ចាប់ពីខែ មករា ឆ្នាំ២០២១ យុវវ័យនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនឹងទទួលបានទស្សនាវដ្តីថ្មីមួយនិយាយតែអំពីយុវវ័យប៉ុណ្ណោះដែលវានឹងត្រូវបកប្រែ ហើយផ្ញើទៅកាន់ប្រទេសប្រហែលជា ១៥០ ប្រទេស ជាប្រចាំ ។
នេះគឺជាលើកដំបូងហើយដែលយុវវ័យយ៉ាងច្រើន ( អាយុ ១១–១៨ ឆ្នាំ ) រស់នៅក្រៅពីប្រទេសដែលនិយាយភាសាអង់គ្លេសនឹងអាចជាវទស្សនាវដ្តីមួយដែលមានសារជាពិសេសៗចំពោះពួកគេ ។ មាតិកានឹងមានសារលិខិតដែលបានសរសេរដោយព្យាការី សាវក និងថ្នាក់ដឹកនាំសាសនាចក្រផ្សេងៗ ក៏ដូចជាទីបន្ទាល់ និងបទពិសោធន៍ទាំងឡាយមកពីសមាជិកជាយុវវ័យនៅជុំវិញពិភពលោកផងដែរ ។
ដោយមានយុវវ័យជាគោលជាអ្នកអានទស្សនាវដ្តីនេះ នោះគោលលទ្ធិ ដំណើររឿង និងអត្ថបទទាំងអស់នឹងត្រូវបានរៀបចំ និងបោះពុម្ពផ្សាយដោយគិតដល់តម្រូវការរបស់ពួកគេផ្ទាល់ ។ យុវវ័យនឹងអាចមើលឃើញយុវវ័យដូចជាពួកគេចូលរួមយ៉ាងសកម្មជាមួយនឹងដំណឹងល្អ ហើយស្វែងរកដំណោះស្រាយចំពោះបញ្ហារបស់ពួកគេជាមួយនឹងការបង្រៀនរបស់ព្រះយេស៊ូវគ្រីស្ទផងដែរ ។
បើទោះជាទស្សនាវដ្តី « ដើម្បីកម្លាំងនៃយុវជន » នឹងមានលក្ខណៈខ្លីជាងទស្សនាវដ្តីមុនៗដែលមានតែជាភាសាអង់គ្លេសដូចជាទស្សនាវដ្តី « New Era » ជាដើមក្តី ក៏ការកាត់បន្ថយទំព័រនេះនឹងធ្វើឲ្យទស្សនាវដ្តីនេះអាចត្រូវបានបោះពុម្ពជា ៤៨ ភាសាផងដែរ ។ ទស្សនាវដ្តីនេះក៏នឹងមានមាតិកាឌីជីថលបន្ថែមនៅលើបណ្ណាល័យដំណឹងល្អ និង កម្មវិធីការរស់នៅតាមដំណឹងល្អ នៅលើបណ្តាញសង្គម និងនៅលើគេហទំព័រទស្សនាវដ្តីផងដែរ ។ ស្របជាមួយនឹងបំណងរបស់សាសនាចក្រ ដើម្បីឲ្យមានលក្ខណៈកាន់តែសកល ឥឡូវនេះអ្នកអានកាន់តែច្រើនដែលមិនធ្លាប់មានពីមុនមកនឹងអនុញ្ញាតឲ្យចូលទៅអានដំណើររឿងពិតៗអំពីយុវវ័យដែលបានសរសេរនៅតាមបណ្តាលប្រទេសមួយចំនួនដូចជា ស៊ីមបាវ៉េ បារាំង ថៃ និងជាច្រើនទៀត ។
ប្រធាន ស្ទីវិន ជេ. ឡាន់ នៃគណៈប្រធានយុវជនទូទៅបានមានប្រសាសន៍ថា ឥឡូវនេះវាសំខាន់ជាងពេលណាៗទាំងអស់ដែលត្រូវផ្តល់នូវមាតិកាលើកតម្កើងជាលក្ខណៈសកលមួយ ។
