ជាច្រើនឆ្នាំកន្លងទៅ គណៈប្រធានទីមួយបានអញ្ជើញខ្ញុំឲ្យបម្រើនៅក្នុងគណៈកម្មការមួយដែលកំពុងខិតខំស្វែងរកនូវអ្វីមួយដែលសាសនាចក្រអាចធ្វើ ដើម្បីផ្ដល់ពរជ័យយ៉ាងច្រើនដល់ជីវិតមនុស្ស ហើយពង្រឹងដល់សេចក្ដីជំនឿនៃជំនាន់កំពុងពេញវ័យ ។ គណៈកម្មការនេះរួមមានថ្នាក់ដឹកនាំអង្គការជំនួយរបស់សាសនាចក្រ ព្រមទាំងសមាជិកនៃពួកដប់ពីរនាក់ និងពួកអ្នកមានសិទ្ធិអំណាចផ្សេងទៀតផងដែរ ។ មានលទ្ធភាពជាច្រើនដែលត្រូវបានពិចារណា ។ ប៉ុន្តែបន្ទាប់ពីធ្វើការសិក្សាជាច្រើនខែមក គណៈកម្មការនេះបានចេញអនុសាសន៍តែរឿងមួយគត់ ។ រឿងមួយនោះគឺការបន្ថយចុះអាយុនៃការបម្រើជាអ្នកផ្សព្វផ្សាយសាសនា ឲ្យមកត្រឹមអាយុ១៨ ឆ្នាំសម្រាប់យុវជន និង១៩ឆ្នាំសម្រាប់យុវនារី ។
ជាការឆ្លើយតបចំពោះការសិក្សានេះ រួមទាំងវិវរណៈទៅកាន់ព្យាការីរបស់ព្រះផងដែរ គឺប្រធាន ថូម៉ាស អេស ម៉នសុន នោះអាយុសម្រាប់អ្នកផ្សព្វផ្សាយសាសនាត្រូវបានបន្ថយចុះ ហើយមានយុវវ័យរាប់ពាន់នាក់បានឆ្លើយតបចំពោះការហៅឲ្យបម្រើនោះ ។ អំឡុងការបម្រើរបស់អ្នកផ្សព្វផ្សាយសាសនាដែលត្រូវបានហៅឲ្យបម្រើនៅពេលនោះ ហើយនិងការកំពុងបន្តបម្រើរបស់អ្នកដែលបម្រើនៅពេលនេះ ទីបន្ទាល់ និងសេចក្ដីជំនឿរបស់ពួកគេលើព្រះវរបិតាសួគ៌របស់យើង និងព្រះរាជបុត្រារបស់ទ្រង់ គឺព្រះយេស៊ូវគ្រីស្ទ ហើយនៅក្នុងព្រះវិហារដ៏ពិតរបស់ទ្រង់ គឺសាសនាចក្រ នៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ បាននិងកំពុងបន្តពង្រឹង ។ សេចក្តីស្រឡាញ់របស់ពួកគេចំពោះមិត្តភក្តិកាន់តែជ្រាលជ្រៅទៅៗ ។ កូនចៅរាប់សែននាក់របស់ព្រះនៅលើផែនដីទាំងមូលបានទទួលដំណឹងល្អដែលបានស្តារឡើងវិញរបស់ព្រះយេស៊ូវគ្រីស្ទ ហើយបានចុះសេចក្តីសញ្ញាដំបូងរបស់ពួកគេ ដោយការទទួលពិធីបុណ្យជ្រមុជទឹក និងអំណោយទាននៃព្រះវិញ្ញាណបរិសុទ្ធ ។ ការប្តេជ្ញាចិត្តដើម្បីរៀបអាពាហ៍ពិពាហ៍នៅព្រះវិហារបរិសុទ្ធ និងក្រុមគ្រួសារដ៏នៅអស់កល្បជានិច្ច ដែលបានផ្សារភ្ជាប់សម្រាប់ពួកអ្នកផ្សព្វផ្សាយសាសនា និងដល់អស់ជនទាំងឡាយណាដែលពួកគេបានបង្រៀនក៏ត្រូវបានពង្រឹង ហើយបំណងប្រាថ្នារបស់ពួកគេដើម្បីមានភាពសក្តិសមចូលព្រះវិហារបរិសុទ្ធ និងមានក្រុមគ្រួសារដ៏អស់កល្ប និងផ្សារភ្ជាប់ក៏ត្រូវបានពង្រឹងផងដែរ ។ ទាំងអស់នេះគឺជាពរជ័យដែលទទួលបានពីការបម្រើជាអ្នកផ្សព្វផ្សាយសាសនា ។
