ខ្ញុំនឹងមិនភ្លេចទេកាលនៅជាគ្រួសារតូចមួយនៅឡើយ នូវបទពិសោធន៍ពេលផ្លាស់ទៅរស់នៅកោះតៃវ៉ាន់ជាច្រើនឆ្នាំកន្លងទៅ ។ វាគឺនៅឆ្នាំ ១៩៩៣ ហើយកូនទីពីររបស់យើងទើបនឹងកើត ។ មុនការផ្លាស់លំនៅនេះ យើងធ្លាប់រស់ នៅកោះតៃវ៉ាន់ម្ដងហើយ កាលទើបបានរៀបការជាប្តីប្រពន្ធថ្មោងថ្មី ប៉ុន្ដែបទពិសោធន៍លើកនេះគឺខុសគ្នាខ្លាំងណាស់ យើងមិនគ្រាន់តែមកដើម្បីផ្សងព្រេងនោះទេ—គឺយើងមករស់នៅ ! ខ្ញុំនៅតែអាចចាំយ៉ាងច្បាស់ពីអារម្មណ៍ដ៏ពិបាកនោះ ដែលត្រូវចេញពីប្រទេសកាណាដាក្នុងពេលមួយរយៈវែង ហើយយើងបាននឹកដល់ការប្រារព្ធពិធីបុណ្យថ្លែងអំណរគុណ បុណ្យគ្រីស្ទម៉ាស និងបុណ្យអ៊ីស្ទើរ ពេលយើងជួបជុំគ្នាជាមួយក្រុមគ្រួសាររបស់យើងផ្ទាល់នៅឯផ្ទះ ។ នៅប៉ុន្មានឆ្នាំនោះ ឃែរី និងខ្ញុំបានចំណាយពេលជា ច្រើនដើម្បីគិតពីរបៀបដែលយើងនៅតែអាចប្រារព្ធពិធី និងប្រពៃណីទាំងនោះប្រកបដោយអត្ថន័យបានសម្រាប់គ្រួសារតូចរបស់យើង និងរបៀបដែលយើងអាចជួយកូនៗរបស់យើងឲ្យនៅតែមានអំណរ ដែលយើងធ្លាប់មានកាលយើងធំឡើង ហើយស្វែងរកវិធីបង្រៀនពួកគេអំពីព្រះអង្គសង្គ្រោះ និងដំណឹងល្អរបស់ទ្រង់ ។
អំឡុងឆ្នាំដំបូងៗ យើងបានគិតដល់គោលការណ៍នៃការណែនាំពីរបីដើម្បីជួយដល់យើង ។ ទីមួយ វាស្ទើរតែមិនអាចទៅរួចដើម្បីបង្កើតឲ្យមានបទពិសោធន៍ដែលយើងធ្លាប់មាននៅផ្ទះរបស់យើង កាលធំឡើងនៅប្រទេសកាណាដា ។ នៅកោះតៃវ៉ាន់ គ្មាននរណាម្នាក់នៅជុំវិញយើងប្រារព្ធពិធីបុណ្យទាំងនេះទេ ។ យើងត្រូវតែទទួលយករឿងនោះ រួចហើយធ្វើវាឲ្យសាមញ្ញ ហើយសម្របការប្រារព្ធពិធីតាមកាលៈទេសៈបច្ចុប្បន្នរបស់យើង ។ ទីពីរ យើងត្រូវរើសយកប្រពៃណីណាមួយដែលសំខាន់ខ្លាំងបំផុតចំពោះយើង ហើយសម្រេចចិត្តពីរបៀបដែលយើងនឹងបង្កើតបទពិសោធន៍ដ៏មានអត្ថន័យនោះសម្រាប់កូនៗរបស់យើង ជាមួយនឹងធនធានដែលមានកម្រិតរបស់យើង ។ ទីបី យើងបានដឹងថា យើងត្រូវផ្ដោតលើការស្វែងរករបៀបនានាដើម្បីបង្រៀនកូនៗរបស់យើងអំពីព្រះអង្គសង្គ្រោះ និងបេសកកម្មរបស់ទ្រង់ ។ ទីបំផុត យើងបានលាយបញ្ចូលគ្នារវាងសកម្មភាពដែលផ្ដោតលើគេហដ្ឋាន និងសាសនាចក្រ ។
