សិទ្ធិអំណាច កូនសោ និងអំណាចបព្វជិតភាព

សិទ្ធិអំណាចបព្វជិតភាព

« បព្វជិតភាពគឺជាសិទ្ធិអំណាច និងជាអំណាចរបស់ព្រះ ។ តាមរយៈបព្វជិតភាព ព្រះវរបិតាសួគ៌បានសម្រេចកិច្ចការរបស់ទ្រង់ដើម្បី ‹ នាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស ( ម៉ូសេ ១:៣៩ ) › » ។១ អំណាចនៃស្ថានសួគ៌ទាក់ទងគ្នាទៅវិញទៅមកទៅនឹងកូនសោបព្វជិតភាពដើម្បីដឹកនាំកិច្ចការនៃសេចក្ដីសង្គ្រោះ និងភាពលើកតម្កើងរបស់ព្រះ ។ ព្រះស្រឡាញ់បុត្រាបុត្រីទ្រង់យ៉ាងខ្លាំង និងគ្មានលក្ខខណ្ឌ ។ ដោយសារមូលហេតុនេះហើយ ទើបទ្រង់បានបញ្ជូនព្រះរាជបុត្រាតែមួយរបស់ទ្រង់ឲ្យសង្គ្រោះយើងទាំងអស់គ្នា « ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ » ។២ ដើម្បីជួយបុត្រាបុត្រីទាំងអស់របស់ព្រះឲ្យទទួលបានការសន្យារបស់ទ្រង់ នោះនៅជិតចុងបញ្ចប់នៃការងារបម្រើក្នុងព្រះជន្មរមែងស្លាប់របស់ទ្រង់ ព្រះគ្រីស្ទបានសន្យាប្រទានកូនសោបព្វជិតភាពដល់ពេត្រុស ដោយដឹងថាពួកសាវករបស់ទ្រង់ត្រូវការបព្វជិតភាពដើម្បីដឹកនាំកិច្ចការបន្ទាប់ពីទ្រង់យាងទៅស្ថានសួគ៌វិញ ។ « ខ្ញុំនឹងឲ្យកូនសោនៃនគរស្ថានសួគ៌ដល់អ្នក បើអ្នកនឹងចងទុកអ្វីៗនៅផែនដី នោះនឹងត្រូវចងទុកនៅលើស្ថានសួគ៌ដែរ »៣

តាំងពីពេលនោះមក សិទ្ធិអំណាច និងកូនសោបព្វជិតភាពត្រូវបានប្រគល់ដល់បុរសទាំងឡាយតាមរយៈភ្នាក់ងារដែលមានសិទ្ធិអំណាចរបស់ព្រះ ។ សារទូតរបស់ព្រះអម្ចាស់ យ៉ូហាន បាទីស្ទ ដែលបានកាន់កូនសោទាំងនេះ បានស្ដារបព្វជិតភាពអើរ៉ុនឡើងវិញដល់ព្យាការី យ៉ូសែប ស្ម៊ីធ និង អូលីវើរ ខៅឌើរី នាថ្ងៃទី១៥ ខែឧសភា ឆ្នាំ១៨២៩ ។ បន្ទាប់មកមានការស្ដារឡើងវិញនូវកូនសោបព្វជិតភាពម៉ិលគីស្សាដែកដោយពេត្រុស យ៉ាកុប និងយ៉ូហាន ។ នៅថ្ងៃទី៣ ខែមេសា ឆ្នាំ១៨៣៦ ម៉ូសេបានប្រគល់កូនសោនៃនគរស្ថានសួគ៌សម្រាប់ « ការប្រមូលផ្ដុំអ៊ីស្រាអែល » ។ អេលីយ៉ាសបានប្រគល់កូនសោនៃគ្រាកាន់កាប់ត្រួតត្រានៃដំណឹងល្អរបស់អ័ប្រាហាំ ហើយអេលីយ៉ាបានប្រគល់អំណាចនៃការផ្សារភ្ជាប់ដើម្បីប្រមូលផ្ដុំអ៊ីស្រាអែលទាំងសងខាងនៃវាំងនន ។ ព្យាការី យ៉ូសែប ស្ម៊ីធ ជាឧបករណ៍ និងជាប្រដាប់ដ៏ជម្រើសមួយ ដើម្បីទទួលពរជ័យទាំងនេះ ហើយជួយបន្តកិច្ចការរបស់ព្រះសម្រាប់គ្រាកាន់កាប់ត្រួតត្រានេះ ។

