សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺជាគ្រួសារនៃពួកអ្នកជឿជាសាកល និងជាគ្រួសារផ្សេងៗគ្នាដែលបានរួបរួមគ្នានៅលើសេចក្ដីជំនឿលើព្រះយេស៊ូវគ្រីស្ទ ។ ក្នុងប៉ុន្មានទសវត្សថ្មីៗនេះ ចរិកលក្ខណៈនៃសមាជិករបស់សាសនាចក្របានផ្លាស់ប្តូរទៅរកចំណុចថា ឥឡូវនេះសមាជិកដែលនៅលីវមានច្រើនជាងពាក់កណ្តាលនៃសមាជិកភាពពេញវ័យ ។
នៅពេលគ្រួសារជាសាកលនេះបានប្រមូលផ្ដុំគ្នាតាមអ៊ីនធឺណិតចូលរួមសន្និសីទទូទៅខែមេសា ឆ្នាំ២០២១ មានពួកសាវកមួយចំនួនបានថ្លែងអំពីសេចក្ដីត្រូវការដើម្បីគាំទ្រ ការរាប់បញ្ចូល និងការចូលរួមរបស់សមាជិកសាសនាចក្រដែលនៅលីវ ។
ប្រធាន អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានថ្លែងថា លោក និងថ្នាក់ដឹកនាំផ្សេងទៀតបានប្រឹក្សាជាមួយគ្នាប្រកបដោយការអធិស្ឋានអំពីសារៈសំខាន់នៃ « សេចក្ដីសង្ឃឹមនៅក្នុងព្រះគ្រីស្ទ » ដើម្បីយល់ដឹងកាន់តែប្រសើរ « ពីរបៀបដើម្បីជួយមនុស្សទាំងអស់ ដែលមានអារម្មណ៍ឯកោ ឬមានអារម្មណ៍ថាពួកគេមិនចុះចំណោម ។ យើងចង់ជួយមនុស្សទាំងអស់ដែលមានអារម្មណ៍បែបនេះ » ។
ប្រធានបាឡឺដបានថ្លែងពីកង្វល់ជាពិសេសចំពោះមនុស្សដែលបច្ចុប្បន្ននេះនៅលីវ ។ សាសនាចក្រកំពុងស្វែងរកវិធីល្អប្រសើរជាងមុនដើម្បីជួយ និងគាំទ្រដល់សមាជិកដែលមិនធ្លាប់រៀបការ ឬដែលបានលែងលះ ឬស្ត្រីមេម៉ាយ ។ លោកបានថ្លែងថា « សាសនាចក្រនេះចង់បានបងប្អូន និងត្រូវការបងប្អូន ។ មែនហើយ យើងត្រូវការបងប្អូន ! យើងត្រូវការសំឡេង ទេពកោសល្យ ជំនាញ សេចក្ដីល្អ និងភាពសុចរិតរបស់បងប្អូន » ។
ដើម្បីធ្វើឲ្យសំឡេង ជំនាញ និងទេពកោសល្យរបស់សមាជិកដែលនៅលីវមានការចូលរួមកាន់តែច្រើន ថ្មីៗនេះសាសនាចក្របានពង្រីកការហៅ និងការចាត់តាំងជាច្រើនមួយចំនួនទៀតដែលពួកគេអាចចូលរួមបាន ។