ប្រធាននៀលសិន បានមានប្រសាសន៍ជាច្រើនអំពី « គន្លងនៃសេចក្តីសញ្ញា » នៃភាពជាសិស្ស ។ នៅពេលថ្លែងសុន្ទរកថាជាលើកដំបូងទៅកាន់សមាជិកនៃសាសនាចក្រ នោះលោកបានមានប្រសាសន៍ថា ៖ « ឥឡូវនេះ ចំពោះសមាជិកនៃសាសនាចក្រ ខ្ញុំសូមប្រាប់ថា ចូរបន្តដើរនៅលើផ្លូវនៃសេចក្តីសញ្ញា ។ ការប្តេជ្ញាចិត្តរបស់បងប្អូនដើម្បីធ្វើតាមព្រះអង្គសង្រ្គោះ តាមរយៈការចុះសេចក្តីសញ្ញាជាមួយទ្រង់ ហើយបន្ទាប់មករក្សាសេចក្តីសញ្ញាទាំងនោះ នោះទ្វារនឹងបើកដល់វិញ្ញាណទាំងឡាយ នូវពរជ័យ និងអភ័យឯកសិទ្ធិដែលមានចំពោះបុរស និងស្រ្តី ហើយនិងកូនចៅនៅគ្រប់ទីកន្លែង » ១ ។
« ផ្លូវ នៃសេចក្តីសញ្ញា » គឺមាននូវសេចក្តីសញ្ញាទាំងឡាយណាដែលយើងបានចុះជាមួយព្រះ ដែលនឹងនាំយើងត្រឡប់ទៅរកទ្រង់វិញ និងទីដែលមានវត្តមានរបស់ទ្រង់ ជាបុគ្គល និងជាក្រុមគ្រួសារ ។ គ្មានអ្វីនៅក្នុងជីវិតរបស់យុវវ័យ ដែលចងភ្ជាប់ពួកគេបន្ថែមទៅនឹងផ្លូវនៃសេចក្តីសញ្ញានេះ ជាងការជ្រើសរើសបម្រើបេសកកម្មដោយស្មោះសរនោះទេ ។
អ្វីៗទាំងអស់នេះបានកើតឡើងនៅក្នុងជីវិតរបស់ខ្ញុំ ។ ការសម្រេចចិត្តដើម្បីលះបង់ពេលវេលាពីរឆ្នាំ ហើយបម្រើបេសកកម្មជូនព្រះអម្ចាស់ បានមានឥទ្ធិពលដ៏ល្អចំពោះខ្ញុំជាងអ្វីៗទាំងអស់ ។ តាមការពិត រឿងល្អៗដែលកើតឡើងនៅក្នុងជីវិតខ្ញុំ គឺជាលទ្ធផលមកពីការសម្រេចិត្តរបស់ខ្ញុំទៅបម្រើបេសកកម្ម ។ កាលនោះនៅអំឡុងបេសកកម្មរបស់ខ្ញុំដែលខ្ញុំបានទទួលសាក្សីដ៏ច្បាស់ ហើយប្រាកដពីព្រះវិញ្ញាណថាព្រះគម្ពីរមរមនគឺពិត ហើយថា យ៉ូសែប ស្ម៊ីធ គឺជាព្យាការីរបស់ព្រះអម្ចាស់នៃការស្តារឡើងវិញ ។ ខ្ញុំបានស្គាល់បំណងដ៏ធំរបស់ខ្ញុំ គឺត្រូវផ្សារភ្ជាប់នឹងភរិយាខ្ញុំ ហើយចិញ្ចឹមបីបាច់គ្រួសារដ៏សុចរិតមួយជាមួយនាង ។ ខ្ញុំបានប្តេជ្ញាចិត្តដើម្បីបម្រើព្រះ និងកូនចៅរបស់ទ្រង់អស់មួយជីវិតខ្ញុំ ។ ខ្ញុំបានចុះសេចក្តីសញ្ញា ជាមួយព្រះថា ខ្ញុំនឹងគោរពតាមព្រះបញ្ញត្តិទ្រង់ ប្រែចិត្ត និងបន្តលើកដាក់លើខ្លួននូវព្រះនាមទ្រង់អស់មួយជីវិតខ្ញុំ ។ ខ្ញុំក៏ចាប់ផ្តើមស្គាល់សេចក្តីស្រឡាញ់ទ្រង់ និងទុកចិត្តលើទ្រង់ ។ ខ្ញុំដឹងថាទ្រង់ស្រឡាញ់កូនចៅរបស់ទ្រង់ ហើយថា « ទ្រង់មិនធ្វើការណ៍ណាឡើយ លើកលែងតែការណ៍នោះមានប្រយោជន៍ដល់មនុស្សលោក ត្បិតទ្រង់ស្រឡាញ់មនុស្សលោកដល់ម្ល៉េះ បានជាទ្រង់ប្តូរជីវិតទ្រង់ផ្ទាល់ ដើម្បីទ្រង់អាចទាញមនុស្សទាំងអស់មករកទ្រង់ » ។២... ខ្ញុំដឹងថាព្រះស្រឡាញ់ខ្ញុំ និងសមាជិកដទៃទៀតរបស់សាសនាចក្រ ហើយថា « ទ្រង់អញ្ជើញ. . .