យើងរស់នៅក្នុងពិភពលោកមួយដែលពោរពេញទៅដោយភាពសម្បូរបែប និងពោរពេញទៅដោយការរីកចម្រើនផ្នែកវិទ្យាសាស្ត្រ និងបច្ចេកវិទ្យា ដែលមិនអាចនឹកស្មានដល់ សូម្បីតែមួយទសវត្សរ៍មុនក៏ដោយ ។ យើងអាចទំនាក់ទំនងជាមួយមនុស្សជាតិទាំងមូលដោយផ្ទាល់ ហើយអាចមើលឃើញឆ្ងាយហួសពីប្រព័ន្ធព្រះអាទិត្យរបស់យើង ដោយប្រើកែវយឹត និងផ្កាយរណប ។ ឧបករណ៍ដែលយើងកាន់នៅក្នុងដៃរបស់យើងអាចបកប្រែភាសា តាមដានចង្វាក់បេះដូង និងភ្ជាប់យើងទៅមនុស្សគ្រប់គ្នានៅគ្រប់ទីកន្លែង ។ យ៉ាងណាក៏ដោយ ជារឿយៗយើងក្រឡេកមើលពិភពលោកខាងលោកិយជុំវិញខ្លួនយើង ហើយមិនឃើញមានអ្វីអស្ចារ្យ គ្មានអ្វីពិសេសខ្លាំង និងគ្មានអ្វីដែលយើងនឹងចាត់ទុកថាជាអព្ភូតហេតុនោះទេ ។ យើងអានដំណើររឿងក្នុងព្រះគម្ពីរអំពីណូអេសង់ទូកធំមួយ ម៉ូសេបានញែកសមុទ្រក្រហម និងព្រះអង្គសង្គ្រោះបានប្រែក្លាយទឹកទៅជាស្រាទំពាំងបាយជូរ ។ នៅក្នុងដំណើររឿងទាំងនោះ យើងមើលឃើញអព្ភូតហេតុ !
តើឈប់មានអព្ភូតហេតុហើយឬនៅ ? នៅក្នុងជំពូកចុងក្រោយនៃព្រះគម្ពីរមរមន មរ៉ូណៃឆ្លើយសំណួរនេះដោយដកស្រង់សម្ដីរបស់ឪពុកលោកគឺ មរមន ។ « ឱបងប្អូនដ៏ជាទីស្រឡាញ់របស់ខ្ញុំអើយ តើឈប់មានអព្ភូតហេតុហើយឬនៅ ? មើលចុះ ខ្ញុំសូមប្រាប់អ្នកថា ទេ រីឯពួកទេវតាក៏ពុំឈប់ធ្វើការងារបម្រើដល់កូនចៅមនុស្សដែរ » ( មរ៉ូណៃ ៧:២៩ ) ។
ជាញឹកញាប់ យើងនិយាយអំពីអព្ភូតហេតុថាជាព្រឹត្តិការណ៍ដ៏អស្ចារ្យដែលមនុស្សមិនអាចពន្យល់បាន ជាជាងការបើកសម្តែងដ៏ពិសិដ្ឋ និងជានិរន្តរ៍នៃព្រះចេស្ដារបស់ព្រះនៅក្នុងជីវិតរបស់យើង ។ អព្ភូតហេតុគឺជា « លទ្ធផលធម្មជាតិនៃវត្តមានរបស់ព្រះមែស៊ីនៅក្នុងចំណោមមនុស្ស » ( Bible Dictionary « Miracles » ) ដូចជា ការបន្ទន់ចិត្តរឹងរូស កម្លាំងដើម្បីស៊ូទ្រាំនឹងការសាកល្បងដ៏លំបាក ឬសេចក្តីសុខសាន្តដែលមាននៅក្នុងគ្រាដែលមានទុក្ខព្រួយ ឬការឈឺចាប់ ។ តើទាំងនេះមិនមែនជាការបើកសម្តែងដ៏បរិសុទ្ធនៃព្រះចេស្ដារបស់ព្រះនៅក្នុងជីវិតរបស់យើងទេឬអី ? ទាំងនេះគឺជាអព្ភូតហេតុ !
