នាយប់ថ្ងៃអង្គារ ប្រធាន រ័សុល អិម ណិសលុននៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បាននាំមកនូវដំណឹងល្អដ៏សែនរីករាយប្រាប់ជូនដល់សមាជិកសាសនាចក្ររាប់រយនាក់ ដែលប្រជុំគ្នានៅឯមជ្ឈមណ្ឌលព្រីមៀរសែនសុខទីក្រុងភ្នំពេញ ។ លោកបានរូបភាពរបស់វិចិត្រករមួយអំពីអ្វីដែលនឹងក្លាយទៅជាទីតាំងថ្វាយបង្គំដ៏ពិសិដ្ឋបំផុតមួយរបស់សាសនាចក្រ—គឺព្រះវិហារបរិសុទ្ធភ្នំពេញ ។
កាលរូបភាពព្រះវិហារបរិសុទ្ធដែលនឹងសាងសង់នេះ បានបង្ហាញឡើងនៅលើអេក្រង់ដ៏ធំមួយនៅក្នុងសាលប្រជុំនោះ ព្យាការីបានមានប្រសាសន៍ថា « តើវាស្អាតដែរឬទេ ? » « យើងមិនដឹងថា ព្រះវិហារបរិសុទ្ធនឹងបញ្ចប់ការសាងសង់នៅពេលណានោះទេ ។ ប៉ុន្ដែខ្ញុំដឹងថា វាពិបាកនៅក្នុងការសាងសង់ព្រះវិហារបរិសុទ្ធ តែការស្ថាបនាមនុស្សឲ្យត្រៀមខ្លួនជាស្រេចសម្រាប់ព្រះវិហារបរិសុទ្ធនឹងកាន់តែពិបាកជាងនេះទៅទៀត ។ ការរៀបចំខ្លួនសម្រាប់ព្រះវិហារបរិសុទ្ធគឺ មានរួមទាំងសមាជិកទាំងឡាយក្នុងគ្រួសាររបស់បងប្អូនផង ។ ការរៀបចំខ្លួនបងប្អូនផ្ទាល់នឹងផ្ដល់ពរជ័យដល់គ្រួសាររបស់បងប្អូន » ។
ប្រធាន ណិលសុន—« វាពិបាកនៅក្នុងការសាងសង់ព្រះវិហារបរិសុទ្ធ តែការស្ថាបនាមនុស្សឲ្យត្រៀមខ្លួនជាស្រេចសម្រាប់ព្រះវិហារបរិសុទ្ធនឹងកាន់តែពិបាកជាងនេះទៅទៀត » ។
ប្រធានណិលសុនបានថ្លែងថា ផ្នែកដ៏សំខាន់មួយនៃការរៀបចំខ្លួននោះគឺ ការយល់ពីសំណួរសម្ភាសទទួលបណ្ណព្រះវិហារបរិសុទ្ធ ដែលពួកបរិសុទ្ធថ្ងៃចុងក្រោយម្នាក់ៗត្រូវតែឆ្លើយមុននឹងចូលទៅក្នុងព្រះដំណាក់របស់ព្រះអម្ចាស់ ។
ប្រធានណិលសុនបានថ្លែងអំឡុងសុន្ទរកថា ដែលបានចាក់ផ្សាយទៅកាន់សាលាជំនុំទាំងអស់នៅក្នុងប្រទេសកម្ពុជាថា « សំណួរទាំងនោះគឺជាចំណេះដឹងទូទៅ ។ ប៉ុន្ដែចម្លើយរបស់បងប្អូនចំពោះសំណួរទាំងនោះគឺពិសិដ្ឋ និងសម្ងាត់បំផុត ។ អ្នកជួយដល់បងប្អូន និងបងប្អូនផ្ទាល់នឹងធ្វើការរៀបចំខ្លួនដើម្បីឲ្យបងប្អូនអាចមានភាពស័ក្ដិសមនឹងទទួលបានពរជ័យទាំងអស់នៃព្រះវិហារបរិសុទ្ធដ៏ពិសិដ្ឋនេះ ។ ខ្ញុំសូមសន្យានឹងបងប្អូនថា កាលបងប្អូនមានភាពស័ក្ដិសមនឹងទទួលបណ្ណព្រះវិហារបរិសុទ្ធនោះ អព្ភូតហេតុជាច្រើននឹងកើតមានឡើងក្នុងជីវិតរបស់បងប្អូន » ។
