គណៈប្រធានទីមួយ និងកូរ៉ុមនៃពួកសាវកដប់ពីរនាក់នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានអនុញ្ញាតឲ្យមានការត្រឡប់មកកាន់កម្មវិធីថ្វាយបង្គំ និងសកម្មភាពខាងជំនឿប្រចាំសប្ដាហ៍វិញខ្លះៗតាមដំណាក់កាល ។ ការជូនដំណឹងមួយបានផ្ញើចេញនៅថ្ងៃទី ១៩ ខែឧសភា ទៅកាន់ថ្នាក់ដឹកនាំទូទៅ និងថ្នាក់ដឹកនាំក្នុងមូលដ្ឋានទូទាំងពិភពលោកថា ការណ៍នេះអាចត្រូវបានធ្វើឡើងបាន តែនៅពេលច្បាប់រដ្ឋាភិបាលក្នុងស្រុកអនុញ្ញាតឲ្យ និង បន្ទាប់ពីគណៈប្រធានតំបន់ផ្ដល់នូវការណែនាំបន្ថែមទៅកាន់ថ្នាក់ដឹកនាំសាសនាចក្រក្នុងមូលដ្ឋានតែប៉ុណ្ណោះ ។
មធ្យោបាយជាដំណាក់កាលពីរនឹងត្រូវប្រើប្រាស់ ប៉ុន្តែត្រូវធ្វើតាមច្បាប់របស់រដ្ឋាភិបាលជានិច្ច ដើម្បីប្រាកដថាអស់អ្នកដែលចូលរួមពាក់ព័ន្ធមានសុខភាពល្អ និងសុវត្ថិភាព ។ គំរូខាងក្រោមអាចនឹងមានការកែសម្រួលដោយគណៈប្រធានតំបន់តាមដែលស្ថានភាពក្នុងស្រុកតម្រូវការ ព្រមទាំងដូចដែលបានអនុមតិតាមការទំនាក់ទំនងរបស់ពួកគាត់នឹងកូរ៉ុមនៃពួកដប់ពីរនាក់ និងគណៈប្រធានចិតសិបនាក់ ។ ប្រធានស្តេក ដោយមានការប្រឹក្សាជាមួយនឹងប៊ីស្សព នឹងកំណត់អំពីពេលវេលាជាក់លាក់សម្រាប់ការមានការប្រជុំ និងសកម្មភាពជាថ្មីម្ដងទៀត ។
កម្មវិធីថ្វាយបង្គំនៅថ្ងៃឈប់សម្រាក ៖ ដំណាក់កាលទី ១
ការប្រជុំខ្លីនៅក្នុងសាលាប្រជុំដែលមានមនុស្សចូលរួមដល់ទៅ ៩៩ នាក់ ត្រូវធ្វើតាមច្បាប់របស់រដ្ឋាភិបាលក្នុងមូលដ្ឋាន ។
ការប្រជុំ និងសកម្មភាពដទៃទៀត ( រួមមានទាំងអាពាហ៍ពិពាហ៍ និងពិធីបុណ្យសព ) ៖ ដំណាក់កាលទី ១
ការប្រជុំខ្លី ត្រូវធ្វើតាមច្បាប់របស់រដ្ឋាភិបាលក្នុងមូលដ្ឋាន ឬអាចនឹងធ្វើឡើងតាមបច្ចេកវិទ្យាមើលពីចម្ងាយ ។
កម្មវិធីថ្វាយបង្គំនៅថ្ងៃឈប់សម្រាក ៖ ដំណាក់កាលទី 2
ការប្រជុំនៅក្នុងសាលាប្រជុំដែលមានមនុស្ស ១០០ នាក់ ឬច្រើនជាងនោះ សូមធ្វើតាមច្បាប់របស់រដ្ឋាភិបាលក្នុងមូលដ្ឋាន ។
ការប្រជុំ និងសកម្មភាពដទៃទៀត ៖ ដំណាក់កាលទី 2
ការប្រជុំនៅសាលាប្រជុំ អាចនឹងធ្វើឡើងតាមច្បាប់របស់រដ្ឋាភិបាលក្នុងមូលដ្ឋាន ។
គណៈប្រធានទីមួយមានប្រសាសន៍ថា ៖ « យើងមានអំណរគុណចំពោះសេចក្ដីជំនឿរបស់សមាជិកយើង នៅពេលពួកគេបានថ្វាយបង្គំនៅក្នុងផ្ទះ និងមានអំណរគុណចំពោះពរជ័យនានាដែលនឹងកើតមានមក នៅពេលយើងជួបជុំគ្នាថ្វាយបង្គំ និងមានសកម្មភាពទាំងឡាយ » ។
