នៅក្នុងព្រឹត្តិការណ៍ថ្មីៗនេះ ប្រធាន រ័សុល អិម ណិល ជាប្រធានសាសនាចក្រព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានចែកចាយសារលិខិតដូចតទៅនេះនៅលើគណនីប្រព័ន្ធផ្សព្វផ្សាយសង្គមរបស់លោក ៖
យើងចូលរួមនឹងមនុស្សជាច្រើននៅក្នុងប្រជាជាតិនេះ និងនៅទូទាំងពិភពលោកដែលមានចិត្តសោកសៅយ៉ាងខ្លាំង ដោយសារតែភស្ដុតាងនៃការរើសអើងជាតិសាសន៍ និងការមិនយកចិត្តទុកដាក់ចំពោះជីវិតមនុស្សថ្មីៗនេះ ។ យើងស្អប់ខ្ពើមដែលថាមានមនុស្សខ្លះបានបដិសេធការគោរពចំពោះមនុស្សដទៃ និងសេរីភាពជាមូលដ្ឋាន ដោយសារតែពណ៌សម្បុរពួកគេ ។
យើងក៏មានចិត្តសោកសៅផងដែរ ពេលការរំលោភបំពានទាំងនេះមានមកលើសេចក្ដីថ្លៃថ្នូរមនុស្ស ដែលនាំឲ្យកើតមានឡើងនូវអំពើហិង្សា និងភាពចលាចល ។
ព្រះដ៏បង្កបង្កើតនៃយើងគ្រប់គ្នាអំពាវនាវឲ្យយើងម្នាក់ៗលះបង់ចោលឥរិយាបថនៃការរើសអើងទាស់នឹងក្រុមណាមួយនៃកូនចៅរបស់ព្រះ ។ បើមានពួកយើងណាម្នាក់បានរើសអើងចំពោះជាតិសាសន៍មួយទៀត គឺត្រូវតែប្រែចិត្ត !
អំឡុងបេសកកម្មនៅលើផែនដីរបស់ព្រះអង្គសង្គ្រោះ ទ្រង់បានធ្វើការងារបម្រើឥតឈប់ឈរទៅដល់អ្នកដែលត្រូវគេកាត់ចេញ អ្នកបាត់បង់ឱកាស អ្នកត្រូវគេកាត់ទោស អ្នកត្រូវគេមើលរំលង អ្នកត្រូវគេបំពាន ហើយអ្នកត្រូវគេបន្ទាបបន្ថោក ។ ក្នុងនាមជាពួកអ្នកដើរតាមទ្រង់ តើយើងអាចធ្វើអ្វីមួយតិចជាងនេះបានទេ ? ចម្លើយគឺថាទេ ! យើងជឿលើសេរីភាព សេចក្ដីសប្បុរស និងភាពស្មើគ្នាសម្រាប់កូនចៅគ្រប់រូបរបស់ព្រះ !
ចូរឲ្យយើងមានភាពច្បាស់លាស់ ។ យើងគឺជាបងប្អូនប្រុសស្រីនឹងគ្នា យើងម្នាក់ៗគឺជាបុត្រនៃព្រះវរបិតាសួគ៌ជាទីស្រឡាញ់ ។ ព្រះរាជបុត្រាទ្រង់ ព្រះអម្ចាស់ ព្រះយេស៊ូវគ្រីស្ទ អញ្ជើញមនុស្សគ្រប់គ្នាឲ្យមករកទ្រង់—« ទាំងខ្មៅ និងស ទាំងបាវគេ និងសេរី ទាំងប្រុស និងស្រី » ( នីហ្វៃទី២ ២៦:៣៣ ) ។ វាចាំបាច់ឲ្យយើងម្នាក់ៗធ្វើអ្វីដែលយើងអាចធ្វើបាននៅក្នុងវិសាលភាពនៃឥទ្ធិពលរបស់យើងដើម្បីរក្សាសេចក្ដីថ្លៃថ្នូរ និងការគោរពដែលបុត្រាបុត្រីគ្រប់រូបរបស់ព្រះគួរតែទទួលបាន ។
ប្រជាជាតិមួយអាចមានភាពអស្ចារ្យទៅបានអាស្រ័យទៅលើប្រជាជនរបស់ខ្លួនប៉ុណ្ណោះ ។ ការណ៍នោះតម្រូវឲ្យពលរដ្ឋបណ្ដុះសីលធម៌ដែលជួយពួកគេឲ្យបែងចែករវាងអ្វីដែលត្រូវ និងអ្វីដែលខុស ។
ទង្វើខុសច្បាប់ ដូចជា ការលួចប្លន់ ការបំផ្លិចបំផ្លាញទ្រព្យសម្បត្តិសាធារណៈ ឬឯកជន មិនអាចអត់ឱនបានឡើយ ។ ពុំដែលមានកំហុសណាមួយ ត្រូវបានកែតម្រូវដោយសារកំហុសទីពីរនោះឡើយ ។ អំពើអាក្រក់ពុំអាចត្រូវបានដោះស្រាយដោយសារអំពើអាក្រក់ជាងនោះឡើយ ។
យើងត្រូវតែចិញ្ចឹមបីបាច់សេចក្ដីជំនឿរបស់យើងទៅលើភាពជាបិតារបស់ព្រះ និងភាពជាបងប្អូនរបស់មនុស្ស ។
យើងត្រូវតែចិញ្ចឹមបីបាច់នូវការគោរពដ៏សំខាន់ចំពោះសេចក្ដីថ្លៃថ្នូររបស់មនុស្សគ្រប់រូប មិនថាពួកគេមានពណ៌សម្បុរ សាសនា ឬបុព្វហេតុអ្វីនោះទេ ។
ហើយយើងត្រូវធ្វើការឥតឈប់ឈរដើម្បីស្ថាបនាស្ពាននៃការយល់ដឹងជាជាងការបង្កើតជញ្ជាំងនៃការបែងចែក ។
ខ្ញុំសូមអង្វរឲ្យយើងធ្វើការរួមគ្នាស្វែងរកសន្តិភាព គោរពគ្នាទៅវិញទៅមក និងផ្ដល់សេចក្ដីស្រឡាញ់ដល់កូនចៅគ្រប់រូបរបស់ព្រះ ។