បងប្អូនប្រុសស្រីជាទីស្រឡាញ់ ព្រមទាំងមិត្តភក្ដិទាំងឡាយ ខ្ញុំដឹងថាកង្វល់របស់បងប្អូនចំពោះសុខភាពផ្ទាល់ខ្លួន សុខភាពក្រុមគ្រួសារ សេដ្ឋកិច្ច ព្រមទាំងការងារផ្ទាល់ខ្លួនរបស់បងប្អូនគឺជាបន្ទុកយ៉ាងធ្ងន់នៅក្នុងគំនិតរបស់បងប្អូននាគ្រានេះ ។ ការរាតត្បាតនៃ កូវីត-១៩ បន្ដនៅមានឥទ្ធិពលមកលើការរស់នៅ ហើយរំខានដល់សកម្មភាពជាធម្មតារបស់យើង ។ នេះគឺជាបញ្ហាបន្ថែមមួយទៀត ដែលបងប្អូនបានជួបប្រទះដោយគ្មានសង្ស័យ ។ ការរញ្ជួយដីថ្មីៗនេះនៅទីក្រុងសលត៍ លេក គឺគ្រាន់តែជាឧទាហរណ៍បន្ថែមមួយទៀតអំពីប្រភពនៃភាពតានតឹងដែលធ្វើឲ្យការបារម្ភរបស់យើងមានកាន់តែខ្លាំងឡើង ។
ការលំបាកទាំងអស់នេះ កំពុងបណ្ដាលឲ្យមនុស្សជាច្រើនមានអារម្មណ៍ថា ដីកំពុងតែរំកិលនៅពីខាងក្រោមពួកគេ ។ ពួកគេងឿងឆ្ងល់អំពីអ្វីដែលពួកគេអាចពឹងផ្អែកពិតប្រាកដនៅក្នុងគ្រានៃភាពចលាចលនេះ ។
ការណ៍នេះរំឭកខ្ញុំអំពីការសន្ទនាមួយដែលខ្ញុំមានមិនយូរប៉ុន្មានជាមួយនឹងមិត្តជាទីស្រឡាញ់ខ្ញុំមា្នក់ ។ បុរសនេះគឺជាមន្ត្រីរដ្ឋាភិបាលរៀមច្បងមួយរូបនៅជាតិសាសន៍ផ្សេងទៀត ដែលខ្ញុំបានស្គាល់អស់ជាច្រើនឆ្នាំ ។ នៅពេលខ្ញុំជួបគាត់ជាលើកចុងក្រោយ ខ្ញុំភ្ញាក់ផ្អើលដែលខ្ញុំបានឃើញគាត់មកកាន់ការប្រជុំរបស់យើងដោយជិះនៅលើរទេះរុញ ។
មិត្តជរារូបនេះបានថ្លែងមកខ្ញុំ ។ គាត់បាននិយាយថា « ខ្ញុំបានឈឺអស់រយៈពេលជាយូរ » « ស្ទើរតែរាល់ថ្ងៃ ខ្ញុំបានដេកនៅលើគ្រែ សំឡឹងមើលទៅលើពិដាន ហើយចង់ដឹងអំពីអ្វីជាសេចក្ដីពិត » ។
អំឡុងគ្រាសាកល្បងនោះ មានរឿងមួយចំនួនបានបញ្ជាក់អះអាង និងលួងលោមចិត្តជាសេចក្ដីពិត ។ សាវកប៉ុលបានមើលឃើញជំនាន់របស់យើង ហើយបានព្យាករណ៍ថា គ្រាសាកល្បងនឹងមកដល់ ។ គាត់បានបន្ថែមថា មនុស្សជាច្រើនបានរៀនសូត្រ ប៉ុន្តែពុំដែលបានទទួលចំណេះដឹងនៃសេចក្ដីពិតទេ ។
អ្វីដែលជាការពិតគឺថា នៅ កណ្ដាលនៃភាពងងឹតខ្លាំងនៃពិភពលោកចលាចល នោះពន្លឺនៃព្រះយេស៊ូវគ្រីស្ទបំភ្លឺកាន់តែខ្លាំង ។ ទ្រង់អាចមានបន្ទូលសេចក្ដីពិតចេញពីដួងចិត្ត និងគំនិតរបស់យើង នៅពេលយើងស្វែងរកទ្រង់ ហើយរៀនស្ដាប់ទ្រង់ ។
នៅក្នុងសេចក្ដីនេះ យើងទន្ទឹងចាំសន្និសីទទូទៅនាពេលខាងមុខនេះរបស់សាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ នៅថ្ងៃទី ៤-៥ ខែមេសា អំឡុងពេលដែលយើងនឹងស្ដាប់ថ្នាក់ដឹកនាំសាសនាចក្រអំពីការស្ដារឡើងវិញនៃដំណឹងល្អ របស់ព្រះយេស៊ូវគ្រីស្ទដ៏រុងរឿង និងរបៀបដែលដំណឹងល្អនាំមកនូវសេចក្ដីសុខសាន្ដដល់ជីវិតរបស់យើង ។
ដោយសារតែក្រុមជំនុំធំមិនអាចប្រមូលផ្ដុំគ្នាផ្ទាល់ នោះសន្និសីទនេះនឹងមានរូបភាពផ្សេងមួយ ។ ប៉ុន្តែសេចក្ដីពិតដែលថាព្រះយេស៊ូវគ្រីស្ទ គឺជាព្រះអង្គសង្គ្រោះ និងព្រះប្រោសលោះរបស់យើង— ហើយថាសេចក្ដីពិតពេញលេញនៃដំណឹងល្អរបស់ទ្រង់ត្រូវបានស្ដារឡើងវិញមកកាន់ផែនដី— នឹងត្រូវបានបង្រៀនជានិច្ចកាល ។
ខ្ញុំសូមផ្ដល់នូវការស្វាគមន៍យ៉ាងកក់ក្ដៅចំពោះមនុស្សទាំងអស់ មិនថាទំនៀមទម្លាប់ជំនឿរបស់បងប្អូនជាអ្វីទេ សូមចូលរួមនឹងពួកយើងតាមរយៈបច្ចេកវិទ្យា ហើយរីករាយនឹងអំណាចនៃសេចក្ដីពិតដែលបានបើកសម្ដែងដ៏លួងលោមចិត្តនេះ ។ ខ្ញុំស្រឡាញ់បងប្អូន ។ ខ្ញុំអធិស្ឋានសម្រាប់បងប្អូន ។ ហើយខ្ញុំអះអាងនឹងបងប្អូនថា ព្រះអម្ចាស់កំពុងទតមើលមកលើយើង អំឡុងគ្រាមានបញ្ហាទាំងនេះ ។