កូនសោបព្វជិតភាព

« ថ្នាក់ដឹកនាំដ៏ជម្រើសរបស់ព្រះអម្ចាស់ទទួលកូនសោបព្វជិតភាពដើម្បីគ្រប់គ្រង និងដឹកនាំកិច្ចការរបស់ទ្រង់ ។ សមាជិកនៃគណៈប្រធានទីមួយ និងកូរ៉ុមនៃពួកសាវកដប់ពីរនាក់កាន់កូនសោទាំងអស់ដែលចាំបាច់សម្រាប់ការគ្រប់គ្រងសាសនាចក្រ ។ មានតែប្រធានសាសនាចក្រប៉ុណ្ណោះមានសិទ្ធិដើម្បីអនុវត្តកូនសោទាំងអស់ ។ លោកបែងចែកកូនសោទាំងនេះទៅអ្នកផ្សេងទៀតដែលជាអធិបតីនៅក្នុងសាសនាចក្រ ដូចជាប្រធានព្រះវិហារបរិសុទ្ធ ប្រធានបេសកកម្ម ប្រធានស្តេក ប្រធានមណ្ឌល ប៊ីស្សព ប្រធានសាខា និងប្រធានកូរ៉ុម រួមទាំងប្រធានកូរ៉ុមឌីកុន និងគ្រូផងដែរ » ។៤

ក្នុងឆ្នាំ២០១៩ ខ្ញុំមានអភ័យឯកសិទ្ធិទៅធ្វើទស្សនកិច្ចព្រះវិហារបរិសុទ្ធទីក្រុងរ៉ូម ប្រទេសអ៊ីតាលី ហើយបានទទួលបទពិសោធន៍រៀនសូត្រដ៏ពិសេសមួយ ។ ពេលដែលខ្ញុំបានដើរទៅកាន់រូបសំណាកពួកសាវកដប់ពីរនាក់ដែលតាំងនៅក្នុងមជ្ឈមណ្ឌលអ្នកទស្សនា ខ្ញុំបានកត់សម្គាល់ពីកូនសោនៅក្នុងដៃរបស់សាវកពេត្រុស ។ ខ្ញុំបានសង្កេតមើលពួកអ្នកផ្សព្វផ្សាយសាសនានៅជុំវិញខ្ញុំដោយអន្ទះសា ដែលកំពុងពន្យល់អំពីកូនសោទាំងឡាយដែលសាវកធំបានទទួលពីព្រះយេស៊ូវគ្រីស្ទ ។ ពួកគេក៏បានពន្យល់ផងដែរអំពីសារៈសំខាន់នៃកូនសោបព្វជិតភាពដែលប្រធាន ណិលសុន កំពុងកាន់ ព្រមទាំងរបៀបដែលព្រះអម្ចាស់ដឹកនាំកិច្ចការរបស់ទ្រង់តាមរយៈព្យាការីដែលបានតែងតាំង និងថាកូនសោទាំងឡាយត្រូវបានបញ្ជូនមកឲ្យបន្តកិច្ចការរបស់ទ្រង់ទៅមុខទៀត ។

ពួកគេបានសាកសួរអំពីការហៅរបស់ខ្ញុំ និងបានសុំខ្ញុំឲ្យកាន់កូនសោ ហើយបានរំឭកខ្ញុំអំពីកូនសោបព្វជិតភាពនៃប្រធានស្តេក ។ ការរៀនសូត្រដ៏មានអត្ថន័យនេះបានកើតឡើងសម្រាប់ខ្ញុំ គឺរបៀបដែលសិទ្ធិអំណាច និងកូនសោបព្វជិតភាពត្រូវបានប្រគល់ដល់បុរសទាំងឡាយដើម្បីគ្រប់គ្រងកិច្ចការរបស់ទ្រង់ ។

អំណាចបព្វជិតភាព

ដើម្បីអនុវត្តអំណាចបព្វជិតភាព មនុស្សម្នាក់ត្រូវតែរស់នៅដោយគោរពប្រតិបត្តិ ដែលមានន័យថា ដើរតាមផ្លូវនៃសេចក្ដីសញ្ញាដូចដែលប្រធាន ណិលសុន បានបង្រៀន ។ « នៅក្នុងពិធីបរិសុទ្ធទាំងឡាយ . . . នោះអំណាចនៃព្រះត្រូវបានសម្ដែងឲ្យឃើញ » ។៥ សិទ្ធិអំណាចបព្វជិតភាពត្រូវបានទទួលតាមរយៈការតែងតាំង ។ យើងទទួលបានអំណាចមកពីស្ថានសួគ៌ដោយការរក្សាសេចក្ដីសញ្ញាដ៏ពិសិដ្ឋ ហើយ « ហេតុដូច្នេះហើយ គ្រប់អ្វីទាំងអស់ ដែលព្រះវរបិតាយើងមាន នោះនឹងត្រូវបានប្រទានដល់អ្នកនោះដែរ » ។៦

