នៅពេលយើងខិតខំដើម្បីក្លាយជាសិស្សរបស់ព្រះយេស៊ូវគ្រីស្ទ នោះពិធីសាក្រាម៉ង់គឺជាពិធីបរិសុទ្ធ ដែលយើងស្គាល់ច្បាស់ និងមានអត្ថន័យបំផុតនៅក្នុងជីវិតរបស់យើង ។ ព្រះយេស៊ូវបានតាំងពិធីសាក្រាម៉ង់នេះឡើង ដើម្បីរំឭកយើងអំពីដង្វាយធួនរបស់ទ្រង់បន្ទាប់ពីយប់អាហារចុងក្រោយ ។ ឥឡូវនេះ យើងដឹងគុណ និងមានអំណរដែលយើងអាចទទួលទានសាក្រាម៉ង់ ព្រមទាំងអាចរំឭក និងរក្សាសេចក្ដីសញ្ញារបស់យើងជារៀងរាល់សប្ដាហ៍ ។
តាមរយៈពិធីបរិសុទ្ធនៃពិធីសាក្រាម៉ង់ យើងចុះសេចក្ដីសញ្ញាថានឹងចងចាំដល់ព្រះយេស៊ូវគ្រីស្ទជានិច្ច ស្ម័គ្រចិត្តលើកដាក់មកលើខ្លួននូវព្រះនាមរបស់ទ្រង់ ហើយសន្យាថានឹងរក្សាបទបញ្ញត្តិទាំងឡាយរបស់ទ្រង់ ដូចដែលបានចែងនៅក្នុងការអធិស្ឋានសាក្រាម៉ង់ ។[1] លើសពីនេះទៅទៀត ព្រះអម្ចាស់សន្យានឹងយើងថា យើងនឹងទទួលបានការផ្ដាច់បាបតាមរយៈដង្វាយធួនរបស់ទ្រង់ មានព្រះវិញ្ញាណរបស់ទ្រង់គង់នៅជាមួយនឹងយើងជានិច្ច ហើយមានចំណេះដឹង សេចក្ដីជំនឿ អំណាច និងសេចក្ដីសុចរិតដើម្បីទទួលបានជីវិតដ៏នៅអស់កល្បជានិច្ច ។[2]
រយៈពេលជាង ៦ ឆ្នាំកន្លងមកនេះ ខ្ញុំមានអំណរគុណដែលខ្ញុំអាចប្រសិទ្ធពរសាក្រាម៉ង់សម្រាប់ម្ដាយរបស់ខ្ញុំនៅរៀងរាល់ថ្ងៃឈប់សម្រាកនៅឯផ្ទះរបស់គាត់ ដោយសារកម្លាំងកាយគាត់ចេះតែទ្រុឌទ្រោម ។ រាល់ពេលទទួលទានសាក្រាម៉ង់ម្តងៗ គាត់បានសញ្ជឹងគិត និងបង្ហាញនូវការដឹងគុណយ៉ាងខ្លាំង ។ យើងតែងតែមានអារម្មណ៍ពិសេសមួយនៅអំឡុងពេល ដែលខ្ញុំអានការអធិស្ឋានសាក្រាម៉ង់ដោយយឺតៗ និងច្បាស់ៗ ។ នៅក្នុងបន្ទប់របស់យើង យើងមានអារម្មណ៍ពីព្រះវិញ្ញាណយ៉ាងខ្លាំង ។ តាមរយៈបរិយាកាសប្រកបដោយគារវភាព និងពិធីបរិសុទ្ធដ៏បរិសុទ្ធដែលយើងបានទទួលទាននោះ វាធ្វើឲ្យដួងចិត្តរបស់ពួកយើងបានរួបរួមគ្នានៅក្នុងព្រះយេស៊ូវគ្រីស្ទ ។ យើងបាននឹកចាំដល់សេចក្ដីសុខសាន្ដដែលព្រះអម្ចាស់ប្រទានដល់អ្នកដើរតាមទ្រង់ ហើយសង្ឃឹមថានឹងត្រឡប់ទៅកាន់ព្រះវរបិតាសួគ៌របស់យើងនៅថ្ងៃណាមួយ ។ ការណ៍នេះគឺការពិតជាពិសេសកាលពីខែកក្កដាមុន នៅពេលដែលម្ដាយខ្ញុំបានលាចាកលោកទៅក្នុងជន្មាយុ ៩៩ ឆ្នំា ។ ខណៈដែលមរណភាពរបស់មនុស្សជាទីស្រឡាញ់ម្នាក់គឺជារឿងពិបាកសម្រាប់មនុស្សជាច្រើន នោះខ្ញុំមានអារម្មណ៍នៃការលួងលោម និងសេចក្ដីសុខសាន្ដអំឡុងពេលនោះ ដោយសារចំណេះដឹង និងសេចក្ដីជំនឿរបស់ខ្ញុំទៅលើដង្វាយធួន ។
