ព្យាការីហេលេមិនក្នុងព្រះគម្ពីរមរមនបានទូន្មានដល់ពួកកូនប្រុសរបស់លោកឲ្យ « ចងចាំចុះ ចូរចងចាំចុះថា គឺនៅលើសិលានៃព្រះដ៏ប្រោសលោះនៃយើង គឺព្រះគ្រីស្ទជាព្រះរាជបុត្រានៃព្រះ ដែលកូនត្រូវសង់គ្រឹះរបស់កូន ដើម្បីកាលណាអារក្សបញ្ចេញខ្យល់ដ៏ខ្លាំងក្លារបស់វាមក មែនហើយ ព្រួញរបស់វានៅក្នុងខ្យល់កួច មែនហើយ កាលណាព្រិល និងខ្យល់ព្យុះកំណាចទាំងអស់របស់វាបោកបក់មកលើកូន នោះវានឹងគ្មានអំណាចមកលើកូនឡើយ ដើម្បីទាញកូនចុះទៅក្នុងជង្ហុកនៃសេចក្ដីវេទនា និងទុក្ខលំបាកដ៏មិនចេះចប់មិនចេះហើយ ពីព្រោះមកពីសិលាដែលកូនបានសង់នៅលើនោះ ដែលជាគ្រឹះដ៏ខ្ជាប់ខ្ជួនមួយ ជាគ្រឹះមួយបើសិនណាមនុស្សសង់នៅលើនោះ នោះពួកគេមិនអាចរលំបានឡើយ » ។ ( ហេលេមិន ៥:១២ បានបន្ថែមការគូសបញ្ជាក់ ) ។
ដើម្បីស្ថាបនាគ្រឹះរបស់យើងនៅលើសិលានៃព្រះប្រោសលោះ គឺត្រូវក្លាយជាសិស្សពេញមួយជីវិតរបស់ព្រះយេស៊ូវគ្រីស្ទ ។ ក្នុងអំឡុងពេលពីរឆ្នាំកន្លងមកនេះ តំបន់អាស៊ីបានសង្កត់ធ្ងន់លើសារៈសំខាន់នៃការក្លាយជាសិស្សពេញមួយជីវិតរបស់ព្រះអង្គសង្គ្រោះ តាមរយៈការជួយមនុស្សទាំងអស់ឲ្យមានអារម្មណ៍ថាពួកគេជាចំណែកនៃសាសនាចក្រ ទទួលបានបទពិសោធន៍នៃថ្ងៃឈប់សម្រាកដ៏រីករាយ បម្រើព្រះ និងមនុស្សទូទៅ ហើយធ្វើឲ្យឥទ្ធិពលនៃសេចក្ដីសញ្ញាដ៏ពិសិដ្ឋនានាមានភាពស៊ីជម្រៅនៅក្នុងជីវិតរបស់យើង ។ នៅក្នុងផ្នែកទាំងនេះនីមួយៗ យើងបានផ្តោតលើសេចក្ដីសញ្ញា និងពិធីបរិសុទ្ធដែលទាក់ទងគ្នានៃពិធីបុណ្យជ្រមុជទឹក និងពិធីបញ្ជាក់ ពិធីសាក្រាម៉ង់ ការបម្រើជាអ្នកផ្សព្វផ្សាយសាសនា និងការថ្វាយបង្គំនៅក្នុងព្រះដំណាក់របស់ព្រះអម្ចាស់ ។ យើងមានអំណរគុណបំផុតចំពោះការខិតខំប្រឹងប្រែងជាបុគ្គល និងជាសមូហភាពរបស់បងប្អូន សម្រាប់ភាពរីកចម្រើនដែលបានធ្វើឡើងនិងផ្តោតចិត្តទុកដាក់នៅក្នុងផ្នែកនីមួយៗ ព្រមទាំងសម្រាប់ជីវិតជាច្រើនដែលបានទទួលពរដោយសារតែកិច្ចការនេះ ។
« ឥឡូវនេះគឺជាពេលវេលាសម្រាប់បងប្អូន និងខ្ញុំ ដើម្បីរៀបចំខ្លួនសម្រាប់ការយាងមកជាលើកទីពីររបស់ព្រះអម្ចាស់ និងព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។ ឥឡូវនេះគឺជាពេលដែលយើងដាក់អាទិភាពខ្ពស់បំផុតទៅលើភាពជាសិស្សរបស់យើង »
