នៅខែមេសា ឆ្នាំ ១៩៧០ សហរដ្ឋអាមេរិកបានបញ្ជូនកាំជ្រួចរ៉ុកកែតមួយទៅកាន់អាវកាសដោយមានដឹកអាកាសយាន្តនិកចំនួន៣នាក់ ។ នៅពេលពួកគេចាប់ផ្តើមធ្វើដំណើរ នោះមានការផ្ទុះមួយដែលធ្វើឲ្យយាន្តអាវកាសខូចហើយធ្វើឲ្យបារម្ភយ៉ាងខ្លាំងពីលទ្ធភាពរបស់ពួកគេ ដើម្បីត្រឡប់មកផ្ទះវិញដោយនៅមានជីវិតរស់ ។
អ្នកជំនាញបានដឹងថាអាកាសយាន្តនិកនៅមានម្ហូប និងទឹកគ្រប់គ្រាន់ដើម្បីរស់ ហើយនៅមានប្រពន្ធអុកស៊ីហ្សែនប្រើសម្រាប់ដកដង្ហើមបានបីបួនថ្ងៃទៀត ។ ប៉ុន្តែ ពួកគេខ្វះចំណុចដ៏សំខាន់មួយគឺ ៖ ថាមពល ។
ដោយមានការប្រឹងប្រែងដ៏ខ្លាំងក្លាដើម្បីស្វែងរកថាមពល នោះច្រើនថ្ងៃក្រោយបន្ទាប់មាននូវថាមពលដែលអាចបម្រុងទុក និងប្រើដើម្បីនាំអាកាសយាន្តនិកទាំងនោះត្រឡប់មកផ្ទះវិញដោយសុវត្ថិភាព ។
ការទទួលបានថាមពលខាងវិញ្ញាណ
នៅក្នុងរបៀបស្រដៀងគ្នានេះ យើងត្រូវការថាមពលខាងវិញ្ញាណដើម្បីប្រឈមនឹងឧបសគ្គនានាក្នុងជីវិតប្រចាំថ្ងៃរបស់យើង និងជួយយើងឲ្យត្រឡប់ទៅផ្ទះសួគ៌ារបស់យើងវិញដោយសុវត្ថិភាព ។ ប្រធាន រ័សុល អិម ណិលសុន បានដាស់តឿនយើងម្តងហើយម្តងទៀតថា ពេលវេលាដ៏លំបាកនឹងកើតឡើង ហើយថាយើងនឹងត្រូវការថាមពលដែលជាអំណាចខាងវិញ្ញាណសម្រាប់ពេលវេលាទាំងនោះ ។[1]
សំណួរសួរថា « តើយើងអាចទទួលបានអំណាចខាងវិញ្ញាណដែលយើងត្រូវការដោយរបៀបណា ? »
ខណៈដែលយើងអាចរកអំណាចនោះបាននៅទីកន្លែងជាច្រើន នោះមានកន្លែងមួយចំនួន ប្រសិនបើមាន ដែលផ្តល់នូវលំហូរនៃអំណាចខាងវិញ្ញាណសម្រាប់យើងយ៉ាងជាប់លាប់គឺមាននៅក្នុងព្រះវិហារបរិសុទ្ធ ។ នៅក្នុងព្រះវិហារបរិសុទ្ធ យើងធ្វើពិធីបរិសុទ្ធនានាដែលគ្មាននៅទីណាផ្សេងទៀតឡើយ ។ ជាលទ្ធផល នៅក្នុងព្រះវិហារបរិសុទ្ធ យើងចុះសេចក្តីសញ្ញា និងទទួលបានអំណាចដែលមានសម្រាប់យើងតែនៅទីនោះប៉ុណ្ណោះ ។
អំណាចមកពីសេចក្តីសញ្ញា
នៅក្នុងគោលលទ្ធិ និង សេចក្តីសញ្ញា យើងរៀនអំពីគ្រាមួយដែលម៉ូសេបានព្យាយាមបន្សុទ្ធដួងចិត្តប្រជាជនរបស់លោក ។ ដើម្បីធ្វើដូច្នេះបាន លោកបានបង្រៀនពួកគេអំពីសិទ្ធិអំណាចនៃបព្វជិតភាព និងសារៈសំខាន់នៃពិធីបរិសុទ្ធបព្វជិតភាព ។
យើងរៀនថា « នៅក្នុងពិធីបរិសុទ្ធទំាងឡាយ [ នៃបព្វជិតភាព ] ដ៏ធំជាងនេះ នោះអំណាចនៃព្រះត្រូវបានសម្តែងឲ្យឃើញ ។ ហើយបើសិនជាគ្មានពិធីបរិសុទ្ធទាំងឡាយនៃបព្វជិតភាពដ៏ធំជាងនេះ និង សិទ្ធិអំណាចនៃបព្វជិតភាពទេ នោះអំណាចនៃព្រះពុំអាចបានសម្តែងដល់មនុស្សនៅក្នុងសាច់ឈាមបានឡើយ » ។[2]