នៅពេលខាងមុខ យើងនឹងមិនអាចរស់រានមានជីវិតខាងវិញ្ញាណបានឡើយ បើគ្មានព្រះចេស្ដាណែនាំ ដឹកនាំ និងលួងលោមចិត្តជានិច្ចកាលមកពីព្រះវិញ្ញាណបរិសុទ្ធទេនោះ
ប្រធាន រ័សុល អិម ណិលសុន
យើងរស់នៅក្នុងគ្រាដ៏លំបាក ។ ភាពតានតឹងខាងសេដ្ឋកិច្ច អស្ថេរភាពខាងសង្គម បញ្ហាទាំងឡាយក្នុងគ្រួសារ និងចំណងអាពាហ៍ពិពាហ៍ ការរាតត្បាតនៃជំងឺកូវីដ-១៩ និងគ្រោះធម្មជាតិនានា គឺជាឧបសគ្គមួយចំនួនដែលយើងកំពុងតែប្រឈមមុខ ។ ខណៈដែលយើងអាចមានអារម្មណ៍ថាវាលើសលប់ពេក នោះយើងមិនត្រូវឲ្យភាពភ័យខ្លាចយកឈ្នះលើយើងនោះឡើយ ។ ផ្ទុយទៅវិញ យើងគួរតែមានអំណរគុណដែលយើងមានការសន្យាថា យើងអាច « បានព្រះវិញ្ញាណរបស់ទ្រង់គង់នៅជាមួយនឹងពួកយើងជាដរាប » ។ តាមរយៈការទទួលទានសាក្រាម៉ង់ជារៀងរាល់សប្ដាហ៍ នោះយើងអាចស្ដាប់ឮព្រះសូរសៀងនៃព្រះវិញ្ញាណរបស់ទ្រង់ខ្សឹបប្រាប់យើងនូវការណែនាំ ការលួងលោម និងសេចក្ដីសុខសាន្ដរបស់ទ្រង់នៅក្នុងជីវិតប្រចាំថ្ងៃរបស់យើង ។ តាមរយៈការនៅស្ងប់ស្ងាត់ នោះយើងអាចស្ដាប់ឮព្រះសូរសៀងរបស់ទ្រង់ ទទួលបានវិវរណៈផ្ទាល់ខ្លួន និងមានអារម្មណ៍សុខសាន្ដ ។ « នៅពេលខាងមុខ យើងនឹងមិនអាចរស់រានមានជីវិតខាងវិញ្ញាណបានឡើយ បើគ្មានព្រះចេស្ដាណែនាំ ដឹកនាំ និងលួងលោមចិត្តជានិច្ចកាលមកពីព្រះវិញ្ញាណបរិសុទ្ធទេនោះ » ។[3]
អែលឌើរ ឌែល ជី រិនឡាន់ បានបង្រៀនថា « ការទទួលទានសាក្រាម៉ង់គឺជាពិធីបរិសុទ្ធបន្ទាប់ ដែលមនុស្សគ្រប់រូបត្រូវការ បន្ទាប់ពីទទួលបានការបញ្ជាក់ជាសមាជិកនៃសាសនាចក្រ ។ ពិធីសាក្រាម៉ង់គឺជាពិធីបរិសុទ្ធចាំបាច់បន្ទាប់ ក្រោយពីការទទួលបានអំណោយទានពិសិដ្ឋ ឬបានផ្សារភ្ជាប់នៅក្នុងព្រះវិហារបរិសុទ្ធ ។ ពិធីសាក្រាម៉ង់គឺជាពិធីបរិសុទ្ធចាំបាច់បន្ទាប់ ក្រោយពីបានធ្វើការជ្រើសរើសល្អមួយ ហើយជាពិធីបរិសុទ្ធចាំបាច់បន្ទាប់ ក្រោយពីបានធ្វើការជ្រើសរើសមិនល្អមួយដែរ ។ ពិធីសាក្រាម៉ង់គឺជាពិធីបរិសុទ្ធចាំបាច់បន្ទាប់ដែលត្រូវការជារៀងរាល់សប្ដាហ៍ពេញមួយជីវិតរបស់យើង » ។[4]
មិនថាយើងមានអាយុប៉ុន្មាន រស់នៅបានយូរប៉ុណ្ណា ឬមានអ្វីកើតឡើងនៅក្នុងជីវិតរបស់យើងនោះទេ ពិធីបរិសុទ្ធនៃពិធីសាក្រាម៉ង់នៅថ្ងៃឈប់សម្រាកជួយយើងឲ្យផ្តោតទៅលើព្រះយេស៊ូវគ្រីស្ទនៅក្នុងជីវិតប្រចាំថ្ងៃរបស់យើង ក៏ដូចជាស្អាងព្រលឹងរបស់យើងផងដែរ ។ ដូចដែលប្រធាន រ័សុល អិម ណិលសុន បានដាស់តឿនថា « នៅពេលជីវិតរបស់យើងផ្តោតលើព្រះយេស៊ូវគ្រីស្ទ ព្រមទាំងដំណឹងល្អរបស់ទ្រង់ នោះយើងអាចមានអំណរ មិនថាមានអ្វីកំពុងកើតឡើង—ឬមិនកើតឡើង—នៅក្នុងជីវិតយើងនោះទេ ។ អំណរកើតមានឡើង ដោយសារតែទ្រង់ ។ ទ្រង់គឺជាប្រភពនៃអំណរទាំងអស់ » ។[5]
