សន្និសីទទូទៅនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺជាព្រឹត្តិការណ៍ពាក់កណ្ដាលឆ្នាំ ដែលព្យាការី សាវក និងថ្នាក់ដឹកនាំផ្សេងទៀតក្នុងសាសនាចក្រចែកចាយសារលិខិតដែលផ្ដោតលើព្រះគ្រីស្ទ ស្ដីពីសេចក្ដីស្រឡាញ់ និងសេចក្ដីសង្ឃឹម ។ សន្និសីទលើកទី ១៩១ ដែលប្រព្រឹត្តទៅនៅថ្ងៃទី ៤-៥ ខែមេសា ឆ្នាំ២០២១ គឺមានតែឌីជីថលប៉ុណ្ណោះ ហើយត្រូវបានចាក់ផ្សាយចេញពីវិសាលដ្ឋានព្រះវិហារបរិសុទ្ធក្នុងទីក្រុងសលត៍ លេក ។ ទំព័រនេះរំលេចនូវការបង្រៀនក្នុងសន្និសីទនេះ ។
សម័យប្រជុំព្រឹកថ្ងៃអាទិត្យ
ដើម្បីទស្សនាសម័យប្រជុំថ្ងៃសៅរ៍ និងថ្ងៃអាទិត្យទាំងស្រុង សូមចុច នៅត្រង់នេះ ។
សម័យប្រជុំព្រឹកថ្ងៃអាទិត្យ
សម័យប្រជុំព្រឹកថ្ងៃអាទិត្យគឺមានលក្ខណៈអន្តរជាតិយ៉ាងខ្លាំង ដោយឆ្លុះបញ្ចាំងពីសាសនាចក្រទូទាំងសាកលលោក ។ អ្នកឡើងនិយាយម្នាក់ៗមកពីប្រទេសផ្សេងគ្នា — ហើយតន្ត្រីដែលបានថតទុកមុនត្រូវបានសម្តែងដោយក្រុមចម្រៀងមកពីក្រុមផ្សេងគ្នាជុំវិញពិភពលោក ច្រៀងជាភាសាកំណើតរបស់ពួកគេ ។
ប្រធាន រ័សុល អិម ណិលសុន បានមានប្រសាសន៍ក្នុងការបម្រូលផ្តុំនៅថ្ងៃឈប់សម្រាកនៃសន្និសីទទូទៅពាក់កណ្ដាលឆ្នាំលើកទី ១៩១ និងបានអញ្ជើញសមាជិកគ្រប់គ្នាឲ្យបង្កើនសេចក្តីជំនឿ ។ « តាមរយៈសេចក្ដីជំនឿរបស់បងប្អូន នោះព្រះយេស៊ូវគ្រីស្ទនឹងបង្កើនសមត្ថភាពរបស់បងប្អូនឲ្យរើភ្នំក្នុងជីវិតរបស់បងប្អូនបាន ទោះជាឧបសគ្គផ្ទាល់ខ្លួនរបស់បងប្អូនអាចធំប៉ុនភ្នំអេវើរ៉េសក្ដី » ។
អែលឌើរ អូលីសេស សូរ៉េស នៃកូរ៉ុមនៃពួកសាវកដប់ពីរនាក់ ដែលមានដើមកំណើតនៅប្រទេសប្រេស៊ីល បានមានប្រសាសន៍ថា ព្រះអង្គសង្គ្រោះគឺជាអង្គមើលថែនៃព្រលឹងរបស់យើងទាំងអស់គ្នា ហើយព្រះហស្ដទ្រង់លាតសន្ធឹងចំពោះអ្នកទាំងអស់ណាដែលស្វែងរកទ្រង់ ។ លោកបានមានប្រសាសន៍ថាតាមរយៈព្រះគ្រីស្ទ នោះពួកអ្នកដើរតាមទ្រង់អាចបានដកពិសោធន៍នូវ « ការផ្លាស់ប្ដូរគំនិត និងដួងចិត្តដ៏ធំ »- ជាការនាំមកនូវឥរិយាបថស្រស់ស្រាយចំពោះព្រះ និងជីវិត ។ មានដើមកំណើតនៅប្រទេសនូវែលសេឡង់ អែលឌើរ អេស ម៉ាក ផលម័រ ជាពួកចិតសិបនាក់ដែលមានសិទ្ធិអំណាចទូទៅ បានមានប្រសាសន៍ថា ចំណេះដឹងពីដំណើររស់ឡើងវិញរបស់ព្រះគ្រីស្ទផ្តល់អត្ថន័យ និងគោលបំណងដល់ជីវិត ។ « ខ្ញុំសូមអញ្ជើញអស់អ្នកដែលសោកសៅ អស់អ្នកដែលតស៊ូពុះពារនឹងការសង្ស័យ អស់អ្នកដែលងឿងឆ្ងល់ពីអ្វីដែលកើតឡើងបន្ទាប់ពីសេចក្តីស្លាប់ សូមឲ្យដាក់សេចក្តីជំនឿលើព្រះគ្រីស្ទ » ។ ស៊ីស្ទើរ រ៉េណា អ៊ី អាប៊ើតូជាជនជាតិ នីការ៉ាហ្គ័រ និងជាទីប្រឹក្សាទីពីរនៅក្នុងគណៈប្រធានសមាគមសង្គ្រោះទូទៅបានបង្រៀនថា តាមរយៈដង្វាយធួនដ៏ប្រោសលោះ និងការមានព្រះជន្មរស់ឡើងវិញដ៏រុងរឿងរបស់ព្រះគ្រីស្ទ នោះ « ដួងចិត្តសង្រេងអាចព្យាបាល ភាពតានតឹងអាចប្រែជាសុខសាន្ត និងក្តីអស់សង្ឃឹមអាចប្រែជាមានសង្ឃឹម » ។
អែលឌើរ អែតវើត ឌូប៊ី មានដើមកំណើតនៅប្រទេសហ្សីមបាវេ និងជាពួកចិតសិបនាក់ដែលមានសិទ្ធិអំណាចទូទៅ បានបង្រៀនថា មនុស្សម្នាក់ៗអាចប្រឈមនឹងឧបសគ្គទាំងឡាយនៃជីវិតរមែងស្លាប់បានតាមរយៈការឆ្ពោះទៅមុខជាមួយសេចក្តីជំនឿទៅលើព្រះវបិតាសួគ៌ និងព្រះរាជបុត្រារបស់ទ្រង់ ។ លោកបានអញ្ជើញមនុស្សគ្រប់រូប « កុំបោះបង់ឡើយ » ។ អែលឌើរ ហូសេ អេ តិក្សេរ៉ា ក្នុងគណៈប្រធាននៃពួកចិតសិបនាក់ មានដើមកំណើតនៅប្រទេសព័រទុយហ្កាល់ បានគូសបញ្ជាក់ថា ការដឹងថាយើងគឺជាបុត្រាបុត្រីនៃព្រះគឺជាជំហានដំបូងដើម្បីត្រឡប់ទៅកាន់គេហដ្ឋានសួគ៌របស់យើងវិញ ។ ព្រះយេស៊ូវគ្រីស្ទ ប្រទាននូវការការពារ ហើយទ្រង់នាំអ្នកដើរតាមទ្រង់ « ទៅកាន់ជីវិតពេញដោយអំណរ » ។ អែលឌើរថានែលឡា ប៊ី វ៉ាកូឡូ ដែលមានដើមកំណើតនៅប្រទេស ហ្វីជី ថានែលឡា ប៊ី វ៉ាកូឡូ ជាពួកចិតសិបនាក់ដែលមានសិទ្ធិអំណាចទូទៅបានថ្លែងទីបន្ទាល់ថា « ទំនាក់ទំនងដ៏មានតម្លៃបំផុតរបស់យើងគឺនៅជាមួយព្រះវរបិតា និងព្រះរាជបុត្រា ព្រមទាំងក្រុមគ្រួសាររបស់យើងផ្ទាល់ ពីព្រោះចំណងនោះគឺអស់កល្បជានិច្ច » ។ លោកបានបង្រៀនថា ព្រះវរបិតាសួគ៌ បង្ហាញសេចក្តីស្រឡាញ់របស់ទ្រង់ចំពោះបុត្រាបុត្រីរបស់ទ្រង់ តាមការប្រទានទំនាក់ទំនងដ៏អស់កល្បជានិច្ច ដោយការហៅពួកព្យាការី និងការវាយប្រដៅនៅពេលចាំបាច់ ។ អែលឌើរ ឈី ហុង ( សេម ) វុង ជាពួកចិតសិបនាក់មានសិទ្ធិអំណាចទូទៅកើតនៅហុងកុង បានរំឮកយើងថា « យើងប្រហែលជាពុំអាចផ្លាស់ប្តូរអ្វីទាំងអស់ដែលនឹងកើតឡើងបានឡើយ ប៉ុន្តែយើងអាចជ្រើសរើសរបៀបដែលយើងរៀបចំខ្លួនសម្រាប់អ្វីដែលនឹងកើតឡើងនោះ » ។ អែលឌើរ ម៉ៃឃល ចន យូ ថេ ដែលមានដើមកំណើតនៅប្រទេសហ្វីលីពីន ជាពួកចិតសិបនាក់មានសិទ្ធិអំណាចទូទៅ បានថ្លែងទីបន្ទាល់ថា ការស្គាល់ព្រះអង្គសង្គ្រោះគឺជាការស្វែងរកដ៏សំខាន់បំផុតនៃជីវិតរបស់យើង ហើយវាខុសពីការដឹងពី ព្រះអង្គសង្គ្រោះ ។
ប្រធាន រ័សុល អិម ណិលសុន បានប្រកាសសាងសង់ព្រះវិហារបរិសុទ្ធថ្មីចំនួន ២០ ទៀតនៅជុំវិញពិភពលោក ។ « យើងសាងសង់ឥឡូវនេះដើម្បីអានាគត » ។ ទីតាំងនៃព្រះវិហារបរិសុទ្ធទាំងនេះគឺ ៖ អូលឡូ, ន័រវេស, ព្រុចសែល បែលហ្ស៊ិក, វីយែន អូទ្រីស, ហ្កាណា, ប៊ីរ៉ា ម៉ូហ្សំប៊ិក, ខេបថោន អាហ្វ្រិកខាងត្បូង, សិង្ហបុរី, សាធារណរដ្ឋសិង្ហបុរី, ប៊ីឡូ ហ្សូរីហ្សូនី, ប្រេស៊ីល, កាលី កូឡុំប៊ី, ឃឺរេតារ៉ូ, ម៉ិកស៊ីកូ, តូរេន ម៉ិកស៊ិក, ហេលេណា ម៉ុនតាណា, ហ្គាស្ពើរ, វ៉ាយអូមីង, ហ្រ្គេន ចាំងសិន, ខូឡូរ៉ាដូ; ហ្វាមីងតុន, ម៉ិកស៊ីកូថ្មី, ប៊ូលី, អៃដាហូ, អេកហ្គេន, អូរីហ្គុន, អេលកូ, នេវ៉ាដា; ចូបា លីនដា, លីហ្វ័រញ៉ា និង ស្ម៊ីធហ្វីល រដ្ឋយូថាហ៍ ។ បច្ចុប្បន្ននេះ មានព្រះវិហារបរិសុទ្ធចំនួន ៤១ កន្លែងកំពុងសាងសង់ ឬ ជួសជុល និងព្រះវិហារបរិសុទ្ធថ្មីចំនួន ២១ បានធ្វើពិធីសម្ភោធបើកការដ្ឋានសាងសង់កាលពីឆ្នាំមុន ។
ប្រធាន ដាល្លិន អេក អូក នៃគណៈប្រធានទីមួយនៅក្នុងសុន្ទរកថារបស់លោកបានថ្លែងពីរដ្ឋធម្មនុញ្ញរបស់សហរដ្ឋអាមេរិកដែលបានបំផុសគំនិតដោយទេវភាព ហើយបានលើកទឹកចិត្តសមាជិកឲ្យប្រកាន់ខ្ជាប់ និងការពារគោលការណ៍ទាំងឡាយនៅក្នុងនោះ ។ អែលឌើរ រ៉ូណល អេ រ៉ាសបានបានបង្រៀនថា « ព្រះអម្ចាស់ធ្វើនូវអព្ភូតហេតុដើម្បីរំឭកយើងពីព្រះចេស្តាទ្រង់ សេចក្តីស្រឡាញ់របស់ទ្រង់ចំពោះយើង ឥទ្ធិពលទ្រង់ពីស្ថានសួគ៌មកកាន់បទពិសោធន៍ជីវិតរមែងស្លាប់របស់យើង និងព្រះទ័យរបស់ទ្រង់ដើម្បីបង្រៀនអំពីអ្វីដែលមានតម្លៃបំផុត » ។ ពួកចិតសិបនាក់ដែលមានសិទ្ធិអំណាចទូទៅអែលឌើរ ធីម៉ូថេ ជេ ឌូឆេស បានថ្លែងទីបន្ទាល់ថា ពន្លឺខាងវិញ្ញាណរបស់ព្រះអង្គសង្គ្រោះគឺសំខាន់ស្មើគ្នានឹងពន្លឺព្រះអាទិត្យសម្រាប់ជីវិតទាំងអស់នៅលើផែនដី ។ ពន្លឺនៃព្រះគ្រីស្ទ ដែលជាញឹកញាប់ត្រូវបានហៅថា សតិសម្បជញ្ញៈ ដឹកនាំទៅការទទួលនូវព្រះចេស្ដានៃព្រះវិញ្ញាណបរិសុទ្ធ ដែលជាប្រភពដ៏ភ្លឺបំផុតនៃពន្លឺមកពីព្រះវបិតាសួគ៌នៅក្នុងជីវិតរមែងស្លាប់ ។
អែលឌើរ ឌី ថត គ្រីស្តូហ្វឺសិនបានបង្រៀនថា « ការធ្វើតាមគោលការណ៍ និងបទបញ្ញត្តិទាំងឡាយនៃដំណឹងល្អរបស់ព្រះយេស៊ូវគ្រីស្ទជារៀងរាល់ថ្ងៃ គឺជាដំណើរដ៏មានសុភមង្គល និងស្កប់ស្កល់បំផុតនៅក្នុងជីវិត » ។ អែលឌើរអាឡាន់ អ័រ. វលឃឺរ ពួកចិតសិបនាក់ដែលមានសិទ្ធិអំណាចទូទៅកំពុងបម្រើនៅប្រទេស ហ្គាតេម៉ាឡា បានមានប្រសាសន៍ក្នុងសារលិខិតដែលបានថតទុកថា « កាលយើងជួបជុំគ្នានៅទាំងសងខាងវាំងនន កាលយើងធ្វើការលះបង់ដើម្បីបម្រើ និងធ្វើឲ្យព្រះវិហារបរិសុទ្ធជាផ្នែកដ៏សំខាន់ក្នុងជីវិតរបស់យើង នោះព្រះអម្ចាស់កំពុងស្ថាបនាយើងពិតមែន—ទ្រង់កំពុងស្ថាបនារាស្ត្រនៃសេចក្ដីសញ្ញារបស់ទ្រង់ » ។ អែលឌើរ ដាវីឌ អេ បែដណា បានអញ្ជើញពួកបរិសុទ្ធថ្ងៃចុងក្រោយឲ្យ « រៀនសូត្រ រស់នៅតាម និងស្រឡាញ់គោលការណ៍នៃសុចរិតភាព » ។ លោកបានថ្លែងទីបន្ទាល់ថា « មានតែសេចក្ដីពិតនៃដំណឹងល្អប៉ុណ្ណោះដែលអាចធ្វើឲ្យយើង ‹ ប្រព្រឹត្តការណ៍ទាំងនេះដែលនៅក្នុងអំណាចយើង ដោយមានចិត្តរីករាយ › ដើម្បីឆ្ពោះទៅមុខលើផ្លូវនៃសេចក្តីសញ្ញា និងដើម្បី ‹ បានឃើញសេចក្ដីសង្គ្រោះពីព្រះ និងបានព្រះពាហុទ្រង់បើកសម្ដែងមកឲ្យឃើញ › » ។
ដើម្បីទស្សនាសម័យប្រជុំថ្ងៃសៅរ៍ និងថ្ងៃអាទិត្យទាំងស្រុង សូមចុច នៅត្រង់នេះ ។