គណៈប្រធានទីមួយនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានប្រកាសអំពីការផ្លាស់ប្តូរចំពោះសន្និសីទទូទៅរបស់សាសនាចក្រនាពេលខាងមុខ ដែលត្រូវបានធ្វើឡើងរៀងរាល់ខែមេសា និងតុលា ។
ចាប់ពីសន្និសីទទូទៅខែតុលានេះតទៅ សម័យប្រជុំល្ងាចថ្ងៃសៅរ៍នឹងពុំមានទៀតឡើយ ។ កាលពីមុនសម័យប្រជុំល្ងាចថ្ងៃសៅរ៍ត្រូវបានធ្វើឡើងសម្រាប់ស្រ្តី ( នៅខែតុលា ) និងអ្នកកាន់បព្វជិតភាព ( នៅខែមេសា ) ។ ការផ្លាស់ប្តូរនេះត្រូវបានធ្វើឡើងដោយសារតែឥឡូវនេះសម័យប្រជុំទាំងអស់នៃសន្និសីទទូទៅគឺមានសម្រាប់ឲ្យមនុស្សគ្រប់គ្នាដែលចង់មើល ឬស្តាប់ ។
សម្រាប់ សន្និសីទទូទៅខែតុលា ឆ្នាំ២០២១ ( ដែលនឹងត្រូវប្រារព្ធឡើងនៅថ្ងៃទី២–៣ ខែតុលា ) ដំណើរការសន្និសីទនឹងប្រព្រឹត្តទៅក្នុងសាលប្រជុំនៃមជ្ឈមណ្ឌលសន្និសីទនៅទីក្រុងសលត៍ លេក ។ ជាថ្មីម្តងទៀត មជ្ឈមណ្ឌលសន្និសីទនឹងត្រូវបានបិទជាសាធារណៈ ។
សន្និសីទទូទៅគឺជាឱកាសមួយសម្រាប់សមាជិកសាសនាចក្រ និងមិត្តភក្តិនៅទូទាំងសកលលោក ដើម្បីទទួលសារលិខិតអំពីព្រះអង្គសង្គ្រោះ ព្រះយេស៊ូវគ្រីស្ទ មកពីពួកព្យាការី និងពួកសាវកដែលនៅរស់ តាមរយៈបច្ចេកវិទ្យាដ៏ធំទូលាយ ។