អែលឌើរ ឃ្វីនថិន អិល ឃុក បានថ្លែងនៅពេលការផ្លាស់ប្ដូរត្រូវបានប្រកាសថា « យើងចង់ឲ្យបងប្អូនដឹងថាមានមនុស្សស្រឡាញ់បងប្អូន — ហើយបងប្អូនចាំបាច់យ៉ាងខ្លាំងចំពោះការស្ថាបនានគរព្រះ ។ ចំពោះហេតុផលនេះ យើងបានទទួលអារម្មណ៍ឲ្យធ្វើការស្រាវជ្រាវរកគោលនយោបាយ និងការយល់ច្រឡំដោយប្រុងប្រយ័ត្ន ដែលវាអាចដាក់កំហិតដល់ការបម្រើរបស់សមាជិកនៅលីវក្នុងសាសនាចក្រ ។ អ្វីដែលយើងបានរកឃើញគឺថា គោលនយោបាយសាសនាចក្រអនុញ្ញាតឲ្យមានការបម្រើយ៉ាងទូលំទូលាយរួចហើយចំពោះពួកមជ្ឈិមវ័យនៅលីវ — ហើយវាអាចមានភាពធំទូលំទូលាយជាងនេះទៀត ។ … យើងសង្ឃឹមថា ថ្នាក់ដឹកនាំរបស់បងប្អូនដឹងពីរបៀបសុំឲ្យបងប្អូនធ្វើការ — រួមមានជាទីប្រឹក្សានៅក្នុងគណៈប៊ីស្សព ក្នុងក្រុមប្រឹក្សាជាន់ខ្ពស់ និងជាប្រធាន និងទីប្រឹក្សារបស់អង្គការ » ។
ថ្មីៗនេះ សាសនាចក្របានបង្កើតក្រាហ្វិចព័ត៌មានមួយដើម្បីជួយថ្នាក់ដឹកនាំ នៅពេលពួកគាត់ស្ដាប់ ហើយស្វែងរកការយល់ដឹងពីបទពិសោធន៍របស់សមាជិកដែលនៅលីវ ។ ក្រាហ្វិចខាងក្រោមពិពណ៌នាពីអ្វីដែលសមាជិកទាំងនេះបានថ្លែងអំពីអ្វីដែលពួកគេត្រូវការ ហេតុអ្វីពួកគេជួបបញ្ហា កន្លែងដែលពួកគេរកឃើញកម្លាំងខាងវិញ្ញាណ និងរបៀបដែលថ្នាក់ដឹកនាំអាចជួយពួកគេបាន ។ ឧទាហរណ៍ ការប្រាស្រ័យទាក់ទងនឹងព្រះ ការមានការគាំទ្រផ្នែកសង្គម និងការចូលរួមក្នុងបទពិសោធន៍ដែលពាក់ព័ន្ធគឺសំខាន់បំផុតសម្រាប់ពួកគេ ។
អែលឌើរ ហ្គើរីត ដបុលយូ ហ្គង បានគូសបញ្ជាក់ថា គោលជំហររបស់បុគ្គលម្នាក់ « ការឈរចំពោះព្រះភ័ក្រ្តព្រះអម្ចាស់ និងក្នុងសាសនាចក្ររបស់ទ្រង់ មិនទាក់ទងនឹងស្ថានភាពអាពាហ៍ពិពាហ៍របស់យើងនោះទេ ប៉ុន្តែគឺជាការក្លាយមកជាសិស្សដ៏ក្លាហាន និងស្មោះត្រង់របស់ព្រះយេស៊ូវគ្រីស្ទទេតើ ។ មជ្ឈិមវ័យចង់ឲ្យគេឃើញថាខ្លួនជាមជ្ឈិមវ័យ ហើយមានការទទួលខុសត្រូវ និងការចូលរួមក្នុងនាមជាមជ្ឈិមវ័យ » ។
ប្រធានបាឡឺដ បានអះអាងថា ការសន្យារបស់ព្រះចំពោះភាពតម្កើងឡើង រួមមាននូវពរជ័យនៃអាពាហ៍ពិពាហ៍ និងការរស់នៅជាក្រុមគ្រួសារសម្រាប់ភាពអស់កល្បជានិច្ច គឺមានសម្រាប់មនុស្សគ្រប់គ្នាដែលស្មោះត្រង់ចំពោះសេចក្ដីសញ្ញារបស់ពួកគេនៅក្នុងដំណឹងល្អ ។ ទោះជាពេលវេលានៃការស្គាល់ពរជ័យទាំងនេះមិនបានដឹងច្បាស់ក្ដី ក៏លោកបានកត់ចំណាំថា « ទំនុកចិត្តរបស់យើងលើការធានាអះអាងទាំងនេះមានឫសគល់ពីសេចក្ដីជំនឿរបស់យើងលើព្រះយេស៊ូវគ្រីស្ទ ដែលតាមរយៈព្រះគុណទ្រង់ នោះគ្រប់ការណ៍ទាំងអស់ទាក់ទងនឹងជីវិតរមែងស្លាប់ នឹងត្រូវបានដាក់ឲ្យត្រឹមត្រូវ » ។