ប្រធាន រ័សុល អិម ណិលសុន
កាលពីដើមឆ្នាំនេះ ពិភពលោកបានស្រឡាំងកាំងដោយព្យុះភ្លើងភ្លាមៗ និងមិនបានរំពឹងទុក ដែលបានបំផ្លាញតំបន់ជិតខាងទាំងមូលក្នុងទីក្រុងឡូសអាន់ជើឡែស រដ្ឋកាលីហ្វូញ៉ា ក្នុងសហរដ្ឋអាមេរិក ។ ល្បឿន និងកម្រិតដ៏ខ្លាំងដែលភ្លើងឆេះរាលដាលមិនធ្លាប់មានពីមុនមក បណ្តាលឲ្យមនុស្សរាប់ម៉ឺននាក់ត្រូវភៀសខ្លួន ហើយមានការបំផ្លិចបំផ្លាញដល់សហគមន៍ទាំងមូល ។ ទោះបីជាយ៉ាងណា ក្នុងចំណោមការបំផ្លិចបំផ្លាញនេះ មានផ្ទះលំហែមួយចំនួនដែលរួចផុតពីភ្លើងឆាបឆេះ ខណៈដែលអ្វីៗនៅជុំវិញវាត្រូវបានដុតបំផ្លាញអស់ ។ « ផ្ទះអព្ភូតហេតុ » ទាំងនេះត្រូវបានសិក្សាដោយអ្នកជំនាញ ហើយវាត្រូវបានគេរកឃើញថា ខណៈដែលទីតាំង ទិសដៅខ្យល់ ការខិតខំប្រឹងប្រែងពន្លត់អគ្គីភ័យ និងដង់ស៊ីតេអគារដើរតួយ៉ាងសំខាន់ ផ្ទះទាំងនេះមានភាពស្រដៀងគ្នាដូចជា ៖ វាត្រូវបានសាងសង់ដោយសម្ភារធន់នឹងភ្លើង ។ ព្រៃគម្ពោត និងរុក្ខជាតិដែលអាចឆេះត្រូវបានជម្រះចេញពីបរិវេណដែលនៅជិតវា ហើយក្នុងករណីខ្លះ វាមានប្រព័ន្ធបាញ់ទឹកការពារភ្លើងដែលបានដំឡើងជាមុន ។
ដូចគ្នានេះដែរ បញ្ហាដែលយើងនឹងប្រឈមមុខក្នុងជីវិត មិនថាជាបញ្ហាខាងសាច់ឈាម ហិរញ្ញវត្ថុ សតិអារម្មណ៍ សុខភាពផ្លូវកាយ ឬខាងវិញ្ញាណនោះទេ អាចនឹងកើតឡើងដោយមិននឹកស្មានដល់ និងឆាប់រហ័ស ។ ប៉ុន្តែប្រសិនបើយើងបានស្ថាបនាគ្រឹះរបស់យើងយ៉ាងរឹងមាំរួចរាល់នៅលើសិលានៃព្រះយេស៊ូវគ្រីស្ទ នោះយើងមានការសន្យាថាយើងនឹងអាចយកឈ្នះរាល់ការលំបាកដែលកើតមាននៅក្នុងជីវិតរបស់យើង ។
ផ្ទុយទៅវិញ ប្រសិនបើយើងជ្រើសរើសមិនធ្វើបែបនេះទេ វាប្រាកដណាស់ថាយើងនឹងមិនបានរួចផុតជីវិតឡើយ ( សូមមើល នីហ្វៃទី៣ ១៨:១៣ ) ។ ចំពោះពួកយើងដែលមានកូន ឬមនុស្សផ្សេងទៀតដែលយើងស្រឡាញ់ តើយើងមិនចង់រៀបចំពួកគេតាមរបៀបនេះ ដើម្បីពួកគេអាចស៊ូទ្រាំ និងយកឈ្នះលើគ្រប់ការសាកល្បងដែលពួកគេនឹងជួបប្រទះក្នុងជីវិតរបស់ពួកគេទេឬអី ?
