នាពេលថ្មីៗ ព័ត៌មានសាសនាចក្របានប្រកាសថា ប្រធាន នាង គួនណូ វាសនា ត្រូវបានហៅឲ្យធ្វើជាប្រធានបេសកកម្មភ្នំពេញកម្ពុជានៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ បច្ចុប្បន្ននេះ ប្រធាន វាសនា កំពុងបម្រើជាប្រធានទីមួយដែលបានហៅដើម្បីដឹកនាំមណ្ឌលខាងកើត ភ្នំពេញកម្ពុជា ។ ឥឡូវនេះ គាត់នឹងត្រូវបម្រើជាប្រធានបេសកកម្មភ្នំពេញកម្ពុជាដំបូងគេដែលជាជនជាតិខ្មែរ ។
នៅពេលប្រធាន ហិនរី ប៊ី អាវរិង ក្នុងគណៈប្រធានទីមួយនៃសាសនាចក្របានផ្តល់ការងារបម្រើនេះដល់ប្រធាន វាសនា គាត់បានមានប្រសាសន៍ថា ភរិយារបស់គាត់ ចន្ធី បានសួរថា « ហេតុអ្វីបានជាហៅពួកយើង ? » ប្រធានវាសនា បានប្រាប់ថា ភរិយារបស់គាត់ចង់សំដៅថា មានថ្នាក់ដឹកនាំល្អៗជាច្រើនទៀតក្នុងប្រទេសកម្ពុជានេះ ដែលពួកគាត់គិតថាគេស័ក្ដិសមជាង ។
បន្ទាប់ពីត្រូវបានហៅភ្លាម អ៊ែលឌើរ ភីធើ អែហ្វ មើស៍ ក្នុងគណៈប្រធានតំបន់អាស៊ី បានទូរសព្ទមកអបអរសាទរ និងជូនពរពួកគាត់ឲ្យបំពេញការងារហៅថ្មីនេះឲ្យបានជោគជ័យ ។ ពួកគាត់បានសូមពាក្យទូន្មានរបស់អ៊ែលឌើរ ភីធើ អែហ្វ មើស៍ ហើយលោកបានមានប្រសាសន៍ថា « ធ្វើតាមទម្លាប់ទៅបានហើយ » ។ ភរិយារបស់ប្រធាន វាសនា ចន្ធី បានមានប្រសាសន៍ថា ពាក្យទាំងនោះប្រហែលជាការលួងលោមដ៏ល្អបំផុតហើយដែលពួកគាត់បានឮ ។
ប្រធាន ចន លូវីស៍ ជាប្រធានបេសកកម្ម បេសកកម្មភ្នំពេញកម្ពុជានាពេលបច្ចុប្បន្ន និងស៊ិស្ទើរ ឡាស៊ិនដា លូវីស៍ ជាភរិយារបស់គាត់ បានមានប្រសាសន៍ថា
« យើងមានចិត្តរំភើបខ្លាំងណាស់ ពេលបានឮព័ត៌មានថា ប្រធាន វាសនា និងភរិយារបស់គាត់នឹងបម្រើ ហើយដឹកនាំបេសកកម្មភ្នំពេញកម្ពុជា ។ ពួកគាត់គឺជាគំរូដ៏ល្អបំផុតនៃអ្នកបម្រើដូចជាព្រះគ្រីស្ទដែលចូលចិត្តជួយអ្នកដទៃ ! »
ប្រធាន នាង គួនណូ វាសនា បានកើតនៅថ្ងៃទី២៨ ខែធ្នូ ឆ្នាំ១៩៨០ នៅទីក្រុងភ្នំពេញ ប្រទេសកម្ពុជា ។ គាត់គឺជាកូនច្បង ហើយមានប្អូនប្រុសបួននាក់ និងប្អូនស្រីម្នាក់ ។ កាលគាត់នៅវ័យជំទង់ គាត់មានចំណាប់អារម្មណ៍ជាខ្លាំងអំពីសាសនា ។ នៅអាយុ ១៦ ឆ្នាំ គាត់បានចូលរួមក្នុងព្រះវិហារគ្រីស្ទមួយ ។ ប៉ុន្តែសំណួររបស់គាត់នៅតែមានដដែល ។ គាត់បន្តសួរខ្លួនឯងថា « តើហេតុអ្វីមានព្រះវិហារច្រើនម្ល៉េះ ? » នៅថ្ងៃមួយ គាត់បានជជែកជាមួយនឹងមិត្តរបស់គាត់ម្នាក់ ឈ្មោះ ប្រមូល អំពីកង្វល់ទាំងនេះ ។ មិត្តរបស់គាត់គឺជាសមាជិកជំនាន់ដំបូងនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ គាត់បានផ្តល់យោបល់ឲ្យ វាសនា ជួបជាមួយអ្នកផ្សព្វផ្សាយសាសនា ។ ការណាត់ជួបជាមួយពួកអ្នកផ្សព្វផ្សាយសាសនាក៏ត្រូវបានធ្វើឡើង ហើយពីរឆ្នាំក្រោយមក វាសនា បានទទួលពិធីបុណ្យជ្រមុជទឹក ។
