ព្យាការី នីហ្វៃ បានបង្រៀនថា « ហើយខ្ញុំ នីហ្វៃ បានទៅលើភ្នំជាញឹកញាប់ ហើយខ្ញុំបានអធិស្ឋានដល់ព្រះអម្ចាស់ជាញយៗ ហេតុដូច្នោះហើយ ទើបព្រះអម្ចាស់ ទ្រង់បង្ហាញខ្ញុំពីការណ៍ដ៏ប្រសើរជាច្រើន » ។[1] គំរូនៃការកំណត់ពេលវេលាជាទៀងទាត់ដើម្បីទៅទីកន្លែងពិសេសមួយដើម្បីស្វែងរកព្រះ ធ្វើឲ្យមានភាពងាយស្រួលក្នុងការទទួលការបំផុសគំនិត និងវិវរណៈពីព្រះ ។ នៅក្នុងព្រះគម្ពីរ យើងឃើញមានគំរូជាច្រើន រួមទាំង ៖
- បងរបស់យ៉ារេឌ ម៉ូសេ យ៉ូស្វេ ម្នាក់ៗសុទ្ធតែបានឡើងភ្នំខ្ពស់ដើម្បីស្វែងរកព្រះអម្ចាស់ និងទទួលការណែនាំរបស់ទ្រង់[2]
- អេណុសបានស្វែងរកព្រះអម្ចាស់តាមរយៈការអធិស្ឋាន ពេលកំពុងប្រមាញ់នៅក្នុងព្រៃ ហើយបានទទួលការអត់ទោសពីអំពើបាបរបស់លោក ហើយបានទទួលការសន្យាដ៏អស្ចារ្យនានា[3]
- យ៉ូសែប ស៊្មីធ បានចូលទៅក្នុងព្រៃដើម្បីស្វែងរកប្រាជ្ញាតាមរយៈការអធិស្ឋាន ហើយបានទទួលការណែនាំពីព្រះវរបិតាសួគ៌ និងព្រះយេស៊ូវគ្រីស្ទ[4]
- ព្រះអង្គសង្គ្រោះបានតមអាហារនៅក្នុងទីវាលរហោស្ថានអស់ ៤០ ថ្ងៃ ដើម្បីរៀបចំសម្រាប់ការងារបម្រើរបស់ទ្រង់ ហើយទទួលបានកម្លាំងខាងវិញ្ញាណ[5]
នៅក្នុងសន្និសីទទូទៅថ្មីៗនេះ ប្រធាន រ័សុល អិម ណិលសុន បានបង្រៀនថា « ពេលវេលានៅក្នុងព្រះវិហារបរិសុទ្ធនឹងជួយបងប្អូនឲ្យ គិតដល់សេឡេស្ទាល និងចាប់យកចក្ខុវិស័យថាបងប្អូនជានរណាពិតប្រាកដ បងប្អូនអាចប្រែក្លាយជាយ៉ាងណា និងប្រភេទនៃជីវិតដែលបងប្អូនអាចមានជារៀងរហូត ។ ការថ្វាយបង្គំក្នុងព្រះវិហារបរិសុទ្ធជាទៀងទាត់នឹងអភិវឌ្ឍរបៀបដែលបងប្អូនមើលមកខ្លួនឯង និងរបៀបដែលបងប្អូនចុះចូលក្នុងផែនការដ៏អស្ចារ្យរបស់ព្រះ ។ ខ្ញុំសូមសន្យានឹងបងប្អូនដូច្នោះ » ។[6]
ពរជ័យដែលបានសន្យានៃការមានចក្ខុវិស័យកាន់តែទូលំទូលាយ ការយល់ដឹងស៊ីជម្រៅ និងការមានអារម្មណ៍កាន់តែខ្លាំងអំពីការរួមចំណែកជាមួយព្រះ ជាលទ្ធផលដែលកើតចេញមកពីឆន្ទៈរបស់យើងក្នុងការថ្វាយពេលវេលាពិសិដ្ឋ និងការស្ថិតនៅក្នុងទីកន្លែងបរិសុទ្ធនានា ដើម្បីមានភាពងាយស្រួលក្នុងការគិតដល់សេឡេស្ទាល ។
« នៅពេលភាពចលាចលណាមួយកើតឡើងក្នុងជីវិតរបស់បងប្អូន កន្លែងដែលមានសុវត្ថិភាពបំផុតដើម្បីមានជីវិតខាងវិញ្ញាណគឺការរស់នៅតាមសេចក្ដីសញ្ញានៃព្រះវិហារបរិសុទ្ធរបស់បងប្អូន »
ប្រធាន រ័សុល អិម ណិលសុន
ពេលវេលាពិសិដ្ឋ