ប្រធាន ឡាន់បានមានប្រសាសន៍ថា « យើងបានដឹងបានឭគ្រប់បែបគ្រប់បទនៃរឿងខាងលោកិយកាន់តែច្រើនឡើងៗ ដែលរឿងរ៉ាវជាច្រើននឹងទាញយើងចេញពីព្រះអង្គសង្គ្រោះ និងពីអ្វីដែលសំខាន់បំផុត។ » « យើងពិតជាត្រូវការដាក់គុណធម៌ជាទីមួយ និងជាផ្នែកដ៏សំខាន់នៅក្នុងជីវិតរបស់យើង—ជារឿងរ៉ាវដែលនឹងរំឮកយើងថាយើងគឺជានរណា និងពីអ្វីដែលជាការសន្យារបស់យើង ។ ខ្ញុំសង្ឃឹមថាជារៀងរាល់ថ្ងៃ យុវវ័យគ្រប់រូបនៅក្នុងសាសនាចក្រនឹងរកឃើញអ្វីមួយដូចជាទស្សនាវដ្តី ‹ ដើម្បីកម្លាំងនៃយុវជន › ដើម្បីបើកផ្នត់គំនិតរបស់ពួកគេ ហើយទទួលបានការបំផុសគំនិត ឲ្យធ្វើអំពើល្អ » ។
ការស្វែងរកអំណរនៅក្នុងព្រះគ្រីស្ទ
ទស្សនាវដ្តី « ដើម្បីកម្លាំងនៃយុវជន » នឹងព្យាយាមស្អាងមនុស្សវ័យក្មេងជាមួយនឹងចំណងជើងរបស់ទស្សនាវដ្តីនេះ ៖ « ការស្វែងរកអំណរនៅក្នុងព្រះគ្រីស្ទ » តាមរយៈទំព័រដែលមានពណ៌ចម្រុះចំនួន ៣២ សន្លឹក របស់ទស្សនាវដ្តីនេះ ។
ទោះបីជាការជជែកវែកញែក និងការពិភាក្សាជាច្រើនបានផ្តោតលើចំណងជើងនៃទស្សនាវដ្តីនេះក៏ដោយ ក៏ទីបំផុតចំណងជើងនេះត្រូវបានគេជ្រើសរើសដោយសង្ឃឹមថា បំផុសឲ្យយុវវ័យរៀន និងរីកចម្រើនតាមរយៈដំណឹងល្អរបស់ព្រះយេស៊ូវគ្រីស្ទខណៈដែលកំពុងរីករាយនឹងដំណើរការនេះ ។
ប្រធាន ឡាន់ បានមានប្រសាសន៍ថា « សាតាំងធ្វើបានល្អណាស់ក្នុងការលាបពណ៌សាសនាថាជារឿងមួយបែបមិនសំខាន់ នៅពេលដែលការពិតសាសនារបស់យើងគឺជារឿងដ៏សំខាន់បំផុតនៅលើផែនដី ។ វានាំឲ្យយើងឃើញយ៉ាងច្បាស់នូវហេតុផលដែលយើងកើតមកក្នុងជីវិតនេះ ។ ការសន្យារបស់ទស្សនាវដ្តីនេះគឺថា វានឹងអាចបង្ហាញថាមានការតភ្ជាប់គ្នារវាងអំណរ និងសុភមង្គលក្នុងជីវិត និងភាពស្មោះត្រង់របស់យើងទៅនឹងដំណឹងល្អ ។
អ្វីដែលត្រូវរំពឹង
ទស្សនាវដ្តី « ដើម្បីកម្លាំងនៃយុវជន » នឹងត្រូវបានផ្សព្វផ្សាយទូទាំងពិភពលោក ហើយនៅក្នុងទស្សនាវដ្តីនេះនឹងមានសារលិខិតដ៏ពិសេស និងដូចគ្នាទាំងអស់ ផ្ញើ ទៅកាន់សមាជិកយុវវ័យនៃសាសនាចក្រ — មិនថានៅស្រុកកំណើត ឬតំបន់ណាឡើយ ។ ប្រធាន ឡាន់ បានមានប្រសាសន៍ថា ទោះបីជារៀងរាល់ខែនឹងមាននូវការភ្ញាក់ផ្អើលខុសគ្នាបន្តិចបន្តួចក្ដី ក៏ទស្សនាវដ្តីនេះនឹងមានវគ្គដូចគ្នាដដែលៗដែលអ្នកអានអាចរំពឹងជាប្រចាំផងដែរ ។
សារលិខិតមកពីថ្នាក់ដឹកនាំនៃសាសនាចក្រ
