សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានចេញសេចក្តីថ្លែងការណ៍ដូចតទៅនេះអំពីជំនួយមនុស្សធម៌ចំពោះវិបត្តិនៅអឺរ៉ុបខាងកើត ៖
មនុស្សជាច្រើនកំពុងតែចោទសួរពីរបៀបដែលសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានជួយក្នុងជំនួយមនុស្សធម៌ចំពោះវិបត្តិដែលកំពុងកើនឡើងបណ្តាលមកពីសង្គ្រាមប្រដាប់អាវុធក្នុងពេលបច្ចុប្បន្ននេះ ។ ចាប់តាំងពីវិនាទីដំបូង សាសនាចក្របានចាប់ផ្តើមទាក់ទងមិត្តភក្តិ និងអង្គការជាដៃគូសហការក្នុងស្រុក ដើម្បីវាយតម្លៃលើតម្រូវការ និងទិញស្បៀងអាហារ ព្រមទាំងតម្រូវការផ្សេងៗទៀត ។
តាមរយៈបទពិសោធន៍អស់ជាច្រើនទសវត្សរ៍ក្នុងការផ្តល់ជំនួយអំឡុងពេលមានវិបត្តិដោយគ្រោះធម្មជាតិ វិបត្តិជនភៀសខ្លួន និងជំនួយមនុស្សធម៌ក្នុងវិបត្តិផ្សេងៗទៀត នោះយើងបានបង្កើតគំរូសាកល្បង និងការបង្ហាញដើម្បីមើលឃើញពីតម្រូវការ និងការផ្តល់ជាជំនួយ ។ គំរូនេះរួមមានទាំងការជំរុញដល់ថ្នាក់ដឹកនាំក្នុងមូលដ្ឋានឲ្យប្រើប្រាស់ធនធានហិរញ្ញវត្ថុរបស់សាសនាចក្រដើម្បីទិញទំនិញ និងសេវាកម្មនានាពីអាជីវកម្មក្នុងមូលដ្ឋាន ដើម្បីឆ្លើយតបចំពោះតម្រូវការពិតប្រាកដ ។
ដោយធ្វើតាមលំនាំនេះ គណៈប្រធានតំបន់អឺរ៉ុបកំពុងធ្វើការជាមួយក្រុមការងារនៅទីស្នាក់ការកណ្តាលរបស់សាសនាចក្រដើម្បីកំណត់ និងដោះស្រាយទៅតាមតម្រូវការទាំងឡាយ ។ គ្រឿងបរិក្ខារជួយសង្គ្រោះ— រួមមាន មុង បៅអ៊ីបត់ និងតង់ — កំពុងតែបញ្ជូនទៅកាន់ភ្នាក់ងាររដ្ឋាភិបាលក្នុងមូលដ្ឋាន កាកបាទក្រហម និងអង្គការផ្សេងៗទៀត ដែលកំពុងដោះស្រាយដល់វិបត្តិជនភៀសខ្លួនអ៊ុយក្រែនដែលបានធ្វើដំណើរមកដល់ព្រំដែនប្រទេសជិតខាង។ ជំនួយបន្ថែមទៀតកំពុងបានរៀបចំបន្ត ។ សមាជិកសាសនាចក្រ និងមិត្តភក្តិទាំងឡាយក៏ត្រូវបានអញ្ជើញឲ្យតមអាហារ និងអធិស្ឋានសម្រាប់មនុស្សទាំងឡាយដែលរងគ្រោះយ៉ាងខ្លាំងពីសង្គ្រាមនេះ។ មនុស្សជាច្រើនទៀតនឹងចែកចាយអំពីការខិតខំរបស់ពួកគេនៅក្នុងប៉ុន្មានថ្ងៃ និងប៉ុន្មានសប្តាហ៍ទៀតខាងមុខនេះ ។
សមាជិកទាំងឡាយនៃសាសនាចក្រនៅជុំវិញពិភពលោកបានសាកសួរពីរបៀបដើម្បី ជួយ ឬបរិច្ចាគ ។ យើងសូមអញ្ជើញពួកគេឲ្យជួយតាមរយៈមូលនិធិជំនួយមនុស្សធម៌របស់សាសនាចក្រ ដែលនឹងត្រូវយកមកប្រើប្រាស់ដើម្បីដោះស្រាយចំពោះវិបត្តិនេះ និងវិបត្តិផ្សេងៗទៀត៕