ពួកគេទាំងអស់គ្នាឲ្យមករកទ្រង់ ហើយទទួលទាននូវសេចក្តីល្អសប្បុរសរបស់ទ្រង់ » ។៣ រឿងទាំងអស់នេះធ្វើឲ្យខ្ញុំស្រឡាញ់ព្រះ និងកូនចៅរបស់ទ្រង់កាន់តែខ្លាំង ជាទីដែលខ្ញុំបានទទួលពរដែលបានជួបពួកគេ ។
ទាំងអស់នេះមិនទាន់ចប់នោះទេ ។ កាលនោះនៅអំឡុងបេសកកម្មរបស់ខ្ញុំ ដែលខ្ញុំបានស្គាល់នូវសេចក្តីអំណរនៃការចែកចាយដំណឹងល្អដល់អ្នកដទៃ ។ ខ្ញុំស្រឡាញ់បងប្អូនដែលខ្ញុំបានបង្រៀន ។ សេចក្តីរីករាយជាងគេនៅក្នុងជីវិតខ្ញុំគឺការមើលឃើញកូនចៅរបស់ពួកគាត់ត្រូវបានចិញ្ចឹមបីបាច់នៅក្នុងដំណឹងល្អ ហើយចៅៗរបស់ពួកគាត់ត្រូវបានប្រទានពរជ័យតាមរយៈដំណឹងល្អនៃព្រះយេស៊ូវគ្រីស្ទ ។ មិនមានន័យថា មានតែខ្ញុំស្រឡាញ់មនុស្សដ៏អស្ចារ្យទាំងនេះនោះទេ ប៉ុន្តែពួកគាត់មានសេចក្តីស្រឡាញ់ ហើយបានពង្រឹងខ្ញុំ និងក្រុមគ្រួសារខ្ញុំអស់រយៈពេលប៉ុន្មានឆ្នាំមកនេះ ។
វាជាសាក្សីនិងទីបន្ទាល់របស់ខ្ញុំថា ព្រះអម្ចាស់មានព្រះទ័យចង់ឲ្យកូនប្រុសស្រីរបស់ទ្រង់ជាច្រើនចេញបម្រើបេសកកម្ម ។ មក ហើយចូលរួមជាមួយយើងនៅក្នុងការបម្រើជាអ្នកផ្សព្វផ្សាយសាសានា ។ ពរជ័យនៃការបម្រើជាអ្នកផ្សព្វផ្សាយសាសនាមិនអាចនិយាយបំភ្លើសបានទេ ។ តាមពិតទៅដូចដែលព្រះអម្ចាស់មានព្រះបន្ទូលទៅកាន់យុវវ័យដទៃទៀតដែលកំពុងពិចារណាក្នុងការបម្រើជាអ្នកផ្សព្វផ្សាយសាសនាថា « ហើយឥឡូវនេះ មើលចុះ យើងមានបន្ទូលមកកាន់អ្នកថា ការណ៍ដែលនឹងមានតម្លៃបំផុត ចំពោះអ្នក គឺផ្សាយប្រាប់ពីការប្រែចិត្តដល់ប្រជាជននេះ ដើម្បីឲ្យអ្នកអាចនាំព្រលឹងទាំងឡាយមករកយើង ដើម្បីឲ្យអ្នកអាចសម្រាកជាមួយពួកគេ នៅក្នុងនគរនៃព្រះវរបិតារបស់យើង» ។៤ ...ខ្ញុំសូមថ្លែងជាសាក្សីថា ការជ្រើសរើសទៅបម្រើបេសកកម្មគឺមានតម្លៃបំផុតសម្រាប់អ្នក និងដល់អស់អ្នកដែលអ្នកនឹងបម្រើ ។ ខ្ញុំស្រឡាញ់ព្រះអម្ចាស់ ហើយខ្ញុំមានអំណរគុណជារៀងរហូត ដែលទ្រង់បានអនុញ្ញាតឲ្យខ្ញុំបម្រើបេសកកម្ម និងចាប់ផ្តើមស្គាល់ទ្រង់ តាមរយៈការបម្រើដល់កូនចៅរបស់ទ្រង់ ។
ចំណងជើង ៖ អែលឌើរ ដេវីឌ អេហ្វ. អ៊ីវ៉ានស៍
ចំណាំ ៖
១ រ័សុល អិម ណិលសុន «As We Go Forward Together» Ensign ខែ មេសា ឆ្នាំ ២០១៨
២ នីហ្វៃទី ២ ២៦:២៤
៣. នីហ្វៃទី ២ ២៦:៣៣
៤ គោលលទ្ធិ និងសេចក្តីសញ្ញា ១៥:៦