គណៈប្រធានទីមួយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានប្រកាសអំពីកិច្ចខិតខំជាសាកលជាបន្ដបន្ទាប់ដើម្បីប្រឈមមុខនឹងការរាតត្បាតកូវីត-១៩ ។ នៅក្នុងចំណោមគម្រោងជាច្រើនដែលកំពុងតែដំណើរការ នោះធនធានសាសនាចក្រ និងអ្នកស្ម័គ្រចិត្ត ត្រូវបានប្រើប្រាស់ដើម្បីជួយផលិតម៉ាស់ឲ្យច្រើនបំផុតតាមដែលអាចធ្វើទៅបាន និងឧបករណ៍ការពារដទៃទៀតសម្រាប់ពេទ្យមើលថែនៅជួរមុខ ។
នៅក្នុងលិខិតរបស់គណៈប្រធានទីមួយ ដែលចុះនៅថ្ងៃអង្គារ ទី ១៤ ខែមេសា ឆ្នាំ ២០២០ បានថ្លែងថា « យើងដឹងថាព្រះនឹងព្រះសណ្ដាប់ ហើយឆ្លើយតបចំពោះការអធិស្ឋានរបស់យើង ។ យើងត្រូវបានបង្រៀនឲ្យ ‹ ចូលរួមយ៉ាងសស្រាក់សស្រាំ › នៅក្នុងការជួយសង្គ្រោះដល់អស់អ្នកដែលរងទុក្ខ និងមើលថែដល់អ្នកដែលខ្វះខាត ( សូមមើលគោលលទ្ធិ និងសេចក្តីសញ្ញា ៥៨:២៧ ) » ។
ពួកលោកបន្ថែមថា « មកដល់បច្ចុប្បន្ននេះ យើងបានអនុមតិទៅលើគម្រោងជួយសង្គ្រោះពីកូវីត-១៩ ជាង ១១០ គម្រោង នៅក្នុងប្រទេសចំនួន ៥៧ ប្រទេស ។ ភាគច្រើនបំផុត គឺធ្វើឡើងជាមួយនឹងដៃគូជាទីទុកចិត្តមកពីភ្នាក់ងារសប្បុរសធម៌ ក្រសួងសុខាភិបាល និង មន្ទីរពេទ្យជាច្រើន ដែលអនុញ្ញាតឲ្យយើងប្រើធនធានរបស់ពួកគេ— រួមទាំងអាហារ ផលិតផលអនាម័យ ឧបករណ៍ការពារផ្ទាល់ខ្លួន ឧបករណ៍ពេទ្យ ប្រាក់កាស និងសម្ភារដទៃៗទៀត— នៅក្នុងទីកន្លែងដែលពួកគេអាចធ្វើបានយ៉ាងល្អបំផុត ។
ឧទាហរណ៍ រោងចក្រសម្លៀកបំពាក់ប៊ីហៃរបស់សាសនាចក្រនៅក្នុងប្រទេសប្រេស៊ីល ប្រទេសម៊ិកស៊ីកូ ប្រទេសប៉ារ៉ាហ្គាយ និងប្រទេសហ្វីលីពីន ព្រមទាំងរដ្ឋហូថាហ៍ នឹងផ្លាស់ប្ដូរប្រតិបត្តិការរបស់ពួកគេជាបណ្ដោះអាសន្នពីការផលិតសម្លៀកបំពាក់ខាងសាសនាមកជាការដេរម៉ាស់ ( គ្រប់ទីតាំងទាំងអស់ ) និង សម្លៀកបំពាក់សម្រាប់ពេទ្យ ( តែរដ្ឋយូថាហ៍ប៉ុណ្ណោះ ) ដែលចាំបាច់សម្រាប់អស់អ្នកដែលនៅក្នុងវិស័យវេជ្ជសាស្ត្រ ។
ស៊ីស្ទើរ សារ៉ុន អូប៊ែង ជាប្រធានអង្គការសប្បុរសធម៌ពួកបរិសុទ្ធថ្ងៃចុងក្រោយ និងជាសមាជិកក្នុងគណៈប្រធានសមាគមសង្គ្រោះ បានមានប្រសាសន៍ថា « យើងកំពុងព្យាយាមធ្វើការជាមួយថ្នាក់ដឹកនាំរដ្ឋាភិបាល [ និង ] ថ្នាក់ដឹកនាំក្នុងសហគមន៍ ហើយស្វែងយល់អំពីអ្វីជាតម្រូវការរបស់ពួកគេ បន្ទាប់មកឆ្លើយតបតាមសេចក្ដីត្រូវការនោះ » ។ « យើងមានសមាគមសង្គ្រោះ និងក្រុមគ្រួសាររបស់ពួកគេដើម្បីជួយក្នុងគម្រោងទាំងនេះមួយចំនួន » ។
ស៊ីស្ទើរ អូប៊ែង បានបន្ថែមថា « អង្គការសប្បុរសធម៌ពួកបរិសុទ្ធថ្ងៃចុងក្រោយ គឺមានសំណាងណាស់ ដោយសារយើងមានដៃគូជាច្រើន ទោះជាមានការរាតត្បាត ឬអត់ក្ដី » ។ « យើងមានទំនាក់ទំនងជាទីទុកចិត្តអស់រយៈពេលជាយូរមកហើយ ។ ដូច្នេះនៅពេលមានការរាតត្បាត នោះយើងមិនចាំបាច់ចាប់ផ្ដើមដោយដៃទទេនោះទេ ។ យើងដឹងយ៉ាងច្បាស់អំពីរបៀបជួយគ្នាទៅវិញទៅមក » ។
នៅក្នុងប្រទេសកម្ពុជា និងប្រទេសវៀតណាម សាសនាចក្របានសហការជាមួយនឹងរដ្ឋាភិបាលក្នុងមូលដ្ឋានដើម្បីផ្ដល់ម៉ាស់ និងសម្ភារៈសង្គ្រោះបន្ទាន់ ដែលផ្ដល់អត្ថប្រយោជន៍ដល់មនុស្សជិត ១៥ លាននាក់ ។
នៅក្នុងលិខិតរបស់គណៈប្រធានទីមួយបានថ្លែងថា « យើងសូមអញ្ជើញសមាជិករបស់យើងឲ្យចូលរួមនៅក្នុងគម្រោងជួយសង្គ្រោះទាំងនេះ និងគម្រោងដទៃៗទៀតនៅក្នុងតំបន់ និងសហគមន៍របស់ពួកគេកាលមានឱកាស ទាំងធ្វើតាមការដឹកនាំពីរដ្ឋាភិបាលក្នុងមូលដ្ឋា ននិងពេលស្ថានភាពផ្ទាល់ខ្លួនអំណោយផល » ។