ពិធីប្រគល់គ្រឿងបរិក្ខាពេទ្យត្រូវបានធ្វើឡើងនៅមន្ទីរពេទ្យស្រុកកោះធំ នៅថ្ងៃសៅរ៍ ទី ២៨ ខែសីហា ឆ្នាំ ២០២១ ក្នុងស្រុកកោះធំ ខេត្តកណ្ដាល ព្រះរាជាណាចក្រកម្ពុជា ។ នៅក្នុងពិធីនោះ អ្នកផ្សព្វផ្សាយសាសនារៀមច្បងគឺ វេជ្ជបណ្ឌិត ដាន ស៊ែលលើរ បានណែនាំអំពីឯកឧត្តម ស៊ុន ចាន់ថុល ជាទេសរដ្ឋមន្ត្រីនៃក្រសួងសាធារណការ និងដឹកជញ្ជូន ។ អំឡុងពេលធ្វើសុន្ទរកថារបស់លោក ឯកឧត្តមបានសម្ដែងនូវការថ្លែងអំណរគុណ និងថ្លែងការដឹងគុណដល់សមាគមនិកាយសាសនានៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ចំពោះការផ្ដល់អំណោយជាឧបករណ៍ និងគ្រឿងបរិក្ខាពេទ្យ ដែលបានបរិច្ចាគទៅកាន់មន្ទីរសុខភាពចំនួន ១២ កន្លែង នៅក្នុងខេត្តកណ្ដាល ។
ឯកឧត្តមក៏បានប្រកាសផងដែរថា នៅក្នុងខែតុលានេះ មន្ទីរពេទ្យស្រុកកោះធំ នឹងត្រូវរុះរើ ហើយនឹងធ្វើការចាប់ផ្ដើមសាងសង់ជាថ្មីនូវមន្ទីរពេទ្យកាន់តែធំ និងកាន់តែទំនើប ។ គម្រោងនេះ នឹងផ្ដល់មូលនិធិជារួមមកពីស្ថាប័ននៃអ្នកបរិច្ចាគជាច្រើន ។
អំឡុងពេលនៃការសាងសង់មន្ទីរពេទ្យថ្មីនោះ សមាគមនិកាយសាសនានៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នឹងចាប់ផ្ដើមធ្វើការកែលម្អដល់មន្ទីរសុខភាពជាច្រើននៅក្នុងស្រុកកោះធំ ។ ការធ្វើដូចនេះ នឹងជួយបំពេញតម្រូវការនៃការថែទាំសុខភាពជាមូលដ្ឋាន អំឡុងពេលនៃការសាងសង់មន្ទីរពេទ្យ ។
បន្ទាប់ពីសុន្ទរកថាបញ្ចប់ ឧបករណ៍ពេទ្យទាំងឡាយត្រូវបានចែកចាយទៅដល់មន្ទីរសុខភាពចំនួន ១២ កន្លែង ។ ឧបករណ៍ទាំងនោះរួមមាន ម៉ាស៊ីនពិនិត្យអ្នកជំងឺ បំពង់អុកស៊ីសែន គ្រែអ្នកជំងឺ ជញ្ជីង អូតូក្លាវ និងគ្រឿងបរិក្ខាដទៃទៀតជាច្រើន ព្រមទាំងឧបករណ៍ដែលចាំបាច់ដើម្បីដំណើរការមន្ទីរសុខភាពនីមួយៗឲ្យបានត្រឹមត្រូវ ។
គ្រឿងបរិក្ខារដែលបានបរិច្ចាគ គឺមានចំណែកនៅក្នុងកម្មវិធីកិច្ចខិតខំកែលម្អវិស័យសុខាភិបាលនៅក្នុងប្រទេសកម្ពុជា ( CHIE ) ជាបន្ដបន្ទាប់ ។ គម្រោងនេះគឺបានចាប់ផ្ដើមឡើងនៅក្នុងឆ្នាំ ២០១៨ នៅពេលអែលឌើរ ភីទើរ អែហ្វ មើរស៍ នៃគណៈប្រធានតំបន់អាស៊ី មានក្ដីស្រម៉ៃមួយដើម្បីជួយកែលម្អដល់ការថែទាំសុខភាពដល់ជនក្រីក្រ និងខ្វះខាត នៅក្នុងព្រះរាជាណាចក្រកម្ពុជា ។ ចាប់ពីពេលនោះរហូតមកដល់សព្វថ្ងៃនេះ មានគូស្វាមីភរិយាចំនួនប្រាំមួយគូហើយដែលបានមក ឬកំពុងបម្រើនៅក្នុងគម្រោង CHIE នេះ ។
កម្មវិធីនេះ បានផ្ដល់នូវគ្រឿងបរិក្ខារ និងឧបករណ៍ពេទ្យទៅកាន់មន្ទីរសុខភាពជាច្រើននៅក្នុងព្រះរាជាណាចក្រកម្ពុជា ។ កម្មវិធីនេះក៏មានផ្ដល់ជាការបំពាក់បំប៉នទៅដល់អ្នកដែលនៅជួរមុខអំពីរបៀបសង្គ្រោះបឋម និងរបៀបសង្គ្រោះជីវិត ដែលពួកគាត់ជាអ្នកបានទទួលកញ្ចប់សង្គ្រោះបន្ទាន់ ដែលមានគ្រឿងបរិក្ខារដែលពួកគេអាចប្រើប្រាស់សម្រាប់ការសង្គ្រោះបន្ទាន់ខាងផ្នែកវេជ្ជសាស្ត្រ ។ កម្មវិធី CHIE ក៏បានផ្ដល់ការអប់រំ និងការណែនាំទៅកាន់វេជ្ជបណ្ឌិត គិលានុប្បដ្ឋាយិកា និងបុគ្គលិកពេទ្យដទៃទៀត ព្រមទាំងបានផ្ដល់ដល់មន្ទីរពេទ្យនូវគ្រឿងបរិក្ខារជួយសង្គ្រោះដល់អ្នកជំងឺកូវីត និងអស់អ្នកដែលទទួលរងគ្រោះធ្ងន់ធ្ងរដោយជំងឺរាតត្បាតផងដែរ ។
កម្មវិធី CHIE បច្ចុប្បន្ននេះផ្ដោតទៅលើការជួសជុល និងការកែលម្អដល់មន្ទីរពេទ្យ និងប្រព័ន្ធថែទាំសុខភាពទាំងមូល ។ កិច្ចខិតខំខាងមនុស្សធម៌ កំពុងបន្ដដើម្បីផ្ដល់ជាអណ្ដូងទឹក និងគ្រឿងបរិក្ខារទឹកស្អាតទៅកាន់មន្ទីរពេទ្យ និងអគារថែទាំសុខភាពដទៃទៀត ។
នៅក្នុងពិធីនោះមានការចូលរួមមកពីលោក អ៊ិត វិឈិត និង លោក ឡុងសារ៉េត អែលឌើរ និងស៊ីស្ទើរ ស៊ែលលើរ ដែលជាអ្នកសម្របសម្រួលនៅក្នុងគម្រោងផ្ដួចផ្ដើមខាងវេជ្ជសាស្ត្រនេះនៅក្នុងប្រទេស ។ អែលឌើរ និងស៊ីស្ទើរ ជែនសិន ដែលបម្រើខាងទំនាក់ទំនងសាសនាចក្រក៏បានចូលរួមផងដែរ ។