ពួកអ្នកកាន់តំណែងទូទៅនឹងមានឱកាសមួយចំនួនដើម្បីថ្លែងពីបញ្ហាសព្វថ្ងៃនេះ និងផ្តល់ដំបូន្មានមានប្រយោជន៍ដែលអាចអនុវត្តនៅក្នុងជីវិតរបស់សមាជិកជាយុវវ័យនៃសាសនាចក្របាន ។ អ្នកអាននឹងទទួលបានការយល់ដឹងផ្ទាល់ខ្លួនអំពីប្រធានបទដែលនឹងជាដំណើររឿងក្នុងច្បាប់នីមួយៗ ។ តាមរយៈការអានដំបូន្មាន និង ការណែនាំពីថ្នាក់ដឹកនាំសាសនាចក្រ នោះយុវវ័យនឹងអាចទទួលបានកម្លាំង ទទួលការណែនាំ និងទទួលអារម្មណ៍នៃក្ដីស្រឡាញ់របស់សមាជិកគណៈប្រធានសាសនាចក្រ កាលដែលពួកគេផ្តោតលើមាតិកាដែលត្រូវបានបង្កើតជាពិសេសសម្រាប់ពួកគេនោះ ។
មាតិកាដ៏បំផុសគំនិតរបស់យុវវ័យ
យុវវ័យនៃសាសនាចក្រផ្ទាល់នឹងចូលរួមយ៉ាងខ្លាំងក្លាក្នុងការបង្កើតមាតិកាដែលពួកគេឃើញនៅក្នុងទស្សនាវដ្តី « ដើម្បីកម្លាំងនៃយុវជន » ។ អ្នកអានអាចរំពឹងនូវបទពិសោធន៍ផ្ទាល់ខ្លួនពីយុវវ័យនៅជុំវិញពិភពលោក ដែលឆ្លើយតបនឹងបញ្ហាសម័យថ្មី សំណួរ និងភាពច្របូកច្របល់ខាងវិញ្ញាណ ។
ប្រធាន ឡាន់ បានមានប្រសាសន៍ថា លោករំភើបណាស់សម្រាប់យុវវ័យដើម្បីផ្សារភ្ជាប់ជាមួយដំណើររឿងពិតរបស់សមាជិកវ័យក្មេងនៃសាសនាចក្រ នៅពេលពួកគេអានអំពីរបៀបដែលអ្នកដទៃទៀតកំពុងស្វែងរក ហើយចែករំលែកអំណរនៅក្នុងព្រះគ្រីស្ទ ខណៈដែលកំពុងគ្រប់គ្រងកង្វល់ដ៏ធំនៃលោកិយនាពេលខ្លះនោះ ។
« យើងទាំងអស់គ្នាត្រូវបានផ្តល់អំណាច និងលើកទឹកចិត្តដោយជំនឿ និងភាពក្លាហានរបស់មនុស្សដែលមានអាយុ ស្ថានភាព និងកាលៈទេសៈដូចគ្នានឹងយើង ។ យើងព្យាយាមស្តាប់មនុស្សគ្រប់គ្នា ប៉ុន្តែនរណាដែលមើល និងគិតដូចយើង— ហើយដកពិសោធន៍ដូចអ្វីដែលយើងដកពិសោធន៍— វាហាក់ដូចជាទាក់ទងនឹងយើងច្រើនជាង ។ លោកបានមានប្រសាសន៍ថា យើងអាចផ្សារភ្ជាប់ទៅនឹងដំណើររឿង និងឧទាហរណ៍ទាំងនោះបានល្អប្រសើរជាង » ។
ការអនុវត្តន៍តាមការបង្រៀន
ខណៈពេលដែលទស្សនាវដ្តីនឹងជួយពង្រឹងទីបន្ទាល់របស់មនុស្សគ្រប់គ្នាដែលអានទស្សនាវដ្តីនេះ នោះវាក៏នឹងផ្តល់នូវឧទាហរណ៍ដែលបង្ហាញពីរបៀបដែលយុវវ័យនៃសាសនាចក្រកំពុងពង្រឹងដល់អ្នកដែលនៅជុំវិញពួកគេតាមមូលដ្ឋានផងដែរ ។
ប្រធាន ឡាន់ បានប្រសាសន៍ថា « នៅពេលប្រធាន ណិលសុន អញ្ជើញយុវវ័យឲ្យចូលរួមក្នុងពលទ័ពរបស់ព្រះអម្ចាស់ នោះវាមិនចាំបាច់ថាទាល់តែបានដើរក្បួនលើទឹកដីបរទេសដើម្បីជួយសង្គ្រោះអ្នកដទៃនោះទេ វាក៏មានន័យថាជាការជួយសង្គ្រោះគ្នាទៅវិញទៅមកផងដែរ » ។ « ការងារដំបូងរបស់ទាហានគឺជាការការពារជនរួមជាតិ និងទាហានក្នុងក្រុមរបស់គាត់ ។ ទស្សនាវដ្តីនេះនឹងជួយចង្អុលបង្ហាញយើងពីគ្នាទៅវិញទៅមក និងបង្ហាញពីឱកាសដែលយើងអាចបម្រើព្រះវរបិតាសួគ៌ នៅក្នុងផ្ទះ នៅក្នុងគ្រួសារ និងនៅក្នុងកូរ៉ុម ហើយនិងនៅក្នុងថ្នាក់រៀនរបស់យើងផ្ទាល់ » ។
