នៅពេលខ្ញុំត្រូវបានណែនាំឲ្យស្គាល់គ្រិស្តសាសនាជាលើកដំបូងនៅសាលារៀន ខ្ញុំបានរៀនអំពីសាសន៍អ៊ីស្រាអែលថាជាប្រជាជននៃសេចក្តីសញ្ញា និងរបៀបដែលពួកគេត្រូវបានដឹកនាំទៅកាន់ដែនដីដីសន្យា ។ រហូតដល់ពេលដែលខ្ញុំបានចូលរួមក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ទើបខ្ញុំយល់ថាអ្វីជាសេចក្តីសញ្ញា និង មូលហេតុដែលពួកបរិសុទ្ធថ្ងៃចុងក្រោយត្រូវបានហៅថាជារាស្ត្រនៃសេចក្តីសញ្ញា ។
សេចក្តីសញ្ញា គឺជាកតិកាសញ្ញា ឬ កិច្ចព្រមព្រៀងរវាងព្រះ និងមនុស្ស ហើយនៅពេលយើងរក្សាកិច្ចសន្យានោះ វានឹងនាំមកនូវពរជ័យមកក្នុងជីវិតនេះ ហើយទីបំផុតវានឹងនាំយើងត្រឡប់ទៅរស់នៅជាមួយព្រះវរបិតាសួគ៌ដ៏អស់កល្បជានិច្ច ។
នៅពេលយើងរក្សាផ្នែកនៃកិច្ចព្រមព្រៀងរបស់យើង នោះព្រះក៏បំពេញសេចក្តីសន្យារបស់ទ្រង់ដែរ ដូចដែលបទគម្ពីរបានបង្រៀនថា « យើងជាព្រះអម្ចាស់ជាប់សន្យា កាលណាអ្នករាល់គ្នាប្រព្រឹត្តិតាមអ្វី ដែលយើងមានព្រះបន្ទូល ប៉ុន្តែកាលណាអ្នករាល់គ្នាមិនប្រព្រឹត្តិតាមអ្វីដែលយើងមានព្រះបន្ទូលទេ នោះអ្នករាល់គ្នាពុំមានសេចក្តីសន្យាឡើយ » ។ ១
ព្រះអម្ចាស់បានធ្វើសេចក្តីសញ្ញាជាមួយកូនចៅរបស់ទ្រង់នៅលើផែនដីចាប់តាំងពីដើមដំបូងមកម្លេះ ។ អ័ដាម និង នាងអេវ៉ា បានធ្វើសេចក្តីសន្យាជាមួយព្រះថា « បង្កើតកូនឲ្យចម្រើនជាច្រើនឡើងឲ្យមានពេញពាសលើផែនដី » ។ ២ សេចក្តីសញ្ញាមួយដែលគួរឲ្យកត់សម្គាល់បំផុតរវាងព្រះ និងលោកអ័ប្រាហាំ គឺត្រូវបានគេស្គាល់ផងដែរថាជាសេចក្តីសញ្ញាអ័ប្រាហាំ ។ អ័ប្រាហាំបានទទួលយកដំណឹងល្អ ហើយបានតែងតាំងជាសង្ឃជាន់ខ្ពស់ ។ ដោយសារតែភាពស្មោះត្រង់របស់លោក ព្រះអម្ចាស់បានសន្យាដល់អ័ប្រាហាំថា តាមរយៈគាត់ និងពូជពង្សរបស់គាត់ ថា « អស់ទាំងគ្រួសារនៅលើផែនដី [ នឹងបានពរ ] »។ ៣
តើយើងទាំងអស់គ្នាជាផ្នែកមួយនៃក្រុមគ្រួសារនៅលើផែនដីនេះឬ ? តើយើងបានទទួលពរដោយសារសេចក្តីសញ្ញាដែលអ័ប្រាហាំបានធ្វើពីជំនាន់បុរាណយ៉ាងដូចម្តេច ?