មិនត្រឹមតែបុរសប៉ុណ្ណោះទេដែលទទួលបានអំណាចនៃបព្វជិតភាព ។ បងប្អូនស្រីក៏មានសិទ្ធិទទួលពរជ័យទាំងឡាយតាមរយៈពិធីបរិសុទ្ធ និងសេចក្ដីសញ្ញាដ៏ពិសិដ្ឋទាំងឡាយដែលបានធ្វើនៅក្នុងព្រះវិហារបរិសុទ្ធផងដែរ ។ តាមរយៈអំណាចបព្វជិតភាព មនុស្សម្នាក់អាចតម្កើងការហៅ និងដកពិសោធនូវអព្ភូតហេតុទាំងឡាយនៅក្នុងជីវិតផ្ទាល់ខ្លួនរបស់ពួកគេ និងរបស់អ្នកទាំងឡាយដែលពួកគេបម្រើ ។ ដំបូងបំផុត កាតព្វកិច្ចរបស់អ្នកកាន់បព្វជិតភាព គឺត្រូវបម្រើនៅក្នុងផ្ទះទាំងមូលរបស់គាត់ « ក៏សូមឲ្យចិត្តអ្នកពេញទៅដោយសេចក្ដីសប្បុរសដល់មនុស្សទាំងអស់ និងដល់ពួកអ្នកជឿផង » ។៧ សមាជិកក្នុងគ្រួសារយើងផ្ទាល់គួរតែទទួលស្គាល់ និងទទួលអារម្មណ៍នៃពរជ័យបព្វជិតភាព ។ លំដាប់លំដោយនៃបព្វជិតភាពត្រូវបានបង្រៀន និងពន្យល់យ៉ាងល្អ ៖ ទីមួយ ផ្តល់ ការពារ ហើយបន្ទាប់មក ធ្វើជាអធិបតី ។ ប្រសិនបើមានអ្វីដែលផ្ទុយពីលំដាប់លំដោយនេះ ឬនៅក្នុងការត្រួតត្រាដែលបានចាត់តាំងរបស់យើង « យើងខំស្វែងរកផ្លូវដើម្បីលាក់អំពើបាបទាំងឡាយរបស់យើង ឬដើម្បីបំពេញសេចក្ដីឆ្មើងឆ្មៃរបស់យើង សេចក្ដីប៉ងប្រាថ្នាដ៏ឥតប្រយោជន៍របស់យើង ឬដើម្បីអនុវត្តការត្រួតត្រា ឬការគ្រប់គ្រង ឬការបង្ខិតបង្ខំទៅលើព្រលឹងនៃកូនចៅមនុស្សដោយនូវសេចក្ដីដ៏ឥតសុចរិតណាមួយ ។ មើលចុះ ស្ថានសួគ៌ដកខ្លួនចេញ ព្រះវិញ្ញាណនៃព្រះអម្ចាស់ថប់បារម្ភ ហើយកាលណាព្រះវិញ្ញាណថយចេញ បព្វជិតភាព ឬសិទ្ធិអំណាចនៃមនុស្សនោះត្រូវបានបញ្ចប់ » ។ ៨

ខ្ញុំសូមថ្លែងទីបន្ទាល់ថា ព្រះអម្ចាស់ និងព្រះអង្គសង្គ្រោះរបស់យើង គឺព្រះយេស៊ូវគ្រីស្ទបានប្រគល់បព្វជិតភាពដល់បុរសទាំងអស់ ដើម្បីជួយទ្រង់ក្នុងកិច្ចការនៃសេចក្ដីសង្គ្រោះ និងភាពលើកតម្កើង ។ យើងមានកាតព្វកិច្ចដើម្បីអនុវត្តសិទ្ធិអំណាច និងកូនសោបព្វជិតភាពដោយសេចក្ដីសប្បុរស និងដោយសេចក្ដីរាបសាគ្រប់យ៉ាង ដើម្បីធ្វើជាសាក្សីដល់អំណាចដែលមិនអាចប្រៀបផ្ទឹមបាន និងអព្ភូតហេតុទាំងឡាយរបស់ទ្រង់នៅក្នុងជីវិតអ្នកទាំងឡាយណាដែលយើងបម្រើ ។

ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៣.០ នៅលើគេហទំព័រ ChurchofJesusChrist.org
យ៉ូហាន ៣:១៦
ម៉ាថាយ ១៦:១៩
« Priesthood Keys » New Era ខែឧសភា ឆ្នាំ២០១២
គោលលទ្ធិ និងសេចក្ដីសញ្ញា ៨៤:២០
គោលលទ្ធិ និងសេចក្ដីសញ្ញា ៨៤:៣៨
គោលលទ្ធិ និងសេចក្ដីសញ្ញា ១២១:៤៥
គោលលទ្ធិ និងសេចក្ដីសញ្ញា ១២១:៣៧