សេចក្តីស្រឡាញ់ និងគ្រឿងឧបភោគ បរិភោគបន្តិចបន្តួចត្រូវបានយកទៅជូនដល់ក្រុមគ្រួសារប្រមាណជា ១៩០០ គ្រួសារ ដែលរស់នៅតំបន់បិទខ្ទប់ដោយសារជំងឺ កូវីដ-១៩ ក្នុងរាជធានីភ្នំពេញ ប្រទេសកម្ពុជា ។ សមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ចាប់ដៃគូសហការជាមួយមូលនិធិកម្ពុជាប្រឆាំងកូវីដ-១៩ ដើម្បីផ្តល់គ្រឿងឧបភោគ បរិភោគសម្រាប់ផ្គត់ផ្គង់រយៈពេលពីរសប្តាហ៍ដល់ក្រុមគ្រួសារទាំងនេះ ។
ការចុះចែកគ្រឿងឧបភោគ បរិភោគចំនួនប្រាំកន្លែងបានធ្វើឡើងនៅថ្ងៃអង្គារ ទី១១ ខែ ឧសភា ។ ខណ្ឌដែលបានទទួលគ្រឿងឧបភោគ បរិភោគមាន ៖ ខណ្ឌ ៧ មករា ខណ្ឌឫស្សីកែវ ខណ្ឌសែនសុខ ខណ្ឌច្បារអំពៅ និងខណ្ឌទួលគោក ។ ខណ្ឌពីរនៅក្នុងចំណោមខណ្ឌខាងលើនេះ នៅតែចាត់ទុកថាជា « តំបន់ក្រហម » ដដែល តំបន់នេះពុំសូវមានគ្រឿងឧបភោគ បរិភោគច្រើននោះទេ ដោយសារតែបទបញ្ជាបិទខ្ទប់មានលក្ខណៈតឹងរឹង ។
ពិធីចែកគ្រឿងឧបភោគ បរិភោគនីមួយៗមានការចូលរួមពីគ្រួសារប្រជាពលរដ្ឋទទួលជំនួយប្រមាណជា ២៥០ គ្រួសារ ។ គ្រឿងឧបភោគ បរិភោគរួមមាន អង្ករ មី ត្រីខកំប៉ុង ទឹកស៊ីអ៊ីវ ទឹកត្រី ស្ករស និងប្រេងឆា ។ គ្រឿងឧបភោគ បរិភោគនេះអាចជួយផ្គត់ផ្គង់ដល់គ្រួសារមួយបានប្រមាណជាពីរសប្តាហ៍ ។ បន្ថែមពីលើគ្រឿងឧបភោគ បរិភោគនេះ ក៏មានកញ្ចប់ថ្នាំពេទ្យដែលផ្តល់ឲ្យតាមរយៈមន្ទីរពេទ្យសូរិយា ហើយជំនួយនេះត្រូវបានផ្តល់ឲ្យតាមរយៈ ឯកឧត្តម ហោ សេរីវឌ្ឍន៍។ កញ្ចប់ថ្នាំពេទ្យនេះមានថ្នាំ ដូចជា ៖ ថ្នាំបំបាត់ការឈឺចាប់ វីតាមីនស៊ី ថ្នាំឈឺពោះ និងម៉ាស់ ។
នៅថ្ងៃបន្ទាប់គឺត្រូវនឹងថ្ងៃពុធ ទី១២ ខែ ឧសភា ក៏មានការចុះចែកគ្រឿងឧបភោគ បរិភោគចំនួនពីរកន្លែងទៀតនៅខណ្ឌតាខ្មៅ នៃខេត្តកណ្តាលផងដែរ ។ ពិធីផ្តល់ជូនគ្រឿងឧបភោគ បរិភោគទាំងពីរនេះមានការចូលរួមពីគ្រួសារប្រជាពលរដ្ឋទទួលជំនួយប្រមាណជា ៣១៥ គ្រួសារ ។
អ្នកតំណាងរបស់សាសនាច្រ និងពួកអ្នកផ្សព្វផ្សាយសាសនារៀមច្បងបានចូលរួមជាមួយសមាជិកនៃមូលនិធិកម្ពុជាប្រឆាំងជំងឺកូវីដ-១៩ និងមន្រ្តីរបស់រដ្ឋាភិបាលដើម្បីជួយនៅក្នុងពិធីចែកគ្រឿងឧបភោគ បរិភោគនេះ ។
