នៅថ្ងៃទី ១៨ ខែកញ្ញា ឆ្នាំ ២០២១ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានជីកបំបែកដីដើម្បីសាងសង់ព្រះវិហារបរិសុទ្ធភ្នំពេញកម្ពុជា ។ ប្រធាន នាង កូណូ វាសនា នៃបេសកកម្មភ្នំពេញកម្ពុជាបានធ្វើជាអធិបតី និងផ្ដល់ការអធិស្ឋានឧទ្ទិសឆ្លង ។
ប្រធាន នាង បានមានប្រសាសន៍ថា « នេះគឺជាថ្ងៃមួយដែលស្ថានសួគ៌ញញឹមមកលើយើង ពន្លឺនៃព្រះគ្រីស្ទនឹងបំភ្លឺនៅទីនេះ នៅពេលដែលសំណង់ព្រះវិហារបរិសុទ្ធត្រូវបានបញ្ចប់ » ។
គាត់បន្ដមានប្រសាសន៍ថា « ថ្ងៃនេះ ព្រះវិហារបរិសុទ្ធដ៏ពិសិដ្ឋរបស់ព្រះ នឹងចាប់ផ្ដើមចាក់គ្រឹះ ដែលជាតំណាងឲ្យសេចក្ដីស្មោះត្រង់ សេចក្ដីស្រឡាញ់ និងអំណររបស់ពួកបរិសុទ្ធក្នុងព្រះរាជាណាចក្រកម្ពុជា ។ ពួកយើងដឹងថា នៅពេលយើងមកកាន់ព្រះវិហារបរិសុទ្ធ នោះយើងអាចទទួលអារម្មណ៍កាន់តែខិតទៅជិតព្រះអម្ចាស់ ព្រះយេស៊ូវគ្រីស្ទ ។ វានឹងជាពរជ័យមួយដើម្បីមកកាន់ព្រះវិហារបរិសុទ្ធឲ្យបានញឹកញាប់តាមដែលយើងអាចធ្វើទៅបាន » ។
នេះគឺជាព្រះវិហារបរិសុទ្ធដំបូងគេសម្រាប់សាសនាចក្រនៃព្រះយេស៊ូវគ្រីស្ទនៅក្នុងព្រះរាជាណាចក្រកម្ពុជា ។ នៅពេលពេលព្រះវិហារបរិសុទ្ធសាងសង់បញ្ចប់ នោះព្រះវិហារបរិសុទ្ធនឹងបម្រើដល់ពួកបរិសុទ្ធថ្ងៃចុងក្រោយនៅក្នុងព្រះរាជាណាចក្រកម្ពុជាច្រើនជាង ១៥០០០ នាក់ ព្រមទាំងប្រទេសជិតខាងផងដែរ ។
ខណៈដែលមានបម្រាមគោចរណ៍ក្នុងការប្រមូលផ្ដុំដោយសារតែជំងឺកូវីត ១៩ នោះការចូលរួមពិធីសម្ពោធការដ្ឋានសាងសង់ដោយផ្ទាល់នៅនឹងទីតាំងគឺមានការកំណត់ ដូច្នេះសមាជិក និងមិត្តភក្ដិក្នុងសាសនាចក្រនៅទូទាំងប្រទេសកម្ពុជា និងប្រទេសជិតខាងអាចមើលពិធីសម្ពោធតាមការចាក់ផ្សាយអនឡាញ ។
ប្រធានស្ដេកខាងជើងភ្នំពេញ គឺប្រធាន អេង ប៊ុនហួច ក៏បានមានប្រសាសន៍នៅក្នុងពិធីផងដែរ ។ គាត់បាននឹកចាំពីអារម្មណ៍របស់គាត់កាលដែលប្រធាននៃសាសនាចក្រ ប្រធានហ្គរដិន ប៊ី ហ៊ីងគ្លី បានឧទ្ទិសឆ្លងទឹកដីកម្ពុជាសម្រាប់កិច្ចការផ្សព្វផ្សាយសាសនាក្នុងឆ្នាំ ១៩៩៦ ។
គាត់មានប្រសាសន៍ថា កិច្ចការទ្រង់នឹងរីកចម្រើនលូតលាស់ទៅតាមរបៀបដ៏អស្ចារ្យ។ « ខ្ញុំទទួលបានអារម្មណ៍ថា ការស្ថាបនាអគារព្រះវិហារបរិសុទ្ធនេះ គឺជាតឹកតាងមួយនៃពរជ័យពីព្រះអម្ចាស់ ដូចដែលប្រធានហ៊ីងឃ្លីបានមានប្រសាសន៍ » ។