វិហារបរិសុទ្ធគឺខុសពីសាលប្រជុំរបស់សាសនាចក្រ ជាកន្លែងដែលយើងស្វាគមន៍មនុស្សទាំងអស់ឲ្យចូលរួមការបម្រើនៅថ្ងៃអាទិត្យ និងសកម្មភាពផ្សេងៗទៀតក្នុងសប្ដាហ៍ ។ នៅក្នុងព្រះវិហារបរិសុទ្ធ ពួកបរិសុទ្ធថ្ងៃចុងក្រោយដ៏ស្មោះត្រង់ចូលរួមក្នុងពិធីការដ៏ពិសិដ្ឋនានាដូចជា អាពាហ៍ពិពាហ៍ដែលចងភ្ជាប់ក្រុមគ្រួសារជាមួយគ្នាជារៀងរហូត និងពិធីបុណ្យជ្រមុជទឹកជំនួសឲ្យបុព្វការីជនដែលពុំមានឱកាសនោះ ។ ព្រះវិហារបរិសុទ្ធដែលបានឧទ្ទិសរួចរបស់សាសនាចក្រចំនួន ១៦៦ មាននៅពាសពេញទូទាំងពិភពលោក ត្រូវបានចាត់ទុកថាជាទីកន្លែងដ៏ពិសិដ្ឋបំផុតនៅលើផែនដីនេះ ។ នៅក្នុងសំណង់អគារដ៏ពិសិដ្ឋទាំងនេះ—អគារនីមួយៗមានសរសេរពាក្យថា « ព្រះដំណាក់នៃព្រះអម្ចាស់ » ដែលបានបង្ហាញនៅលើផ្នែកខាងក្រៅអគារ—ថាការបង្រៀនរបស់ព្រះគ្រីស្ទត្រូវបានបញ្ជាក់ជាថ្មី កាលសមាជិកទាំងឡាយខិតខំធ្វើតាមគំរូរបស់ទ្រង់ ។ ហេតុដូច្នេះហើយ ការថ្វាយបង្គំនៅក្នុងព្រះវិហារបរិសុទ្ធគឺជាអភ័យឯកសិទ្ធិដ៏ពិសិដ្ឋមួយ ។
ព្រះវិហារបរិសុទ្ធភ្នំពេញដែលបានប្រកាសលើកដំបូងដោយប្រធានណិលសុននៅខែ តុលា ឆ្នាំ ២០១៨ នឹងមានទីតាំងនៅលើបណ្ដោយផ្លូវសហព័ន្ធរុស្សី នៅចន្លោះវិទ្យាស្ថានបច្ចេកវិទ្យាកម្ពុជា និងវិទ្យាស្ថានភាសាបរទេស នៅក្បែរសាកលវិទ្យាល័យភូមិន្ទភ្នំពេញ ។ ព្រះវិហារបរិសុទ្ធនេះនឹងផ្ដល់ឱកាសថ្វាយបង្គំដល់ពួកបរិសុទ្ធថ្ងៃចុងក្រោយនៃប្រទេសកម្ពុជាចំនួន ១៥០០០ នាក់ ។
ព្យាការីអាយុ ៩៥ ឆ្នាំរូបនេះក៏បានកត់ចំណាំពីការនឹងប្រារព្ធខួបទីពីររយឆ្នាំនៃការនិមិត្តរបស់យ៉ូសែប ស្ម៊ីធឃើញព្រះវរបិតា និងព្រះរាជបុត្រា ដែលត្រូវបានពួកបរិសុទ្ធថ្ងៃចុងក្រោយស្គាល់ថាជា ការនិមិត្តដំបូង និងការចាប់ផ្ដើមនៃការស្ដារឡើងវិញនៃដំណឹងល្អរបស់ព្រះយេស៊ូវគ្រីស្ទផងដែរ ។ ប្រធានណិលសុនបានមានប្រសាសន៍ថា ការស្ដារឡើងវិញនោះមានថ្មជ្រុងគ្រឹះបួន ៖ ( ១ ) ចំណេះដឹងអំពីក្រុមព្រះ រួមមានព្រះវរបិតា ព្រះរាជបុត្រារបស់ទ្រង់គឺព្រះយេស៊ូវគ្រីស្ទ និងព្រះវិញ្ញាណបរិសុទ្ធ ( ២ ) ព្យាការីនៅលើផែនដីដែលថ្លែងជំនួសព្រះ ( ៣ ) ព្រះគម្ពីរដែលជា « យុថ្កាពិតប្រាកដមួយនៃសេចក្ដីពិតដ៏អស់កល្ប » និងជា « សាក្សីដ៏រឹងមាំមួយអំពីភាពជាព្រះនៃព្រះអម្ចាស់យេស៊ូវគ្រីស្ទ » និង ( ៤ ) សិទ្ធិអំណាចបព្វជិតភាពដែលបានស្ដារឡើងវិញ ។