សមាជិកនៃសាសនាចក្រជាច្រើនបានទទួលរងផលប៉ះពាល់ដោយសារតែការបិទខ្ទប់ក្នុងពេលថ្មីៗនេះ ។ បន្ថែមពីលើនោះ សមាជិកនៃសាសនាចក្របានមានបំណងចង់ជួយដល់បងប្អូនដែលកំពុងខ្វះខាត ។ សេចក្តីសប្បុរសគឺជាបុគ្គលិកលក្ខណៈដូចព្រះគ្រីស្ទដែលសមាជិកនៃសាសនាចក្រកំពុងខិតខំដើម្បីអភិវឌ្ឍខ្លួន ។ វាគឺជាការបង្ហាញដ៏អស្ចារ្យបំផុតតាមរយៈសេចក្តីស្រឡាញ់ ការយកចិត្តទុកដាក់ និងការផ្តល់ឲ្យដល់បងប្អូនទាំងឡាយណាដែលកំពុងជួបប្រទះឧបសគ្គ និងការសាកល្បងនៅក្នុងជីវិតរបស់ពួកគេ ។ របៀបមួយដើម្បីជួយដល់អ្នកដទៃគឺជាផ្តល់ឲ្យសេចក្តីត្រូវការខាងសាច់ឈាម ។
ប្រធាន រ័សុល អិម ណិលសុន បានរម្លឹកយើងនាពេលថ្មីៗនេះថា « គ្មានថ្នាំពេទ្យ ឬការវះកាត់ណាមួយដែលអាចផ្លាស់ប្តូរវិបត្តិផ្លូវចិត្ត សេចក្ដីវេទនា និងជំងឺខាងវិញ្ញាណជាច្រើនដែលយើងជួបប្រទះឡើយ » ដែលជាសង្គមសកលសមូហភាពនោះ ។ បន្ទាប់មកលោកបន្តទៀត ៖ « ទោះជាយ៉ាងណាក្ដី ក៏មាននូវឱសថម្យ៉ាង—ជាឱសថមួយដែលប្រហែលជាធ្វើឲ្យភ្ញាក់ផ្អើល ដោយសារវាផ្ទុយពីវិចារណញាណពីធម្មជាតិរបស់យើង … ទោះជាបែបនេះក្ដី ក៏ឥទ្ធិពលរបស់វាត្រូវបានធ្វើឲ្យមានសុពលភាពដោយពួកអ្នកវិទ្យាសាស្ត្រក៏ដូចជាបុរសស្ត្រីនៃសេចក្ដីជំនឿផងដែរ ។ ខ្ញុំសំដៅទៅលើអំណាចព្យាបាលនៃការដឹងគុណ » ។
បងប្អូនដែលបានចូលរួមក្នុងការចែកគ្រឿងឧបភោគ បរិភោគ និងថ្នាំពេទ្យដល់ប្រជាពលរដ្ឋដែលខ្វះខាត បាននិយាយថា វាជាសេចក្តីរីករាយ និងមានអំណរណាស់ដែលបានមកជួយ ។ ពួកគេបានសម្តែងនូវការដឹងគុណជាពិសេសដែលអាចមើលឃើញកែវភ្នែក និងទឹកចិត្តរបស់ប្រជាពលរដ្ឋដែលទទួលបានជំនួយ ។
អ្នកផ្សព្វផ្សាយសាសនារៀមច្បងម្នាក់នៅក្នុងបេសកកម្ម ភ្នំពេញកម្ពុជា ដែលបានចូលរួមនៅក្នុងការចែកគ្រឿងឧបភោគ បរិភោគ បានសង្ខេបគំនិតជាច្រើនថា « នៅពេលយើងក្រឡេកមើលទៅប្រជាពលរដ្ឋដែលបានទទួលគ្រឿងឧបភោគ បរិភោគ យើងសង្ឃឹមថាពួកគេនឹងមើលឃើញពន្លឺពិសេស តាមរយៈកែវភ្នែករបស់យើង ដែលបង្ហាញក្តីស្រឡាញ់ចំពោះពួកគេ និងក្តីសង្ឃឹមសម្រាប់អនាគតរបស់ពួកគេផងដែរ » ។