បន្ទាប់ពីពិធីបុណ្យជ្រមុជទឹក គាត់បានចូលរួមសកម្មភាពយុវជនយុវនារី នៅសាខាទី៥ ។ គាត់មានមិត្តម្នាក់ដែលជាយុវនារី ហើយអំឡុងសកម្មភាពនោះ នាង បានណែនាំគាត់ឲ្យស្គាល់ ប្អូនស្រីនាងឈ្មោះ ចន្ធី ថុល ។ ពួកគាត់បានចូលរួមក្នុងក្រុមយុវវ័យនោះជាមួយគ្នា ហើយតាមការរៀបរាប់របស់គាត់ថា « គ្រាន់តែជាមិត្តនឹងគ្នាប៉ុណ្ណោះ » ។
ពីរឆ្នាំក្រោយមក នៅអាយុ ២០ ឆ្នាំ វាសនា បានទទួលជំនួយពីអ្នកផ្សព្វផ្សាយសាសនារៀមច្បង ហើយត្រូវបានទទួលឲ្យចូលរៀននៅសាកលវិទ្យាល័យប៊ីវ៉ាយយូ ហាវ៉ៃ ។ គាត់បានសិក្សានៅទីនោះ ហើយបានទទួលសញ្ញាបត្រថ្នាក់បរិញ្ញាបត្រ ។ គាត់បានមានឱកាសដើម្បីធ្វើការនៅសហរដ្ឋអាមេរិក តែទោះជាយ៉ាងណា គាត់បានមានអារម្មណ៍ថា គាត់គួរតែត្រឡប់មកប្រទេសកម្ពុជាវិញ ។
ពេលត្រឡប់មកវិញ គាត់បានចាប់អារម្មណ៍ជាខ្លាំងលើ « មិត្ត » របស់គាត់ ចន្ធី ថុល ហើយពួកគាត់បានរៀបការនៅថ្ងៃទី២០ ខែធ្នូ ឆ្នាំ២០០៨ ។ គាត់មានប្រសាសន៍ថា ពួកគាត់តាមពិតបានរៀបការចំនួនបួនលើក ។ លើកទីមួយគឺតាមទំនៀមទម្លាប់អាពាហ៍ពិពាហ៍របស់ខ្មែរ ។ លើកទីពីរគឺនៅក្នុងសាលាប្រជុំរបស់សាសនាចក្រ ។ មួយសប្តាហ៍ក្រោយមក ពួកគាត់បានចុះសំបុត្រអាពាហ៍ពិពាហ៍ស្របច្បាប់ ។ ហើយមួយឆ្នាំក្រោយមក ពួកគាត់បានធ្វើដំណើរទៅទីក្រុងហុងកុង ហើយបានផ្សារភ្ជាប់នៅក្នុងព្រះវិហារបរិសុទ្ធ ហុងកុង ប្រទេស ចិន ។
ប្រធាន វាសនា និងភរិយារបស់គាត់ មានកូនចំនួនបួននាក់- ប្រុសពីរ និងស្រីពីរ-ពួកគេមានអាយុ ៤ ឆ្នាំ ៦ ឆ្នាំ ៨ ឆ្នាំ និង ១១ ឆ្នាំ ។
ប្រធាន វាសនា ធ្លាប់បានបម្រើជាប្រធានសាខា និងបម្រើនៅក្នុងការហៅបច្ចុប្បន្នរបស់គាត់ជាប្រធានមណ្ឌល ។ គាត់មានប្រសាសន៍ថា ពរជ័យដ៏អស្ចារ្យបានកើតឡើងចំពោះគាត់ និងគ្រួសារតាមរយៈការបម្រើនៅក្នុងសាសនាចក្រ ។ ឧទាហរណ៍ អំឡុងពេលកំពុងបម្រើជាប្រធានមណ្ឌល គាត់កំពុងតែធ្វើការមួយដែលល្អជាមួយក្រុមហ៊ុនរបស់គាត់ ។ ក្រុមហ៊ុននោះបាននិយាយថា ដើម្បីគាត់បន្តរីកចម្រើននៅក្នុងអាជីពការងាររបស់គាត់ គាត់គួរតែទទួលតំណែងមួយនៅប្រទេសវៀតណាម ។ គាត់បានមានប្រសាសន៍ថា គាត់មិនអាចទទួលការងារនោះបានទេ ដោយសារតែគាត់កំពុងតែបម្រើជាប្រធានមណ្ឌលនៅក្នុងសាសនាចក្រ ។ ក្រុមហ៊ុននោះបានតបថា ប្រសិនបើគាត់មិនទទួលការងារនោះទេ គាត់នឹងត្រូវលាឈប់ពីក្រុមហ៊ុននេះហើយ ។ ដូច្នេះហើយ គាត់ក៏លាឈប់ពីក្រុមហ៊ុននោះ ។ ប្រធាន វាសនា បានចែកចាយនូវរឿងនោះជាមួយនឹងក្រុមជំនុំ ។ បន្ទាប់ពីការប្រជុំចប់ អតីតប្រធាន បេសកកម្មភ្នំពេញកម្ពុជា ដែលបានមកលេងប្រទេសកម្ពុជានាពេលនោះ បានដើរសំដៅមករកប្រធាន វាសនា ហើយបានផ្តល់ការងារមួយឲ្យគាត់ធ្វើ ។
ទោះបីជាការហៅថ្មីជាប្រធានបេសកកម្មនេះ មាននូវបញ្ហាប្រឈមដ៏ធំក្តី ក៏ប្រធាន វាសនា ដឹងថាព្រះអម្ចាស់នឹងផ្តល់ជំនួយឲ្យគាត់ដែរ ។ គាត់ និងគ្រួសារពឹងផ្អែកលើព្រះអម្ចាស់ដើម្បីទទួលបានការណែនាំ និងការដឹកនាំដែលនឹងត្រូវការនៅក្នុងការហៅថ្មីនេះ ។