ប្រធាន រ័សុល អិម ណិលសុន បានបង្រៀនយើង « អ្នកពិតជាបុត្រាបុត្រីខាងវិញ្ញាណរបស់ព្រះ ។ អ្នកបានច្រៀងពីសេចក្តីពិតនេះចាប់តាំងពីអ្នកបានរៀនទំនុកចម្រៀង ‹ ខ្ញុំជាកូនរបស់ព្រះ › ។ ប៉ុន្តែតើសេចក្តីពិតដ៏នៅអស់កល្ប
ជានិច្ចនេះបានចារនៅក្នុងដួងចិត្តរបស់អ្នកដែរឬទេ ? តើសេចក្ដីពិតនេះបានជួយអ្នក នៅពេលប្រឈមមុខនឹងការល្បួងដែរឬទេ ? . . ខ្ញុំបារម្ភថា អ្នកប្រហែលជាបានឮសេចក្ដីពិតនេះជាញឹកញាប់ ដែលវាស្តាប់ទៅដូចជាពាក្យស្លោកជាជាងសេចក្ដីពិតរបស់ព្រះ ។ . . . ប្រសិនបើខ្ញុំត្រូវចាត់លំដាប់ថ្នាក់អំពីសារៈសំខាន់នៃតួនាទីដែលអាចអនុវត្តចំពោះខ្ញុំ ខ្ញុំនឹងនិយាយថា ៖ ទីមួយ ខ្ញុំជាកូនរបស់ព្រះ » ។ ១
ខ្ញុំបានដកពិសោធសេចក្តីពិតនេះតាមរបៀបដ៏មានអានុភាព អំឡុងពេលការផ្ដល់ការងារបម្រើសួរសុខទុក្ខ ។ នៅថ្ងៃទី១៥ ខែកញ្ញា ឆ្នាំ២០២៤ ខ្ញុំត្រូវបានអញ្ជើញឲ្យចូលរួមជាមួយថ្នាក់ដឹកនាំនៅសាខា ចូហ័រ បារូ ដើម្បីទៅសួរសុខទុក្ខ រ៉ាជែល ដែលជាមជ្ឈិមវ័យនៅលីវ ។ នៅឆ្នាំ២០២១ ជីវិតរបស់រ៉ាជែល បានផ្លាស់ប្តូរយ៉ាងខ្លាំងនៅពេលដែលគ្រោះថ្នាក់ចរាចរណ៍ដ៏ធ្ងន់ធ្ងរមួយបានធ្វើឲ្យនាងសន្លប់អស់រយៈពេលជិតមួយខែ ។ បន្ទាប់ពីការវះកាត់ជាច្រើនដង រួមទាំងការវះកាត់មួយដើម្បីព្យាបាលលលាដ៍ក្បាលរបស់នាងដែលប្រេះស្រាំ រ៉ាជែលបានចាប់ផ្តើមដំណើរការការជាសះស្បើយឡើងវិញយ៉ាងយូរ ។ ដោយមានជំនឿ ការតស៊ូ និងការព្យាបាលជាច្រើនអស់ពេលមួយឆ្នាំ នាងបានរៀនរបៀបទំនាក់ទំនងឡើងវិញបន្តិចម្តងៗ ។ ប៉ុន្តែរឿងជាច្រើននៅតែមិនដូចពីមុន ។ នាងលែងជាអ្នកចម្រៀង និងអ្នករបាំដែលរហ័សរហួនទៀតហើយ ។ នាងមិនទាន់ទទួលបានជំនាញចលនា និងការចងចាំច្រើនឡើងវិញទេ ។ នាងមានចិត្តចង់យកឈ្នះលើពិការភាពរបស់នាងយ៉ាងខ្លាំង ហើយត្រឡប់ចូលសិក្សានៅសាកលវិទ្យាល័យរបស់នាងវិញ ប៉ុន្តែមានអារម្មណ៍បាក់ទឹកចិត្តជាមួយនឹងស្ថានភាពរូបកាយរបស់នាងបច្ចុប្បន្ន ។ វាហាក់ដូចជាបញ្ហាប្រឈមដែលមិនអាចយកឈ្នះបាន ។ ការជាសះស្បើយឡើងវិញរបស់នាងយឺតៗនេះធ្វើឲ្យមានការឈឺចាប់ ។ ក្រោយពីប្រាប់រឿងរ៉ាវ និងការព្រួយបារម្ភរបស់នាង រ៉ាជែលបានមករកខ្ញុំ ហើយបានសួរថា « តើខ្ញុំគួរធ្វើអ្វី ? » ខ្ញុំបានស្វែងរកពាក្យលួងលោមតែឥតបានផលសោះ ។ ដោយក្តីអាណិតអាសូរដែលខ្ញុំមានអស់ពីចិត្តចំពោះប្អូនស្រីជាទីស្រឡាញ់រូបនេះ ខ្ញុំបាននិយាយថា « ខ្ញុំពិតជាមិនដឹងទេ » ។ បន្ទាប់មកខ្ញុំ បានទទួលចំណាប់អារម្មណ៍ដ៏មានអានុភាពមួយ ហើយបានប្រាប់នាងថា « ប្អូនជាកូនដ៏មានតម្លៃ ស្រស់ស្អាតរបស់ព្រះ ទ្រង់ស្រឡាញ់ប្អូនខ្លាំងណាស់ ។ ប្អូនឧស្សាហ៍ព្យាយាមណាស់ » ។ យើងទាំងពីរនាក់យំដោយសារតែអំណរ និងក្តីសង្ឃឹមដែលយើងទទួលបានពីសេចក្តីពិតទាំងនេះ ។ មុនពេលមានបទពិសោធន៍នេះជាមួយរ៉ាជែល ខ្ញុំបានជឿថា ខ្ញុំជាកូនរបស់ព្រះ ។ ប៉ុន្តែជំនឿរបស់ខ្ញុំបានផ្អែកលើការយល់ដឹងដោយបញ្ញាច្រើនជាង ប្រៀបដូចជាពាក្យស្លោក ។ ការប្រកាសដែលខ្ញុំបានថ្លែងចំពោះរ៉ាជែល ដែលអមដោយសាក្សីនៃព្រះវិញ្ញាណ គឺជាការបើកសម្តែងខាងវិញ្ញាណដ៏មានឥទ្ធិពលចំពោះខ្ញុំ និងនាងថា យើងម្នាក់ៗពិតជាកូនរបស់ព្រះ ។ ខណៈពេលដែលការជាសះស្បើយរបស់ រ៉ាជែល នឹងត្រូវការការអត់ធ្មត់ និងការខិតខំប្រឹងប្រែង ឥឡូវនេះនាងកំពុងប្រឈមមុខនឹងអនាគតរបស់នាងជាមួយនឹង « ការភ្លឺថ្លានៃសេចក្ដីសង្ឃឹមដ៏ឥតខ្ចោះ »២ ។ រ៉ាជែល និងមនុស្សផ្សេងទៀតដូចជានាង គឺជាហេតុផលដែលព្រះអង្គសង្គ្រោះរបស់យើងបានបង្រៀនយើងឲ្យទុកកូន ៩៩ នាក់ឲ្យនៅមានសុវត្ថិភាព ហើយចេញទៅស្វែងរក និងជួយសង្គ្រោះកូនដ៏មានតម្លៃម្នាក់នោះ ។
« យើងពិតជាបុត្រាបុត្រីរបស់ព្រះប្រាកដមែន ។ សេចក្តីពិតនោះ គួរឲ្យភ្ញាក់ផ្អើលណាស់ ! អស្ចារ្យណាស់ ! ហើយសេចក្តីពិតនេះគឺជាការពិត ។ . . . នៅពេលបងប្អូនស្វាគមន៍ចំពោះការពិតដ៏អស្ចារ្យនេះចូលទៅក្នុងព្រលឹងរបស់បងប្អូន ហើយទទួលអារម្មណ៍លួងលោមផង និងក្តីរំភើបផង នោះទស្សនវិស័យទាំងមូលរបស់បងប្អូននឹងផ្លាស់ប្តូរ ! បងប្អូនអាចទទួលអារម្មណ៍នូវក្តីស្រឡាញ់របស់ទ្រង់ ស្តាប់ឮព្រះសូរសៀងរបស់ទ្រង់ ហើយព្រះហស្តរបស់ទ្រង់ មិនថាមានអ្វីកើតឡើង ឬមិនកើតឡើងនៅក្នុងជីវិតរបស់បងប្អូនក្តី» ។
Elder Patrick Kearon
ខ្ញុំពិតជាមានអំណរគុណខ្លាំងណាស់ក្នុងការធ្វើជាឪពុកមួយរូប ។ កូនៗខ្ញុំបន្តបង្រៀនខ្ញុំ ហើយជួយខ្ញុំឲ្យយល់ពីសេចក្ដីពិតនៃដំណឹងល្អ ។ នៅពេលកូនប្រុសរបស់ខ្ញុំឈ្មោះ ណូអែល នៅក្មេង ប្រាកដណាស់ ការមានសណ្ដាប់ធ្នាប់គឺមានសារៈសំខាន់ចំពោះខ្ញុំ ខ្លាំងជាងចំពោះគាត់ ។ នៅពេលខ្ញុំកាន់តែមានភាពស្មុគស្មាញខ្លាំង ភរិយារបស់ខ្ញុំបានផ្តល់យោបល់យ៉ាងឈ្លាសវៃថា ខ្ញុំគួរតែមានពេលឪពុក និងកូនខ្លះៗជាមួយ ណូអែល ។ ខ្ញុំសម្រេចចិត្តនាំកូនចេញទៅដើរលេងខាងក្រៅ ។ ខ្ញុំបានទិញនំផេនខេករសជាតិសណ្ដែកដីដែលគាត់ចូលចិត្ត ហើយពួកយើងបានដើរទៅដល់ពហុកីឡដ្ឋានមួយ ។ យើងរីករាយមើលអត្តពលិកជាច្រើននាក់កំពុងហាត់នៅក្នុងពហុកីឡដ្ឋាននោះ ។ បន្ទាប់មក នៅពេលខ្ញុំងាកមកមើលកូនប្រុសខ្ញុំ ខ្ញុំបានឃើញថា គាត់សប្បាយចិត្ត និងពេញចិត្តខ្លាំងណាស់ នៅពេលគាត់ចាប់ផ្ដើមញុំានំសណ្តែកដីរបស់គាត់ ។ ខ្ញុំស្ងប់ស្ញែងចំពោះភាពត្រង់ និងភាពបរិសុទ្ធរបស់គាត់ ។ ខ្ញុំបានយកឈ្នះដោយអារម្មណ៍ខាងវិញ្ញាណថា កូនប្រុសខ្ញុំជាកូនដ៏មានតម្លៃរបស់ព្រះ ។ ខ្ញុំស្រឡាញ់គាត់ណាស់ ! សម្រាប់ខ្ញុំ នេះគឺជាការភ្ញាក់រលឹកមួយ ។ ខ្ញុំបានប្រែចិត្ត ហើយបានមើលកូនប្រុសរបស់ខ្ញុំតាមរយៈទស្សនៈខាងវិញ្ញាណ ។ គាត់ពិតជាកូនប្រុសដ៏ជាទីស្រឡាញ់របស់ព្រះ ។ គាត់តែងតែមានចិត្តល្អ អាណិតអាសូរ និងយកចិត្តទុកដាក់ចំពោះតម្រូវការរបស់អ្នកដទៃ ។ ខ្ញុំលែងខ្វល់ខ្វាយពីរឿងដែលមិនសំខាន់ទៀតហើយ ។ ទោះបីជាយើងមានភាពខុសគ្នាយ៉ាងណាក៏ដោយ ខ្ញុំតែងតែមានសេចក្តីស្រឡាញ់ចំពោះគាត់ដែរ ។
អែលឌើរ ផាទ្រីក ខៀរ៉ុន បានបង្រៀននៅឯសន្និសីទទូទៅខែមេសា ឆ្នាំ២០២៥ « យើងពិតជាបុត្រាបុត្រីរបស់ព្រះប្រាកដមែន ។ សេចក្តីពិតនោះ គួរឲ្យភ្ញាក់ផ្អើលណាស់ ! អស្ចារ្យណាស់ ! ហើយសេចក្តីពិតនេះគឺជាការពិត ។ . . . នៅពេលបងប្អូនស្វាគមន៍ចំពោះការពិតដ៏អស្ចារ្យនេះចូលទៅក្នុងព្រលឹងរបស់បងប្អូន ហើយទទួលអារម្មណ៍លួងលោមផង និងក្តីរំភើបផង នោះទស្សនវិស័យទាំងមូលរបស់បងប្អូននឹងផ្លាស់ប្តូរ ! បងប្អូនអាចទទួលអារម្មណ៍នូវក្តីស្រឡាញ់របស់ទ្រង់ ស្តាប់ឮព្រះសូរសៀងរបស់ទ្រង់ ហើយព្រះហស្តរបស់ទ្រង់ មិនថាមានអ្វីកើតឡើង ឬមិនកើតឡើងនៅក្នុងជីវិតរបស់បងប្អូនក្តី ។៣
សូមឲ្យព្រះអម្ចាស់ប្រទានពរដល់យើងឲ្យស្រឡាញ់អត្តសញ្ញាណសំខាន់ដ៏នៅអស់កល្បជានិច្ចមួយនេះ - អ្នកគឺជាបុត្រា ឬបុត្រីរបស់ព្រះជានិច្ច ។ នៅពេលអ្នកមកយល់ដឹង និងស្រឡាញ់សេចក្តីពិតនេះ វានឹងផ្លាស់ប្តូររាល់ទិដ្ឋភាពនៃជីវិតរបស់អ្នក ។
១ រ័សុល អិម ណិលសិន « Choices for Eternity » [ Worldwide Devotional for Young Adults ថ្ងៃទី១៥ ខែឧសភា ឆ្នាំ២០២២ ] នៅលើគេហទំព័រ broadcasts.ChurchofJesusChrist.org
២ នីហ្វៃទី២ ៣១:២០
៣ ផាទ្រីក ខៀរ៉ុន « ទទួលយកអំណោយរបស់ទ្រង់ » លីអាហូណា ខែឧសភា ឆ្នាំ២០២៥