ដើម្បីជួយយើង ព្រះអម្ចាស់បានបង្រៀនយើងតាមរយៈព្យាការីរបស់ទ្រង់ ។ សូមយើងពិនិត្យមើលរឿងមួយចំនួនដែលប្រធាន រ័សុល អិម ណិលសុន បានណែនាំ និងអញ្ជើញយើងឲ្យធ្វើក្នុងរយៈពេលប៉ុន្មានឆ្នាំចុងក្រោយនេះ ៖
- « នៅពេលខាងមុខ វានឹងមិនអាចរស់រានខាងវិញ្ញាណបានឡើយ បើគ្មានព្រះចេស្ដាណែនាំ ដឹកនាំ និងលួងលោមចិត្តជាប់ជានិច្ចមកពីព្រះវិញ្ញាណបរិសុទ្ធនោះ » ។ ( « Revelation for the Church, Revelation for Our Lives » Liahona ខែឧសភា ឆ្នាំ២០១៨ )
- « រើកម្ទេចកម្ទីចាស់ៗក្នុងជីវិតយើងចេញ ដោយមានជំនួយពីព្រះអង្គសង្គ្រោះ » ។ ( « សារលិខិតស្វាគមន៍ » លីអាហូណា ខែឧសភា ឆ្នាំ២០២១ )
- « ឥឡូវដល់ពេលដែលយើងម្នាក់ៗត្រូវអនុវត្តនូវវិធានការដ៏អស្ចារ្យ ពង្រឹងគ្រឹះខាងវិញ្ញាណផ្ទាល់ខ្លួនរបស់យើង » ។ ( « ព្រះវិហារបរិសុទ្ធ និងគ្រឹះខាងវិញ្ញាណរបស់បងប្អូន » លីអាហូណា ខែវិច្ឆិកា ឆ្នាំ២០២១ )
- « នៅពេលភាពចលាចលណាមួយកើតឡើងក្នុងជីវិតរបស់បងប្អូន កន្លែងដែលមានសុវត្ថិភាពបំផុតដើម្បីមានជីវិតខាងវិញ្ញាណ គឺការរស់នៅ តាម សេចក្ដីសញ្ញានៃព្រះវិហារបរិសុទ្ធរបស់បងប្អូន ! » ( « ព្រះវិហារបរិសុទ្ធ និងគ្រឹះខាងវិញ្ញាណរបស់បងប្អូន » លីអាហូណា ខែវិច្ឆិកា ឆ្នាំ២០២១ )
- ធ្វើជាអ្នកផ្សះផ្សាគេ –« ឲ្យជំនួសការស្ដីបន្ទោសមកជាការទូលអង្វរព្រះ ការស្អប់មកជាការយោគយល់ និងការទាស់ទែងគ្នាមកជាភាពសុខសាន្ដ » ។ ( « ត្រូវការអ្នកផ្សះផ្សាគេ » លីអាហូណា ខែឧសភា ឆ្នាំ២០២៣ )
- « ឥឡូវនេះគឺជាពេលវេលាសម្រាប់បងប្អូន និងខ្ញុំ ដើម្បីរៀបចំខ្លួនសម្រាប់ការយាងមកជាលើកទីពីររបស់ព្រះអម្ចាស់ និងព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។ ឥឡូវនេះគឺជាពេលដែលយើងដាក់អាទិភាពខ្ពស់បំផុតទៅលើភាពជាសិស្សរបស់យើង » ។ ( « ព្រះអម្ចាស់ព្រះយេស៊ូវគ្រីស្ទនឹងយាងមកម្ដងទៀត » លីអាហូណា ខែវិច្ឆិកា ឆ្នាំ២០២៤ )
ព្យាការីរបស់ព្រះអម្ចាស់កំពុងអញ្ជើញយើងឲ្យកសាងគ្រឹះរបស់យើងនៅលើសិលានៃព្រះប្រោសលោះ ហើយក្លាយជាសិស្សរបស់ព្រះអង្គសង្គ្រោះដ៏ល្អប្រសើរ និងពេញមួយជីវិត ។ លោកកំពុងរៀបចំយើងសម្រាប់ការយាងមកជាលើកទីពីររបស់ព្រះអង្គសង្គ្រោះ និងភាពចលាចលដែលប្រាកដជានឹងកើតឡើងនៅចន្លោះពេលឥឡូវនេះ និងពេលនោះ ។ ការសន្យាចំពោះអ្នកស្មោះត្រង់ដែលផ្ទៀងត្រចៀក ហើយស្តាប់តាមការអញ្ជើញរបស់ព្រះអម្ចាស់នឹងត្រូវបានធានា ។ គ្រប់ទីកន្លែងដែលយើងម្នាក់ៗអាចធ្វើនៅលើផ្លូវនៃភាពជាសិស្សរបស់យើង សូមឲ្យយើងបន្តឆ្ពោះទៅមុខដោយឧស្សាហ៍ព្យាយាម និងសេចក្ដីជំនឿ ហើយក្លាយជា « មនុស្សប៉ិនប្រយ័ត្ន ដែលសង់ផ្ទះខ្លួននៅលើថ្ម » ។ ( សូមមើល ម៉ាថាយ ៧:២៤–២៧ )