« ពិធីបរិសុទ្ធទាំងឡាយចងភ្ជាប់យើងទៅនឹង [ ព្រះយេស៊ូវគ្រីស្ទ ] តាមរយៈសេចក្តីសញ្ញាដ៏ពិសិដ្ឋនៃបព្វជិតភាព ។ បន្ទាប់មក នៅពេលយើងរក្សាសេចក្តីសញ្ញារបស់យើង នោះទ្រង់នឹងប្រទានព្រះចេស្ដានៃការព្យាបាល ព្រះចេស្ដានៃការពង្រឹងរបស់ទ្រង់ មកដល់យើង »
ប្រធាន រ័សុល អិម ណិលសុន
ប្រធាន ណិលសុន បានពន្យល់តាមបែបនេះថា « ពិធីបរិសុទ្ធទាំងឡាយចងភ្ជាប់យើងទៅនឹង [ ព្រះយេស៊ូវគ្រីស្ទ ] តាមរយៈសេចក្តីសញ្ញាដ៏ពិសិដ្ឋនៃបព្វជិតភាព ។ បន្ទាប់មក នៅពេលយើងរក្សាសេចក្តីសញ្ញារបស់យើង នោះទ្រង់នឹងប្រទានព្រះចេស្ដានៃការព្យាបាល ព្រះចេស្ដានៃការពង្រឹងរបស់ទ្រង់ មកដល់យើង » ។[3]
នៅពេលយើងចូលរួមក្នុងពិធីបរិសុទ្ធទាំងឡាយ នោះយើងចុះសេចក្តីសញ្ញានានា ។ ពេលយើងរៀបចំខ្លួនដើម្បីចុះសេចក្តីសញ្ញាទាំងនោះ ពេលយើងចុះសេចក្តីសញ្ញាទាំងនោះ និងពេលយើងព្យាយាមដើម្បីរក្សាសេចក្តីសញ្ញាទាំងនោះ នោះយើងរស់នៅក្នុងជីវិតដែលកាន់តែប្រសើរឡើង ហើយកាន់តែសុចរិត ។ ហើយនៅពេលយើងរស់នៅបែបនោះ អំណាចខាងវិញ្ញាណហូរចូលមកក្នុងដួងព្រលឹងរបស់យើង ។ ប្រហែលនោះគឺជាមូលហេតុមួយដែលប្រធាន ណិលសុន លើកទឹកចិត្តយើងជាញឹកញាប់ដើម្បីឲ្យ « ដើរនៅលើផ្លូវនៃសេចក្ដីសញ្ញា ហើយបន្ដនៅលើផ្លូវនោះ » ។[4]
សេចក្តីសញ្ញារបស់យើងអាចផ្តល់ឲ្យយើងនូវអំណាចដើម្បីទប់ទល់នឹងឧបសគ្គទាំងឡាយក្នុងជីវិតរបស់យើង ។ ខ្ញុំស្គាល់បុរសម្នាក់ដែលត្រូវបានអញ្ជើញទៅទទួលទានអាហារពេលល្ងាចនៅស្ថានទូតមួយក្នុងប្រទេសរុស្សី ។ នៅពេលការទទួលទានអាហារបានបញ្ចប់ អ្នករៀបចំកម្មវិធីបានណែនាំបុគ្គលិករបស់គាត់ឲ្យបម្រើគ្រឿងស្រវឹងដល់ភ្ញៀវរបស់គាត់ ។ ភ្ញៀវគ្រប់គ្នាបានទទួលស្រាម្នាក់មួយកែវ ហើយពួកគេបានទទួលទានស្រានោះលើកលែងតែបុរសម្នាក់នេះ ។
វាគឺជាពេលដ៏ខុសឆ្គង និងលំបាកមួយដែលបានធ្វើឲ្យអ្នករៀបចំមានការអាក់អន់ចិត្តជាខ្លាំង ។ បុរសនោះអាចគិតថា ការទទួលទានគ្រឿងស្រវឹងអាចជាករណីលើកលែងបានសម្រាប់កាលៈទេសៈបង្ខំ ។ ប៉ុន្តែនៅពេលគាត់បានចងចាំសេចក្តីសញ្ញា គាត់បានដឹងអំពីអ្វីដែលគួរធ្វើ ហើយពេលគាត់បានព្យាយាមរស់នៅតាមសេចក្តីសញ្ញារបស់គាត់ នោះគាត់រកបានអំណាចដើម្បីធ្វើវា ។