- យើងបានសម្គាល់ឃើញថា មានមនុស្សដទៃ ទៀតក្នុងវួដរបស់យើង និងក្រុមមិត្តភក្ដិជា ច្រើន ដែលនៅឆ្ងាយពីគ្រួសារអំឡុងគ្រាដ៏ សំខាន់ទាំងនេះដែរ ។ យើងបានបើកទ្វារផ្ទះយើង ហើយអញ្ជើញមនុស្សជាច្រើនឲ្យមកប្រារព្ធពិធីជាមួយយើង ។
- យើងមិនត្រឹមតែខិតខំអញ្ជើញមិត្តបរទេសផ្សេងទៀតនោះទេ ប៉ុន្ដែក៏បានអញ្ជើញមិត្តក្នុងស្រុកផងដែរ ។ សម្រាប់មិត្តជនជាតិតៃវ៉ាន់របស់យើងជាច្រើន ការចូលរួមជាមួយប្រពៃណីរបស់យើងគឺជារបៀបដ៏មានអត្ថន័យមួយ ដើម្បីបង្រៀន ឬបង្កើនការយល់ដឹងរបស់ពួកគេអំពីសារៈសំខាន់នៃព្រះជន្ម និងពលិកម្មរបស់ព្រះអង្គសង្គ្រោះ ។
- តន្ដ្រីអំពីព្រះអង្គសង្គ្រោះគឺជាផ្នែកដ៏សំខាន់មួយនៃប្រពៃណីគ្រួសាររបស់យើង ។ យើងបានបង្កើតសៀវភៅតន្ដ្រីគ្រួសារ ចូលរួមក្នុងក្រុមចម្រៀង និងការច្រៀងចម្រៀងគ្រីស្ទម៉ាស ហើយជាលទ្ធផល យើងរីករាយ ហើយទទួលបានព្រះវិញ្ញាណដ៏ពិសេសដែលកើតមានតាមរយៈតន្ដ្រីដែលផ្ដោតលើព្រះគ្រីស្ទ ។
- កាលយើងអធិស្ឋានស្វែងរកមនុស្សដទៃដើម្បីផ្ដល់ការបម្រើអំឡុងរដូវបុណ្យទាំងនេះ វាបានបើកឱកាសដ៏គួរឲ្យចងចាំ និងមានអត្ថន័យជាច្រើនដើម្បីបង្រៀនកូនៗរបស់យើងអំពីការថែទាំដល់អ្នកដទៃ ។
- នៅក្នុងវួដ និងស្ដេករបស់យើង យើងជួយធ្វើឲ្យប្រាកដថា ការប្រជុំសាក្រាម៉ង់ និងសកម្មភាពរបស់យើងអំឡុងរដូវបុណ្យទាំងនេះគឺផ្ដោតទៅលើព្រះគ្រីស្ទ ។ ឱ វាជាអំណរដ៏ក្រៃលែងដើម្បីជួយបង្រៀន និងចែកចាយអំពីព្រះអង្គសង្គ្រោះតាមរយៈព្រឹត្តិការណ៍ក្នុងសាសនាចក្រ ដូចជាការប្រកួតការសម្ដែងប្រសូតិកម្មបុណ្យគ្រីស្ទម៉ាស និងកូនចៀមនៃព្រះ អូរ៉ាថូរីអូ ជាដើម ។
« ជញ្ជឹងគិត និងស្វែងរករបៀបប្រារព្ធពិធីបុណ្យអ៊ីស្ទើរឲ្យកាន់តែផ្តោតលើព្រះគ្រីស្ទក្នុងគ្រួសារយើង » ។
អែលឌើរ ហ្គែរី អ៊ី ស្ទីវ៉ែនសុន
នៅប្រទេសវៀតណាម ជាកន្លែងដែលសាសនាចក្រនៅថ្មីស្រឡាងនៅឡើយ ដៃគូរៀមច្បងមួយគូបានបង្រៀនយុវមជ្ឈិមវ័យនៅលីវក្នុងសាខានីមួយៗអំពីរបៀបសម្ដែងប្រសូតិកម្ម ខណៈអានដំណើររឿងដំណឹងល្អមកពីព្រះគម្ពីរសញ្ញាថ្មីនៅក្នុងគម្ពីរលូកា និងម៉ាថាយ ។ យើងស្រមៃថា នៅថ្ងៃណាមួយ សមាជិកដ៏អស្ចារ្យទាំងនេះម្នាក់ៗនឹងមានក្រុមគ្រួសាររបស់ពួកគេផ្ទាល់ ហើយនឹងដឹងពីរបៀបបង្រៀនកូនៗរបស់ពួកគេអំពីដំណើររឿងបុណ្យគ្រីស្ទម៉ាស ។
