ថ្នាក់ដឹកនាំស្ត្រីជាសកលរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានមានប្រសាសន៍ថា ការអប់រំគឺជាកូនសោសម្រាប់ភាពជោគជ័យរបស់ស្រ្តី និងក្មេងស្រីនៅទូទាំងពិភពលោក ។
ស៊ីស្ទើរ ជីន ប៊ី ប៊ីងហាំ ដែលជាប្រធានសមាគមសង្គ្រោះទូទៅរបស់សាសនាចក្រគឺជាវាគ្មិនកិត្តិយសក្នុងសន្និបាតប្រចាំឆ្នាំលើកទីប្រាំស្តីពីស្រ្តីក្នុងកិច្ចការទូតអន្តរជាតិ ។ ព្រឹត្តិការណ៍នេះផ្សាយចេញពីទីក្រុង ឡូស អាន់ជើឡែស ហើយបានប្រារព្ធឡើងតាមប្រព័ន្ធអនឡាញដោយសារតែជំងឺរាតត្បាតសកល ។ ព្រឹត្តិការណ៍នេះត្រូវបានឧបត្ថម្ភដោយអគ្គកុងស៊ុលកិត្តិយសនៃសាធារណរដ្ឋសេណេហ្គាល់ ។
ស៊ីស្ទើរ ប៊ីងហាំ បានប្រាប់អ្នកដឹកនាំ និងការទូតផ្នែកពាណិជ្ជកម្មអន្តរជាតិដែលបានចូលរួមក្នុងព្រឹត្តិការណ៍នេះថា « ក្នុងនាមជាស្ត្រីម្នាក់ដូចជាស្ត្រីផ្សេងទៀតដែរ ខ្ញុំរីករាយនៅក្នុងចក្ខុវិស័យរួមគ្នារបស់យើងស្តីពីការជួយធ្វើឲ្យជីវិតបងប្អូនស្ត្រីបានល្អប្រសើរឡើងមិនថាយើងរស់នៅទីណានោះទេ » ។
ស៊ីស្ទើរ ប៊ីងហាំ គឺជាប្រធានទូទៅនៃសមាគមសង្គ្រោះរបស់សាសនាចក្រ ដែលតំណាងឲ្យស្ត្រីពួកបរិសុទ្ធថ្ងៃចុងក្រោយជាង ៧.៥ លាននាក់នៅក្នុង ២២០ ប្រទេស ។
ស៊ីស្ទើរ រ៉េណា អ៊ី អាប៊ើតូ ជាទីប្រឹក្សាទីពីរនៅក្នុងគណៈប្រធានសមាគមសង្គ្រោះទូទៅគឺជាវាគ្មិនកិត្តិយសកាលពី ឆ្នាំមុន ។
ប្រធានសមាគមសង្គ្រោះទូទៅបានចែកចាយវីដេអូមួយដែលរម្លឹកដល់ទិវាសិទ្ធិនារីអន្តរជាតិក្នុងសុន្ទរកថារបស់គាត់ ដែលគាត់ក៏បានចែកចាយវីដេអូនេះនៅលើប្រព័ន្ធផ្សព្វផ្សាយសង្គមផងដែរ ។
ដោយយោងទៅលើផលប៉ះពាល់ដែលបណ្តាលមកពីជំងឺរាតត្បាតសកលទៅលើស្ត្រីទូទាំងពិភពលោកទាំងក្នុងក្រុមគ្រួសារ ផ្ទាល់ខ្លួន និងទាំងទិដ្ឋភាពវិជ្ជាជីវៈនៃជីវិតរបស់ពួកគេផងដែរ ស៊ីស្ទើរ ប៊ីងហាំ បានបន្តសុន្ទរកថារបស់គាត់ដោយការចែកចាយការកោតសរសើរចំពោះបងប្អូនស្ត្រីពេលប្រឈមនឹងភាពលំបាក ។
ស៊ីស្ទើរ ប៊ីងហាំ បានមានប្រសាសន៍ថា « ខ្ញុំសូមឱនក្បាលគោរពចំពោះបងប្អូននូវអ្វីទាំងអស់ដែលបងប្អូនសម្រេចបាននៅក្នុងពេលដ៏លំបាកទាំងនេះ »
ស៊ីស្ទើរ ប៊ីងហាំ បានចែកចាយនៅក្នុងសុន្ទរកថារបស់គាត់ថា ទោះជាគាត់ជឿលើដំណឹងល្អនៃព្រះយេស៊ូវគ្រីស្ទថា « បងប្អូនស្រ្តី និងក្មេងស្រីគ្រប់រូបនៅលើផែនដីនេះគឺជាបុត្រីសំណប់របស់ព្រះ » និងផ្តល់ឲ្យគាត់នូវ « សេចក្តីសង្ឃឹមថា កាលៈទេសៈនានាដែលគាបសង្កត់មនុស្សជាច្រើននោះអាចត្រូវបានយកឈ្នះ » ក្តី ក៏គាត់ « ពុំមែនគ្មានចំណេះដឹង » នោះដែរ ហើយគាត់ដឹងថា « ឧបសគ្គដ៏ធំមួយដែលរារាំងភាពជោគជ័យ និងសុភមង្គល [ របស់ស្រ្តី និងក្មេងស្រីទាំងនោះ ] គឺកង្វះការអប់រំ » ។
សន្និបាតដែលបានរៀបចំនៅទីក្រុង ឡូស អាន់ជើឡែសនេះ មានក្រុមវាគ្មិននិងអ្នកចូលរួមមកពីទូទាំងប្រទេស បានចែកចាយនូវសារលិខិតដែលផ្តោតលើការអប់រំចំពោះភាពអត់ធន់របស់ស្ត្រី និងការពិភាក្សាលើរបៀបផ្តល់អំណាចដល់ស្ត្រី និងក្មេងស្រីតាមរយៈការអភិវឌ្ឍភាពជាសហគ្រិន និងសេដ្ឋកិច្ច ។
ស៊ីស្ទើរ ប៊ីងហាំ បានមានប្រសាសន៍ថា « ការអប់រំលើកកម្ពស់ចក្ខុវិស័យរបស់មនុស្សម្នាក់ បើកឱកាសរបស់ពួកគេ និងពង្រឹងសមត្ថភាពរបស់ពួកគេដើម្បីក្លាយជាមនុស្សខ្លួនទីពឹងខ្លួន » ។ គាត់បានយោងទៅលើការសិក្សាមួយរបស់ Citi Global Perspectives & Solutions ដោយសហការជាមួយ Plan International ដែលឆ្លុះបញ្ចាំងនូវរបៀបដែលការអប់រំដល់ស្ត្រីអាចផ្តល់ដល់ក្រុមគ្រួសារ និងសហគមន៍របស់ពួកគេនូវសុវត្ថិភាពសេដ្ឋកិច្ចយូរអង្វែង ។
គាត់បានមានប្រសាសន៍ថា « ខ្ញុំស្គាល់កម្លាំងនៅក្នុងសហគមន៍មួយដែលដោះស្រាយដើម្បីការពារ ហើយបន្ទាប់មកផ្តល់អំណាចដល់ធនធានដ៏ងាយរងគ្រោះបំផុត និងមានតម្លៃបំផុត—នោះគឺមនុស្សជំនាន់ក្រោយ » ។
សុន្ទរកថារបស់ស៊ីស្ទើរ ប៊ីងហាំ ក៏បានលើកឡើងពីការខិតខំរបស់សាសនាចក្រដើម្បីជួយផ្តល់ការអប់រំបន្ថែមដល់ស្រ្តីទូទាំងពិភពលោក និងបាននិយាយផងដែរអំពី កម្មវិធី អក្ខរកម្មដំណឹងល្អ ( Gospel Literacy ) ជាគំនិតផ្តួចផ្តើមមួយដែលកំពុងជួយដល់ស្រ្តីនៅក្រុមប្រទេសអាហ្រ្វិកភាគខាងលិច ដើម្បីទទួលបាននូវជំនាញអក្ខរកម្មគ្រប់គ្រាន់ ដើម្បីជួយដល់កូនៗរបស់ពួកគេទាក់ទងនឹងកិច្ចការសាលា និងជួយដល់បងប្អូនស្រ្តីឲ្យមានការអប់រំគ្រប់គ្រាន់ ដើម្បីបម្រើជាគ្រូបង្រៀន ឬ ជាថ្នាក់ដឹកនាំនៅក្នុងក្រុមជំនុំក្នុងមូលដ្ឋានរបស់ពួកគេ ។