កាលនៅឆ្នាំនោះ អ្នកចូលរួមក្នុងការប្រជុំពិសេសរបស់ប្រធាន ហ៊ីងគ្លី គឺមានចំនួនតិចជាង ៤៥០ នាក់ ដែលចំនួនពាក់កណ្ដាលពុំមែនជាសមាជិកសាសនាចក្រ ។ សព្វថ្ងៃនេះ សាសនាចក្រមានស្ដេកចំនួនពីរ និងមណ្ឌលចំនួនបួននៅក្នុងប្រទេសកម្ពុជា ហើយស្ដេកទាំងពីរនេះមានទីស្នាក់ការនៅក្នុងរាជធានីភ្នំពេញ ។
អស់រយៈពេលជាច្រើនឆ្នាំ សមាជិកសាសនាចក្រមកពីប្រទេសកម្ពុជា បានធ្វើដំណើរទៅកាន់ទីក្រុងហុងកុង ឬប្រទេសហ្វីលីពីនដើម្បីថ្វាយបង្គំនៅក្នុងព្រះវិហារបរិសុទ្ធ ។ មានសមាជិកជាច្រើនបានទៅព្រះវិហារបរិសុទ្ធតែម្ដងប៉ុណ្ណោះនៅក្នុងជីវិត ដោយសារតែត្រូវចំណាយថ្លៃច្រើន និងតម្រូវឲ្យមានការលះបង់ច្រើន ។ ដូច្នេះ នៅពេលប្រធានសាសនាចក្រ ប្រធាន រ័សុល អិម ណិលសុន បានប្រកាសអំពីព្រះវិហារបរិសុទ្ធកាលពីខែតុលា ឆ្នាំ ២០១៨ ក្នុងសន្និសីទទូទៅ និងក្រោយមកលោកបានបើកបង្ហាញដោយផ្ទាល់អំពីរូបវិចិត្រករនៃព្រះវិហារបរិសុទ្ធ អំឡុងពេលលោកមកធ្វើទស្សនកិច្ចការងារបម្រើដល់ប្រទេសនេះកាលពីខែវិច្ឆិកា ឆ្នាំ ២០១៩ ឯសេចក្ដីរំភើបរបស់ពួកបរិសុទ្ធគឺមានច្រើនហួសនឹងថ្លែងបាន ។
ប្រធានអេង គឺជាមនុស្សម្នាក់នៃអ្នកដែលពុំដែលធ្លាប់បានគិតថានឹងមានព្រះវិហារបរិសុទ្ធមួយនៅក្នុងទឹកដីរបស់ពួកគេក្នុងជីវិតរស់នៅនោះទេ ។
គាត់មានប្រសាសន៍ថា « ពិតជារំភើបណាស់ » « ខ្ញុំដឹងថា មិនត្រឹមតែពួកយើងទាំងអស់គ្នារំភើបចិត្តទេ គឺមានជីដូនជីតារបស់យើង ពួកលោកក៏កំពុងមើលមកយើង ហើយកំពុងតែត្រេកអរ និងរំភើបជាមួយនឹងពួកយើងចំពោះកិច្ចការដ៏ពិសិដ្ឋមួយនេះផងដែរ ពីព្រោះពួកលោកកំពុងតែចង់បានសេចក្តីសង្រ្គោះដល់ព្រលឹងរបស់ពួកលោក » ។
សម្ដីរបស់គាត់ត្រូវបានបន្ទរដោយប្អូនស្រី ហុង ចន្នី និងប្អូនស្រី យស ស្រីណុច ដែលបានថ្លែងទីបន្ទាល់របស់ពួកគេនៅក្នុងពិធីសម្ពោធបើកការដ្ឋានសាងសង់ ។ អ្នកទាំងពីរបានបង្ហាញនូវការដឹងគុណចំពោះការស្ដារឡើងវិញនៃដំណឹងល្អ ដែលរួមមានទាំងការស្ដារឡើងវិញនៃពិធីបរិសុទ្ធនានា ដែលអនុញ្ញាតឲ្យទំនាក់ទំនងគ្រួសារបន្ដមានជានិរន្ដរ៍ហួសពីសេចក្ដីស្លាប់ ។ ពួកគេក៏ចង់ចូលរួមនៅក្នុងកិច្ចការព្រះវិហារបរិសុទ្ធផងដែរ ដើម្បីពួកគេផ្ដល់ឱកាសមួយដល់ជីដូនជីតារបស់ពួកគេឲ្យទទួលទាននូវពរជ័យដ៏អស់កល្បជានិច្ច ។
