ប្រធាន រ័សុល អិម ណិលសុន នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ និងភរិយារបស់លោក វិនឌី — ព្រមទាំង អែលឌើរ ឌី ថត គ្រីស្ដូហ្វឺសិន ក្នុង កូរ៉ុមនៃពួកសាវកដប់ពីរនាក់ និងភរិយារបស់លោក ខេធើរីន — នឹងធ្វើដំណើរទៅអាស៊ីនៅពាក់កណ្ដាលខែវិច្ឆិកា កាលព្យាការីបន្ដការងារបម្រើទូទាំងពិភពលោករបស់លោក ។ ថ្នាក់ដឹកនាំសេចក្ដីជំនឿទូទាំងពិភពលោកទាំងនេះនឹងទៅប្រទេសចំនួនបួនក្នុងរយៈពេលប្រាំពីរថ្ងៃ ដោយធ្វើដំណើរទៅប្រទេសវៀតណាម កម្ពុជា សាំងហ្គាពួរ និងឥណ្ឌូនេស៊ី ចាប់ពីថ្ងៃទី ១៥ ខែ វិច្ឆិកា ទៅថ្ងៃទី ២២ ខែ វិច្ឆិកា ឆ្នាំ ២០១៩ ។
ប្រទេសទាំងបួននេះមានពួកបរិសុទ្ធប្រហែល ៣០ ០០០ នាក់ បេសកកម្មចំនួនបួន និងព្រះវិហារបរិសុទ្ធដែលទើបប្រកាសថ្មីមួយនៅប្រទេសកម្ពុជា ។
ប្រធាន ណិលសុន និងអែលឌើរ គ្រីស្ដូហ្វឺសិន នឹងថ្លែងក្នុងការប្រជុំសមាជិកជាច្រើនជាមួយពួកបរិសុទ្ធថ្ងៃចុងក្រោយ និងមិត្តទាំងឡាយនៃសេចក្ដីជំនឿនេះ ។ ពួកលោកក៏នឹងជួបជាមួយរដ្ឋាភិបាល ក៏ដូចជាថ្នាក់ដឹកនាំនៃប្រទេសទាំងនេះផងដែរ ។
ព្រឹត្តិការណ៍នេះនឹងជាការទស្សនកិច្ចដំបូងរបស់ប្រធានសាសនាចក្រសម្រាប់ប្រទេសវៀតណាម និងកម្ពុជា ក្រោយជាង ២០ ឆ្នាំកន្លងមក ។ ប្រធាន ហ្គរដុន ប៊ី ហ៊ីងគ្លឺ បានមកប្រទេសវៀតណាម និងកម្ពុជាក្នុងឆ្នាំ ១៩៩៦ ប្រទេសសាំងហ្គាពួរ និងឥណ្ឌូនេស៊ីក្នុងឆ្នាំ ២០០០ ។ ពុំមានប្រធានសាសនាចក្រណាផ្សេងទៀតបានទៅកាន់ប្រទេសទាំងនេះឡើយ ។
ប្រធាន ណិលសុន បានទៅទស្សនកិច្ចនៅប្រទេសសាំងហ្គាពួរ និងឥណ្ឌូនេស៊ីក្នុងនាមជាសាវកកាលពីខែ កុម្ភៈ ឆ្នាំ ២០១០ ។ ការត្រឡប់មកវិញរបស់លោកក្នុងខែវិច្ឆិកានេះ នឹងជាការប្រារព្ធខួបលើកទី ៥០ នៃសាសនាចក្រក្នុងប្រទេសទាំងនេះ ។
ថ្ងៃ អាទិត្យ ទី ១៧ ខែ វិច្ឆិកា–ថ្ងៃ ចន្ទ ទី ១៨ ខែ វិច្ឆិកា
ទីក្រុងហាណូយ និងហូជីមិញប្រទេសវៀតណាម
ប្រធាន ណិលសុន នឹងជួបជាមួយពួកបរិសុទ្ធថ្ងៃចុងក្រោយក្នុងការប្រជុំធម្មនិដ្ឋាននាល្ងាចថ្ងៃ អាទិត្យ ទី ១៧ ខែ វិច្ឆិកា នៅទីក្រុងហាណូយ រដ្ឋធានីនៃប្រទេសវៀតណាម ដែលបន្ដដោយការជួបជាវី.អាយ.ភី.មួយ ។ នៅថ្ងៃ ចន្ទ ទី ១៨ ខែ វិច្ឆិកា ការជួបជាវី.អាយ.ភី. និងការប្រជុំធម្មនិដ្ឋានមួយនឹងធ្វើឡើងនៅទីក្រុងហូជីមិញ ។ ប្រទេសវៀតណាមគឺជាប្រទេសមួយ ដែលទើបមានវត្តមានរបស់សាសនាចក្រ ហើយវាបន្ដរីកចម្រើន ។