សេចក្តីសន្យានេះត្រូវបានបំពេញតាមវិធីជាច្រើន ៖
- តាមរយៈព្រះយេស៊ូវគ្រីស្ទដែលជាលោកចៅហ្វាយ និងជាព្រះប្រោសលោះរបស់យើង ហើយទ្រង់បានយាងមកតាមរយៈពូជពង្សរបស់អ័ប្រាហាំ ។
- តាមរយៈអំណាចបព្វជិតភាពដែលបានប្រទានដល់អ័ប្រាហាំ និងកូនចៅរបស់លោក ។
- តាមរយៈការខ្ចាត់ព្រាត់ និង ការប្រមូលផ្ដុំនៃអ៊ីស្រាអែល ។
ដោយសារការខ្ចាត់ព្រាត់នៃអ៊ីស្រាអែលពាសពេញផែនដី នោះឈាមរបស់សាសន៍អ៊ីស្រាអែលត្រូវបានប្រោះនៅក្នុងចំណោមប្រជាជាតិនានា ហើយដូច្នេះ ប្រជាជាតិទាំងអស់ក៏មានសិទ្ធិទទួលបានការសន្យាដែលថាអ៊ីស្រាអែល នឹងត្រូវបានប្រមូលផ្តុំជាថ្មី នៅក្នុងសេចក្ដីមេត្តាករុណារបស់ព្រះក្នុងលក្ខខណ្ឌនៃការប្រែចិត្តផងដែរ ។
- តាមរយៈការឱបក្រសោបលើដំណឹងល្អនៃព្រះយេស៊ូវគ្រីស្ទ ដែលបានស្ដារឡើងវិញដោយព្យាការី យ៉ូសែប ស្ម៊ីធ ។
ព្រះអម្ចាស់បានធ្វើសេចក្ដីសញ្ញាជាមួយលោកអ័ប្រាហាំថា បន្ទាប់ពីជំនាន់របស់លោកទៅ អស់អ្នកដែលឱបក្រសោបក្នុងដំណឹងល្អគួរតែត្រូវបានហៅតាមឈ្មោះរបស់លោក ឬត្រូវរាប់បញ្ចូលក្នុងចំណោមពូជពង្សរបស់លោក ហើយគួរតែទទួលព្រះវិញ្ញាណបរិសុទ្ធ ។ ៤
« យើងជាព្រះអម្ចាស់ជាប់សន្យា កាលណាអ្នករាល់គ្នាប្រព្រឹត្តិតាមអ្វី ដែលយើងមានព្រះបន្ទូល ប៉ុន្តែកាលណាអ្នករាល់គ្នាមិនប្រព្រឹត្តិតាមអ្វីដែលយើងមានព្រះបន្ទូលទេ នោះអ្នករាល់គ្នាពុំមានសេចក្តីសន្យាឡើយ » ។
គ. និង ស. ៨២:១០
អស់អ្នកទាំងឡាយណាដែលមិនមែនជាពូជអម្បូររបស់អ័ប្រាហាំ និង អ៊ីស្រាអែលផ្ទាល់ នោះនឹងប្រែក្លាយទៅជាដូច្នោះនៅពេលដែលពួកគេទទួលបុណ្យជ្រមុជទឹក និងបានទទួលការបញ្ជាក់ដោយអ្នកដែលមានសិទ្ធិអំណាចបព្វជិតភាព នោះគឺពួកគេត្រូវបានប្រមូលផ្តុំចូលទៅក្នុងមែកធាងគ្រួសារ ហើយមានសិទ្ធិទទួលបានសិទ្ធិ និងឯកសិទ្ធិទាំងអស់ក្នុងនាមជាអ្នកស្នងមរតក ។ ៥
នៅពេលយើងទទួលបុណ្យជ្រមុជទឹក និងពិធីបញ្ជាក់ជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នោះយើងបានធ្វើសេចក្ដីសញ្ញាជាមួយព្រះអង្គសង្គ្រោះដើម្បីលើកដាក់លើខ្លួនយើងនូវព្រះនាមទ្រង់ ដើម្បីចងចាំទ្រង់ជានិច្ច ហើយគោរពតាមបទបញ្ញត្តិរបស់ទ្រង់ជានិច្ច ។ ហើយជាការឆ្លើយតបវិញ ព្រះអម្ចាស់បានសន្យាថា យើងនឹងមានភាពដៃគូនៃព្រះវិញ្ញាណបរិសុទ្ធ ។ យើងរំឭកសេចក្ដីសញ្ញានេះជាមួយព្រះអម្ចាស់ នៅពេលយើងទទួលទានសាក្រាម៉ង់ ។ នៅពេលយើងទទួលពិធីបរិសុទ្ធទាំងឡាយនៃព្រះវិហារបរិសុទ្ធ យើងក៏បានធ្វើសេចក្តីសញ្ញា និងសេចក្តីសន្យាពិសិដ្ឋនៃភាពតម្កើងឡើងសម្រាប់ការគោរពប្រតិបត្តិដ៏ស្មោះត្រង់ ។ ៦ « តាមរយៈការគោរពតាមដំណឹងល្អ ឬការទទួលមកចិញ្ចឺមបីបាច់តាមរយៈដំណឹងល្អ នោះយើងទាំងអស់គ្នាជាអ្នកស្នងមរតកជាមួយអ័ប្រាហាំ និងពូជពង្សលោក មិនថាយើងគឺជាកូនចៅជំនាន់ក្រោយចាប់តាំងពីមិលគីស្សាដែក ពីអេដុម ពីអ៊ីស្មាអែល ឬមិនថាយើងជាសាសន៍យូដា ឬសាសន៍ដទៃនោះទេ ។