« ចូរមកតាមខ្ញុំ »
ចាប់ពីខែមករានេះ អ្នកអានអាចសង្ឃឹមទទួលបានអត្ថបទ និងដំណើររឿងដែលបំពេញអ្វីដែលពួកគេកំពុងរៀននៅក្នុងសៀវភៅ « ចូរមកតាមខ្ញុំ » ។ មាតិកានេះមិនត្រឹមតែអាចលើកទឹកចិត្តពួកគេឲ្យធ្វើតាមការបំពេញការបង្រៀនផ្តោតលើគេហដ្ឋានដែលជួយគាំទ្រដោយសាសនាចក្រប៉ុណ្ណោះនោះទេ ប៉ុន្តែវាក៏នឹងផ្តល់ឲ្យពួកគេមើលឃើញនូវរបៀបដែលពួកគេអាចអនុវត្តតាមប្រធានបទនៅក្នុងជីវិតប្រចាំថ្ងៃរបស់ពួកគេផងដែរ ។
មាតិកាឌីជីថល
យុវវ័យក៏អាចរំពឹងថាមានឯកសារដែលអាចរកបាននៅលើអនឡាញផងដែរ ។ អត្ថបទឌីជីថលក៏នឹងមានដំណើររឿង និងទស្សនវិស័យដែលនឹងពង្រឹងដល់សារលិខិតនេះនៅក្នុងច្បាប់ប្រចាំខែនោះ ។ អ្នកដែលចាប់អារម្មណ៍ក្នុងការចូលមើលមាតិកាឌីជីថលអាចរកបាននៅក្នុងកម្មវិធីបណ្ណាល័យដំណឹងល្អ ឬតាមអនឡាញនៅលើគេហទំព័រ ChurchofJesusChrist.org ។
លើសពីនេះទៅទៀត មាតិការបស់យុវវ័យអាចរកបាននៅលើប៉ុស្ដិ៍ Instagram យុវវ័យរបស់សាសនាចក្រ @StriveToBe ( @ព្យាយាមប្រែក្លាយ ) និងកម្មវិធីការរស់នៅតាមដំណឹល្អ ។
« អ្នកអាចទទួលបានព្រះវិញ្ញាណយ៉ាងងាយស្រួលនៅក្នុងទស្សនាវដ្តីយុវវ័យនេះ ។ ប្រធាន ឡាន់ បានបន្តថា ខ្ញុំពិតជារំភើបណាស់ដែលគោលលទ្ធិដ៏អស់កល្បជានិច្ចដែលនាំមកនូវអំណរដល់យើង ដែលវាបានកើតមានឡើងនៅក្នុងគំនិតនៃមនុស្សវ័យក្មេងរបស់យើង » ។ « ទស្សនាវដ្តី ‹ ដើម្បីកម្លាំងនៃយុវជន › នឹងផ្តល់ជូនការតម្កើងដែលយើងបានឃើញមាននៅក្នុងច្បាប់ចេញផ្សាយមុនៗ ប៉ុន្តែវាមានលក្ខណៈប្រសើរជាងមុន – នឹងកាន់តែងាយស្រួលដល់យុវវ័យជាច្រើនតាមបណ្តាកន្លែងជាច្រើន ហើយដឹកនាំកាន់តែប្រសើរជាងមុន និងផ្តោតយកចិត្តទុកដាក់កាន់តែប្រសើរជាងមុនអំពីការបង្ហាញទំនាក់ទំនងរវាងការរស់នៅតាមដំណឹងល្អ និងសុភមង្គល » ។
ការជាវទស្សនាវដ្តី « ដើម្បីកម្លាំងនៃយុវជន »
ដើម្បីជាវទស្សនាវដ្តី « ដើម្បីកម្លាំងនៃយុវជន » ចេញថ្មីនេះ សូមចូលទៅគេហទំព័រ store.ChurchofJesusChrist.org ។
ធនធានបន្ថែមទាំងឡាយ
ទស្សនាវដ្តីសាសនាចក្រនឹងមានការផ្លាស់ប្តូរនៅក្នុងឆ្នាំ ២០២១
ទស្សនាវដ្ដី ‹ លីអាហូណា › ផ្តល់ជូនសារលិខិតជាសាកលដល់សាសនាចក្រទូទាំងពិភពលោក