ប្រធាន នាង បានលើកទឹកចិត្តដល់សមាជិកទាំងអស់នៃសាសនាចក្រក្នុងប្រទេសកម្ពុជាឲ្យមានប័ណ្ណចូលព្រះវិហារបរិសុទ្ធ ហើយដែលកាន់តែសំខាន់ជាងនោះទៀត គឺរស់នៅក្នុងជីវិតស័ក្ដិសមដើម្បីអាចឲ្យពួកគេចូលទៅក្នុងដំណាក់នៃព្រះអម្ចាស់ ។
នៅក្នុងការអធិស្ឋានឧទ្ទិសឆ្លង គាត់បានអធិស្ឋានសូមឲ្យព្រះនឹងញែកទីតាំងនេះចេញជាបរិសុទ្ធ ហើយ សូមឲ្យទីតាំងនេះអាចត្រូវបានការពារ និងប្រសិទ្ធពរឲ្យធ្វើជាទីតាំងដ៏ល្អពេញលេញ និងជាគ្រឹះសម្រាប់ព្រះដំណាក់នៃព្រះអម្ចាស់ដ៏ពិសិដ្ឋ » ។
គាត់ក៏មានប្រសាសន៍ផងដែរថា ព្រះវិហារបរិសុទ្ធនេះនឹងជា « រស្មីនៃពន្លឺ និងសេចក្ដីសង្ឃឹម » ហើយគាត់អធិស្ឋានសូមឲ្យអស់អ្នកដែលធ្វើដំណើរឆ្លងកាត់ទីតាំងនេះ នឹង ទទួលអារម្មណ៍នូវសេចក្តីស្រឡាញ់ និងភាពសុខសាន្ត ។
ព្រះវិហារបរិសុទ្ធមានកម្ពស់មួយជាន់ ដែលមានក្រឡាផ្ទៃប្រហែលជា ១០០០០ ហ្វីតការ៉េ ( ៩២៩.០៣០៤ ម៉ែត្រការ៉េ ) នឹងសាងសង់នៅលើផ្ទៃដីចំនួន ៣.១៦ acre ( ១.២៧៨៨០៧ ហិចតា ) មានទីតាំងនៅលើផ្លូវសហព័ន្ធរុស្សី នៅចន្លោះវិទ្យាស្ថានបច្ចេកវិទ្យាកម្ពុជា និងវិទ្យាស្ថានភាសាបរទេស ដែលនៅជិតនឹងសាកលវិទ្យាល័យភូមិន្ទភ្នំពេញ ។ ទីតាំងព្រះវិហារបរិសុទ្ធនឹងមានអគារបន្ថែមមួយទៀតផងដែរ ។
ព្រះវិហារបរិសុទ្ធនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយខុសប្លែកពីសាលាប្រជុំ ឬរោងជំនុំ ដែលសមាជិកជួបជុំគ្នាដើម្បីធ្វើកម្មវិធីថ្វាយបង្គំនៅថ្ងៃអាទិត្យ ។ ព្រះវិហារបរិសុទ្ធនីមួយៗត្រូវបានចាត់ទុកថាជា « ដំណាក់របស់ព្រះអម្ចាស់ » ជាកន្លែងដែលការបង្រៀនរបស់ព្រះយេស៊ូវគ្រីស្ទ ត្រូវបានអះអាងសារជាថ្មីតាមរយៈពិធីបុណ្យជ្រមុជទឹក និងពិធីបរិសុទ្ធដទៃទៀត ដែលបង្រួបបង្រួមក្រុមគ្រួសារសម្រាប់ភាពអស់កល្បជានិច្ច ។ នៅក្នុងព្រះវិហារបរិសុទ្ធ សមាជិកសាសនាចក្ររៀនបន្ថែមអំពីគោលបំណងនៃជីវិត និងចុះសេចក្ដីសញ្ញាដើម្បីដើរតាមព្រះយេស៊ូវគ្រីស្ទ និងបម្រើដល់បងប្អូនរបស់ពួកគេ ។