ប្រធាន បាឡឺដ បានថ្លែងបន្ថែមទៀតថា សមាជិកដែលនៅលីវត្រូវការដកពិសោធន៍នូវអំណរនៃការរីកចម្រើនឲ្យបានច្រើនដូចជាពួកបរិសុទ្ធថ្ងៃចុងក្រោយផ្សេងទៀតដែរ ។ ប្រធានបាឡឺដបានថ្លែងពីខ្លួនលោកដែលជាបុរសពោះម៉ាយម្នាក់ថា « ការរង់ចាំព្រះអម្ចាស់មានន័យថា ការបន្ដគោរពប្រតិបត្តិ និងរីកចម្រើនខាងវិញ្ញាណ » ។
ប្រធានបាឡឺដ ក៏ព្រមានអំពីស្លាកដែលយើងដាក់ឲ្យខ្លួនឯង និងមនុស្សដទៃ ។ លោកបានថ្លែងថា គ្មានការគូសចំណាំណាមួយសំខាន់ជាងការធ្វើជាសិស្សរបស់ព្រះគ្រីស្ទ និងជាសមាជិកនៃសាសនាចក្រទ្រង់ឡើយ ។
លោកបានថ្លែងថា « អស់រយៈពេលជាច្រើនឆ្នាំ យើងបាននិយាយអំពី « យុវមជ្ឈិមវ័យនៅលីវ » « មជ្ឈិមវ័យនៅលីវ » និង « មជ្ឈិមវ័យ » ។ « ការជ្រើសរើសជាមុនទាំងនោះអាចមានប្រយោជន៍ខាងរដ្ឋបាលខ្លះដែរ ប៉ុន្ដែអាចផ្លាស់ប្ដូរដោយចៃដន្យលើរបៀបដែលយើងយល់ឃើញពីមនុស្សដទៃ ។ តើមានវិធីណាមួយដើម្បីចៀសវាងទំនោររបស់មនុស្សដែលអាចបំបែកយើងពីគ្នាដែរឬទេ ? ប្រធាន [ សាសនាចក្រ ] ប្រធាន [ រ័សុល អិម ] ណិលសុន បានស្នើសុំឲ្យយើងហៅខ្លួនឯងថាជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ពាក្យនោះសំដៅលើយើងគ្រប់រូប មែនទេ ?
បន្ថែមទៅលើការបង្ហាញថា យើងគឺជាគ្រួសារនៃក្រុមអ្នកមានជំនឿ ដូចបទគម្ពីរបង្រៀនថា សាសនាចក្រក៏ជារូបកាយផងដែរ ។ ដូចជារូបកាយមានផ្នែកជាច្រើនដែលផ្នែកនីមួយៗមានគោលបំណងដ៏វិសេស ដូច្នេះសាសនាចក្រមានមនុស្សច្រើនប្រភេទ ។ ផ្នែកនីមួយៗត្រូវបានប្រទានឲ្យនូវអំណោយទានដែលផ្ដល់ពរជ័យដល់រូបកាយទាំងមូល ។ ជាពិសេស ដូចដែលសាវកប៉ុលបានថ្លែងនៅក្នុងព្រះគម្ពីរប៊ីបថា បើផ្នែកមួយនៃរូបកាយមានការឈឺចាប់ នោះ « សមាជិកទាំងអស់នឹងឈឺជាមួយគ្នា » ដែរ ។ ហើយបើផ្នែកមួយទៀតនៃរូបកាយត្រូវបានតម្កើងឡើង « នោះសមាជិកទាំងអស់នឹងបានរីករាយជាមួយដែរ » ។
មិនថាធ្លាប់រៀបការ ឬនៅលីវ មេម៉ាយ ឬបានលែងលះគ្នា មនុស្សទាំងអស់នៅក្នុងសាសនាចក្រដែលជាចំណែករបស់ព្រះគ្រីស្ទ ។
ធនធានបន្ថែម