« ឱបងប្អូនដ៏ជាទីស្រឡាញ់របស់ខ្ញុំអើយ តើឈប់មានអព្ភូតហេតុហើយឬនៅ ? មើលចុះ ខ្ញុំសូមប្រាប់អ្នកថា ទេ រីឯពួកទេវតាក៏ពុំឈប់ធ្វើការងារបម្រើដល់កូនចៅមនុស្សដែរ »
មរ៉ូណៃ ៧:២៩
ពេលកំពុងបម្រើបេសកកម្មនៅប្រទេសអេស្ប៉ាញ កូនស្រីរបស់ខ្ញុំ ឡូរ៉ែន បានសង្កេតឃើញការបើកសម្តែងដ៏អស្ចារ្យនៃព្រះចេស្ដារបស់ព្រះនៅក្នុងជីវិតរបស់នាង ។ យើងបានសង្កេតឃើញថា ក្នុងរយៈពេលប៉ុន្មានខែនៃបេសកកម្មរបស់នាង នាងបានចាប់ផ្តើមសំដៅទៅបទពិសោធន៍ជាច្រើនរបស់នាងថាជា « អព្ភូតហេតុ » ។ ការជួបគ្នាដោយចៃដន្យនៅក្នុងឧទ្យានមួយ ឬការរាក់ទាក់នៅតាមផ្លូវ ត្រូវបានមើលឃើញថាជាការបើកសម្តែងនៃព្រះចេស្ដារបស់ព្រះនៅក្នុងជីវិតរបស់នាង ។ នៅពេលនាងសង្កេតឃើញអព្ភូតហេតុមួយហើយមួយទៀតកើតឡើង កាលណានាងមើលឃើញកាន់តែច្រើន នោះការបើកសម្តែងដ៏បរិសុទ្ធក៏កាន់តែត្រូវបានធ្វើជាសក្ខីភាព ។ រាល់សប្តាហ៍ជាបន្តបន្ទាប់ យើងមានការភ្ញាក់ផ្អើលយ៉ាងខ្លាំងចំពោះដំណើររឿងដ៏ពិសិដ្ឋ និងការលើកស្ទួយកាន់តែច្រើនឡើងចំពោះលក្ខណៈដ៏អស្ចារ្យនៃគ្រាខ្លះក្នុងបទពិសោធន៍របស់នាង ។
មានពេលមួយ នាង និងដៃគូរបស់នាងកំពុងធ្វើដំណើរទៅជួបមិត្តភក្តិថ្មីម្នាក់ ។ យ៉ាងណាក៏ដោយ ពួកគេបានទៅខុសទិសដៅ ដោយគ្រាន់តែដឹងថាពួកគេនៅសល់ពេលសាមសិបនាទីទៀតពីគោលដៅរបស់ពួកគេ ។ ឡូរ៉ែនបានឈប់មួយសន្ទុះដើម្បីប្ដូរទិសដៅ ខណៈពេលដៃគូរបស់នាងដែលធ្លាប់ស្ទាក់ស្ទើរក្នុងការទំនាក់ទំនងតាមផ្លូវ បានសម្រេចចិត្តនិយាយជាមួយយុវនារីម្នាក់នៅក្បែរនោះដោយក្លាហាន ។ នៅពេលនោះ ពួកគេនៅឆ្ងាយពីគោលដៅដែលពួកគេបានគ្រោងនឹងទៅ ការសន្ទនាសាមញ្ញមួយបាននាំទៅរកការអញ្ជើញដ៏ស្រស់ស្អាតមួយឲ្យទទួលយកដំណឹងល្អនៃព្រះយេស៊ូវគ្រីស្ទ ។ ពីរបីសប្តាហ៍ក្រោយមក មិត្តថ្មីនោះបានចូលទៅក្នុងទឹកនៃពិធីបុណ្យជ្រមុជទឹក ហើយបានទទួលព្រះវិញ្ញាណបរិសុទ្ធ ។ ការបើកសម្តែងដ៏បរិសុទ្ធនៃព្រះចេស្ដារបស់ព្រះនេះ អាចត្រូវបានមើលរំលងយ៉ាងងាយថាជាឱកាស ជារឿងចៃដន្យ ឬប្រហែលជាសំណាង ជាជាងការពិតវាជា … អព្ភូតហេតុ !