ថ្នាក់ដឹកនាំពួកបរិសុទ្ធថ្ងៃចុងក្រោយបានចែកចាយនូវបទពិសោធន៍របស់បងប្អូនស្រី្តដែលបានប្រើការអប់រំដើម្បីត្រួសត្រាយផ្លូវឆ្ពោះទៅរកភាពជោគជ័យ នេះរួមបញ្ចូលទាំង ម៉ាថា លូសឺនី កុងហ្គោលី ជាស្ត្រីម្នាក់មកពី អាហ្វ្រិកភាគខាងលិច ដែលបានឈប់រៀនតាំងពីមុនរៀនអាន ឬ សរសេរទៅទៀតពីព្រោះនាងគ្មានលទ្ធភាពបង់ថ្លៃសាលា ។
ស៊ីស្ទើរ ប៊ីងហាំ បានមានប្រសាសន៍ថា « ក្នុងនាមជាម្តាយវ័យក្មេងម្នាក់ នាងបានប្រឈមនឹងការពិតថានាងត្រូវតែរកប្រាក់ដើម្បីទិញអាហារសម្រាប់កូនៗរបស់នាង » ។ « តាមរយៈការចុះឈ្មោះក្នុងកម្មវិធីអក្ខរកម្មដំណឹងល្អ ( Gospel Literacy ) ម៉ាថាបានទទួលជំនាញ និងទំនុកចិត្តដើម្បីចាប់ផ្តើមអាជីវកម្មតូចមួយ » ។
ស៊ីស្ទើរ ប៊ីងហាំ បានមានប្រសាសន៍ថា ការទទួលបានការអប់រំថ្មីៗរបស់ កុងហ្គោលី បានផ្តល់ឲ្យគាត់នូវប្រាក់ចំណូលមួយដែលថេរ និងសមត្ថភាពដើម្បីក្លាយជាអ្នកប្រឹក្សាដល់ក្មេងស្រីវ័យជំទង់នៅក្នុងក្រុមជំនុំរបស់នាង ។
ស៊ីស្ទើរ ប៊ីងហាំ បានមានប្រសាសន៍ថា « ខ្ញុំពេញដោយអំណរគុណចំពោះតួនាទីដែលសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ និងមនុស្សដទៃជាច្រើនទៀតកំពុងតែដើរតួដើម្បីកែលម្អជីវិត និងបង្កើតឱកាសសម្រាប់បងប្អូនស្ត្រីជុំវិញពិភពលោក » ។ « ក្នុងនាមជាថ្នាក់ដឹកនាំ យើងគឺស្ថិតនៅលើជំហរមួយគត់ដើម្បីជះឥទ្ធិពលដល់អ្នកទាំងឡាយដែលបង្កើតគោលនយោបាយដែលនឹងបើកទ្វារការអប់រំសម្រាប់ស្ត្រី និងក្មេងស្រី ។ ខ្ញុំសូមអញ្ជើញដល់យើងម្នាក់ៗឲ្យទាញយកគុណប្រយោជន៍ដែលយើងរីករាយក្នុងការបង្កើតនូវឱកាសច្រើនថែមទៀតសម្រាប់បងប្អូនស្ត្រីរបស់យើងនៅជុំវិញពិភពលោក » ។
ប្រធានសមាគមសង្គ្រោះទូទៅ ជីន ប៊ី ប៊ីងហាំ អញ្ជើញចូលរួមការប្រជុំប្រចាំឆ្នាំលើកទីប្រាំស្តីពីស្រ្តីក្នុងកិច្ចការទូតអន្តរជាតិ សន្និបាតនេះបានប្រារព្ធឡើងនៅថ្ងៃចន្ទ ទី៨ ខែមីនា ឆ្នាំ២០២១ ។ ព្រឹត្តិការណ៍តាមប្រព័ន្ធអនឡាញនេះត្រូវបានធ្វើឡើងនៅទិវាសិទ្ធិនារីអន្តរជាតិ ។
ស៊ីស្ទើរ ជីន ប៊ី ប៊ីងហាំ ប្រធានសមាគមសង្គ្រោះទូទៅ សិក្សាឯកសារកម្មវិធី អក្ខរកម្មដំណឹងល្អ ( Gospel Literacy ) ជាមួយនឹងស្រ្តីមួយក្រុមនៅប្រទេស សៀរ៉ា លូយ៉ូន នាខែមិថុនា ឆ្នាំ២០១៩ ដោយ
ម៉ាថា រស់នៅប្រទេស សៀរ៉ា លូយ៉ូន តាំងបង្ហាញសៀវភៅ អក្ខរកម្មដំណឹងល្អ ( Gospel Literacy ) ឆ្នាំ២០១៩