យើងស្រឡាញ់ព្រះវរបិតាសួគ៌ និងព្រះរាជបុត្រារបស់ទ្រង់ គឺព្រះយេស៊ូវគ្រីស្ទ ហើយទទួលអារម្មណ៍នៃសេចក្តីស្រឡាញ់របស់ទ្រង់ដែលមានមកដល់យើង ។ យើងធ្វើតាមព្រះអង្គសង្គ្រោះ ហើយខិតខំស្រឡាញ់អ្នកជិតខាងរបស់យើង ដូចដែលទ្រង់បានធ្វើដែរ ។ យើងចង់ឲ្យអ្នកដទៃទទួលអារម្មណ៍សេចក្ដីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទដែរ ។ យើងអាចចែកចាយពេលវេលា ធនធាន និងបទពិសោធន៍ផ្ទាល់ខ្លួនដើម្បីផ្ដល់ពរជ័យដល់មិត្តភក្ដិរបស់យើង និងក្រុមគ្រួសាររបស់ពួកគេ ។ យើងចង់ឲ្យពួកគេមានអំណរដែលកើតមកពីព្រះអង្គសង្គ្រោះ ដំណឹងល្អរបស់ទ្រង់ និងសាសនាចក្ររបស់ទ្រង់ ។ « ពិធីបរិសុទ្ធនៃពិធីសាក្រាម៉ង់ធ្វើឲ្យការប្រជុំសាក្រាម៉ង់ជាការប្រជុំដ៏ពិសិដ្ឋ និងជាការប្រជុំដ៏សំខាន់បំផុតនៅក្នុងសាសនាចក្រ » ។[6] ក្នុងនាមជាសិស្សរបស់ព្រះយេស៊ូវគ្រីស្ទ យើងអាចផ្ដល់ការអញ្ជើញមួយពេញដោយក្ដីស្រឡាញ់ទៅកាន់មិត្តភក្ដិរបស់យើង និងសមាជិកដែលអសកម្មទាំងអស់ ដែលយើងស្គាល់ និងស្រឡាញ់ ដើម្បីឲ្យមកកាន់ការប្រជុំសាក្រាម៉ង់ ជាកន្លែងដែលយើងទាំងអស់គ្នាអាចមានអារម្មណ៍នៃសេចក្ដីស្រឡាញ់ និងស្ថាបនាសេចក្ដីជំនឿទៅលើព្រះយេស៊ូវគ្រីស្ទបាន ។ នេះគឺជាកិច្ចការរបស់ទ្រង់ ។ នេះគឺជាសាសនាចក្ររបស់ទ្រង់ ។
[1] គោលលទ្ធិ និង សេចក្តីសញ្ញា ២០:៧៧, ៧៩ ។
[2] ការបកប្រែដោយ យ៉ូសែប ស្ម៊ីធ ម៉ាថាយ ២៦:២២, ២៤; នីហ្វៃទី៣ ១៨:១២ ។
[3] រ័សុល អិម ណិលសុន « Revelation for the Church, Revelation for Our Lives » Ensign ឬ Liahona ខែ ឧសភា ឆ្នាំ ២០១៨ ទំព័រ ៩៦ ។
[4] ឌែល ជី រិនឡាន់ « Lifelong Conversion » សុន្ទរកថានៅក្នុងការប្រជុំធម្មនិដ្ឋាន ប៊ី.វ៉ាយ.យូ. ថ្ងៃទី ១៤ ខែ កញ្ញា ឆ្នាំ ២០២១ ។
[5] រ័សុល អិម ណិលសុន « Joy and Spiritual Survival » Ensign ឬ Liahona ខែ វិច្ឆិកា ឆ្នាំ ២០១៦ ទំព័រ ៨២ ។
[6] ដាល្លិន អេក អូក « Sacrament Meeting and the Sacrament » Ensign ឬ Liahona ខែ វិច្ឆិកា ឆ្នាំ ២០០៨ ទំព័រ ១៨ ។