ក្រោយពីការចាប់ផ្តើមការជួសជុលកែលម្អឡើងវិញនៅឆ្នាំ២០១៩ នោះព្រះវិហារបរិសុទ្ធហុងកុងនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនឹងបើកដំណើរការឡើងវិញនៅខែកក្កដាក្រោយនេះ បន្ទាប់ពីបានធ្វើការឧទ្ទិសឆ្លងម្តងទៀតនៅថ្ងៃទី១៩ ខែមិថុនា ឆ្នាំ២០២២ ។
សមាជិកសាសនាចក្រនៅក្នុងមណ្ឌលព្រះវិហារបរិសុទ្ធហុងកុង បានចូលរួមដោយផ្ទាល់ និងតាមរយៈការផ្សាយផ្ទាល់ដោយក្តីរីករាយដែលព្រះវិហារបរិសុទ្ធបានរៀបចំរួចរាល់ដើម្បីស្វាគមន៍សមាជិកជាថ្មីម្តងទៀត ។
អាឡិន ជឹង ថ្នាក់ដឹកនាំម្នាក់ក្នុងមូលដ្ឋានបាននិយាយថា « ព្រះវិហារបរិសុទ្ធជួយសមាជិកឲ្យយល់ដឹងអំពីគោលបំណងនៃជីវិតកាន់តែច្បាស់ លើកទឹកចិត្តពួកគេឲ្យកាន់តែមានភាពស្មោះត្រង់ សប្បុរស និងចិត្តល្អ ហើយផ្តល់នូវកម្លាំងដល់ពួកគេដើម្បីទប់ទល់នឹងការលំបាកនានាក្នុងជីវិត » ។
វីនសិន និងប៉ូលី ហ្វុង ជាសមាជិកសាសនាចក្រនៅហុងកុង គឺជាឪពុកម្តាយដែលមានកូនតូចៗបីនាក់ ។ ដែលប៉ូលីបានចែកចាយថា « ការថ្វាយបង្គំក្នុងព្រះវិហារបរិសុទ្ធនាំឲ្យយើងកាន់តែមានភាពសិ្នទស្នាលខ្លាំងឡើងជាគ្រួសារមួយ ។ ហើយស្វាមីខ្ញុំនិងខ្ញុំទន្ទឹងរង់ចាំដើម្បីអាចទៅចូលរួមក្នុងព្រះវិហារបរិសុទ្ធម្តងទៀតក្នុងពេលឆាប់ៗនេះ ។ ការចូលរួមក្នុងព្រះវិហារបរិសុទ្ធជួយពួកយើងឲ្យធ្វើជាស្វាមីភរិយា និងឳពុកម្តាយកាន់តែល្អប្រសើរជាងមុន ។
អេស៊ី ហូ សមាជិកសាសនាចក្រមកពីប្រទេស សិង្ហបុរី បាននិយាយថា « អ្វីដែលសំខាន់បំផុតក្នុងជីវិតរបស់ខ្ញុំគឺគ្រួសាររបស់ខ្ញុំ ។ ខ្ញុំធ្វើ និងរក្សាសេចក្តីសញ្ញានៅក្នុងព្រះវិហារបរិសុទ្ធដើម្បីឲ្យគ្រួសារ និងខ្ញុំអាចរស់នៅជាមួយគ្នាជារៀងរហូតនៅក្នុងនរគរបស់ព្រះវបិតាសួគ៌ខ្ញុំ » ។
ស៊ូផាផន ភុតធីយ៉ា ជាសមាជិកសាសនាចក្រក្នុងប្រទេសថៃបាននិយាយថា « ព្រះវិហារបរិសុទ្ធជួយខ្ញុំឲ្យផ្តោតលើកិច្ចការខាងវិញ្ញាណជំនួសឲ្យកិច្ចការខាងលោកិយ » ។ នាងបានចូលរួមក្នុងព្រះវិហារបរិសុទ្ធលើកដំបូងនៅខែមេសា ឆ្នាំ២០១៨ ហើយបានមានបទពិសោធន៍ដ៏អស្ចារ្យដែលបានជួយឲ្យនាងខិតជិតព្រះវបិតាសួគ៌ និងគ្រួសាររបស់នាងកាន់តែខ្លាំងជាងមុន ។