ប្រសិនបើយើងត្រូវបង្ហាញពីរបាយការណ៍នៃការប្រើប្រាស់ពេលវេលាប្រចាំថ្ងៃរបស់យើង តើវានឹងប្រាប់យើងអ្វីខ្លះអំពីអាទិភាពរបស់យើង ? កាលខ្ញុំបានពិនិត្យមើលការប្រើប្រាស់ពេលវេលាផ្ទាល់ខ្លួនរបស់ខ្ញុំ ខ្ញុំបានមានអារម្មណ៍ថាត្រូវការការកែតម្រូវទម្លាប់របស់ខ្ញុំ និងមានបំណងរក្សាទុកពេលវេលាដើម្បីធ្វើរឿងទាំងឡាយដែលនឹងជួយខ្ញុំឲ្យខិតកាន់តែជិតព្រះ ។ ការកែតម្រូវទាំងនេះរួមមាន ការរៀបចំពេលទៀងទាត់មួយដើម្បីទៅព្រះវិហារបរិសុទ្ធ ទុកពេលជាក់លាក់ក្នុងថ្ងៃនីមួយៗសម្រាប់ការសិក្សាព្រះគម្ពីរផ្ទាល់ខ្លួន ។ យើងទាំងអស់គ្នាគួរតែប្រុងប្រយ័ត្នក្នុងការរក្សាម៉ោងដ៏ពិសិដ្ឋនៃការប្រជុំសាក្រាម៉ង់ជារៀងរាល់សប្ដាហ៍ ។ ពេលយើងរក្សាទុកពេលវេលាជាមុន វាកាន់តែងាយស្រួលសម្រាប់យើង ដើម្បីកុំឲ្យយើងចំណាយពេលវេលារបស់យើងអស់ ដោយទុកការណ៍នោះទៅជាចុងក្រោយដោយមិនសំខាន់ទៅវិញ ។
តើពេលវេលាណាខ្លះដែលពិសិដ្ឋចំពោះបងប្អូន ហើយតើបងប្អូនរក្សាទុក និងការពារពេលវេលាទាំងនោះដោយរបៀបណា ?
ទីកន្លែងបរិសុទ្ធ
ព្រះវិហារបរិសុទ្ធជាដំណាក់របស់ព្រះអម្ចាស់ ជាកន្លែងដែលយើងអាចទៅស្វែងរកទ្រង់បាន ។ យើងមានអំណរគុណដែលមានព្រះវិហារបរិសុទ្ធកាន់តែច្រើននៅទូទាំងតំបន់អាស៊ីនេះ ។ មូលនិធិជំនួយទូទៅសម្រាប់អ្នកទៅព្រះវិហារបរិសុទ្ធ ក៏អាចជួយអ្នកចូលរួមព្រះវិហារបរិសុទ្ធលើកទីមួយ ដែលត្រូវការជំនួយផ្នែកហិរញ្ញវត្ថុផងដែរ ។ មូលនិធិនោះក៏អាចត្រូវបានប្រើប្រាស់សម្រាប់ការចូលរួមការផ្សារភ្ជាប់បន្តទៀតរបស់បងប្អូនបង្កើត និងកូនៗដែលនៅរស់ផងដែរ ។ ប្រសិនបើយើងមិនរស់នៅជិតនឹងព្រះវិហារបរិសុទ្ធ ដូចជានីហ្វៃ នោះយើងនៅតែអាចស្វែងរកទីកន្លែងពិសេសដើម្បីទៅកាន់តែជិតព្រះបានផងដែរ ។ ទីកន្លែងទាំងនេះអាចនៅក្នុងគេហដ្ឋានរបស់យើងផ្ទាល់[7] សាលាប្រជុំរបស់យើង ឬទីកន្លែងដ៏ស្ងប់ស្ងាត់ និងស្រស់ស្អាតផ្សេងៗទៀត ។ ទីកន្លែងមួយដែលខ្ញុំចូលចិត្តគឺទួលនៅខាងក្រោយផ្ទះខ្ញុំ ជាកន្លែងដែលខ្ញុំទៅដើរលំហែ ខណៈដែលខ្ញុំស្ដាប់ និងពិចារណាដល់ប្រសាសន៍របស់ព្យាការី ។ ទីកន្លែងបរិសុទ្ធក៏មិនកំណត់តែចំពោះទីតាំងខាងរូបកាយនោះដែរ ។ ប្រធាន ណិលសុន បានបង្រៀនថា « នៅពេលភាពចលាចលណាមួយកើតឡើងក្នុងជីវិតរបស់បងប្អូន កន្លែងដែលមានសុវត្ថិភាពបំផុតដើម្បីមានជីវិតខាងវិញ្ញាណគឺការរស់នៅតាមសេចក្ដីសញ្ញានៃព្រះវិហារបរិសុទ្ធរបស់បងប្អូន » ។[8]