ប្រធានណិលសុន បានរំឭកដល់យុវវ័យជាច្រើនរូបដែលមានវត្តមាននៅទីនោះអំពី « ការទទួលខុសត្រូវខាងសាសនារបស់ពួកគេដើម្បីទទួលបានការអប់រំដ៏ល្អមួយ » ។ លោកបានមានប្រសាសន៍ថា ការអប់រំនេះគឺជា « ភាពខុសគ្នារវាងប៉ងប្រាថ្នាឲ្យប្អូនៗអាចជួយមនុស្សដទៃបាន និងការដែលប្អូនៗអាចជួយមនុស្សដទៃបាន » ។
ព្យាការីបានបញ្ចប់ដោយការសរសើរដល់ពួកបរិសុទ្ធកម្ពុជា ដែលធ្វើជាពលរដ្ឋដ៏សុចរិតទៀងត្រង់នៅក្នុងសហគមន៍របស់ពួកគេ ។
លោកបានមានប្រសាសន៍ថា « ខ្ញុំពិតជាមានសុទិដ្ឋិនិយមខ្លាំងណាស់អំពីអនាគតរបស់ប្រទេសកម្ពុជា » ។
ស៊ិស្ទើរ វិនឌី ណិលសុន និងអែលឌើរ ឌី ថត គ្រីស្ដូហ្វឺសិន ក្នុងកូរ៉ុមនៃពួកសាវកដប់ពីរនាក់ និងភរិយារបស់លោក ខេធី បានអមដំណើរជាមួយប្រធានណិសលុន នៅក្នុងការធ្វើដំណើររយៈពេលប្រាំពីរថ្ងៃនេះទៅកាន់ប្រទេសចំនួនបួនក្នុងតំបន់អាស៊ីអាគ្នេយ៍ ។ ពួកលោកម្នាក់ៗបានឡើងថ្លែងនៅក្នុងការប្រជុំធម្មនិដ្ឋាននាល្ងាចថ្ងៃអង្គារនោះ ។
ប្រធាន ណិលសុន និងអែលឌើរ គ្រីស្ដូហ្វឺសិន ជួបជាមួយឧបនាយករដ្ឋមន្ត្រីរបស់ប្រទេសកម្ពុជា
នារសៀលថ្ងៃអង្គារ ថ្នាក់ដឹកនាំសាសនាចក្របានជួបជាមួយឧបនាយករដ្ឋមន្ត្រីរបស់ប្រទេសកម្ពុជា លោកជំទាវ ម៉ែន សំអន ដែលមើលការខុសត្រូវលើកិច្ចការសប្បុរសធម៌ និងសង្គមកិច្ចប្រចាំប្រទេស ។
ប្រធានណិលសុនបានថ្លែងថា « លោកជំទាវជាមនុស្សរស់រាយ និង ចិត្តល្អ រាក់ទាក់ » លោកជំទាវបានយល់ដឹងពីអ្វីដែលសាសនាចក្របានកំពុងជួយ ។ លោកជំទាវមានអំណរគុណចំពោះសមាជិកនៃសាសនាចក្រ ចំពោះក្រុមគ្រួសារដ៏រឹងមាំរបស់ពួកគេ ចំពោះជំនួយដែលយើងបានផ្ដល់ជារទេះរុញជនពិការ ជំនួយខាងវេជ្ជសាស្ដ្រ និងគម្រោងផ្សេងៗទៀត » ។
អែលឌើរ គ្រីស្ដូហ្វឺសិន បានបន្ថែមថា « វាច្បាស់ណាស់ថា ពួកគេមានការយល់ដឹងច្បាស់មួយអំពីអ្វីដែលសាសនាចក្របានរួមចំណែកតាំងដើមរហូតមក ។ នេះគឺជាមូលហេតុមួយ ដែលយើងបានចូលជំនួបសំណេះសំណាលជាមួយពួកគាត់ ដើម្បីឲ្យពួកគាត់ដឹងថា យើងមកទីនេះចង់ជួយ និងពិតជាកំពុងជួយមែន ។ ហើយលោកជំទាវបានដឹងអំពីការណ៍ទាំងនោះ ហើយមានចិត្តអន្ទះសាចង់ឃើញព្រះវិហារបរិសុទ្ធរបស់យើងបានសាងសង់ និងបញ្ចប់នៅទីនេះ » ។
ទស្សនកិច្ចការងារបម្រើរបស់ប្រធានណិលសុនបន្ដដល់ថ្ងៃពុធនៅប្រទេសសិង្ហបុរី និងថ្ងៃព្រហស្បតិ៍នៅប្រទេសឥណ្ឌូនេស៊ី ។