ដោយអនុលោមតាមពិធីការស្តីពីជំងឺកូវីដក្នុងតំបន់ ការចូលរួមដោយផ្ទាល់នៅឯពិធីឧទ្ទិសឆ្លងឡើងវិញគឺមានកំណត់ ។ អ្នកចូលរួមម្នាក់ឈ្មោះ អាហ្គនីស អ៊ឹង បានច្រៀងក្នុងក្រុមចម្រៀងតូចមួយ ។ នាងបានធ្វើតាមគំរូរបស់ឪពុកនាងឈ្មោះ វ៉ៃ-កាំ អ៊ឹង ដែលបានច្រៀងនៅឯការឧទ្ទិសឆ្លងព្រះវិហារបរិសុទ្ធហុងកុងក្នុងឆ្នាំ១៩៩៦ ។
នាងបាននិយាយថា « ខ្ញុំចាំថាគាត់បានទៅធ្វើការហាត់សមជាច្រើនដង ប៉ុន្តែខ្ញុំពុំអាចយល់បានថាវាមានន័យយ៉ាងណាចំពោះគាត់ទេ ។ ថ្ងៃនេះដោយបានធ្វើនូវអ្វីដែលគាត់បានធ្វើកាលពីច្រើនឆ្នាំកន្លងមកនោះ ឥឡូវខ្ញុំយល់ហើយ ។ វាដូចជាការរស់នៅតាមដំណឹងល្អដែរ យើងមិនដឹងថាវាល្អអស្ចារ្យប៉ុណ្ណានោះទេរហូតទាល់តែយើងរស់នៅនិងធ្វើដោយខ្លួនឯង » ។
វ៉ៃ-កាំក៏បានចែកចាយនូវទស្សនៈរបស់គាត់ផងដែរថា« ការឃើញកូនស្រីរបស់ខ្ញុំច្រៀងនៅឯការឧទ្ទិសឆ្លងព្រះវិហារបរិសុទ្ធឡើងវិញ បន្តសេចក្តីជំនឿរបស់ខ្ញុំរហូតដល់ជំនាន់ក្រោយរបស់ខ្ញុំ ។ ខ្ញុំមានអំណរចំពោះដំណឹងល្អ និងពរជ័យដែលទទួលបានតាមរយៈព្រះវិហារបរិសុទ្ធ វាបានជួយខ្ញុំ និងភរិយាខ្ញុំឲ្យចិញ្ចឹមកូនរបស់យើងក្នុងសុចរិតភាព » ។
អែលឌើរ ហ្គែរីឌ ដបុលយូ ហ្គង នៃកូរ៉ុមនៃពួកសាវកដប់ពីរនាក់ បានធ្វើជាអធិបតីនៅការបម្រើនោះ បន្ទាប់ពីការប្រជុំជាមួយនឹងថ្នាក់ដឹកនាំតំបន់អាស៊ីនិងបុគ្គលិក និងការពិនិត្យមើលប្រតិបត្តិការនៅទូទាំងតំបន់មក ។
លោកបានមានប្រសាសន៍ថា « ព្រះវិហារបរិសុទ្ធហុងកុងដ៏ស្រស់ស្អាតនេះអញ្ជើញយើងទាំងអស់គ្នាក្នុងតំបន់អាស៊ីនេះឲ្យខិតចូលកាន់តែជិតព្រះអង្គសង្គ្រោះព្រះយេស៊ូវគ្រីស្ទរបស់យើង ស្ថាបនាគ្រឹះខាងវិញ្ញាណរបស់យើងជារៀងរាល់ថ្ងៃ ហើយផ្តល់ពរជ័យដល់គ្រួសារយើងគ្រប់ជំនាន់ » ។
ព្រះវិហារបរិសុទ្ធហុងកុងគឺជាព្រះវិហារបរិសុទ្ធទី៤៨ដែលបានសាងសង់ឡើងដោយសាសនាចក្រ ហើយត្រូវបានឧទ្ទិសឆ្លងនៅឆ្នាំ១៩៩៦ ដោយប្រធាន ហ្គរដុន ប៊ី ហ៊ិងគ្លី ។ ព្រះវិហារបរិសុទ្ធនេះត្រូវបានបិទទ្វារនៅឆ្នាំ២០១៩ដើម្បីធ្វើការជួសជុលកែលម្អដែលចាំបាច់ក្រោយពីបានផ្តល់សេវាកម្មអស់រយៈពេល២៣ឆ្នាំ ។