ការធ្វើជារាស្ត្រនៃសេចក្ដីសញ្ញាគឺជាឯកសិទ្ធ ប៉ុន្តែក៏ជាទំនួលខុសត្រូវផងដែរ ។ វាគឺជាការទទួលខុសត្រូវជាមួយនឹងពរជ័យដែលបានសន្យាដ៏មហិមា ។ ព្រះយេស៊ូវបានមានបន្ទូលប្រាប់សាសន៍យូដាយ៉ាងសាមញ្ញថា កាលត្រឹមជាពូជពង្សអ័ប្រាហាំ តែម្យ៉ាងមិនគ្រប់គ្រាន់សម្រាប់ការសង្គ្រោះរបស់ពួកគេទេ ។ ព្រះយេស៊ូវបានបង្រៀនថា « បើអ្នករាល់គ្នាជាពូជលោកអ័ប្រាហាំពិត នោះនឹងធ្វើតាមលោកជាប្រាកដ » ។ ៨
អំឡុងពេលនៃការធ្វើចំណាកស្រុករបស់ពួកបរិសុទ្ធទៅភាគខាងលិច ដែលដឹកនាំដោយ ព្រិកហាំ យ៉ង់ ក្នុងឆ្នាំ ១៨៤៦នោះពួកគេត្រូវបានព្រមានឲ្យធ្វើដំណើរ « ដោយធ្វើសេចក្ដីសញ្ញា និងសេចក្ដីសន្យា ដើម្បីកាន់តាមអស់ទាំងព្រះបញ្ញត្តិ និងក្រឹត្យក្រមទាំងឡាយនៃព្រះអម្ចាស់ដ៏ជាព្រះរបស់យើងចុះ » ។ ៩ ពួកគេត្រូវបានរំឭកថា ការប្រព្រឹត្តរបស់ពួកគេក្នុងពេលធ្វើដំណើរគឺសំខាន់ដូចជាគោលដៅរបស់ពួកគេដែរ ហើយក៏បានប្រែក្លាយការសាកល្បងដ៏លំបាកនេះទៅជាបទពិសោធន៍ខាងវិញ្ញាណដ៏សំខាន់មួយដែលបានចែករំលែក ។
ខ្ញុំបានទទួលពរលោកអយ្យកោរបស់ខ្ញុំក្នុងឆ្នាំ ២០០១ រយៈពេលដប់ឆ្នាំបន្ទាប់ពីពិធីបុណ្យជ្រមុជទឹករបស់ខ្ញុំ ហើយខ្ញុំក៏បានរៀនបន្ថែមទៀតអំពីពូជពង្សអ៊ីស្រាអែល ។ មិនថាពូជពង្សរបស់យើងជាអ៊ីស្រាអែល ឬត្រូវទទួលមកចិញ្ចឹមនោះទេ ក៏យើងនៅតែអាចទទួលពរជ័យនៃសេចក្តីសន្យា តាមរយៈលោកអ័ប្រាហាំ អាស្រ័យលើភាពស័ក្តិសម និងភាពស្មោះត្រង់របស់យើងលើព្រះអម្ចាស់ ។
ខ្ញុំមានអំណរគុណដែលបានរកឃើញដំណឹងល្អដែលបានស្ដារឡើងវិញតាមរយៈ សាសនាចក្រនៃព្រះយេស៊ូវគ្រីស្ទ ដែលបានស្តារឡើងវិញ ។ ពិតណាស់ ការយល់ពីគោលលទ្ធិនៃការធ្វើជារាស្រ្តនៃសេចក្តីសញ្ញា បានជួយខ្ញុំឲ្យរស់នៅតាមដំណឹងល្អបានយ៉ាងខ្ជាប់ខ្ជួន ។ ទស្សនវិស័យដ៏អស់កល្បដែលដំណឹងល្អបង្រៀន និងការដឹកនាំពីព្រះវិញ្ញាណបរិសុទ្ធ បានមានផលប៉ះពាល់យ៉ាងជ្រាលជ្រៅនៅក្នុងជីវិតរបស់ខ្ញុំ ។ សូមឲ្យយើងតែងតែមានការដឹកនាំពីព្រះវិញ្ញាណដើម្បីបន្តដំណើររបស់យើងក្នុងនាមជារាស្រ្តនៃសេចក្តីសញ្ញាពិតប្រាកដ ។
- គ. និង ស. ៨២:១០ ។
- លោកុប្បត្តិ ១:២៨ ។
- អ័ប្រាហាំ ៣:១១ ។
- យ៉ូសែប ហ្វីលឌិង ស៊្មីធ Doctrines of Salvation, comp. Bruce R. McConkie, (ឆ្នាំ ១៩៥៥) ៣:៦០០ ។
- យ៉ូសែប ហ្វីលឌិង ស៊្មីធ « How One May Become of the House of Israel » Improvement Era,ខែ តុលា ឆ្នាំ ១៩២៣,១១៤៩ ។
- សូមមើល គ. និង ស. ១៣២ ។
- ប៉ាលី ភី ប្រាត្ត ,Journal of Discourses, វ៉ុល ១ ទំព័រ ២៦២ ។
- យ៉ូហាន ៨:៣៩ ។
- គ. និង ស. ១៣៦:២ ។
- សូមមើល Chad M. Orton, “This Shall Be Our Covenant,” នៅក្នុងវិវរណៈក្នុង មាតិកា ៖ ដំណើររឿងនៅពីក្រោយជំពូកទាំងឡាយនៃគោលលទ្ធិ និងសេចក្ដីសញ្ញា ( ឆ្នាំ ២០១៦ ) ទំព័រ ៣០៨ ។