ប្រធាន រ័សុល អិម ណិលសុន បានអញ្ជើញដល់អ្នកចូលរួមទាំងឡាយក្នុង សន្និសីទទូទៅ ទូទាំងពិភពលោករបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយឲ្យមកស្តាប់រក « សេចក្តីពិតដ៏បរិសុទ្ធ គោលលទ្ធិដ៏បរិសុទ្ធនៃព្រះគ្រីស្ទ និង វិវរណៈដ៏បរិសុទ្ធ » ផ្ដល់កម្លាំងដល់គ្រឹះខាងវិញ្ញាណរបស់ពួកគេ និង មានពេលវេលាសម្រាប់ព្រះអម្ចាស់ ។
សារលិខិតដែលបានផ្តោតទៅលើព្រះយេស៊ូវគ្រីស្ទដោយប្រធាន ណិលសុន ពួកអ្នកមានសិទ្ធអំណាចទូទៅ និងពួកអ្នកកាន់តំណែងទូទៅ ត្រូវបានថ្លែងនៅថ្ងៃទី ២–៣ ចេញពីមជ្ឈមណ្ឌលសន្និសីទដែលស្ទើរគ្មានមនុស្សសោះដោយសារតែជំងឺកូវីដ-១៩ នៅទីក្រុង សលត៍ លេក រដ្ឋ យូថាហ៍ ហើយចាក់ផ្សាយទៅកាន់មនុស្សរាប់លាននាក់នៅជុំវិញពិភពលោក ។
សូមស្វែងរក សេចក្តីពិតដ៏បរិសុទ្ធ គោលលទ្ធិដ៏បរិសុទ្ធ និង វិវរណៈដ៏បរិសុទ្ធ
ដោយការបញ្ជាក់ន័យ « សេចក្តីពិតដាច់ខាត—សេចក្តីពិតដ៏អស់កល្បជានិច្ច » គឺមានពិតមែន នោះប្រធាន ណិលសុន ដែលសមាជិកនៃសេចក្តីជំនឿបានគោរពជា ព្យាការី បានបញ្ជាក់ដល់អ្នកស្តាប់ទាំងឡាយនៅអំឡុងការបើកសម័យប្រជុំថា « អ្វីដែលបងប្អូននឹងស្តាប់នៅថ្ងៃនេះ និងថ្ងៃស្អែក គឺជាសេចក្តីពិតដ៏បរិសុទ្ធ » ។
លោកក៏បានមានប្រសាសន៍ពីអានុភាពនៃ « គោលលទ្ធិនៃព្រះគ្រីស្ទដ៏បរិសុទ្ធ » ដើម្បីផ្លាស់ប្តូរជីវិត និងជួយមនុស្សឲ្យនៅលើផ្លូវនៃសេចក្តីសុចរិតផងដែរ ។ លោកបានមានប្រសាសន៍ថា « មិនដែលមានពេលណានៅក្នុងប្រវត្តិសាស្រ្តនៃពិភពលោកនេះ ដែលចំណេះដឹងពីព្រះអង្គសង្រ្គោះរបស់យើងមានសារៈសំខាន់ផ្ទាល់ខ្លួន និងទាក់ទង នឹងព្រលឹងមនុស្សគ្រប់គ្នានោះទេ » ។
លោកបានមានប្រសាសន៍ថា សូមស្វែងរកព្រះវិញ្ញាណបរិសុទ្ធដើម្បីជួយបងប្អូន « ស្តាប់អ្វីដែលព្រះអម្ចាស់ចង់ឲ្យបងប្អូនស្តាប់ » ដោយថ្លែងថា « វិវរណៈដ៏បរិសុទ្ធ » នឹងជួយឆ្លើយសំណួរនៅក្នុងដួងចិត្តរបស់អ្នកស្តាប់នៅពេលពួកគេទទួលយកសារលិខិតពីព្រះអម្ចាស់តាមរយៈពួកអ្នកបម្រើរបស់ទ្រង់ ។
ផ្ដល់កម្លាំងដល់គ្រឹះខាងវិញ្ញាណរបស់បងប្អូន
ដោយប្រើ ឧទាហរណ៍នៃការបន្តកែលម្អ ចំពោះព្រះវិហារបរិសុទ្ធ សលត៍ លេក ដែលរួមមានទាំងការពង្រឹងគ្រឹះដើមរបស់វា ប្រធាន ណិលសុន បានបញ្ជាក់នៅព្រឹកថ្ងៃអាទិត្យ ពីតម្រូវការដើម្បីមានគ្រឹះរឹងមាំ « ខាងវិញ្ញាណផ្ទាល់ខ្លួន » នៅអំឡុង « ការលំបាកសម័យថ្មី » ទាំងនេះ ។
លោកបានមានប្រសាសន៍ថា « ប្រសិនបើបងប្អូន និងខ្ញុំត្រូវយកឈ្នះលើគ្រោះថ្នាក់ និងសម្ពាធនានាក្នុងពេលខាងមុខ នោះវាចាំបាច់ណាស់ដែលយើងម្នាក់ៗត្រូវមានគ្រឹះដ៏ រឹងមាំ ខាងវិញ្ញាណ សង់នៅលើគ្រឹះនៃព្រះអង្គសង្រ្គោះ ជាព្រះយេស៊ូវគ្រីស្ទរបស់យើង » ។