ព្រះអម្ចាស់បានប្រកាសថា « … យើងជាព្រះនៃអព្ភូតហេតុទាំងឡាយ ហើយយើងនឹងបង្ហាញដល់មនុស្សលោកថា យើងនៅតែដដែល ទោះពីថ្ងៃម្សិល ថ្ងៃនេះ និងរហូតតទៅ … » ( នីហ្វៃទី២ ២៧:២៣ ) ។ អព្ភូតហេតុមិនបានឈប់ទេ ។ វានៅជុំវិញយើងទាំងអស់គ្នា ប្រសិនបើយើងមានភ្នែកដើម្បីមើល ត្រចៀកដើម្បីស្តាប់ និងជំនឿដើម្បីជឿ ។
ព្រះអម្ចាស់បានបន្តថា « យើងមិនធ្វើកិច្ចការណានៅក្នុងចំណោមកូនចៅមនុស្សឡើយ លើកលែងតែស្របតាមសេចក្ដីជំនឿរបស់ពួកគេតែប៉ុណ្ណោះ » ( នីហ្វៃទី២ ២៧:២៣ ) ។ សមាសធាតុដ៏សំខាន់នៃជំនឿនោះបង្កើតជាគ្រឹះដែលប៉មនៃអព្ភូតហេតុអាចឈរនៅលើនោះ ។ ព្រះអម្ចាស់បានប្រកាសថា « យើងនឹងបង្ហាញអព្ភូតហេតុ ទីសម្គាល់ និងការអស្ចារ្យទាំងឡាយ ដល់អស់អ្នកណាដែលជឿដល់ព្រះនាមយើង » ( គ. និង ស. ៣៥:៨ ) ។ វាគឺជាសេចក្តីជំនឿរបស់យើងដែលកើតឡើងមុនអព្ភូតហេតុ និងសេចក្តីជំនឿរបស់យើងលើព្រះនាមរបស់ទ្រង់ ដែលអនុញ្ញាតឲ្យយើងបានឃើញភាពពេញលេញនៃអព្ភូតហេតុទាំងនោះពិតប្រាកដ !
អព្ភូតហេតុមាននៅជុំវិញយើង ! ចាប់ពីរឿងសាមញ្ញៗរហូតដល់រឿងដ៏អស្ចារ្យ ការបើកសម្តែងនៃព្រះចេស្ដារបស់ព្រះអាចមើលឃើញនៅក្នុងការជួបដោយចៃដន្យ ការផ្លាស់ប្តូរដួងចិត្ត និងការងារបម្រើរបស់ពួកទេវតានៅគ្រាដែលចាំបាច់ ។ យើងប្រហែលជាមិនបានឃើញការបំបែកទឹកសមុទ្រ ឬការសង់ទូកធំនោះទេ ប៉ុន្តែយើងពិតជាអាចមើលឃើញអព្ភូតហេតុនៅក្នុងជីវិតរបស់យើង នៅពេលយើងងាកទៅរកទ្រង់ ។ យើងនឹងមើលឃើញការវិលត្រឡប់របស់កូនប្រុសខ្ជះខ្ជាយ មើលឃើញព្រះហស្តរបស់ព្រះអម្ចាស់នៅក្នុងជីវិតរបស់យើង បានរួចផុតពីរឿងទាំងឡាយដែលឃុំឃាំងយើង ហើយទទួលបានចម្លើយចំពោះការអធិស្ឋានរបស់យើង ។ ហើយខណៈដែលអព្ភូតហេតុបែបនេះអាចនឹងមិនដូចអព្ភូតហេតុដែលបានកើតឡើងចំពោះបងរបស់យ៉ារេឌ អាលម៉ា និងអាមូលេក ឬយ៉ូសែប ស្ម៊ីធ ក៏វាមិនមែនជាការបើកសម្តែងដ៏បរិសុទ្ធតូចតាចជាងព្រះចេស្ដារបស់ព្រះដែលមាននៅក្នុងជីវិតរបស់យើងដែរ ។ វាគឺជាអព្ភូតហេតុ ។
សូមឲ្យយើងបានឃើញអព្ភូតហេតុជារៀងរាល់ថ្ងៃ នៅពេលយើងមើលឃើញព្រះហស្តរបស់ព្រះមាននៅក្នុងជីវិតរបស់យើង ។ ដ្បិតទ្រង់គឺជាព្រះនៃអព្ភូតហេតុ !!