សេចក្តីណែនាំទូទៅ
ថ្នាក់ដឹកនាំសាសនាចក្រ ត្រូវបានណែនាំឲ្យពិគ្រោះគ្នាអំពីលិខិតរបស់គណៈប្រធានទីមួយចុះថ្ងៃទី ១៦ ខែមេសា ឆ្នាំ ២០២០ « គោលការណ៍គ្រប់គ្រងនៅក្នុងគ្រាមានឧបសគ្គ » និងឯកសារភ្ជាប់ពីរទៀត ( សូមមើលនៅត្រង់នេះ និងត្រង់នេះ ) ។ ពួកគេក៏ត្រូវបានអញ្ជើញឲ្យពិចារណាអំពីគោលការណ៍ និងការណែនាំបន្ថែមទាំងនេះ ដើម្បីបន្ដការពារពីការរាតត្បាតនៃកូវីត ១៩ ៖
- សូមមានការប្រុងប្រយ័ត្នខ្ពស់នៅក្នុងការការពារដល់សុខភាព និងសុវត្ថិភាពរបស់សមាជិក ។ សូមយកចិត្តទុកដាក់ជាពិសេសចំពោះសមាជិកដែលមានសុខភាព ឬវ័យដែលប្រឈមនឹងហានិភ័យខ្ពស់ ។
- សូមផ្ដល់ដំបូន្មានដល់បុគ្គលម្នាក់ៗដែលពុំមានសុខភាពល្អ ឬដែលត្រូវបានដាក់ឲ្យនៅដាច់ដោយឡែកពីគេ ឬដែលបង្ហាញថាមានរោគសញ្ញាដូចតទៅនេះ ថាពួកគេពុំគួរចូលរួមការប្រជុំឡើយ ដូចជា ៖ ក្ដៅខ្លួន ក្អក ដកដង្ហើមហត់ៗ ឈឺក្បាល ហៀរសំបោរ ឬឈឺបំពង់ក ។
- សូមធ្វើតាមការអនុវត្តឲ្យនៅគម្លាតគ្នា ការលាងដៃ និងការអនុវត្តផ្សេងៗទៀតដែលពិពណ៌នានៅក្នុង « រង្វាស់នៃការការពារសម្រាប់សមាជិក » ។
- សូមធ្វើតាមច្បាប់រដ្ឋាភិបាលក្នុងទីតាំងនីមួយៗទាក់ទងទៅនឹងការជួបជុំជាសាធារណៈ រួមទាំងទំហំនៃការជួបជុំ ភាពញឹកញាប់ និងរយៈពេល ។ សូមអនុវត្តតាមច្បាប់រដ្ឋាភិបាល ។
- សូមត្រឡប់មកកាន់ការអនុវត្តជាទៀងទាត់របស់យើងដោយសន្សឹមៗ បន្ដដំណើរការដោយប្រើបច្ចេកវិទ្យាខណៈដែលការជួបដោយផ្ទាល់ស្ថិតនៅក្នុងដំណាក់កាលដូចបានពិពណ៌នាដូចខាងក្រោម ។ អាទិភាពសម្រាប់ការជួបជុំដោយផ្ទាល់ គួរតែផ្ដល់ឲ្យចំពោះការប្រជុំដែលពិធីការត្រូវធ្វើឡើង ដូចជាពិធីបុណ្យជ្រមុជទឹក និងការប្រជុំសាក្រាម៉ង់។
សេចក្ដីជូនដំណឹងទៅកាន់ថ្នាក់ដឹកនាំផ្ដល់នូវការណែនាំបន្ថែមអំពីការនៅគម្លាតពីគ្នា អ្វីដែលត្រូវធ្វើនៅពេលសមាជិកកាន់តែច្រើនចង់ចូលរួមក្នុងការប្រជុំ របៀបដើម្បីគ្រប់គ្រងពហុក្រុមជំនុំនៅក្នុងសាលាប្រជុំ ទម្រង់ការអនាម័យត្រឹមត្រូវ ការធ្វើពិធីសាក្រាម៉ង់ដោយសុវត្ថិភាព និងអ្វីៗជាច្រើនទៀត ។ សូមអានព័ត៌មានលម្អិតនៅក្នុងសេចក្ដីជូនដំណឹងទាំងស្រុង ។