នៅក្នុងសន្និសីទទូទៅ ខែ មេសា ឆ្នាំ ២០២៣ អែលឌើរ ហ្គែរី អ៊ី ស្ទីវ៉ែនសុន បានថ្លែងសុន្ទរកថាដ៏បំផុសគំនិតមួយ « ដំណើររឿងបុណ្យអ៊ីស្ទើរដ៏អស្ចារ្យបំផុតដែលពុំធ្លាប់តំណាលប្រាប់ » ។ លោកបានអញ្ជើញយើងឲ្យ « ជញ្ជឹងគិត និងស្វែងរករបៀបប្រារព្ធពិធីបុណ្យអ៊ីស្ទើរឲ្យកាន់តែផ្តោតលើព្រះគ្រីស្ទក្នុងគ្រួសារយើង » ។ លោកមានប្រសាសន៍ថា « ប្រហែលជា … យើងទាំងអស់គ្នាអាចជញ្ជឹងគិត ៖ តើយើងធ្វើជាគំរូពីការបង្រៀន និងការប្រារព្ធពិធីសម្រាប់ការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ដែលជាដំណើររឿងបុណ្យអ៊ីស្ទើរ ឲ្យមានភាព ពេញលេញ មានតុល្យភាពដូចគ្នា និងប្រពៃណីសាសនាដ៏មានអត្ថន័យដូចគ្នា ទៅនឹងការប្រសូតរបស់ព្រះយេស៊ូវគ្រីស្ទ ដែលជាដំណើររឿងនៃបុណ្យគ្រីស្ទម៉ាសដោយរបៀបណា ? » ខ្ញុំដឹងគុណជាពិសេសដល់ការអញ្ជើញបន្ថែមទៀតរបស់អែលឌើរ ស្ទីវ៉ែនសុន ឲ្យពិចារណាពីរបៀបដែល « ការអានព្រះគម្ពីរមរមននៅបុណ្យអ៊ីស្ទើរ អាចផ្តល់ពរដល់ជីវិតយើង និងមនុស្សជាទីស្រឡាញ់របស់យើងតាមរបៀបដ៏មានអត្ថន័យ » ។
កាលការជួបជុំគ្នាបន្ដមាននៅទូទាំងអាស៊ី នោះវាសំខាន់ដែលយើងត្រូវចាប់ផ្ដើមនៅពេលឥឡូវនេះ នៅក្នុងជីវិតរបស់យើងផ្ទាល់ និងជាមួយក្រុមគ្រួសាររបស់យើង ក្នុងការស្វែងរករបៀបនានាដើម្បីប្រារព្ធដល់ព្រះជន្ម និងបេសកកម្មរបស់ព្រះអង្គសង្គ្រោះ ។ សូមគិតដល់រឿងដែលយើងអាចធ្វើបានរៀងៗខ្លួន ជាមួយគ្រួសារ និងមិត្តភក្ដិ ហើយជាវួដ និងស្ដេក ដើម្បីបង្កើតប្រពៃណីដ៏មានអត្ថន័យ និងផ្ដោតលើព្រះគ្រីស្ទបានកាន់តែប្រសើរឡើងនៅឯបុណ្យគ្រីស្ទម៉ាស និងបុណ្យអ៊ីស្ទើរ ។
ខ្ញុំអធិស្ឋានថា យើងនឹងរកឃើញនូវរបៀបប្រើព្រះគម្ពីរមរមនដើម្បីជួយយើងឲ្យចងចាំដល់ព្រះ គ្រីស្ទជានិច្ច ។ ខ្ញុំសូមថ្លែងទីបន្ទាល់ថា វាបង្រៀនគោលលទ្ធិនៃព្រះគ្រីស្ទនៅគ្រប់ទំព័រទាំងអស់ ហើយវាជារបៀបដែលព្រះបានប្រទានមកដើម្បីឲ្យយើងចងចាំ និងអបអរសាទរដល់ព្រះជន្ម និងបេសកកម្មរបស់ព្រះអង្គសង្គ្រោះ ។