ចំណុចសំខាន់នៃ « ការពង្រឹងសេចក្តីជំនឿ និងភាពរឹងមាំខាងវិញ្ញាណរបស់យើង » គឺ ព្រះវិហារបរិសុទ្ធ ដែលបង្កើនការយល់ដឹងអំពីព្រះយេស៊ូវគ្រីស្ទ ចងភ្ជាប់យើងទៅនឹងទ្រង់តាមរយៈ សេចក្តីសញ្ញា ដ៏ពិសិដ្ឋនៃបព្វជិតភាព និងប្រទានដល់យើងនូវព្រះចេស្តានៃការព្យាបាល និងពង្រឹងរបស់ទ្រង់ ។ ប្រធាន ណិលសុន បានមានប្រសាសន៍ថា « ឱ ហើយយើងនឹងត្រូវការព្រះចេស្តារបស់ទ្រង់សម្រាប់ថ្ងៃខាងមុខខ្លាំងណាស់ » ។
ដោយពន្យល់ពី « ការស្តារឡើងវិញ ដែលកំពុងតែបន្ដនេះ ត្រូវការវិវរណៈដែលមានបន្ត » នោះប្រធាន ណិលសុន បានមានប្រសាសន៍ថា ព្រះអម្ចាស់ « កំពុងប្រទានឱកាសដល់យើងម្នាក់ៗ ដើម្បីគាំទ្រគ្រឹះខាងវិញ្ញាណរបស់យើងឲ្យកាន់តែមានប្រសិទ្ធភាព ដោយធ្វើឲ្យជីវិតរបស់យើងផ្ដោតលើទ្រង់ ព្រមទាំងលើពិធីបរិសុទ្ធ និងសេចក្ដីសញ្ញានៃព្រះវិហារបរិសុទ្ធរបស់ទ្រង់ » តាមរយៈការកែសម្រួលនីតិវិធីនៃព្រះវិហារបរិសុទ្ធក្នុងពេលថ្មីៗនេះ និងនៅពេលអនាគត ។
លោកបានមានប្រសាសន៍ថា តាមរយៈការបន្តពិតចំពោះសេចក្តីសញ្ញានៃព្រះវិហារបរិសុទ្ធ « ពេលការរញ្ជួយដីខាងវិញ្ញាណកើតឡើង បងប្អូននឹងអាចឈរ យ៉ាងរឹងមាំ ដោយសារគ្រឹះខាងវិញ្ញាណរបស់បងប្អូនរឹងមាំ ហើយនឹងន » ។
មានពេលវេលាសម្រាប់ព្រះម្ចាស់
នៅអំឡុងការបិទសម័យប្រជុំនៅរសៀលថ្ងៃអាទិត្យ ប្រធាន ណិលសុន បានអង្វរដល់អ្នកចូលរួមឲ្យ « ប្រឆាំងនឹងការល្បួងពីពិភពលោកនេះ តាមរយៈការមានពេលវេលាសម្រាប់ព្រះអម្ចាស់នៅក្នុងជីវិតរបស់បងប្អូន »។
លោកបានមានប្រសាសន៍ថា « សូមធ្វើឲ្យគ្រឹះខាងវិញ្ញាណផ្ទាល់ខ្លួនរបស់បងប្អូនរឹងមាំ ហើយអាចឈរតតាំងនឹងគ្រាសាកល្បង ដោយការធ្វើរឿងទាំងឡាយដែលអនុញ្ញាតឲ្យព្រះវិញ្ញាណបរិសុទ្ធគង់នៅជាមួយបងប្អូន ជានិច្ច » ។
ប្រធាន ណិលសុន បានមានប្រសាសន៍ថា « ប្រសិនបើព័ត៌មានជាច្រើនដែលបងប្អូនបានទទួលមកពីប្រព័ន្ធផ្សព្វផ្សាយសង្គម ឬប្រព័ន្ធផ្សព្វផ្សាយផ្សេងទៀត នោះសមត្ថភាពរបស់បងប្អូនដើម្បីស្តាប់ឮការខ្សឹបប្រាប់ពីព្រះវិញ្ញាណនឹងចុះខ្សោយ » ។
យើងយាងអញ្ជើញព្រះវិញ្ញាណតាមរយៈ « ការកែតម្រូវការផ្តោតអារម្មណ៍របស់បងប្អូនទៅលើព្រះយេស៊ូវគ្រីស្ទ » តាមរយៈការអធិស្ឋាន និងការសិក្សាដំណឹងល្អរាល់ថ្ងៃ ការថ្វាយបង្គំនៅថ្ងៃឈប់សម្រាក ការទទួលទាន សាក្រាម៉ង់ និងមានពេលវេលាសម្រាប់ព្រះអម្ចាស់នៅក្នុងព្រះវិហារបរិសុទ្ធ ។
បន្ទាប់មកប្រធានណិលសុន បានប្រកាសឈ្មោះ ព្រះវិហារបរិសុទ្ធថ្មីចំនួន ១៣ ។
លោកបានបញ្ចប់ថា « ព្រះអម្ចាស់ស្គាល់បងប្អូន និងស្រឡាញ់បងប្អូន » ។ « ទ្រង់ជាព្រះអង្គសង្រ្គោះ និង ព្រះប្រោសលោះរបស់បងប្អូន ។ ទ្រង់ដឹកនាំ និងណែនាំសាសនាចក្ររបស់ទ្រង់ ។ ទ្រង់នឹងដឹកនាំ ហើយណែនាំ បងប្អូន នៅក្នុងជីវិតផ្ទាល់ខ្លួនរបស់បងប្អូន ប្រសិនបើបងប្អូន មានពេលវេលាសម្រាប់ទ្រង់ នៅក្នុងជីវិតរបស់បងប្អូន—ជារៀងរាល់ថ្ងៃនោះ ។