មិនថាយើងនៅកន្លែងណាទេ យើងអាចចំណាយពេលពិចារណាពីសេចក្ដីសញ្ញាដែលយើងបានចុះជាមួយនឹងព្រះ ។ ការរំឭកឡើងវិញនូវអ្វីដែលយើងរៀននៅក្នុងព្រះវិហារបរិសុទ្ធ និងការតាំងចិត្តរបស់យើងជាថ្មីចំពោះការសន្យាដ៏ពិសិដ្ឋរបស់យើងចំពោះព្រះ ព្រមទាំងពរជ័យដែលបានសន្យារបស់ទ្រង់ចំពោះយើង នឹងពង្រឹង ហើយនិងផ្ដល់អំណាចដល់យើង ។ ការរំឭកពីសំណួរប័ណ្ណចូលព្រះវិហារបរិសុទ្ធក៏អាចជួយយើងឲ្យវាយតម្លៃពីជំហររបស់យើងជាមួយនឹងព្រះ និងចំណុចដែលយើងអាចត្រូវការជំនួយផងដែរ ។[9]
បន្ថែមលើព្រះវិហារបរិសុទ្ធ តើទីកន្លែងបរិសុទ្ធណាខ្លះទៀត ដែលបងប្អូនទៅដើម្បីនៅជាមួយនឹងព្រះ ។
ការគិតដល់សេឡេស្ទាល
ពេលដែលយើងមានបំណងស្វែងរកព្រះជាទៀងទាត់ ដោយការចំណាយពេលវេលាពិសិដ្ឋនៅក្នុងទីកន្លែងបរិសុទ្ធ នោះទ្រង់នឹងប្រទានពរដល់យើងឲ្យមានការយល់ដឹង ការលួងលោម សេចក្ដីសុខសាន្ត ទស្សនវិស័យ និងវិវរណៈកាន់តែច្រើនឡើង ។ ការណ៍នេះនឹងជួយពង្រីក និងបង្កើនការគិតរបស់យើង ហើយយើងនឹងទទួលបានចម្លើយ ការលើកទឹកចិត្ត ទំនុកចិត្ត និងការបំផុសគំនិតដើម្បីប្រឈមនឹងឧបសគ្គនៃជីវិតរបស់យើង ។ វានឹងផ្ដល់ទិសដៅ ហើយជួយយើងឲ្យដាក់អ្វីៗទៅក្នុងទស្សនវិស័យត្រឹមត្រូវរបស់វា ដើម្បីមានភាពស្រពិចស្រពិលកាន់តែតិច ហើយមានភាពសេឡេស្ទាលកាន់តែច្រើននៅក្នុងគំនិតរបស់យើង ។
កាលដែលយើងស្ដាប់តាមការអញ្ជើញរបស់ប្រធាន ណិលសុន ឲ្យ « គិតដល់សេឡេស្ទាល » នោះចូរយើងម្នាក់ៗរស់នៅឲ្យពេញលេញសមនឹងឯកសិទ្ធិនៃជំនួយដ៏ទេវភាពរបស់យើង ដោយការកំណត់ពេលវេលាដោយចេតនា ដើម្បីចូលរួមក្នុងព្រះវិហារបរិសុទ្ធ និងទីកន្លែងបរិសុទ្ធផ្សេងៗទៀតឲ្យបានទៀងទាត់ ដោយការពិចារណា និងការរស់នៅក្នុងសេចក្ដីសញ្ញារបស់យើង និងដោយការប្រព្រឹត្តិតាមជំនួយដ៏ទេវភាពដែលបានទទួលនោះ ។[10]
[1] នីហ្វៃទី១ ១៨:៣
[2] អេធើរ ៣:១, ម៉ូសេ ១:១-២, និក្ខមនំ ៣, និក្ខមនំ ២៤
[3] អេណុស ១
[4] យ៉ូសែប ស្ម៊ីធ ប្រវត្តិ ១:១៤-២០
[5] ម៉ាថាយ ៤:១
[6] រ័សុល អិម ណិលសុន « រីករាយនៅក្នុងអំណោយទាននៃកូនសោបព្វជិតភាព » លីអាហូណា ខែ ឧសភា ឆ្នាំ ២០២៤
[7] ម៉ាថាយ ៦:៦-៧
[8] រុស័ល អិម ណិលសុន « ព្រះវិហារបរិសុទ្ធ និងគ្រឹះខាងវិញ្ញាណរបស់បងប្អូន » លីអាហូណា ខែ វិច្ឆិកា ឆ្នាំ ២០២១
[9] ក្បួនខ្នាតទូទៅ ២៦.៣.៣.១, ២៧.២
[10] រ័សុល អិម ណិលសុន « គិតដល់សេឡេស្ទាល » លីអាហូណា ខែ វិច្ឆិកា ឆ្នាំ ២០២៣