ប្រធាន រ័សុល អិម ណិលសុន បង្ហាញការថ្លែងអំណរគុណចំពោះអស់អ្នកទាំងឡាយដែលបានចូលរួមនៅក្នុងការអញ្ជើញរបស់លោកឲ្យបង្ហាញការ #ដឹងគុណ រយៈពេលមួយសប្ដាហ៍នៅក្នុង ការបង្ហោះតាមប្រព័ន្ធផ្សព្វផ្សាយសង្គម និងសារអ៊ីម៉ែលដែលបានផ្ញើរចេញនៅថ្ងៃអាទិត្យ ទី ២៩ ខែវិច្ឆិកា ។ លោកបានមានប្រសាសន៍ថា « ខ្ញុំដឹងគុណ និងមានចិត្តរាបសារដែលបងប្អូនចូលរួមនៅក្នុងការថ្លែងអំណរគុណចំពោះព្រះសម្រាប់ពរជ័យដែលពុំអាចរៀបរាប់អស់ ដែលទ្រង់បានប្រទានពរដល់យើងម្នាក់ៗ » ។
របៀបមួយដើម្បីបន្ដបង្ហាញនូវការដឹងគុណនៅក្នុងអំឡុងរដូវបុណ្យគ្រីស្ទម៉ាស់ គឺតាមរយៈការបម្រើដូចជាព្រះគ្រីស្ទ លោកបានបន្ថែមជាមួយនឹងការអញ្ជើញមួយដើម្បី #បំភ្លឺពិភពលោក « ដោយការស្រឡាញ់ និងការបម្រើអ្នកដទៃ ម្ដងម្នាក់ៗ » ។
សារលិខិតជាវីដេអូរបស់ប្រធាន រ័សុល អិម ណិលសុន និងការអធិស្ឋានអំពីការដឹងគុណនៅថ្ងៃសុក្រ ទី ២០ ខែវិច្ឆិកា បានផ្សាយចេញទៅកាន់មនុស្សរាប់លាននាក់នៅទូទាំងពិភពលោក ចាប់តាំងពីពេលដែលវាត្រូវបានចេញផ្សាយនៅលើ YouTube, Facebook និង ChurchofJesusChrist.org ។ វីដេអូអាចរកបាននៅក្នុង Gospel Media និង បណ្ណាល័យដំណឹងល្អ ក្រោមចំណងជើង « ព្រះយេស៊ូវ គ្រីស្ទ » ។ មានមនុស្សរាប់រយពាន់នាក់បានធ្វើតាមការអញ្ជើញរបស់លោកដើម្បីបង្ហោះនៅលើប្រព័ន្ធផ្សព្វផ្សាយដោយប្រើ#ដឹងគុណ ។
(តាម Instagram)
សេចក្ដីសង្ឃឹមនៅតែបញ្ចាំងពន្លឺ #បំភ្លឺពិភពលោក
នៅថ្ងៃទី ២០ ខែវិច្ឆិកា ខ្ញុំបានផ្ដល់សារ និងការអធិស្ឋាននៃការដឹងគុណសម្រាប់ពិភពលោក និងមនុស្សគ្រប់រូប ។ ខ្ញុំដឹងគុណ និងមានចិត្តរាបសារដែលបងប្អូនចូលរួមនៅក្នុងការថ្លែងអំណរគុណចំពោះព្រះសម្រាប់ពរជ័យដែលពុំអាចរៀបរាប់អស់ ដែលទ្រង់បានប្រទានពរដល់យើងម្នាក់ៗ ។
ខ្ញុំលើកទឹកចិត្តឲ្យបងប្អូនសម្ដែងការដឹងគុណចំពោះព្រះដែលទ្រង់មានចំណែកនៅក្នុងជីវិតប្រចាំថ្ងៃរបស់បងប្អូន ។ អាកប្បកិរិយានៃការដឹងគុណផ្ដល់នូវទស្សនវិស័យល្អប្រសើរ និងកាន់តែមានភាពសុខសាន្ដនៅក្នុងចិត្ត និងបេះដូងរបស់យើង ។
ខ្ញុំក៏សង្ឃឹមថាបងប្អូននឹងបន្ដអធិស្ឋានប្រចាំថ្ងៃទៅកាន់ព្រះវរបិតាសួគ៌របស់យើងផងដែរ ។ យើងគឺជាកូនចៅរបស់ទ្រង់ ហើយទ្រង់ស្រឡាញ់យើងដោយការមើលថែដ៏ទន់ភ្លន់របស់ឪពុកម្ដាយ ។
ឥឡូវ នៅពេលយើងឈានចូលដល់រដូវបុណ្យគ្រីស្ទម៉ាស់ ហើយអបអរដល់ព្រះគ្រីស្ទដ៏មានព្រះជន្មរស់ នោះរបៀបដ៏មានអានុភាពបំផុតមួយ គឺយើងអាចបង្ហាញការដឹងគុណរបស់យើងតាមរយៈការបម្រើដល់កូនចៅរបស់ទ្រង់ ។ ចូរយើងធ្វើតាមគំរូរបស់ទ្រង់ដើម្បី « បំភ្លឺពិភពលោក » តាមរយៈការស្រឡាញ់ និងការបម្រើដល់អ្នកដទៃ ម្ដងម្នាក់ៗ ។ #ដឹងគុណ #បំភ្លឺពិភពលោក