេសដែលផ្តល់ជំនួយបានរៀបចំផ្នែកនីមួយៗរបស់ខ្លួននៃស្ថានីយអវកាសសម្រាប់ប្រើប្រាស់ ។ នៅពេលដែលយើងចូលកន្លែងធ្វើការរៀងៗខ្លួនក្រុមនីមួយៗបានពន្យល់ពីមូលហេតុដែលផ្នែករបស់ពួកគេសំខាន់បំផុតចំពោះបេសកកម្ម ។ ពួកគេយល់ថា បើគ្មានការរួមចំណែករបស់ពួកគេទេ នោះគម្រោងទាំងមូលនឹងបរាជ័យ ។ ហើយសម្រាប់ពួកគេ ការបរាជ័យមិនមែនជាជម្រើសមួយទេ ។
វាដូចគ្នានឹងពួកយើងផងដែរ ។ យើងម្នាក់ៗអាចដើរតួយ៉ាងសំខាន់នៅពេលព្រះអម្ចាស់ពន្លឿនកិច្ចការរបស់ទ្រង់ ។[4]
ចេញទៅហើយសង់សំពៅរបស់បងប្អូន
ព្យាការីនីហ្វៃធ្លាប់បានស្វែងរកការណែនាំពីព្រះអម្ចាស់ទាក់ទងទៅនឹងការងារបម្រើរបស់លោក ។ លោកត្រូវបានបង្គាប់ឲ្យសង់សំពៅមួយ ដើម្បីព្រះអម្ចាស់អាចដឹកនាំគ្រួសាររបស់លោកឆ្លងកាត់ទឹកដ៏ធំមហិមាដើម្បីទៅកាន់ដែនដីសន្យា ។ នីហ្វៃមិនដឹងពីរបៀបសង់សំពៅទេ ប៉ុន្តែការណ៍នោះមិនអាចបញ្ឈប់លោកបានឡើយ ។ បង ប្រុសរបស់លោកបានហៅលោកថាជាមនុស្សល្ងីល្ងើ ប៉ុន្តែនីហ្វៃ បានអនុវត្តសេចក្តីជំនឿដ៏អស្ចារ្យដោយថ្លែងថា « បើព្រះទ្រង់បានបញ្ជាខ្ញុំឲ្យធ្វើនូវកិច្ចការគ្រប់យ៉ាង នោះខ្ញុំអាចធ្វើកិច្ចការទាំងនោះបាន »[5]
ដូច្នេះនីហ្វៃ« បានទៅលើភ្នំជាញឹកញាប់ ហើយ[លោក]បានអធិស្ឋានដល់ព្រះអម្ចាស់ជាញយៗ » ។ [6] « ហើយព្រះអម្ចាស់ទ្រង់បានបង្ហាញ [ លោក ] ជាញយៗពីរបៀបដែល [ លោក ] ត្រូវធ្វើរាងសំពៅ » ។ [7] ហើយនីហ្វៃ « មិនបានធ្វើរាងសំពៅតាមរបៀបដែលមនុស្សបានរៀនទេ …ប៉ុន្តែ [ លោក ] បានធ្វើសំពៅនេះតាមរបៀបដែលព្រះបានបង្ហាញ [ លោក ] ។ » [8]
ជាលទ្ធផលគឺបានសំពៅដែលរចនាឡើងយ៉ាងពិសេសស័ក្តិសមនឹងស្ថានភាព ។ វាប្រហែលជាមិនត្រូវបានសាងសង់ដូចសំពៅផ្សេងទៀតទេ ប៉ុន្តែវាបានដឹកនីហ្វៃ និងគ្រួសាររបស់លោកទៅដល់ដែនដីសន្យាដោយជោគជ័យ ។
បងប្អូនប្រុសស្រី នៅពេលដែលបងប្អូនស្វែងរកការណែនាំពីព្រះអម្ចាស់ប្រកបដោយការអធិស្ឋាន នោះទ្រង់នឹងប្រទានការណែនាំដែលបងប្អូនត្រូវការ ។ ខណៈពេលដែលបងប្អូន ប្រឈមមុខនឹងការសង្ស័យ ហើយដំណោះស្រាយរបស់បងប្អូនអាចខុសពីអ្នកដ៏ទៃ នោះទ្រង់នឹងជួយបងប្អូន បង្កើតដំណោះស្រាយដែលបងប្អូនត្រូវការ ។ នៅក្នុងពេលវេលាដ៏ពិសេសនេះ ខ្ញុំសូមអញ្ជើញបងប្អូនឲ្យធ្វើចំណែករបស់បងប្អូន ដើម្បីជួយប្រមូលអ៊ីស្រាអែលដែលខ្ចាត់ខ្ចាយដើម្បីទៅកាន់ដែនដីសន្យាដោយសុវត្ថិភាព ដើម្បីពួកគេអាចទទួលបានសេចក្តីស្រឡាញ់និងស្ថាបនាសេចក្ដីជំនឿរបស់ពួកគេលើព្រះយេស៊ូវគ្រីស្ទ ។
[1] ពង្សាវតាក្សត្រទី ២ ៦:១៦-១៧
[2] ប្រធាន រ័សុល អិម ណិលសុន ក្តីសង្ឃឹមនៃអ៊ីស្រាអែល ថ្ងៃទី ៣ ខែ មិថុនា ឆ្នាំ ២០១៨
[3] ប្រធានរ័សុល អិម ណិលសុន ព្រះគ្រីស្ទមានព្រះជន្មរស់ឡើងវិញ សេចក្តីជំនឿលើទ្រង់នឹងរើភ្នំចេញបាន លីអាហូណា សន្និសីទទូទៅខែ មេសា ឆ្នាំ ២០២១
[4] សូមមើលIកូរិនថូសទី ១១២:២០-២៦
[5] សូមមើល នីហ្វៃទី ១ ១៧:៥០
[6] សូមមើល នីហ្វៃទី ១ ១៨:៣
[7] សូមមើល នីហ្វៃទី ១ ១៨:1
[8] សូមមើល នីហ្វៃទី ១ ១៨:2