យើងក៏អាចធ្វើបែបនេះបានដូចគ្នា ។ នៅពេលយើងត្រូវបានល្បួងឲ្យធ្វើនូវអ្វីដែលយើងពុំគួរធ្វើ ឬកាត់បន្ថយពីអ្វីដែលយើងគួរតែធ្វើ ប្រសិនបើយើងបានកាន់ខ្ជាប់នូវសេចក្តីសញ្ញារបស់យើង នោះយើងនឹងរកឃើញអំណាចដែលយើងត្រូវការដើម្បីទប់ទល់នឹងឧបសគ្គទាំងឡាយដែលកើតមានលើផ្លូវរបស់យើង ។
អំណាចមកពីសេចក្តីសញ្ញាព្រះវិហារបរិសុទ្ធ
ខណៈដែលយើងអាចរកឃើញអំណាចខាងវិញ្ញាណបាននៅទីកន្លែងជាច្រើន នោះមានកន្លែងមួយចំនួន ប្រសិនបើមាន ដែលផ្តល់នូវលំហូរនៃអំណាចខាងវិញ្ញាណសម្រាប់យើងយ៉ាងជាប់លាប់គឺមាននៅក្នុងព្រះវិហារបរិសុទ្ធ ។ នៅក្នុងព្រះវិហារបរិសុទ្ធ យើងធ្វើពិធីបរិសុទ្ធនានាដែលគ្មាននៅទីណាផ្សេងទៀតឡើយ ។ ជាលទ្ធផល នៅក្នុងព្រះវិហារបរិសុទ្ធ យើងចុះសេចក្តីសញ្ញា និងទទួលបានអំណាចដែលមានសម្រាប់យើងតែនៅទីនោះប៉ុណ្ណោះ ។
ខ្ញុំដឹងថា នេះជាការពិត ពីព្រោះខ្ញុំធ្លាប់បានឃើញវានៅក្នុងជីវិតនៃគ្រួសាររបស់ខ្ញុំ ហើយខ្ញុំធ្លាប់ជួបបទពិសោធន៍នេះដោយខ្លួនខ្ញុំផ្ទាល់ ។
ប្រសិនបើបងប្អូនពុំទាន់បានទៅព្រះវិហារបរិសុទ្ធទេ ខ្ញុំសូមអញ្ជើញបងប្អូនឲ្យរៀបចំខ្លួនដើម្បីទៅឥឡូវនេះ ។ ប្រសិនបើបងប្អូនធ្លាប់ទៅហើយ ខ្ញុំសូមអញ្ជើញបងប្អូនឲ្យត្រឡប់ទៅវិញឲ្យបានកាន់តែឆាប់ និងកាន់តែញឹកញាប់តាមដែលបងប្អូនអាចទៅតាម ។ ប្រសិនបើបងប្អូនរស់នៅឆ្ងាយពីព្រះវិហារបរិសុទ្ធ ឬមានឧបសគ្គផ្សេងទៀតដែលរារាំងបងប្អូនមិនអាចចូលរួមបាន ប្រធាន ណិលសុន បានលើកទឹកចិត្តបងប្អូនឲ្យ « ដាក់កាលវិភាគទៀងទាត់មួយ ដើម្បីសិក្សាសេចក្ដីសញ្ញាដែលបងប្អូនបានធ្វើនោះនៅក្នុងចិត្តរបស់បងប្អូន » ។[5]
ខ្ញុំសន្យាថា ពេលបងប្អូនធ្វើនូវកិច្ចការទាំងនេះ នោះអំណាចខាងវិញ្ញាណនឹងហូរចូលក្នុងព្រលឹងរបស់បងប្អូន ៕
[1] រ័សុល អិម ណិលសុន « The Temple and Your Spiritual Foundation » Liahona ខែ វិច្ឆិកា ឆ្នាំ ២០២១ ទំព័រ ៩៤ ។
[2] សូមមើល គោលលទ្ធិ និង សេចក្តីសញ្ញា ៨៤ ៖ ២៣, ១៨-២១ ។
[3] រ័សុល អិម ណិលសុន « The Temple and Your Spiritual Foundation » Liahona ខែ វិច្ឆិកា ឆ្នាំ ២០២១ ទំព័រ ៩៤ ។
[4] រ័សុល អិម ណិលសុន « The Power of Spiritual Momentum » Liahona ខែ ឧសភា ឆ្នាំ ២០២២ ទំព័រ ៩៨ ។
[5] រ័សុល អិម ណិលសុន « The Temple and Your Spiritual Foundation » Liahona ខែ វិច្ឆិកា ឆ្នាំ ២០២១ ទំព័រ 95 ។