ថ្ងៃ អង្គារ ទី ១៩ ខែ វិច្ឆិកា
ទីក្រុងភ្នំពេញ ប្រទេសកម្ពុជា
ប្រធាន ណិលសុន នឹងធ្វើដំណើរទៅប្រទេសកម្ពុជា ហើយធ្វើការប្រជុំធម្មនិដ្ឋាននាពេលល្ងាច ។ ព្រឹត្តិការណ៍នេះនឹងត្រូវចាក់ផ្សាយបន្ដផ្ទាល់ទូទាំងសាលាជំនុំទាំងអស់នៅប្រទេសកម្ពុជា ។
ក្នុងប្រទេសកម្ពុជា មានពួកបរិសុទ្ធប្រហែល ១៥ ០០០ នាក់ ក្នុងសាលាជំនុំចំនួន ២៩ និងបេសកកម្មចំនួនមួយ ។ ព្រះវិហារបរិសុទ្ធ ភ្នំពេញ កម្ពុជាត្រូវបានប្រកាសដោយប្រធាន ណិលសុន ក្នុងខែ តុលា ឆ្នាំ ២០១៨ អំឡុងសន្និសីទទូទៅ ។
ថ្ងៃ ពុធ ទី ២០ ខែ វិច្ឆិកា
ប្រទេសសាំងហ្គាពួរ
ប្រធាន និងស៊ិស្ទើរ ណិលសុន រួមជាមួយនឹងអែលឌើរ និងស៊ិស្ទើរ គ្រីស្តូហ្វឺសិន នឹងធ្វើដំណើរទៅប្រទេសសាំងហ្គាពួរដើម្បីធ្វើការប្រជុំសមាជិកនាពេលល្ងាច ។ ការប្រជុំនេះនឹងបកប្រែ ហើយចាក់ផ្សាយផ្ទាល់នៅសាលាជំនុំទាំងអស់ក្នុងប្រទេសម៉ាឡេស៊ី ។ មានសមាជិកប្រហែល ១៤ ០០០ នាក់ក្នុងសាលាជំនុំសាសនាចក្រចំនួន ៤៣ នៃប្រទេសសាំងហ្គាពួរ និងម៉ាឡេស៊ី ។ សាសនាចក្រនឹងប្រារព្ធខួបលើកទី ៥០ ក្នុងប្រទេសសាំងហ្គាពួរនៅឆ្នាំនេះ ។
ថ្ងៃ ព្រហស្បតិ៍ ទី ២១ ខែ វិច្ឆិកា
ទីក្រុងហ្សាការតា ប្រទេសឥណ្ឌូនេស៊ី
ទស្សនកិច្ចនៃការងារបម្រើចុងក្រោយនៅអាស៊ីនេះគឺទីក្រុងហ្សាការតា ប្រទេសឥណ្ឌូនេស៊ី ជាកន្លែងដែលថ្នាក់ដឹកនាំសាសនាចក្រជាន់ខ្ពស់នឹងជួបប្រជុំ ហើយថ្លែងទៅកាន់ការប្រជុំធម្មនិដ្ឋានមួយ ដែលនឹងចាក់ផ្សាយផ្ទាល់សម្រាប់សាលាជំនុំទាំងអស់ក្នុងប្រទេសនេះ ។
មានពួកបរិសុទ្ធថ្ងៃចុងក្រោយប្រហែល ៧ ៥០០ នាក់ក្នុងសាលាជំនុំចំនួន ២៤ រស់នៅក្នុងប្រទេសឥណ្ឌូនេស៊ី ហើយមានបេសកកម្មចំនួនមួយ ។ សាសនាចក្រនឹងប្រារព្ធខួប ៥០ ឆ្នាំក្នុងប្រទេសឥណ្ឌូនេស៊ីនៅឆ្នាំនេះ ។
ព័ត៌មាន Newsroom នឹងផ្ដល់ដំណឹងពេញលេញស្ដីពីការធ្វើដំណើរជាព្រឹត្តិការណ៍ប្រវត្តិសាស្ដ្រនេះ រួមទាំងវីដេអូ និងរូបថតនានាតាមប្រព័ន្ធផ្សព្វផ្សាយ និងជាសាធារណជន ។